‘Panon Ak a Makapanpulong?’

Diad interon mundo, wala ray ehemplon agagi ya matoor a mibibiang ed panagpulong a kimey anggaman walay graben sakit da. Alaen tayoy alimbawa nen Dalia, a manaayam ed Vilnius, say kabisera na Lithuania.

Masulok lan 30 años nen Dalia. Manlapu lad inkianak to, sikatoy nanairapan lapud cerebral apoplexy. Lapud satan a sakit et sikatoy aparalisa tan naiirapan a maong a mansalita. Kanian, saray kapamilya to labat so talagan makatalos ed ibabaga to. Kaiba tod abung si nanay ton Galina, a mangaasikasod sikato. Anggano naiirapan tan napapagaan si Dalia, sikatoy mansiasiansian positibo. Panon ton agawaan itan?

Impaliwawa nen Galina: “Nen 1999, binmisitad sikami so kapinsan kon si Apolonija. Naimano min kabkabisado toy Biblia to, tan dakel so tepet nen Dalia ed sikato. Si Apolonija et sakey ed saray Tasi nen Jehova, ag-abayag et inyaralan toy Dalia. Sagpaminsan et mimi-study ak met pian ipatalos so ibabaga nen Dalia. Tan naimanok ya nagugunggonaan ed amin ya nanaaralan to. Kanian nampa-study ak met.”

Sanen natatalosan la nen Dalia iray katuaan ed Biblia, walay tepet ya angonigon ed sikato. Diad saginonor et intepet tod Apolonija: “Panon a makapanpulong so sakey ya paralisado, a singa siak?” (Mat. 28:19, 20) Pinaseguroan nen Apolonija si Dalia: “Agka natatakot. Tulongan ka nen Jehova.” Tan tua met ya tinulongan nen Jehova.

Panon sirin ya akapampulong si Dalia? Diad nanduruman paraan. Sikatoy tinulongan na agagin bibii ya manggaway sulat a base ed Biblia. Unona, ibaga nen Dalia ed saray sister so nononoten to. Insan ira manggaway sulat unong ed imbaga to. Manpupulong met si Dalia panamegley na panti-text ed cellphone to. Tan no marakep so panaon, ibaan na saray kakongregasyon to ya manpulong diad parke tan diad karsada.

Inmaligwas ed espiritual si Dalia tan say nanay to. Indedika ray bilay dad si Jehova tan nen Nobyembre 2004 et bansag iran nampabautismo. Nen Setyembre 2008, walay aporman grupo ya mansasalitay Polish diad Vilnius. Lapud kaukolan so dakel ya manangipalapag na Panarian diad satan a grupo, nan-volunteer iran sanina. Inkuan nen Dalia: “Wala ray bulan a mapaga ak no agak ni akapanpulong. Balet kayarik ya ipikasi itan ed si Jehova, biglan walay mitarato ed siak ya manpulong.” Antoy liknaan na pinablin agi tayon si Dalia ed kipapasen to? Oniay kuan to: “Abaldadoy laman ko lapud sakit, balet pueray nonot ko. Malikeliket ak ta makakapanpulong ak ed arum nipaakar ed si Jehova!”