1. Anto ray balibalin naeeksperiensya na dakel ya kalangweran a Kristiano?

MANBIBILAY itayod agnalinglingwanan a panaon. Minilyon ya totoon nanlapud amin a bansa so ondadapag ed dugan panagdayew. (Apo. 7:9, 10) Balibali iray eksperiensya na dakel ya kalangweran diad panutulong dad arum ya natalosan so makapangisalbay bilay ya katuaan ed Biblia. (Apo. 22:17) Wala ray kalangweran ya mangikokonduktay panangiyaral na Biblia, tan tutulongan da ray totoon napaaligwas so paraan na kabibilay da. Arum ed sikara so maseseg ya mangipupulong ed maong a balita diad saray teritoryan sananey so lenguahe. (Sal. 110:3; Isa. 52:7) Panon mon naarumay liket mod pibibiang ed sayan kimey na saray totoo nen Jehova?

2. Panon ya ipapanengneng na eksperiensya nen Timoteo ya mabulos si Jehova ya mangimatalek na responsabilidad ed saray kalangweran? (Nengnengen so litratod sayan pahina.)

² Bilang kalangweran, sarag moy manggawa natan na saray desisyon ya mangiter ed sika ed arapen na balibali ran pankanawnawa diad panaglingkor ed Dios. Singa bilang, si Timoteo a taga Listra et mapatnag a nanggaway makabat iran desisyon kanian nen man-20 ni labat o masulok ya 20, nagmaliw lan misionero. (Gawa 16:1-3) Nayarin pigaran bulan labat so apalabas et walay agawan baleg ya isusumpa kanian apilitan si Pablo ya taynan so balon kongregasyon ed Tesalonica. Balet inmatalek nen Pablo ed kalangweran ya Timoteo so pamaseseg ed saray agagi diman. (Gawa 17:5-15; 1 Tes. 3:1, 2, 6) Imadyin mo pay  liket nen Timoteo nen niiter ed sikato itan ya asainmin!

3. Anto so sankaimportantian ya desisyon a gawaen mo, tan kapigan mo itan gawaen?

³ Say panaon a panggaway importante iran desisyon et legan ya kalangweran ni. Antoy sankaimportantian ya desisyon a gawaen mo? Say panlingkor ed si Jehova. Kapigan so sankaabigan ya panggawam ed satan ya desisyon? Oniay imbaga nen Jehova: “Nonoten mo . . . so Manamalsam dia ed saray agew na inkaugaw mo.” (Ecl. 12:1) Say alenleneg ya paraan na ‘pannonot’ ed si Jehova et say panlingkor ed sikato diad interon puso. (Deu. 10:12) Say desisyon mon manlingkor ed Dios diad interon pusom so sankaimportantian ya desisyon ya gawaen mo. Baleg so epekto na satan ed arapen mo.​—Sal. 71:5.

4. Anto ray importantin desisyon ya makaapektod panaglingkor mod Dios?

⁴ Siempre aliwa labat a say desisyon mon manlingkor ed si Jehova so makaapektod arapen mo. Singa bilang, nayarin nononoten mo no kasin miasawa ka, siopay piasawaan mo, tan no panoy pananap moy pambilay. Importante iratan ya desisyon, balet nepeg mon unaen ya desisyonan no kasin labay moy manlingkor ed si Jehova diad interon pusom. (Deu. 30:19, 20) Akin? Lapud mankokonektaan iratan. Say desisyon mo nipaakar ed panangasawa tan pananap na pambilay et makaapektod panaglingkor mod Dios. (Ikompara so Lucas 14:16-20.) Tan say desisyon mon manlingkor ed Dios et makaapekto met ed gawaen mon desisyon nipaakar ed panangasawa tan pananap na pambilay. Kanian desisyonan mo nin unona no antoy sankaimportantian ed bilay mo.​—Fil. 1:10.

5, 6. Isalaysay no panon a say panggawa na saray dugan desisyon et manresultad balibali iran eksperiensya ed arapen. (Nengnengen met so artikulon “No Antoy Pinilik nen Ugaw Ak Ni” ed sayan isyu.)

