1. Anto ray agawa nen 66 C.E.? (Nengnengen so litratod gapo na artikulo.)

IMADYIN mo pa ya sakey kan Kristiano ya manaayam ed Jerusalem nen 66 C.E. Dakel lay agawgawa. Unona, sinamsam na Romanon gobernador ya si Florus so 17 a talento diad sagradon kaban na templo. Lapud satan, nanrebelde iray Judio, pinapatey da ray sundalo na Roma ed Jerusalem tan inyabawag dan independente la rad Roma. Balet kinmiwas a tampol so Roma. Kayari taloy bulan, 30,000 ya sundalo so linmad Jerusalem, ya indaulo na Romanon gobernador ed Syria ya si Cestius Gallus. Akaloob iran tampol ed kaliberliber na Jerusalem kanian saray rebelden Judio et inmamot diad templo. Ag-abayag, dineral na saray sundalo na Roma so padir na templo! Natatakot a maong iray manaayam ed interon syudad. Anto kasi naliliknam legan mon nanenengneng iraya?

2. Antoy kaukolan ya gawaen na saray Kristiano nen 66 C.E., tan panon a nagmaliw a posible itan?

² Seguradon nanonotan mo imay impasakbay nen Jesus ya walad Ebanghelyo nen Lucas: “Sano nanengneng yo so Jerusalem  ya apaliberan lay mankakampo iran armada, amtaen yo a magano lay pakaderal to.” (Luc. 21:20) Inyarum ni nen Jesus: “Kanian saramay walad Judea et ombatik la ed kapalandeyan, tan saramay walad loob na Jerusalem et ontaynan la, tan saramay walad kaumaan et agla ra onloloob ditan.” (Luc. 21:21) Balet ompan nitepet mo: ‘Panon kon naunor iratan ya instruksion?’ Singa imposible so makatakas ta apaliberan na saray sundalo so syudad. Balet, walay makapakelaw ya agawa. Anengneng mon onaatras iray sundalo na Roma! Antam ya impasakbay la nen Jesus ya say iyataki da et “napatikeyan.” (Mat. 24:22) Kanian wala lay pankanawnawam ya unoren so instruksion to. Tampol mon tinaynan so Jerusalem tan binmatik kad kapalandeyan diad basil na Ilog Jordan, kaiba iray matoor ya Kristiano ya walad syudad tan ed arum nin lugar. * Insan nen 70 C.E., inmataki lamet iray sundalo na Roma ed Jerusalem tan dineral da itan. Balet akaliktar ka lapud inunor moy instruksion nen Jesus.

3. Antoy asingger met lan naeksperiensya na saray Kristiano, tan antoy aralen tayo ed sayan artikulo?

³ Asingsingger tayo met lan naeksperiensya so ontan ya situasyon. Aglabat pinasakbayan nen Jesus iray Kristiano nipaakar ed pakaderal na Jerusalem. Inusar to met iratan ya ebento nen inmunan siglo pian ipanengneng iray nagawa diad “baleg a kairapan.” (Mat. 24:3, 21, 29) Balet walay maong a balita. “Sakey a baleg ya ulop” so makaliktar ed sayan kadederal ya nagawad interon mundo. (Basaen so Apocalipsis 7:9, 13, 14.) Antoy ibabaga na Biblia nipaakar ed sarayan asingger lan nagawa? Kaukolan ya amtaen tayoy ebat ta nalalanor so mismon bilay tayo. Aralen tayo sirin no antoy epekto na sarayan nagawa ed sikatayo.

