Nen 1956, nianak ak ya walay spina bifida. Lapud agkinmapot ya maong so neural tube ed spine ko, walay aderal ya nerve kanian ngalngali agak makaakar tan dakdakel ni linmesan graben sakit ko.

Antis ak ya niyanak, inyaralan na sanasawan misionero ya Tasi nen Jehova iray atateng ko. Nen ugaw ak, pigpigara ni so Tasi ed binalegan kon lugar diad Usakos, Namibia. Kanian aaralen mi bilang pamilya iray akaeskedyul ya aaralen ed kongregasyon. Nen pitoy taon ko, nampa-urostomy ak, sakey iyan operasyon ya binutawan day laman ko pian walay pawayay sirit. Nen 14 años ak, awalaan ak na epilepsy. Lapud arawdawi so high school ed sikami tan kaukolan ya asikasoen ak a maong na atateng ko, agko la nituloy so pani-eskuelak.

Anggaman ontan, nandesisyon ak ya pabiskegey espiritualidad ko. Dakel ed saray publikasyon tayo so agni nipatalos ed lenguahe min Afrikaans. Kanian nanaral ak ya manbasay English pian natalosan ko ray libro tayo. Nagmaliw ak ya manangipalapag tan nampabautismo ak ed edad ya 19. Diad sinmublay ya apatiran taon, dakdakel so sakit ko tan problema ed emosyon. Sakey ni, diad lugar mi ya sankakabat iray totoo, ngalngali agko labay so manpulong lapud takot ed too.

Nen masulok ya 20 años ko, inmalis kamid South Africa, tan ditan et akapilimog ak ya siansia ed sakey ya kongregasyon. Talagan malikeliket ak ed satan! Balet, kaukolan koy manpaopera lamet—natan et colostomy.

Ag-abayag kayari na satan, nadngel koy paliwawa na sakey a manangasikaso na sirkito nipaakar ed panagpayunir. Sinmabid pusok so paliwawa to. Antak ya singa imposiblin nasarag ko ta masakit ak, balet aliknak lay tulong nen Jehova diad saray dinadalan kon irap. Kanian nan-apply ak ya regular payunir. Balet lapud kondisyon na laman ko, ag-inaprobaan na saray elder so aplikasyon ko.

Balet, nandesisyon ak ya gawaen koy anggaay nayarin ko diad ministeryo. Lapud suporta nen nanay ko tan arum ni, masulok ya anem bulan ya say oras ko et singa payunir. Apaneknekan ko ya labay kon talagay manpayunir tan agmakasbel so sakit ko. Nan-apply ak lamet, tan naaprobaan a siansia. Nen Setyembre 1, 1988, nagmaliw ak ya regular payunir.

Bilang payunir, naynay kon naliliknay suporta nen Jehova. Say pangibabangat koy katuaan ed arum imbes ya say pannonot lan pannonot ed situasyon ko so namprotekta, amabiskeg, tan tinmulong ed siak ya mas onapit ed si Jehova. Tan talagan malikeliket ak ed impakatulong kod pigaran indibidual ya angidedikad bilay da tan nampabautismo.

Tubat-tubat ni sakit ko, balet ‘inagew-agew ak ya ililibitan nen Jehova na awit ko.’ (Sal. 68:19) Agto ak labat tinulongan ya nasarag so situasyon ko; tinulongan to ak met ya na-enjoy so bilay!