Nen walay amaloob ed duaran payunir ya manpupulong ed Kenya, abigla ra sanen walay anengneng dan melag a laki ya akarukol ed katri. Talagan melmelag so laman to tan antirikey iray taklay to. Nen ibabaga rad sikato so sipan na Dios ya onsabi panaon et “manlukso so piley a singa sakey ya ulsa,” balibali inyimis to.—Isa. 35:6.

Sayan laki et si Onesmus, ya natan et man-40 años la. Naamtaan na saramay payunir ya manlapud inkianak to et wala lay sakit ton osteogenesis imperfecta, o brittle bone disease. Talagan lupok iray pukel to—natelmeran mo labat na daiset et naputer la. Lapud anggapoy tambal na sakit nen Onesmus, inawat to lan legay bilay ton anosan iyan sakit tan lanang lan aka-wheelchair.

Nampaiyaral na Biblia si Onesmus. Balet, ag-inabuloyan na nanay to ya miaral ed Kingdom Hall ta itatakotan da ompan narisgo. Kanian irerekord na agagi so aral, tan dedengelen itan nen Onesmus diad abung. Nen limay bulan lan manaaral na Biblia si Onesmus, nandesisyon ya miaral anggano singa delikado.

Kasin grinmabe so sakit nen Onesmus lapud pipiaral to? Baliktad laingen so agawa. “Singa naaandi sakit ko no wala ak ed aral,” so kuan to. Naimano ton mas balibali liknaan to nen naamtaan toy katuaan. Naobserbaan met na nanay to ya maliket la natay Onesmus, kanian nampaiyaral met na Biblia. “Say panserbid Dios so tambal na anako,” so inkuan to.

Ag-abayag, nagmaliw ya agbautismadon manangipalapag si Onesmus. Insan nen kien, nampabautismo la tan nagmaliw ya ministeryal a lingkor. Anggano agto nauusar iray sali tan sakey a taklay to, labay nen Onesmus ya gawaey anggaay nayarian ton lingkoran si Jehova. Labay toy man-auxiliary payunir balet manaalangan. Akin ey? Ta amta ton sikatoy mandependid arum a too ya mangitulak ed wheelchair to. Balet nen imbaga to itan ed saray agagi, impromisa dad sikaton tulongan da. Kanian akapan-auxiliary payunir si Onesmus.

Labay met komon nen Onesmus so man-regular payunir balet manaalangan lamet. Balet aminsan, sikatoy apabiskeg ed inagew-agew a teksto. Say teksto et Salmo 34:8 ya say kuan to ditan et: ‘Tawayan tan nengnengen a si Jehova et maong.’ Dinalepdep itan nen Onesmus, tan nandesisyon ya man-regular payunir. Diad sakey simba, apatiran agew ya manpupulong, tan pigarad saray iyaaralan to et onaaligwas ed espiritual. Sikatoy nan-PSS (Pioneer Service School) nen 2010. Malikeliket si Onesmus ta instruktor to imay sakey a payunir ya inmunan nampulong ed sikato!

Naandi lad bilay iray atateng nen Onesmus, balet saray agagid kongregasyon so mangaasikasod sikato. Misalsalamat ed saray bendisyon ya naaawat to, tan agaylay panatalaran to ed agew sano anggapo lay mangibagan, “Mabeblay ak.”—Isa. 33:24.