4. Antoy sinyales na igapoy baleg a kairapan, tan panon itan ya nagawa?

⁴ Panon ya onggapo so baleg a kairapan? Ibabaga na libro na Apocalipsis ya onggapo itan diad kaderal na “Makapanyarin Babilonia.” (Apo. 17:5-7) Dugaruga may kuan na Biblia ya say amin a palson relihyon et singa imoral a bii! Aliling to et akirelasyon iray pari o pastor da ed saray manuley na sayan mauges ya mundo. Imbes ya suportaan day Jesus tan say Panarian to, say sinuportaan da et saray totoon manuley tan inkompromiso da ray bangat na Biblia pian nawalaan iray pakayari ed politika. Baleg so pidumaan dad saray alanaan ya lingkor na Dios ya inkomparad masimpit a birhen. (2 Cor. 11:2; Sant. 1:27; Apo. 14:4) Siopa balet so maneral ed Makapanyarin Babilonia? Iyan nen Jehova a Dios “so walad kanonotan to” diad kapusoan na “samploran saklor” na “ambalbalangan atap ya ayep.” Irerepresenta na sarayan saklor so amin a kaplesan ya politikal a pakayari ya onsusuportad United Nations, say organisasyon ya irerepresenta na “ambalbalangan atap ya ayep.”—Basaen so Apocalipsis 17:3, 16-18.

5, 6. Akin ya nibaga tayon ag-ompatey so amin ya membro na saray palson relihyon sano deralen lay Makapanyarin Babilonia?

⁵ Balet kasin isipen tayo ya no naderal iray relihyon na Makapanyarin Babilonia et ompatey met so amin ya membro na saratan ya relihyon? Andi. Pinuyanan si propetan Zacarias pian isulat no antoy nagawa. Oniay nabasa ed salaysay nipaakar ed sakey ya datin membro na palson relihyon: ‘Ikuan to, Aliwa ak a propeta, ondadalos ak na dalin, ta naaripen ak manlapu lad inkaugaw ko.  Tan no walay mangibagad sikato, Anto rayay sugat ed taklay mo? Et onebat, Nalak irayan sugat ko diad abung na saray kaarok.’ (Zac. 13:4-6) Kanian, nayarin anggan saray pari o pastor da et agla magmaliw ya relihyoso tan agda aminen ya dati iran membro na palson relihyon.

⁶ Antoy nagawa ed totoo na Dios ed satan ya panaon? Imbaga nen Jesus: “Diad tua, no agnapatikeyan iratan ya agew, anggapo so laman a nisalba; balet nisengeg ed saramay pinili, saratan ya agew so napatikeyan.” (Mat. 24:22) Singa naaralan tayo la, samay kairapan ya agawa nen 66 C.E. et ‘apatikeyan.’ Kanian “saramay pinili,” saray alanaan ya Kristiano, et walay pankanawnawa dan taynan so syudad tan ombatik ed kapalandeyan. Ontan met so nagawa ed arapen. Say unonan parte na baleg a kairapan et “napatikeyan” lapud “saramay pinili.” Ag-abuloyan na Dios ya deralen na “samploran saklor” so totoo To. Imbes, diad antikey a panaon et niwalay kareenan.

7, 8. Antoy sarag tayon paneknekan sano aderal la iray palson relihyon, tan akin ya nibagan duma iray lingkor na Dios diad satan a panaon?

⁷ Antoy nagawa no aderal la ray palson relihyon? Panaon itan pian nipanengneng tayo no anton talaga so walad puso tayo. Say karaklan et manmatalek ed saray organisasyon na totoo ya nikomparad “angkakabaleg a bato ed kapalandeyan.” (Apo. 6:15-17) Say totoo na Dios balet et ombatik ed simbolikon salimbengan ya itarya nen Jehova. Nen ‘apatikeyan’ so kairapan nen 66 C.E., ag-iman panaon ya kombertien so dakel ya Judio pian magmaliw iran Kristiano. Imbes, panaon iman pian onkiwas tan ontulok iramay Kristiano la. Ontan met ed arapen. Agtayo iisipen ya diad panaon ya ‘apatikeyan’ so baleg a kairapan et ondakel so balon mananisia. Imbes, panaon itan pian paneknekan na amin ya tuan Kristiano ya inaro day Jehova tan susuportaan day agagi nen Kristo.—Mat. 25:34-40.

