1. Antoy espisyal ed panagdayew tayo?

DIAD interon mundo, say ngaran ya Jehova et akaukit ed dakel ya bilding tan nanduruman bengatla diad saray museum. No makanengneng ka seguro na ontan, ompan manlikliket ka. On ta espisyal itan ya ngaran diad panagdayew tayo—sikatayoy Tasi nen Jehova! Anggapo lay arum ya organisasyon ya talagan manguusar ed satan ya ngaran ya singa sikatayo. Balet, amta tayon say pribilehyon natawag ed ngaran na Dios et walay kaiba ton responsabilidad.

2. Anton responsabilidad so kaibad pribilehyon natawag ed ngaran na Dios?

² Pian abobonan itayo na Dios, agmagenap so pangusar labat ed ngaran to. Nepeg ya manbilay itayo unong ed saray moral ya estandarte to. Kanian papanonotan itayo na Biblia ya saray lingkor nen Jehova et nepeg dan ‘taynan so mauges.’ (Sal. 34:14) Satan ya prinsipyo et malinew ya imbaga nen apostol Pablo nen insulat to: “Amin komon ya ontatawag ed ngaran nen Jehova et ipulisay da so ag-inkatunong.” (Basaen so 2 Timoteo 2:19.) Bilang Tasi nen Jehova, kabkabat na totoo ya ontatawag tayod ngaran na Dios. Balet panon tayon ipulisay so ag-inkatunong?

3, 4. Anto ran salita ed 2 Timoteo 2:19 so mairap a talosan na saray scholar na Biblia, tan akin?

³ Diad 2 Timoteo 2:19, tinukoy nen Pablo so “malet a pundasyon na Dios,” ya ditan et walay akatatak ya duaran mensahe. Say unona et “Kabat nen Jehova iramay kayarian to,” tan mapatnag ya inala itan nen Pablo ed Numeros 16:5. (Nengnengen so akaunan artikulo.) Say komadua et “Amin komon ya ontatawag ed ngaran nen Jehova et ipulisay da so ag-inkatunong,” ya mairap a talosan na saray scholar na Biblia. Akin?

⁴ Diad saray salitan inusar nen Pablo, singano walay angalaan ton libro diad Hebreon Kasulatan. Balet anggapoy ontan ya bersikulo ya miparad imbaga to. Anto siri’ tutukoyen na apostol nen imbaga ton: “Amin komon ya ontatawag ed ngaran nen Jehova et ipulisay da so ag-inkatunong”? Amay unaan ya imbaga nen Pablo et inala tod Numeros kapitulo 16 ya ditan et nabasay salaysay nipaakar ed impanrebelde nen Kora. Posible kasi ya amay komaduan imbaga to et walay koneksion to lanlamang ed satan ya agawa?

5-7. Anto ray agawa nen panaon nen Moises ya angibasiyan nen Pablo ed samay insulat to ya nabasad 2 Timoteo 2:19? (Nengnengen so litratod gapo na artikulo.)

⁵ Ibabaga na Biblia ya si Datan tan Abiram, ya ananak nen Eliab, et akilad si Kora, tan sikaray angidaulo ed impanrebelde ed si Moises tan Aaron. (Num. 16:1-5) Arap-arapan ya agda nirespeto si Moises tan say inter na Dios ya autoridad to. Lapud kaiba ni ran siansia na arum ya Israelita, napepeligroy espiritualidad na saray matoor. Antis ya impaamta nen Jehova no siopa ray matoor tan no siopa ray rebelde, walay malinew ya ingganggan to.

⁶ Oniay nabasad salaysay: “Insan oniay inkuan nen Jehova ed si Moises: ‘Mansalita ka ed muyong tan ibagam ed sikara, “Onarawi kayo manlapud liber na saray tolda nen Kora, Datan, tan Abiram!”’ Kayari na satan et inmalagey si Moises tan linma ed si Datan tan Abiram, tan akila ed sikato iray mamatatken na Israel. Insan inkuan to ed muyong: ‘Ipangasi yo, arawian yo iray tolda na sarayan mauges a lalaki tan agyo didiwiten so antokaman a kayarian da, pian agkayo naderal lapud amin a kasalanan da.’ Tampol dan inarawian iray tolda nen Kora, Datan, tan Abiram, manlapud amin a diking.” (Num. 16:23-27, NW) Insan pinatey nen Jehova so amin ya rebelde. Balet nansiansian mabilay iray matoor ed sikato. Akin? Ta impulisay day ag-inkatunong diad inyarawi dad saray rebelde.

