Aroen so Inkatunong ed Interon Pusom

“Sika aroen mo so inkatunong.”​—SAL. 45:7.

1. Antoy makatulong ed sikatayo pian natumbok iray “basbas na inkatunong”?

PANAMEGLEY na Salita tan masanton espiritu nen Jehova, iwawanwan to iray totoo to ed “saray basbas na inkatunong.” (Sal. 23:3, NW) Balet lapud aliwa itayon perpekto, walay tendensia tayon agtumboken itan a basbas. Pian makapawil itayon manggaway duga, kaukolan tayoy mansagpot. Antoy makatulong? Singa si Jesus, nepeg tayon aroen so panggaway duga.​—Basaen so Salmo 45:7.

2. Antoray “basbas na inkatunong”?

² Antoray “basbas na inkatunong”? Sarayan simbolikon basbas et paraan na kabibilay a base’d estandarte nen Jehova ed inkatunong. Diad Hebreo tan Griego, say “inkatunong” et mankabaliksay “maptek,” a manutukoy ed mapeget ya panumbok ed no antoy duga. Lapud si Jehova so “panag-ayaman na inkatunong,” maliket ya paigigiya iray mandadayew ed sikato pian naamtaan day maptek a basbas ya nepeg dan tumboken.​—Jer. 50:7.

3. Panon tayon naaralan a nagkalalo so inkatunong na Dios?

³ Napaliket ti’ labat so Dios no interon puso tayon pansagpotan ya unoren iray matunong ya estandarte to. (Deu. 32:4) Onggapo itan sano gawaen tayoy anggaay nayarian tayon aralen so nipaakar ed si Jehova a Dios diad Salita to, say Biblia. No kapigan tayo lalon kakabaten so Dios, tan inagew-agew ya onaapit ed sikato, lalo tayon naaro so inkatunong to. (Sant. 4:8) Nepeg a paigiya tayo met ed pinuyanan a Salita na Dios sano kaukolan tayoy manggawa na importante iran desisyon.

Anapen so Inkatunong na Dios

4. Antoy kabaliksan na pananap ed inkatunong na Dios?

⁴ Basaen so Mateo 6:33. Say pananap ed inkatunong na Dios et aglabat mankabaliksay pangipulong tayo’d maong a balita na Panarian. Pian abobonan nen Jehova so sagradon serbisyo tayo, nepeg a mitunosan so inagew-agew a kondukta tayo ed saray atagey ya estandarte to. Antoy kaukolan a gawaen na saray manaanap ed inkatunong nen Jehova? Nepeg dan “isulong so balon personalidad ya apalsa unong ed linawa na Dios tan mitunosan ed saray kakaukolanen na tuan inkatunong tan katooran.”​—Efe. 4:24.

5. Antoy makatulong pian natalonaan tayoy inkadismaya?

⁵ Legan tayon panggugunaetay pambilay unong ed matunong iran estandarte na Dios, nayarin no maminsan et nadismaya tayo lapud saray kalilingoan tayo. Antoy makatulong pian natalonaan tayo so makapakapuy ya inkadismaya tan naaralan ya aroen tan ipatnag so inkatunong? (Uli. 24:10) Kaukolan a regular itayon manpikasi ed si Jehova “tekep na masimoon a kapusoan a napno na kompiyansa lapud pananisia.” (Heb. 10:19-22) Balanglan alanaan itayo odino walaan na mangaraldalin ya ilalo, panisiaan tayo so dondon bagat nen Jesu-Kristo tan say betang to bilang maong ya Atagey a Saserdote. (Roma 5:8; Heb. 4:14-16) Say agawaan na nipaagus a dala nen Jesus et inyilustra ed sankaunaan ya isyu na sayan magasin. (1 Juan 1:6, 7) Oniay nabasa ed saman ya artikulo: “Amta tayo a [sano] say sakey ya ambalangan bengatla [et] ipetek  ed salming ya ambalanga diad maliwawa, magmaliw a singa amputi imay bengatla; kanian anggaman singa ambalanga iray kasalanan tayo, sano nengnengen iratan na Dios panamegley na dala nen Kristo, singa iratan amputi.” (Hulyo 1879, p. 6) Agaylan makapadinayew ya probisyon so inter nen Jehova panamegley na dondon bagat na pinabpabli ton Anak!​—Isa. 1:18.

