Inusar nen Jesus so Pigpigara ya Mamakan ed Dakel
“Kayari [nen Jesus ya] pinisagpisag iray tinapay, imbunog to iratan ed saray disipulo, insan imbunog iratan na saray disipulo ed saray totoo.”—MAT. 14:19.
1-3. Panon ya pinakan nen Jesus so dakdakel ya totoo ed Betsaida? (Nengnengen so litrato ed sayan pahina.)
IMADYINEN pay eksena. (Basaen so Mateo 14:14-21.) Agawa iya sakbay na Paskua nen 32 C.E. Ngalngali 5,000 ya lalaki, nilikud nid bibii tan ugugaw so tinmumbok ed si Jesus tan saray disipulo to diad nisulinek a pasen na Betsaida, sakey ya lugar ed norte na Dayat na Galilea.
2 Akasian nen Jesus iray totoo kanian pinaabig to ray mansasakit tan binangatan to ra na dakel a bengatla nipaakar ed Panarian na Dios. Nen onlalabi la, imbaga na saray disipulo ya pasempeten la nen Jesus iray totoo pian makakar irad asingger iran baryo tan makasaliw iray naakan da. Balet oniay inkuan nen Jesus: “Ikdan yo ray naakan.” Mankelaw ira segurod imbaga to ta dagdaiset so panangan a walad sikara—limaran tinapay labat tan duaran angkelag a sira.
3 Lapud naabagey to ra, nanggawa na milagro si Jesus—saya labat so milagro ya nisulat ed amin ya apatiran Ebanghelyo. (Mar. 6:35-44; Luc. 9:10-17; Juan 6:1-13) Imbaga tod saray disipulo to ya payurongen da ray totoo ed birdin karikaan ya agrupo-grupo na tunggal 50 tan 100. Kayari ton impabendisyonan, pinisagpisag to ray tinapay tan inapag-apag to ray sira. Imbes ya sikaton mismoy mangibunog ed totoo, inter to iratan “ed saray disipulo, insan imbunog iratan na saray disipulo ed saray totoo.” Makapakelaw ta dakdakel so sulok! Isipen pa: Inusar nen Jesus so pigpigara—saray disipulo to—ya mamakan ed nilibo. *
4. (a) Anton panangan so mas importantid si Jesus, tan akin? (b) Antoy pantongtongan tayod sayan artikulo tan ed onsublay?
4 Balet mas importante ed si Jesus so pangitarya na espiritual ya naakan parad saray papatumbok to. Amta to ya say pangan ed espiritual, say katuaan ya walad Salita na Dios, et mangiter na bilay ya andi-anggaan. (Juan 6:26, 27; 17:3) Lapud panangabagey ya singa alikna to sanen pinakan to ray totoo, inusar toy dakel ya panaon to pian ibangat iray papatumbok to. (Mar. 6:34) Balet amta to ya magano labat so pambilay tod dalin tan sikatoy ompawil ed tawen. (Mat. 16:21; Juan 14:12) Panon ton tuloytuloy a napakan ed espiritual iray papatumbok to diad dalin? Singa ginawa to nensaman, mangusar met na pigpigara ya mamakan ed dakel. Balet siopa iratan ya pigpigara? Nengnengen tayo no panon ya angusar si Jesus na pigpigara pian napakan so dakel ya alanaan a papatumbok to nen inmunan siglo. Insan diad onsublay ya artikulo, pantongtongan tayo iyan tepet ya importantid balang sakey: Panon tayon nabirbir so pigpigara ya uusaren nen Jesus a mamakan ed sikatayo natan?
Inusar nen Jesus so pigpigara ya mamakan ed nilibo (Nengnengen so parapo 4)
PINILI NEN JESUS SO PIGPIGARA
5, 6. (a) Anton importantin desisyon so ginawa nen Jesus pian naseguron tuloytuloy a napakan ed espiritual iray papatumbok to kayari ipatey to? (b) Panon ya imparaan nen Jesus iray apostol to parad importantin kimey kayari ipatey to?
5 Say sakey ya responsablin ulo na pamilya et manggaway uksoyan pian naasikasoy pamilya to no bilang ta ompatey. Mipadpara, si Jesus—say magmaliw ya Ulo na Kristianon kongregasyon—et nanggawa na saray uksoyan pian seguradon naasikasoy espiritualidad na papatumbok to kayari ipatey to. (Efe. 1:22) Singa bilang, manga duay taon antis na impatey to, walay ginawa ton importantin desisyon. Pinili to ray unonan kaiba ed pigpigara ya usaren ton mamakan ed dakel. Imanoey agawa.