⁷ Nabasa nen Jehova so puso! Natebek toy katooran na saray kayarian to. Anggaman ontan, kaukolan ya determinado tan tampol ya onkiwas iray matoor, ya onarawi rad saray agmatunong. Posible sirin ya samay salaysay ed Numeros 16:5, 23-27 so tutukoyen nen Pablo nen insulat ton: “Amin komon ya ontatawag ed ngaran nen Jehova et ipulisay da so ag-inkatunong.” Kanian mikonektaan itan ed samay akauna lan imbaga to ya, “Kabat nen Jehova iramay kayarian to.”—2 Tim 2:19.

8. Akin ya agmagenap so pangusar ed ngaran nen Jehova o say pagmaliw ya kabiangan na Kristianon kongregasyon?

⁸ Nen tinukoy nen Pablo iramay agawa nen panaon nen Moises, papanonotan toy Timoteo ya kaukolan ton protektaan so relasyon tod si Jehova. Agmagenap so basta pagmaliw ya kabiangan na Kristianon kongregasyon, no panon ya agmagenap ed panaon nen Moises so basta labat itawag ed ngaran nen Jehova. Nepeg ya ipulisay na saray matoor so ag-inkatunong. Anto siri’  gawaen nen Timoteo? Tan antoy naaralan tayo ed satan ya pinuyanan ya simbawa nen Pablo?

9. Antoy epekto na saray “makulangkulang tan andiay-kabaliksan a pansusuppiatan” ed Kristianon kongregasyon nensaman?

⁹ Diad Biblia, wala ray nabasa tayon simbawa nipaakar ed nanduruman klase na ag-inkatunong ya nepeg ya ipulisay o paliisan na saray Kristiano. Singa bilang, diad konteksto na 2 Timoteo 2:19, imbaga nen Pablo ed si Timoteo ya makapuy so ‘misangsangan lapud saray salita’ tan nepeg ton ‘paliisan iray andi-kakanaan a salita.’ (Basaen so 2 Timoteo 2:14, 16, 23.) Wala ray membro na kongregasyon ya mangikakayat ed bangat na saray apostata. Tan wala met iray mangiloloob na saray bangat ya sengegan na pankokolkol. Anggano agmet iratan direkta ya kontrad Kasulatan, naderal so pankakasakey ed kongregasyon tan ag-iratan makapaseseg. Kanian indanet nen Pablo ya kaukolan ya ‘paliisan iray makulangkulang tan andiay-kabaliksan a pansusuppiatan.’

10. Antoy nepeg ya reaksion tayo no walay narengelan tayon bangat na saray apostata?

¹⁰ Diad panaon tayo, mataltalag la tay walay man-apostata diad kongregasyon. Balet ta ompan siansia nin wala ray narengelan tayon bangat ya kontrad ibabangat na Biblia. Inerman so nanlapuan na satan, nepeg tayon ipulisay ya tampol. Makapuy no midebati tayod saray apostata, diad personal man, diad Internet, o diad arum nin paraan. Anggano say intension tayo et tulongan itan ya too, susumlangen tayo imay isisimbawa na Biblia ya kakkayari tayon inkonsidera. On, igaganggan itayo nen Jehova ya sigpot a paliisan tan ipulisay so apostasya.

11. Antoy posiblin panlapuan na ‘makulangkulang iran pansusuppiatan,’ tan panon ya mangipanengneng na maong ya alimbawa iray elder?