⁸ Anggano agtayo amta so amin a nagawa diad satan a panaon na subok, amta tayo ya walan walay isakripisyo tayo. Nen 66 C.E., kaukolan ya taynan na saray Kristiano iray kaykayarian da tan anosan so irap pian makaliktar ira. (Mar. 13:15-18) Sikatayo balet ey? Kasin akaparaan tayon taynan iray kayarian tayo pian makapansiansia itayon matoor? Kasin mabulos tayon unoren so amin ya instruksion pian paneknekan ya matoor tayod si Jehova? Tandaan, diad satan ya panaon et sikatayo labat so mandadayew ed si Jehova anggan antoy nagawa, a singa ginawa nen propeta Daniel nensaman.—Dan. 6:10, 11.

9, 10. (a) Anton mensahe so ipulong na totoo na Dios legan na baleg a kairapan? (b) Antoy reaksion na saray kalaban na totoo na Dios?

⁹ Say baleg a kairapan et aliwan panaon pian ipulong so “maong a balita na panarian.” Asumpal la itan. Asingsingger lay “anggaan”! (Mat. 24:14) Seguradon say diretsaan ya ipulong na totoo na Dios et say mensahe na panangukom. Nayarin kaibad satan so pangiyabawag ya asingsingger lan naderal so mauges a mundo nen Satanas. Satan ya mensahe et inkompara na Biblia ed uran a yelo: “Manlapud tawen et pinmelag ed totoo so maksil ya uran a yelo tan amin a klase na baton manbelat na ngalngali duamplon kilo, tan inayew na totoo so Dios lapud sayan salot, ta malaklaknab so dineral na saya.”—Apo. 16:21.

¹⁰ Seguradon makasabi ed saray kalaban tayo itan ya mensahe na panangukom. Pinuyanan si propeta Ezequiel pian isulat no antoy gawaen na Gog na Magog, ya ontutukoy  ed alyansa na saray bansa: “Oniay inkuan na Soberanon Katawan a Jehova: ‘Diad satan ya agew et wala ray kanonotan ya onlad pusom, tan manggetma kay mauges. Ikuan mon: “Lusoben ko so dalin a kawalaan na saray ayaman ya andiay proteksion. Onsumpa ak ed saramay manaayam ed kaligenan tan andian na kapagaan, amin da et manaayam ed saray pasen ya ag-asalimbengan na padir, balewet, odino puerta.” Say getmam et mangalay dakel a samsam, pian atakien mo iray aderal a pasen a panaayaman la natan tan saray totoo ya atipon lamet manlapud saray nasyon, saramay mantitipon na kayamanan tan kayarian, saramay manaayam ed pegley na dalin.’” (Eze. 38:10-12, NW) Aliling to et walad “pegley na dalin” so totoo na Dios ta sankaimano ya nikadkaduma ira. Lapud satan et onsyodot ya maong iray nasyon. Tan desidido iran onataki ed saray alanaan ya lingkor nen Jehova ontan met ed saray onsusuportad sikara.

11. (a) Antoy nepeg tayon tandaan nipaakar ed pantutumbokan na saray ebento legan na baleg a kairapan? (b) Antoy reaksion na totoo ed saray tanda ya nanengneng da ed tawen?

¹¹ Legan tayon aaralen iray onsublay a nagawa, nepeg tayon tandaan ya ag-ibabaga na Salita na Dios so eksakton pantutumbokan na saray ebento. Posible ya wala ray ebenton anggano agni asumpal et tumbokan la na sakey nin ebento. Oniay impropesiya nen Jesus nipaakar ed kasampotan na sayan sistema: “Wala naani iray tanda ed agew tan bulan tan bibitewen, tan diad dalin et nagulo iray nasyon, ya agda amta so pawayan da lapud panungol na madaluyon a dayat, bangta saray totoo et onkapuy lapud takot tan pantatalaran da ed saray nagawa diad dalin; lapud nayegyeg iray pakayari na katawenan. Insan nanengneng da so Anak na too ya onsasabi a walad sakey a lurem tekep na pakapanyari tan baleg a gloria.” (Luc. 21:25-27; basaen so Marcos 13:24-26.) Kasin literal ya makanengneng tayo ray makapataktakot ya tanda diad tawen? Alagaren tayo labat no antoy nagawa. Balet antokaman so nagawa, say segurado et ontakot tan nagulo iray kalaban na Dios.