6 Kayarin nampikasi ya sanlabi, tinipon to ray disipulo to tan amili ed sikara na 12 ya apostol. (Luc. 6:12-16) Diad sinmublay a duay taon, sikatoy maap-apit ed labindua tan imbangat to ra diad salita tan alimbawa. Amta ton dakel ni kaukolan dan naaralan. Diad tua et siansia nin tinawag iran “disipulo” o estudyante. (Mat. 11:1; 20:17) Personal to ran sinimbawa tan impasal to ran maong ed ministeryo. (Mat. 10:1-42; 20:20-23; Luc. 8:1; 9:52-55) Mapatnag ya ipaparaan to rad importantin kimey kayari ipatey to tan ipawil tod tawen.
7. Panon ya angiter na ideya si Jesus ed magmaliw ya responsabilidad na saray apostol?
7 Anto so magmaliw ya responsabilidad na saray apostol? Nen asingger lay Pentecostes 33 C.E., malinew ya saray apostol et naikdan na ‘betang bilang manangasikaso.’ (Gawa 1:20) Anto so manunan responsabilidad da? Makaala tayoy ideya ed samay impitongtong nen Jesus ed si apostol Pedro kayari inkioli to. (Basaen so Juan 21:1, 2, 15-17.) Oniay imbaga nen Jesus ed si Pedro a nadngel met na arum ya apostol: “Pakan mo iray angkekelag a karnerok.” Napatnagan ed saman ya imbaga nen Jesus a saray apostol et kaibad pigpigara ya usaren ton mangitarya na espiritual a naakan parad dakel. Talagan inad-aro nen Jesus iray ‘angkekelag a karnero’ to! *
PAMAPAKAN ED DAKEL MANLAPU LAD PENTECOSTES
8. Panon ya impanengneng na saray balon mananisia nen Pentecostes ya malinlinew ed sikara no siopay uusaren na Kristo?
8 Manlapud Pentecostes 33 C.E., inusar na apaoli lan Kristo iray apostol to ya mamakan ed arum ni ran alanaan a disipulo to. (Basaen so Gawa 2:41, 42.) Malinlinew itan ed saray Judio tan proselitan nagmaliw ya alanaan a Kristiano ed saman a panaon. Ag-ira nanduaruwa tan “intultuloy dan inaral iray ibabangat na saray apostol.” Unong ed sakey ya scholar, say Griegon salita ya impatalos ya “intultuloy dan inaral” et nayarin mankabaliksay “mapekder tan determinadon panmatoor ed sakey ya kimey.” Narnarasan ed espiritual iray balon mananisia, tan amta ra no iner so pananapan day espiritual a naakan. Lapud malet ya katooran da, nanmatalek irad saray apostol ya mangipaliwawad saray imbaga tan ginawa nen Jesus, ontan met ed kabaliksan na saray kasulatan ya ontutukoy ed sikato. *—Gawa 2:22-36.
9. Panon ya inyuna na saray apostol so responsabilidad dan mamakan ed saray karnero nen Jesus?
9 Manunaan ed saray apostol so responsabilidad dan mamakan ed saray karnero nen Jesus. Singa bilang, imanoen no panon dan inasikasoy sensitibon isyu ya posiblin pansengegay inkaapag-apag ed balon kongregasyon. Diad tua, say problema et nipaakar ed panangan—literal ya panangan. Napapaulyanan iray bibiin balo ya mansasalitay Griego diad inagew-agew ya panagbunog na naakan, balet agnapapaulyanan iray bibiin balo ya mansasalitay Hebreo. Antoy ginawa na labindua ya apostol? Anuro ira na pitoran kualipikadon lalaki ya mangasikaso ed “importantin kimey,” say panagbunog na naakan. Maslak ed saray apostol et kaiban nambunog na naakan sanen nanggaway milagro si Jesus. Balet amta ra ya mas importante so pamakan ed espiritual. Kanian, inusar day amin a panaon tan biskeg dad “ministeryo nipaakar ed salita.”—Gawa 6:1-6.
10. Panon ya inusar na Kristo iray apostol tan mamasiken ed Jerusalem?
10 Kasabi 49 C.E., saray mabilay nin apostol et wala la ray kaiba dan kualipikadon mamasiken. (Basaen so Gawa 15:1, 2.) “Saray apostol tan mamasiken ed Jerusalem” so nanlingkor bilang mananguley ya ulop. Bilang Ulo na kongregasyon, inusar na Kristo iyan melag a grupo na kualipikadon lalaki a manresolbid pandurumaan na pakatalos ed doktrina, tan mangasikaso tan mangidaulod pangipulong tan pangibangat ed maong a balita na Panarian.—Gawa 15:6-29; 21:17-19; Col. 1:18.