¹¹ Likud ed bangat na saray apostata, wala ni arum ya maneral ed deen na kongregasyon. Singa bilang, ompan nandurumay opinyon tayo nipaakar ed panagligliwaan, ya lapud satan et onlesay “makulangkulang tan andiay-kabaliksan a pansusuppiatan.” Siempre, no wala ray indibidual ya ipapaseseg day panagligliwaan ya sumlang ed moral ya estandarte nen Jehova, ag-itan nepeg ya ibaliwala na saray elder pian labat naiwasan so gulo. (Sal. 11:5; Efe. 5:3-5) Anggaman ontan, nepeg ya siansia nin manalwar iray elder ya aliwan say personal ya opinyon da so ibangat da. Matoor dan tutumboken iyan bilin na Biblia ed saray Kristianon manangasikaso: “Pastolan yo so pulok na Dios a walad panangasikaso yo, . . . agkayo pakakatawan ed saramay kayarian na Dios, noagta magmaliw kayon ehemplo ed pulok.”—1 Ped. 5:2, 3; basaen so 2 Corinto 1:24.

12, 13. (a) Panon ya mandedesisyon iray Tasi nen Jehova no nipaakar ed panagligliwaan, tan anto ran prinsipyod Biblia so onaplika? (b) Panon ya onaplikad nanduruman personal ya bengatla iramay prinsipyon abitlad parapo 12?

¹² No nipaakar ed panagligliwaan, agmanggagawa so organisasyon tayo na listaan na saray espesipikon pelikula, video game, libro, odino kansion ya sebel ed sikatayo. Akin? On ta ipapaseseg na Biblia ya nepeg ya ipasal na kada indibidual so ‘pakayari ton mantalos pian nibiig so duga tan aliwa.’ (Heb. 5:14) Wala ray prinsipyod Biblia ya nausar tayo diad panagpili na panagligliwaan. Diad amin ya gawaen tayon desisyon, nepeg ya ‘seguroen tayon naynay no antoy makapaliket ed Katawan.’ (Efe. 5:10) Ibabaga na Biblia ya walay autoridad na saray ulo na pamilya, kanian sarag day mandesisyon no anto ran panagligliwaan so agnayari ed pamilya da. *—1 Cor. 11:3; Efe. 6:1-4.

 ¹³ Sarayan abitlan prinsipyo ed Biblia et aglabat onaplikad panagpili na panagligliwaan. Nayarin panlapuan met na agpantatalosan so nanduruman opinyon nipaakar ed panangawes tan panag-ayos, pangasikasod laman tan no anto ray nepeg ya kanen, tan arum nin personal a bengatla. Balet no anggapo met so nasusumlang ya prinsipyod Biblia, maabig no agtayo la iratan pansasangsangan, ta “say aripen na Katawan et agnepeg a mikolkol, noagta mauyamo ed amin.”—2 Tim. 2:24.

14. Anton ilustrasyon so inusar nen Pablo pian idanet ya kaukolan tayon paliisan iray mauges ya kaulop?

¹⁴ Anto ni arum ya paraan ya saramay ‘ontatawag ed ngaran nen Jehova et ipupulisay day ag-inkatunong’? Diad agda piulop ed saray manggagaway ag-inkatunong. Makapainteres ta kayarin imbaga nen Pablo imay ilustrasyon nipaakar ed “malet a pundasyon na Dios,” angusar na sananey nin ilustrasyon. Insulat to so nipaakar ed “baleg ya abung” ya wala ray “pananginan a gawa ed balitok tan pilak ontan met ed kiew tan pitek, tan say arum et parad mapagalang a gagala balet say arum et parad aliwan mapagalang a gagala.” (2 Tim. 2:20, 21) Insan to binilin iray Kristiano ya “paliisan” odino arawian da ray kagawaan ya uusaren ed “aliwan mapagalang a gagala.”

15, 16. Antoy naaralan tayod ilustrasyon nipaakar ed “baleg ya abung”?

¹⁵ Antoy labay ya ibaga na satan ya ilustrasyon? Inkompara nen Pablo so Kristianon kongregasyon ed “baleg ya abung,” tan saray membro na kongregasyon et inkompara tod saray “pananginan” o kagawaan. Diad literal ya abung, delikadon usaren iray kagawaan ya marutak o akargaay samal. Kanian say gawaen na akan-abung et iyarawi to iratan ed saray malinis ya kagawaan, singa saray uusaren tod panagluto.

