1. Akin ya lalo tayon onapit ed si Jehova no aligen tayoy Jesus?

NATURAL labat ed sikatayon aligen iramay say personalidad da et labalabay tayo. Diad amin ya toon nambilay ed dalin, anggapo lay mas manepeg ya aligen nen say si Jesu-Kristo. Akin? Imbagan mismo nen Jesus: “Samay akanengneng ed siak et anengneng to met lay Ama.” (Juan 14:9) Talagan inalig nen Jesus so personalidad nen Ama to kanian no obserbaan tayo so Anak, singa tayo met la anengneng so Ama. No aligen tayoy Jesus, lalo tayon onapit ed si Jehova, say sankamakapanyarian a Persona ed uniberso. Baleg sirin a pribilehyo so pangalig ed Anak to!

2, 3. (a) Akin ya angiter si Jehova na pinuyanan iran sulat a mangidedeskribe ed Anak to, tan antoy iilaloan nen Jehova ya gawaen tayo? (b) Antoy aralen tayod sayan artikulo tan ed ontumbok?

² Balet, panon tayon naamtaan so personalidad nen Jesus? Maong labat ta wala ray pinuyanan ya sulat ya mangidedeskribe ed sikato. Inter nen Jehova iratan ya sulat, a walad Kristianon Griegon Kasulatan, lapud labay to ya nakabat tayoy Anak to pian naalig tayo. (Basaen so 1 Pedro 2:21.) Diad Biblia, say  ehemplon intilak nen Jesus et inkompara ed “bakat.” Singa ibabaga nen Jehova ed sikatayo ya manakar tayod benegan nen Jesus tan tumboken tayoy bakat to. Siempre, perpekto si Jesus, sikatayo balet et andi. Anggaman ontan, ag-iilaloan nen Jehova ya perpekto tayon natumbok so bakat nen Jesus. Say iilaloan na Ama et aligen tayoy Anak to diad anggaay nayarian tayo bilang agperpekton totoo.

³ Aralen tayo sirin so pigarad saray balibalin kualidad nen Jesus. Diad sayan artikulo, pantongtongan tayo so kapaabebaan tan panangabagey to; tan diad ontumbok ya artikulo et aralen tayoy pakpel tan pakatebek to. Diad kada kualidad, ebatan tayo so taloran tepet: Antoy kabaliksan na satan? Panon itan ya impanengneng nen Jesus? Tan panon tayon naalig si Jesus?

4. Anto so kapaabebaan?

⁴ Anto so kapaabebaan? Diad sayan mundo ya dakel so mapaatagey, iisipen na arum ya no mapaabeba ka et makapuy ka odino anggapoy kompiyansam ed sarilim. Balet, kasin tua itan? Diad tua, kaukolan so kasil na linawa tan pakpel pian nipanengneng so kapaabebaan. Say toon mapaabeba et aliwan mapaatagey tan arogante. Diad Kristianon Griegon Kasulatan, say salitan nipatalos ya “mapaabeba” et sarag to met ya ipatalos bilang “mapaabeba so nonot.” (Fil. 2:3) Kaibad satan so panmoria tayod sarili tayo. Unong ed sakey ya Bible dictionary, “say kapaabebaan et pamidbir ya talagan abebbeba itayo komparad Dios.” No talagan mapaabeba tayo, agtayo iisipen ya mas atagey itayo nen say arum. (Roma 12:3) Aliwan mainomay ya ipanengneng so kapaabebaan lapud ag-itayo perpekto. Balet naaralan tayon ipanengneng itan no dalepdepen tayoy kipapasen tayod arapan na Dios tan tumboken tayoy bakat na Anak to.

5, 6. (a) Siopa si Miguel ya arkanghel? (b) Panon ya impanengneng nen Miguel so kapaabebaan?

⁵ Panon ya impanengneng nen Jesus so kapaabebaan? Manlapu la nensaman et impanengneng la na Anak na Dios so kapaabebaan, bilang makapanyarin espiritu diad tawen tan bilang perpekton too diad dalin. Nengnengen tayoy pigaran alimbawa.