⁵ No akapandesisyon ka lan manlingkor ed Dios, sarag mo lan nonoten no antoy labay ton gawaen mo tan sarag mo lay mandesisyon no panoy panlingkor mo. Oniay insulat na sakey ya Japanese a brother: “Nen 14 años ko, kaibak ya manpupulong so sakey ya elder ed kongregasyon tan naimano ton matabtabang ak ed ministeryo. Mauyamo ton imbagad siak: ‘Sempet ka ni Yuichiro. Yurong ka tan nonot mon maong no antoy ginawa nen Jehova parad sika.’ Ginawak so imbaga to. Diad tua, pigay agew ak ya nannonot tan nampikasi. Kalkalnan anguman so panmoriak. Ag-abayag, nai-enjoy ko lay panaglingkor kod si Jehova. Nai-enjoy koy pambasad eksperiensya na saray misionero, tan manlapud saman et sankanonot ko la no panon kon sigpot ya panlingkoran so Dios.

⁶ “Ginapoan koy manggawa na saray desisyon ya diad arapen et makatulong ed siak ya manlingkor ed si Jehova diad arum a bansa,” so intuloy nen Yuichiro. “Singa bilang, nandesisyon ak ya manaral na English. Kayarik ya nanaral ed high school, pinilik so part-time ya trabahon manbangat na English pian makapanpayunir ak. Nen 20 años ak la, ginapoan koy manaral na Mongolian tan akabisita ak ed grupo na agagi ya mansasalitay Mongolian. Kayari duay taon, nen 2007, pinmasyar ak ed Mongolia. Nen nampulong ak kaibay pigaran payunir tan anengneng kon dakel so manaanap na katuaan, labay koy onalis diman tan ontulong. Pinmawil ak ed Japan pian manplano. Manpapayunir ak diad Mongolia manlapu la nen Abril 2008. Aliwan mainomay so bilay dia. Balet aawaten na totoo so maong a balita, tan natutulongan ko ran onapit ed si Jehova. Nibagak ya pinilik so sankaabigan ya bilay.”

7. Antoy kaukolan ya desisyonan na balang sakey ed sikatayo tan antoy alimbawa ya impanengneng nen Moises?

⁷ Kada sakey et kaukolan ya mandesisyon no panon ton usaren so bilay to bilang sakey ed Saray Tasi nen Jehova. (Jos. 24:15) Agmi kayo nayarin diktaan no kasin miasawa kayo, no siopay piasawaan yo, odino no antoy pananapan  yoy pambilay. Kasin say pilien yon trabaho et mankaukolan labat na daiset ya panangipasal? Saray arum ed sikayo ran kalangweran a Kristiano et manaayam ed saray lugar ya mairap so bilay; say arum et diad angkabaleg iran syudad. Diad interon mundo, nandurumay personalidad, abilidad, eksperiensya, hilig, tan espiritual a kalat na saray kalangweran. Nayarin midumaan kayod arum ya kalangweran natan, singa say kalangweran ya si Moises ed saray Hebreon kalangweran ed Ehipto nensaman. Lapud manaayam ed palasyo na ari, mayaman tan de-aral si Moises, balet ta saray kalangweran ya Hebreo et ariripen labat. (Exo. 1:13, 14; Gawa 7:21, 22) Singa sikayo, nambilay irad sakey ya panaon ya kaukolan day manggawa na importante iran desisyon. (Exo. 19:4-6) Kaukolan ya mandesisyon so balang sakey no antoy gawaen tod bilay to. Si Moises et pinili ton gawaey linawa nen Jehova.​—Basaen so Hebreos 11:24-27.

8. Antoy makatulong ed saray kalangweran diad panggawa day makabat iran desisyon?

⁸ Tutulongan kayo nen Jehova ya manggawa na makabat iran desisyon. Sikatoy mangiiter na saray simbawa panamegley na saray prinsipyo ya niyaplika yo antokaman so sirkumstansya yo. (Sal. 32:8) Niarum ni, natulongan kayo na saray Tasi ya atateng yo tan saray elder ed kongregasyon no panon yon iyaplika iratan ya prinsipyo. (Uli. 1:8, 9) Pantongtongan tayo natan so taloran prinsipyo ed Biblia ya makatulong ed sikayon manggaway makabat iran desisyon a walay maabig ya epekto tod arapen yo.

9. (a) Panon itayon papagalangan nen Jehova diad pangiiter tod sikatayoy kawayangan ya mandesisyon? (b) Anto ray pankanawnawa yon gawaen no ‘anapen yo nin unona so panarian’?