11, 12. (a) Antoy paneknek ya benendisyonan nen Jehova so uksoyan ya inusar na Anak to diad impamakan ed saray kongregasyon nen inmunan siglo? (b) Akin et mainomay ya nabirbir so inusar na Kristo ya mamakan ed saray karnero to?
11 Kasin benendisyonan nen Jehova so uksoyan ya inusar na Anak to diad impamakan ed saray kongregasyon nen inmunan siglo? On! Panon tayon naseguro? Oniay ibabaga na Gawa: “Natan legan iran manbiabiahe [si apostol Pablo tan saray kaiba to] diad saray syudad, ipapasabi ra ed saramay wadman a nepeg ya unoren iray totontonen a denisisyonan na saray apostol tan saray mamasiken a walad Jerusalem. Lapud saya, saray kongregasyon et nantultuloy a binmiskeg ed pananisia tan ondarakel so bilang da ed kada agew.” (Gawa 16:4, 5) Imanoen ya inmaligwas iraman ya kongregasyon lapud matoor iran nampasakop ed mananguley ya ulop ed Jerusalem. Agta paneknek itan ya benendisyonan nen Jehova so uksoyan ya inusar na Anak to diad impamakan ed saray kongregasyon? Agtayo lilingwanan ya onaligwas itayo labat ed espiritual no bendisyonan itayo nen Jehova.—Uli. 10:22; 1 Cor. 3:6, 7.
12 Anengneng tayo ya walay inusar nen Jesus ya uksoyan diad impamakan tod saray papatumbok to: Inusar toy pigpigara ya mamakan ed dakel. Mainomay iran nabirbir, lalo la ta sarag na saray apostol—saray orihinal a membro na mananguley ya ulop—a paneknekan ya sikaray susuportaan na Dios. Oniay ibabaga na Gawa 5:12: “Saray apostol et nantultuloy a nanggawa na dakel a tanda tan pakelaw ed limog na saray totoo.” * Kanian, agla kaukolan ya itepet na saray nagmaliw ya Kristiano, ‘Siopan talaga so uusaren na Kristo ya mamakan ed saray karnero to?’ Balet diad sampot na inmunan siglo, anguman so situasyon.
Nen inmunan siglo, walay malinew ya paneknek no siopay uusaren nen Jesus ya mamakan ed kongregasyon (Nengnengen so parapo 12)
SANEN DAKEL IRAY SISANYAS TAN PIGPIGARAY TRIGO
13, 14. (a) Antoy impasakbay nen Jesus, tan panon itan ya agawa? (b) Anto so duaran panlapuan na panangataki? (Nengnengen so kaaruman ya impormasyon.)
13 Impasakbay nen Jesus ya walay mangataki ed Kristianon kongregasyon. Tandaan ya diad samay ilustrasyon to nipaakar ed trigo tan sisanyas, imbaga to ya say uma ya kakkapantanem na trigo (saray alanaan ya Kristiano) et nataneman met na saray sisanyas (saray peke ya Kristiano). Inkuan to ya paulyan iran bansag ya ontubo tan ombaleg anggad panag-ani, a nagawa diad “sampot a panaon na sayan sistema na mundo.” (Mat. 13:24-30, 36-43) Ag-abayag, agawa iratan ya imbaga nen Jesus. *
14 Ginmapo so apostasya nen inmunan siglo, balet ‘inamper’ itan na saray matoor ya apostol nen Jesus pian ag-ira narutakan tan naimpluensyaan na palson bangat. (2 Tes. 2:3, 6, 7) Balet nen inatey lan amin iray apostol, linmamut tan kinmayat so apostasya. Diad loob na pigaran siglo et bansag ya binmaleg iray trigo tan sisanyas. Legan na satan a panaon et dinmakel iray sisanyas tan pigpigara iray trigo. Anggapoy organisadon grupo ya uusaren a mangitaryay regular ya espiritual a naakan. Balet manguman lanlamang itan. Kapigan?
SIOPA SO MAMAKAN DIAD PANAOY PANAG-ANI?
15, 16. Antoy resulta na maseet ya impanaral na saray Estudyante na Biblia, tan antoy linmesan tepet?