12, 13. (a) Antoy nagawa sano onsabi si Jesus “tekep na pakapanyari tan baleg a gloria”? (b) Antoy gawaen na saray lingkor na Dios ed satan ya panaon?

¹² Antoy nagawa sano onsabi si Jesus “tekep na pakapanyari tan baleg a gloria”? Tumangan to iramay matoor tan dusaen to ray agmatoor. (Mat. 24:46, 47, 50, 51; 25:19, 28-30) Unong ed si Mateo, sinampotan nen Jesus imay inter ton tanda ed saray disipulo to panamegley na parabolo nipaakar ed saray karnero tan kanding. Imbaga to: “Sano say Anak na too et onsabi ed gloria to, tan kaiba to so amin ya anghel, diad satan et sikatoy onyurong ed maglorian trono to. Tan natipon ed arap to so amin a nasyones, tan pambibiiganen to iray totoo, a singa sakey a managpastol ya ibibiig to iray karnero ed saray kanding. Tan saray karnero et ipasen to diad kawanan to, balet saray kanding et diad kawigi to.” (Mat. 25:31-33) Anton panangukom so naawat na saray karnero tan kanding? Oniay ibabaga na parabolo: “[Saray kanding] so managmak na andi-anggaan a kadederal, balet saray matunong so mangawat na bilay ya andi-anggaan.”—Mat. 25:46.

¹³ Antoy reaksion na saray kanding sano naamtaan dan “andi-anggaan a kadederal” so dusa ra? “Tapoktapoken day pagew da ed pantagleey.” (Mat. 24:30) Anto balet so reaksion na saray agagi nen Kristo tan saray matoor ya onsusuporta ed sikara? Lapud talek da ed Dios a Jehova tan ed Anak to, si Jesu-Kristo, unoren da iyan ganggan nen Jesus: “Sano onggapo lan nagawa irayan  bengatla, onalagey kayo tan itangwa yo iray ulo yo, lapud asingger lay kililiktar yo.” (Luc. 21:28) On, matalek ira ta seguradon niliktar ira!

14, 15. Siopa ray tiponen sano ginmapo lan onataki so Gog na Magog, tan antoy nagawa ed satan a panaon?

¹⁴ Antoy nagawa sano ginmapo lan onataki so Gog na Magog ed totoo na Dios? Inrekord nen Mateo tan Marcos so nagawa: “Ibaki [na Anak na too] iray anghel to pian tiponen da iray pinili to manlapud apatiran dagem, manlapud sampot na dalin angga ed sampot na tawen.” (Mar. 13:27; Mat. 24:31) Satan ya pantipon ed saray pinili et ag-ontutukoy ed inmunan impantatak ed saray alanaan; tan agmet itan ontutukoy ed pangiter na permanentin tatak ed saray nakekeran alanaan diad dalin. (Mat. 13:37, 38) Say pakaawat dad permanentin tatak da et antis ya onggapo so baleg a kairapan. (Apo. 7:1-4) Anto sirin so tutukoyen nen Jesus nen imbaga to ya ‘tiponen na saray anghel iray pinili to’? Atan imay panaon sano awaten la na nakekeran membro na 144,000 so premyo da ed tawen. (1 Tes. 4:15-17; Apo. 14:1) Nagawa itan sano ginmapo lan onataki so Gog na Magog. (Eze. 38:11) Diad satan la nasumpal iyan imbaga nen Jesus: “Diad satan a panaon, saray matunong et onsinag a singa kaliwawa na agew diad panarian na Ama ra.”—Mat. 13:43. *