⁶ Say ugali to. Diad libro na Biblia ya Judas, nabasa so sakey ya insidente antis ya linmad dalin si Jesus. (Basaen so Judas 9.) Bilang Miguel ya arkanghel, si Jesus et “akapisuppiatan ed Diablo nipaakar ed bangkay nen Moises.” Nanonotan tayo ya nen inatey si Moises, imponpon nen Jehova so bangkay to ed lugar ya anggapoy makaamta. (Deu. 34:5, 6) Nayarin labay na Diablo ya usaren so bangkay nen Moises parad palson panagdayew. Antokaman so mauges ya plano na Diablo, inamper itan nen Miguel. Imbaga na sakey ya reperensya ya say Griegon salitan nipatalos ya “akapisuppiatan” et “uusaren met ed legal iran argumento” tan pakapatnagan “ya si Miguel et ‘kinuestion toy kanepegan na Diablo’ ya laen so bangkay nen Moises.” Anggaman ontan, binidbir na Manunan Anghel ya anggapoy autoridad ton ukomen so Diablo. Imbes, impalima to itan ed Sankatagyan ya Ukom, si Jehova. On, agnanggawa si Miguel na bengatlan anggapod autoridad to, anggano diad saman et wala komoy rason ton onsanok. Talagan mapaabeba!

7. Panon ya impanengneng nen Jesus so kapaabebaan diad panagsalita tan ed saray ginawa to?

⁷ Nen wadiad dalin si Jesus, sikatoy nansalita tan kinmiwas ya walaay kapaabebaan.  Say panagsalita to. Agton balot nilabay ya sikato so narayew. Imbes, impaarap toy amin ya dayew ed si Ama to. (Mar. 10:17, 18; Juan 7:16) Agton balot minelmelag iray disipulo to. Imbes, atekepan na dignidad so impantrato tod sikara, ya kinomendaan to ra tan imbalikas toy talek tod sikara. (Luc. 22:31, 32; Juan 1:47) Saray ginawa to. Pinili nen Jesus so simplin panagbilay pian agnapabelatan na dakel ya materyal a bengatla. (Mat. 8:20) Mabulos ton ginawa iray abeban trabaho. (Juan 13:3-15) Say manunan pakapatnagan ya sikatoy mapaabeba et say katutulok to. (Basaen so Filipos 2:5-8.) Aliwan singa saray aroganten totoo ya agda labay so onunor, mapaabeban sinumpal nen Jesus so pagagawa na Dios ed sikato, tan ‘nagmaliw a matulok anggad patey.’ Talagan “mapaabeba ed puso” si Jesus!—Mat. 11:29, footnote.

8, 9. Panon tayon nipanengneng so kapaabebaan?

⁸ Panon tayon naalig so kapaabebaan nen Jesus? Say ugali tayo. No mapaabeba tayo, agtayo gagawaen so bengatlan anggapod autoridad tayo. Kaukolan tayon bidbiren ya anggapoy kanepegan tayon mangukom, kanian agtayo babalawen so arum lapud lingo ra tan agtayo kukuestionen so motibo ra. (Luc. 6:37; Sant. 4:12) Ontulong so kapaabebaan pian agtayo magmaliw ya “alabas a makabat,” ya ompan melmelagen tayo iramay andian na abilidad o pribilehyo ya walad sikatayo. (Ecl. 7:16) Ag-iisipen na saray mapaabeban elder ya mas atagey ira nen say arum ya agagi. Imbes, sarayan pastol et ‘ipasen dan mas atagey so arum’ tan mapaabeba so kiwas da.—Fil. 2:3; Luc. 9:48.

⁹ Nengnengen pay alimbawa nen W. J. Thorn, ya nanlingkor bilang pilgrim, odino ombiabiahen manangasikaso nen 1894. Kayari dakel a taon ed satan ya pribilehyo, sikatoy tinawag ed Kingdom Farm diad New York tan say trabaho to et mangasikaso na saray manok. Inkuan to: “No nalilikas ko lan say sankanonot kon lanang et say sarilik, aliling to et onla ak ed sukong, insan ko ibagan: ‘Anta dabok ka labat. Wala tay nipasirayew mo?’” (Basaen so Isaias 40:12-15.) Talagan mapaabeba!