¹⁶ Ontan met ed saray lingkor nen Jehova natan. No labay tayoy magmaliw ya malinis ed amin ya aspekto na bilay tayo,  agtayo miuulop ed saray indibidual diad kongregasyon ya mangibabaliwalad saray prinsipyo nen Jehova. (Basaen so 1 Corinto 15:33.) No diad mismon loob na kongregasyon et wala ray nepeg tayon paliisan, di lalo lan nepeg tayon “arawian” iray walad paway na kongregasyon, ya dakel ed sikara et ‘maaro ed kuarta, agmatulok ed atateng, aliwan matoor, managpauges, masesebeg, agda aaroen so kamaongan, traidor, tan mas inaro day likeliket nen say Dios’!—2 Tim. 3:1-5.

17. Akin et nibaga tayon sigpot so intulok na saramay matoor ya Israelita nen impulisay day ag-inkatunong?

¹⁷ Espesipikon imbaga na Biblia no panon ya determinadon tinmulok iray Israelita nen ingganggan ira ya ‘arawian day kaliberliber na tabernakulo di Kora, Datan, tan Abiram.’ Ibabaga na salaysay ya ‘tampol iran inmarawi.’ (Num. 16:24, 27, NW) Agla ra nanduaruwa o nanpappaleen. Nabasa tayo met ya sigpot iran inmunor ta say kuan na salaysay et ‘inarawian day amin a diking.’ On, aliwan palpalaran so intulok na saray matoor noagta interon puso. Talagan impanengneng da ya sinuportaan day Jehova tan impulisay day ag-inkatunong. Antoy naaralan tayod satan ya agawa?

18. Antoy labay ya ibaga nen Pablo nen sinimbawa toy Timoteo ya ‘arawian to iray pilalek ya inuugaw’?

¹⁸ Pian naprotektaan tayoy relasyon tayod si Jehova, nepeg a tampol tan determinado tayon onkiwas. Ontan so labay ya ibaga nen Pablo nen sinimbawa toy Timoteo ya ‘arawian to iray pilalek ya inuugaw.’ (2 Tim. 2:22) Diad saman et masulok lan 30 años nen Timoteo. Balet anggan saray adulto la et nayarin makalikna ni “pilalek ya inuugaw.” Kanian no nalikna itan nen Timoteo, kaukolan ton ‘arawian’ iratan. Diad arum a salita, kaukolan ton ‘ipulisay so ag-inkatunong.’ Ontan met so labay ya ibaga nen Jesus nen inkuan ton: “No say matam so sengegan na pankakasalanan mo, sukit mo itan tan ibantak mo.” (Mat. 18:9) No say sakey ya Kristiano natan et labay ton tuloken iyan simbawa pian naprotektaan so relasyon tod Dios, nepeg ya sikatoy tampol tan determinadon onkiwas.

19. Antoy gagawaen na arum pian nipanengneng da ya determinado iran protektaay relasyon dad si Jehova?

¹⁹ Wala ray agagi ya antis iran nagmaliw ya Tasi et agda nakontrol so kakainum day alak, tan natan et nandesisyon iran aglan balot oninum na alak. Say arum et papaliisan da ray panliliket ya agmet makapuy balet ompan liingen toy mauges ya pilalek. (Sal. 101:3) Singa bilang, walay agin antis ya nan-Tasi et labalabay toy onlad party ya walay sayawan tan wala ray nagagawan imoral. Nen naamtaan toy katuaan, aglan balot misasayawan anggano puros agagi kaiba tod party ta natatakot ompan naliing lamet so makapuy iran pilalek tan kanonotan to. Siempre, agto labay ya ibagan saray Kristiano et agla oninum na alak, agla onsayaw, odino paliisan da ray bengatlan agmet makapuy. Balet iilaloan nen Jehova ya maalwar tan determinado tayon protektaay relasyon tayod sikato.

20. Anggano aliwan mainomay ya ‘ipulisay so ag-inkatunong,’ antoy mamapabiskeg ed liknaan tayo?

²⁰ On, say pribilehyon natawag ed ngaran na Dios et walay kaiba ton responsabilidad. Nepeg tayon ‘ipulisay so ag-inkatunong’ tan ‘taynan so mauges.’ (Sal. 34:14) Tua, ag-itan mainomay ya gawaen. Balet ombibiskeg so liknaan tayo ta amta tayon lawas aaroen nen Jehova “iramay kayarian to” tan saray manguunor ed matunong iran estandarte to.—2 Tim. 2:19; basaen so 2 Awaran 16:9a.