⁹ Anapen nin unona so Panarian na Dios tan say inkatunong to. (Basaen so Mateo 6:19-21, 24-26, 31-34.) Papagalangan kayo nen Jehova lapud iikdan to kayoy kawayangan ya mandesisyon no antoy gawaen yod panaon yo. Agto ibabaga ya usaren yoy amin a panaon yod panagpulong. Balet, angiter si Jesus na sakey a prinsipyo ya mangibabangat ed sikatayon anapen nin unona so Panarian. No iyaplika yo itan, mas dakel so pankanawnawa yon ipanengneng so panangaro yod Dios tan totoo, tan say apresasyon yod ilalon bilay ya andi-angga. Legan yon nononoten so nipaakar ed panangasawa tan pananap na pambilay, ikonsidera no kasin say desisyon yo et gawaen to kayon mapagpaga ed saray materyal a bengatla, odino niyuna yoy Panarian na Dios tan say inkatunong to.

10. Antoy amaliket ed si Jesus, tan antoy gawaen yo pian magmaliw kayon maliket?

¹⁰ Panliketay panlingkor ed arum. (Basaen so Gawa 20:20, 21, 24, 35.) Sayan importantin prinsipyod bilay et maar-aron imbangat ed sikatayo nen Jesus. Sikatoy malikeliket lapud ginawa toy linawa na Ama to imbes a say labay to. Naliliketan si Jesus no nanenengneng ton aawaten na totoo so maong a balita. (Luc. 10:21; Juan 4:34) Nayarin alikna yo met la itan a liket diad intulong yod arum. No ibase yo ray desisyon yo ed satan ya prinsipyon imbangat nen Jesus, seguradon magmaliw kayon maliket tan napaliket yoy Jehova.​—Uli. 27:11.

11. Akin ya agla maliket si Baruc, tan antoy insimbawa nen Jehova ed sikato?

¹¹ Say panlilingkor tayod si Jehova so talagan panlalapuan na liket tayo. (Uli. 16:20) Mapatnag ya alingwanan itan nen Baruc, say sekretaryo nen Jeremias. Walay panaon ya agla maliket ed panlilingkor tod si Jehova. Imbaga nen Jehova ed sikato: “Aanapen mo iray angkakabaleg a bengatla parad inkasika. Agmo la iratan aanapen. Ta idapok so desyang ed amin a totoo, . . . tan iter ko ed sika so bilay mo bilang samsam diad amin a pasen a laen mo.” (Jer. 45:3, 5, NW) Parad sika, anto kasi mamaliket ed si Baruc? Kasin say pananap na saray angkakabaleg a bengatla odino say pakaliktar ed kaderal na Jerusalem bilang matoor a lingkor na Dios?​—Sant. 1:12.

12. Anto ray desisyon nen Ramiro ya angiter ed sikato na maliket a bilay?

 ¹² Say sakey ya brother ya akaliknay liket ed panaglingkor ed arum et si Ramiro. Inkuan to: “Nanlapu ak ed mairap bilay ya pamilya diad sakey a baryo ed Andes Mountains. Kanian nen imbaga nen kuyak ya panaralen to ak ed unibersidad, talagan balbaleg iman ya pankanawnawa. Balet agano ak nin abautismoan ya Tasi nen Jehova, tan walay sananey a pankanawnawan niiter ed siak​—inimbitaan ak na sakey a payunir ya milad sikato ed sakey ya melag a baley pian manpulong. Linma ak diman, inaral koy mankatli, tan angilukas ak na barbershop pian nasuportaan koy sarilik. Nen inyopresi mi panangiyaral na Biblia ed totoo, dakel so angawat. Ag-abayag, akiulop ak ed balon kongregasyon ya manguusar ed sakey a lokal a lenguahe. Natan et samploy taon ak lan full-time ya ministro. Anggapo lay arum ya propesyon a makapangiter ed liket ya naliliknak legan kon tutulongan iray totoo ya naaralan so maong a balita diad sarili dan lenguahe.”

13. Akin a say sankaabigan a panaon ya panlingkor ed si Jehova et legan a kalangweran ni?

¹³ Panliketay panlingkor ed si Jehova legan ya kalangweran ni. (Basaen so Eclesiastes 12:1.) Agyo iisipen ya kaukolan yo ni makalmoy balibalin trabaho pian makapanlingkor kayod si Jehova. Say sankaabigan ya pangigapod interon puson panaglingkor ed si Jehova et legan ya kalangweran ni. Daiset ni responsabilidad ed pamilya na dakel a kalangweran tan walay kasil na laman tan biskeg dan manggawad saray mairap ya asainmin. Antoy labay yon gawaen parad si Jehova legan ya kalangweran kayo ni? Ompan labay yoy manpayunir. Nayarin labay yoy ontulong ed kongregasyon ya mansasalitay sananey ya lenguahe. Odino wala ni ray nanenengneng yon paraan pian mas dakel so nagawaan yod kongregasyon yo natan. Antokaman so kalat yod panaglingkor, kaukolan ya walay pananapan yoy pambilay. Itepet yod sarili yo: ‘Antoy pilien kon trabaho, tan panon karukey ya panangipasal so kaukolan kod satan?’