10. Panon tayon nipanengneng so kapaabebaan ed panagsalita tan ed saray gagawaen tayo?

¹⁰ Say panagsalita tayo. No talagan mapaabeba tayo ed puso, napatnagan itan ed saray salita tayo. (Luc. 6:45) Diad pitotongtong tayod arum, aleg komon ya say naynay ya ibabaga tayo et saray nagagawaan tan pribilehyo tayo. (Uli. 27:2) Imbes, imanoen tayoy kamaongan na saray agagi tan komendaan tayo ray balibalin kualidad, abilidad, tan saray nagagawaan da. (Uli. 15:23) Saray gagawaen tayo. Saray mapaabeban Kristiano et ag-interesado ed pagmaliw ya sikat ed sayan mundo. Imbes, mas labay da ya simpli bilay da, ya mabulos da ni ingen ya gawaen so ipapasen na mundo ya abeban trabaho pian nalingkoran day Jehova ed anggaay nayarian da. (1 Tim. 6:6, 8) Manuna ed amin, nipanengneng tayoy kapaabebaan diad itulok tayo. Kaukolan so kapaabebaan na nonot pian magmaliw itayon ‘matulok ed saray mangidadaulo’ ed kongregasyon tan awaten tan tumboken iray instruksion nen Jehova panamegley na organisasyon to.—Heb. 13:17.

11. Ipaliwawa so kabaliksan na panangabagey.

¹¹ Anto so kabaliksan na panangabagey? Say panangabagey et aspekto na  panangaro ya miparad panangasi. Diad tua, nabasad Kasulatan so nipaakar ed “maaron panangabagey” tan “maaron panangasi.” (Luc. 1:78; 2 Cor. 1:3) Nipaakar ed ibabaga na Kasulatan ya kaukolan tayon ipatnag so panangabagey, oniay imbaga na sakey ya reperensya: “Satan et aliwa labat ya pilikna ed saray pakaskasi. Noagta, kaukolan so ikiwas tan tulongan ira pian nauman tan napasimbaloy bilay da.” On, say toon maabagey et onkiwas pian tulongan so arum.

12. Antoy pakapatnagan ya alikna nen Jesus so panangabagey parad arum, tan antoy ginawa to lapud apakiwas na satan?

¹² Panon ya impanengneng nen Jesus so panangabagey? Say maabagey ya liknaan tan ginawa to. Alikna nen Jesus so maaron panangabagey parad arum. Sikatoy “akalua” nen anengneng toy kaaro ton si Maria tan saray kaiba to ya onaakis lapud impatey nen Lazaro. (Basaen so Juan 11:32-35.) Lapud apakiwas si Jesus na panangabagey—a singa alikna to met nen pinaoli to so anak na sakey a balo—pinaoli toy kaaro ton si Lazaro. (Luc. 7:11-15; Juan 11:38-44) Diad satan ya maaron ginawa nen Jesus, naikdan si Lazaro na ilalon manbilay ed tawen. Diad akaunan inkagawa, “naabagey nen Jesus” so dakel ya totoo ya inmasingger ed sikato. Sikatoy apakiwas kanian “imbangat to ira na dakel a bengatla.” (Mar. 6:34) Talagan anguma-uman so bilay na saramay angiyaplika ed saray bangat to! Imanoen ya say panangabagey nen Jesus et aglabat anganggad liknaan; atan so amakiwas ed sikaton manggawa na paraan pian tulongan so arum.—Mat. 15:32-38; 20:29-34; Mar. 1:40-42.

13. Akin et nibagan maabagey so pitotongtong nen Jesus ed arum? (Nengnengen so litratod gapo na artikulo.)

¹³ Saray maabagey ya salita to. Say maabagey ya puso nen Jesus so amakiwas ed sikato pian maabagey so pitotongtong tod arum, lalo lad saray napapairap. Oniay imbaga nen apostol Mateo nipaakar ed si Jesus, ya inaon to iray salita nen Isaias: “Agto puteren so abalbal a tanubong, tan agto erepen so makuykuyep a pabilo.” (Isa. 42:3; Mat. 12:20) Say panagsalita nen Jesus et makarepreskod saray totoon say kipapasen da et singa abalbal ya tanubong odino pabilo na lamparaan ya asingsingger lan naerep. Impulong to so mensahe na ilalo pian ‘nabedberan so puson maermen.’ (Isa. 61:1) Imbaga tod saray “mansasagpot tan nabebelatan” ya ondago rad sikato tan impaseguro tod sikara ya “nainawaan” ira. (Mat. 11:28-30) Impaseguro to met ed saray patumbok to ya iyaansakit na Dios so kada lingkor To, anggan saray “angkekelag”—saramay ipapasen na mundo ya anggapoy kana.—Mat. 18:12-14; Luc. 12:6, 7.