15 Legan a manasingger so panampot na panaoy ibabaleg na saray trigo tan sisanyas, wala ray nagmaliw ya interesadon maong ed katuaan. Tandaan ya nen 1870’s, walay melag a grupo ya talagan labay dan naamtaay katuaan. Nankakasakey tan amorma ira na klase pian araley Biblia. Ag-ira kaibad saray sisanyas—saray peke ya Kristiano ya membro na saray relihyon tan sekta na Kakristianoan. Tinawag day grupo ra ya Estudyante na Biblia. Mapaabeba ira tan lukas so nonot da, tan maalwar dan inaral so Kasulatan.—Mat. 11:25.
16 Maabig so resulta na maseet ya impanaral na saray Estudyante na Biblia. Impaamta na saratan ya matoor a lalaki tan bibii iray palson doktrina tan inyabawag da ray espiritual a katuaan, angi-publish tan angibunog ira na saray literaturan base ed Biblia anggad ararawin pasen. Lapud satan, asabi puso na dakel a totoo tan akombinse iran satan so katuaan. Kanian oniay nayarin nitepet tayo: Antis na 1914, kasin saray Estudyante na Biblia so tinuro na Kristo ya mamakan ed saray karnero to? Andi. Panaon ni labat ya ombabaleg iray trigo tan sisanyas, tan say grupon usaren to ya mangitarya na espiritual a naakan et napoporma ni labat. Aliwa ni itan ya panaon pian ibiig iray singa sisanyas ya Kristiano ed saray singa trigo ya Kristiano.
17. Anto ran importantin ebento so agawa manlapu nen 1914?
17 Singa naaralan tayod apalabas ya artikulo, ginmapo so panaon na panag-ani nen 1914. Manlapud satan a taon, wala ray importantin ebento ya agawa. Si Jesus et nitrono ya Ari, tan ginmapoy kaunoran iran agew. (Apo. 11:15) Manlapud 1914 anggad kagapoy 1919, kaiba nen Jesus so Ama to pian gawaey kakkaukolan a kimey diad espiritual a templo, say pangusisa tan panlinis. * (Mal. 3:1-4) Insan nen 1919, ginmapoy panaon na panagtipon na trigo. Kasin panaon la itan pian manuro so Kristo na sakey ya organisadon grupo ya usaren ton mangitarya na espiritual a naakan? On!
18. Antoy impasakbay nen Jesus ya gawaen to, tan anto so importantin tepet diad inggapo na kaunoran iran agew?
18 Diad samay propesiya nen Jesus nipaakar ed panaoy anggaan, impasakbay to ya sikatoy manuro na usaren ton mangiter na espiritual a ‘naakan diad dugan panaon.’ (Mat. 24:45-47) Siopay usaren to? Singa samay ginawa to nen inmunan siglo, mangusar lamet si Jesus na pigpigara ya mamakan ed dakel. Balet diad inggapo na kaunoran iran agew, say importantin tepet et, Siopa iratay pigpigara? Diad onsublay ya artikulo, naebatan itan tan saray arum nin tepet nipaakar ed propesiya nen Jesus.
^ par. 3 Parapo 3: Diad sakey nin inkagawa ya pinakan nen Jesus so 4,000 ya lalaki, nilikud ed bibii tan ugugaw, inter to lamet so panangan “ed saray disipulo, insan imbunog da iratan ed totoo.”—Mat. 15:32-38.
^ par. 7 Parapo 7: Diad panaon nen Pedro, amin ya ‘angkekelag ya karnero’ a pakanen et diad tawen so ilalo ra.
^ par. 8 Parapo 8: Saray balon mananisia et “intultuloy dan inaral iray ibabangat na saray apostol.” Ipapanengneng na sayan balikas a regular ya manbabangat iray apostol. Say arum ya bangat da et akarekord ed pinuyanan iran libro tan nagmaliw a kabiangan na Kristianon Griegon Kasulatan.
^ par. 12 Parapo 12: Anggaman wala ni ray arum ya Kristianon naikdan na mamilagron regalo na espiritu nilikud ed saray apostol, mapatnag ya saratan a regalo et kaslakan ya niiter panamegley na sakey ya apostol o legan a walay wadman ya apostol.—Gawa 8:14-18; 10:44, 45.
^ par. 13 Parapo 13: Ipapanengneng na sulat nen apostol Pablo ed Gawa 20:29, 30 ya walay duaran panlapuan na panangataki ed kongregasyon. Unona, saray peke ya Kristiano (“sisanyas”) et “onloob ed pegley” na saray tuan Kristiano. Komadua, “diad limog” na saray tuan Kristiano, wala ray magmaliw ya apostata a mansalita na “pikewet iran bengatla.”