14. Anto ray kaukolan mon panalwaran no manplaplano ka parad arapen?

¹⁴ Say taloran prinsipyod Biblia ya apantongtongan tayo et makatulong ed sikan nonoten no antoy pilien mon propesyon. Seguradon amta na saray school counselor o saray ahensia na gobierno iray trabahon available ed lugar yo odino diad pasen ya iisipen mon panlingkoran. Posiblin natulongan da ka, balet kaukolan moy manalwar. Nayarin ipaseseg na saray totoon agmangaarod si Jehova ya aroen moy mundo. (1 Juan 2:15-17) No imanoen mo ray iyoopresi na mundo, main-inomay kan napalikdo na pusom.​—Basaen so Uliran 14:15; Jer. 17:9.

15, 16. Siopay talagan makatulong diad pampilim na trabaho?

¹⁵ No naamtaan mo la ray trabahon sarag mon pampilian, kaukolan moy praktikal a simbawa. (Uli. 1:5) Legan kan manpipili, siopay makatulong ed sikan manggawa na dugan desisyon based saray prinsipyo na Biblia? Dengel mo iramay mangaarod si Jehova, saray mangaarod sika, tan saramay kabat da ka tan makaamtad sirkumstansyam. Tulongan da kan nonoten a maong iray abilidad tan motibom. Nayarin walay nibaga dan ontulong ed sikan pannonotan lamet iray kalat mo. No saray atateng mo et aaroen day Jehova, baleg so nitulong dad sika. Wadtan met iray elder ed kongregasyon yo ya kualipikadon mangigiyad sika. Niarum ni, tepetan mo ray payunir tan ombiabiahen manangasikaso. Akin ya pinili day manlingkor ya full-time? Panon iran ginmapon nampayunir, tan panon dan sinuportaay sarili da? Anto ray bendisyon ya naawat da?​—Uli. 15:22.

¹⁶ Saramay kabat da kan talaga et sarag da kan ikday makabat a simbawa. Singa bilang, ompan labay mo lan itunday panaaral mod high school tan ibagam ya manpayunir ka la, balet diad tua et agmo labat labay so nairapan ed eskuelaan. Nayarin natebek na sakey a mangaarod sika so motibom tan tulongan to kan namoria a makatulong so paneskuela pian naaralan moy agbastabasta onsuko. Importante itan no labay moy manlingkor ed si Jehova diad interon pusom.​—Sal. 141:5; Uli. 6:6-10.

17. Anto ran desisyon so kaukolan tayon paliisan?

¹⁷ Amin ya manlilingkor ed si Jehova et nipapaarap ed situasyon ya posiblin mamakapuy ed pananisia ra tan mangiyarawid sikara ed si Jehova. (1 Cor. 15:33; Col. 2:8) Balet wala ray klase na trabaho ya mas mapeligrod espiritual nen say arum. Kasin diad lugar yo et wala ray “aderal so pananisia ra a singa sakey a barkon nakneb” lapud pinili dan trabaho? (1 Tim. 1:19) Makabat sirin no paliisan moy manggawa na saray desisyon ya posiblin maneral na relasyon mod Dios.​—Uli. 22:3.

18, 19. No agmo ni naliliknan labay moy manpayunir, antoy gawaen mo?

¹⁸ No talagan labay moy manlingkor ed si Jehova, awat mo ray pankanawnawan iiter tod sika legan ya kalangweran ka ni. Saya so panaon pian manggawa ka na saray desisyon ya ontulong ed sikan makapanlingkor a maliket.​—Sal. 148:12, 13.

¹⁹ Panon to balet no agmo ni naliliknan labay moy manpayunir? Agka onsusuko. Itultuloy mon pabiskegey pananisiam. Kayarin impaliwawa nen apostol Pablo no antoy ginawa to pian nagamoran toy panamendisyon na Dios, insulat to: “No diad antokaman a paraan et duma lay akateenan na nonot yo, iparungtal na Dios ed sikayo so dugan panagnonot. Anggaman ontan, antokaman so inaligwasan tayo la, mantultuloy itayo ni komon ya onaligwas a singa ed dati lan gagawaen tayo.” (Fil. 3:15, 16) Tandaan ya inar-aro ka nen Jehova tan say simbawa to et sankaabigan. Manpatulong kad sikato pian makapanggawa ka na saray makabat ya desisyon legan a kalangweran ka ni.