14. Panon itayon nawalaan na maabagey ya liknaan ed arum?

¹⁴ Panon tayon naalig so panangabagey nen Jesus? Say maabagey ya liknaan tayo. Ompan aliwan natural ed sikatayo so ontan ya emosyon, balet papasesegen itayo na Biblia ya mansagpot tayo pian nalikna tayo itan. Say “panangabagey” et kaibad personalidad a nepeg ya isulong na amin ya Kristiano. (Basaen so Colosas 3:9, 10, 12.) Panon kan nawalaan na panangabagey ed arum? Lukasan moy pusom. (2 Cor. 6:11-13) Dengel kan maong no walay mangibebesngaw na liknaan tan problema to. (Sant. 1:19) Usar moy imahinasyon mo tan tepetay sarilim: ‘No siak so walad situasyon to, antoy naliknak? Antoy kaukolan ko?’—1 Ped. 3:8.

15. Anto ray nagawaan tayo pian natulongan iramay say kipapasen da et singa abalbal ya tanubong odino makuykuyep ya pabilo?

 ¹⁵ Saray maabagey ya gagawaen tayo. Say panangabagey so mamakiwas ed sikatayon tulongan so arum lalo la iramay say kipapasen da et singa abalbal ya tanubong odino makuykuyep ya pabilo. Panon tayo ran natulongan? “Miakisan kayo ed saray totoon onaakis,” so kuan na Roma 12:15. No maminsan, mas kaukolan na saray maneermen so pililikna, anggano agtayo nasolusyonan so problema da. Oniay imbaga na sister ya niligliwa na saray agagi nen naandid bilay so anak ton bii: “Naapresyak so imbisita na saray kakaarok tan akiakis irad siak.” Nipanengneng tayo met so panangabagey diad panggaway kaabigan. Wala tay kabat yon balo ya mankaukolay tulong ed pangapiger ed abung to? Kasin walay kakongregasyon yon maedad la ya nayarin nilugan yo paonlad aral, no manpulong, odino naibaan yod doktor? Anggan say angkekelag iran maabig ya gawa et baleg so nitulong tod bilay na agin mankakkaukolan. (1 Juan 3:17, 18) Manuna ed amin, nipanengneng tayoy panangabagey no gawaen tayoy anggaay nayarian tayod ministeryo. Atan so sankaabigan ya paraan pian natulongan tayo iray mauyamon totoo!

16. Antoy sarag tayon ibaga pian napabiskeg iray maneermen?

¹⁶ Saray maabagey ya salita tayo. Say panangabagey so mamakiwas met ed sikatayon ‘ligliwaen iray maneermen.’ (1 Tes. 5:14) Antoy sarag tayon ibaga pian napabiskeg ira? Onlemew so liknaan da no ibalikas tayod sikara ya iyaansakit tayo ra. Impapuso tayo ran komendaan pian nanengneng da iray positibon kualidad tan abilidad da. Ipanonot tayod sikara ya inyasingger ira nen Jehova ed Anak to, kanian mabmabli ira sirin ed pakanengneng to. (Juan 6:44) Ipaseguro tayod sikara ya talagan iyaansakit nen Jehova iray lingkor ton ‘nabtag so puso ra.’ (Sal. 34:18) Saray maabagey ya salita tayo et makatambal ed saramay mankaukolan na ligliwa.—Uli. 16:24.

17, 18. (a) Antoy iilaloan nen Jehova ya pantrato na saray elder ed saray karnero to? (b) Antoy aralen tayod onsublay ya artikulo?

¹⁷ Sikayo ran elder, iilaloan nen Jehova ya maabagey so pantrato yod saray karnero to. (Gawa 20:28, 29) Tandaan ya responsabilidad yon bangatan, pabiskegen, tan ligliwaen so pulok to. (Isa. 32:1, 2; 1 Ped. 5:2-4) Kanian say maabagey ya elder et agto kontrolen iray karnero, agto manggaway sarili ton totontonen, tan agto ra konsiensiaen pian napaskar iran gawaen so bengatla ya ag-iyabuloy na situasyon da. Imbes, labay na maabagey ya elder ya maliket iray agagi tan walay talek ton say panangaro dad si Jehova so mamakiwas ed sikaran gawaen so anggaay nayarian dan manlingkor ed sikato.—Mat. 22:37.

¹⁸ Diad pandalepdep tayod kapaabebaan tan panangabagey nen Jesus, seguradon napakiwas itayon itultuloy ya tumboken so bakat to. Diad onsublay ya artikulo, aralen tayo ni so duaran aspekto na balibalin personalidad nen Jesus—say pakpel tan pakatebek to.