¹⁵ Kasin labay ya ibaga na satan ya saray alanaan et biglan onlad tawen odino walay nagawan “rapture”? Dakel ed Kakristianoan so manisia ya diad “rapture” et onlad tawen so amin a Kristiano ya pisikal nin siansiay laman da. Insan nanengneng da kuno so ipawil  nen Jesus pian manuley diad dalin. Malinlinew balet ed Biblia ya say “tanda na Anak na too” et omparungtal ed tawen, tan onsabi si Jesus “a walad saray lurem na tawen.” (Mat. 24:30) Natalosan tayod sarayan balikas ya say isabi nen Jesus et agnanengneng. Sakey ni, “say laman tan dala et agmakatawir ed panarian na Dios.” Kanian saramay alanaan ya onlad tawen et nepeg nin ‘nauman diad kakirem na mata, legan na unor a trumpeta.’ * (Basaen so 1 Corinto 15:50-53.) Kanian anggano agtayo usaren so terminon “rapture” lapud aliway pakatalos na arum ed satan, amta tayo ya saray nakekeran alanaan diad dalin et tampol ya natipon, “diad kakirem na mata.”

16, 17. Antoy kaukolan nin nagawa antis na bansal na Kordero ed tawen?

¹⁶ No wala lad tawen so amin ya 144,000, onggapo lay unor ya preparasyon parad pankasal na Kordero. (Apo. 19:9) Balet wala ni nagawa antis na satan ya kasal. Tandaan, antis ya onlad tawen iray nakekeran alanaan diad dalin, atakien na Gog iray totoo na Dios. (Eze. 38:16) Antoy resulta? Diad dalin, singa anggapoy kalabanlaban na totoo na Dios. Balet, unoren da iyan instruksion ya inter nen Jehova diad panaon nen Arin Jehosapat: “Agyo kaukolay milaban ed sayan guerra. Omposisyon kayo, alagey kayo labat, tan nengneng yo so panangiliktar nen Jehova parad sikayo. O Juda tan Jerusalem, agkayo natatakot odino nakekebbiew.” (2 Awa. 20:17, NW) Duma balet so gawaen na saray walad tawen. Kayari iyataki na Gog, amin ya alanaan et onla lad tawen. Oniay ibabaga na Apocalipsis 17:14 nipaakar ed gawaen na kalaban na totoo na Dios: “Saraya so onlaban ed Kordero, balet lapud sikato so Katawan na saray katawan tan Ari na saray arari, sikaray taloen na Kordero. Tan ontan met so gawaen na saramay tinawag tan pinili tan matoor a kaiba to.” Iliktar nen Jesus tan na saray 144,000 ya kaiba ton manuley diad tawen iray totoo na Dios diad dalin.

¹⁷ Say guerra na Armagedon so mangigloria ed masanton ngaran nen Jehova. (Apo. 16:16) Diad satan a panaon, saray naukom bilang kanding et “managmak na andi-anggaan a kadederal.” Naandi lay amin a kaugsan, tan makaliktar so baleg ya ulop ed sampot a parte na baleg a kairapan. No nasumpal lan amin iratan, nagawa la so bansal na Kordero, ya ibabaga na libro na Apocalipsis. (Apo. 21:1-4) * Amin a makaliktar diad dalin et nawalaan na maapit a relasyon ed Dios tan panliketan da lay dakel a bendisyon to. Seguradon malikeliket so ponsia na satan a bansal! Talagan labalabay tayo lan nagawa itan!—Basaen so 2 Pedro 3:13.

18. Antoy nepeg ya determinasyon tayo lapud saray asingsingger lan nagawan ebento?

¹⁸ Lapud asingsingger lan nagawa irayan ebento, antoy nepeg tayon gawaen? Oniay insulat nen apostol Pedro: “Sirin, lapud natunaw irayan amin a bengatla, imano yoy inkatoo yo, a nepeg a masanto kayo ed saray ugali yo tan gagawaen yo iray bengatlan nipaakar ed maridios a debosyon, legan ya aalagaren tan sankanonot yo lawas so isabi na agew nen Jehova . . . Kanian inad-arok ira, lapud aalagaren yo irayan bengatla, gawa yoy anggaay nayarian yo pian naromog to kayon andiay mantsa tan andiay pakabalawan tan walad kareenan.” (2 Ped. 3:11, 12, 14) Komon ta determinado tayon mansiansian malinis ed espiritual, tan suportaan so Ari na Kareenan.