Asikasoen so Espiritual ya Armas Mo

6. Akin et importantin asikasoen so espiritual ya armas tayo?

⁶ Kaukolan a lawas walad sikatayo so ‘samben ed pagew na inkatunong,’ lapud makanan kabiangan itan na espiritual ya armas a manlalapud Dios. (Efe. 6:11, 14) Balanglan agano ti’ ni labat ya indedikay bilay tayo’d si Jehova odino pigay dekada lan manlilingkor ed sikato, importantin asikasoen tayo’d inagew-agew so espiritual ya armas tayo. Akin? Lapud say Diablo tan saray demonyo to et imbantak diad dalin. (Apo. 12:7-12) Agaylay pasnok nen Satanas ta amta ton antikey lay panaon to. Kanian, sikatoy lalon mamapasyan mangaataki ed totoo na Dios. Kasin papablien tayo so ‘samben ed pagew na inkatunong’ tayo?

7. Antoy nepeg a kondukta tayo no ipapasen tayon nakaukolan so ‘samben ed pagew na inkatunong’?

⁷ Say samben ed pagew et manalimbeng ed literal a puso. Lapud aliwa tayon perpekto, walay tendensia na simbolikon puso tayo ya magmaliw a mapalikdo tan mairap a kontrolen. (Jer. 17:9) Walay inklinasyon na puso tayo a manggaway aliwa, kanian importantin ipasal tan disiplinaen itan. (Gen. 8:21) No ipapasen tayon nakaukolan so ‘samben ed pagew na inkatunong,’ agtayo itan ekalen anggan temporaryo labat diad pamili na saray panagligliwaan a kabusol na Dios; nisay manpantasyan manggaway makapuy. Agtayo sayangey dakel ya importantin panaon diad pambantay na TV. Imbes, pansagpotan tayon gawaey makapaliket ed si Jehova. Anggano natumba tayo no maminsan lapud mauges a panagnonot, diad tulong nen Jehova et makabangon ti’n makabangon.​—Basaen so Uliran 24:16.

8. Akin et kaukolan tayoy “samper na pananisia”?

⁸ Say sakey nin kabiangan na espiritual ya armas tayo et say “samper na pananisia.” Tulongan itayo na satan a “naerep [so] amin a mandarlang a pana na samay mauges.” (Efe. 6:16) Insan, say pananisia tan sigpot puson panangaro ed si Jehova so ontulong ed sikatayo pian gawaey inkatunong tan mansiansia ed dalan a mamaarap ed bilay ya andi-anggaan. No kapigan tayo lalon aaroen si Jehova, ditan tayo lalon papablien so inkatunong to. Say konsiensia tayo balet ey? Panon itayon tutulongan na satan ed pansasagpot tayon aroey inkatunong?

Pansiansiaey Malinis a Konsiensia

9. Antoy gunggona no pansiansiaen tayon malinis so konsiensia tayo?

⁹ Nen nampabautismo tayo, kinerew tayo’d si Jehova so “malinis a konsiensia.” (1 Ped. 3:21) Lapud panisiaan tayo so dondon, sinakbongan na dala nen Jesus iray kasalanan tayo  kanian awalaan itayo na malinis a talindeg ed Dios. Balet, pian napansiansiay ontan a talindeg, kaukolan a lawas malinis so konsiensia tayo. No gogonigonen tan papasakbayan itayo no maminsan na konsiensia tayo, pisalamatan tayo ta onggagana itan. Satan a panadagdag na konsiensia tayo et pakapatnagan ya ag-itan kinmalyo diad pangunor ed saray maptek a dalan nen Jehova. (1 Tim. 4:2) Balet wala ni betang na konsiensia ed saramay malabay a mangaro ed inkatunong.

10, 11. (a) Mangisalaysay na eksperiensya a mangipapanengneng a nepeg tayon talinengen so impasal na Biblian konsiensia tayo. (b) Akin et mamaliket ed sikatayo so panangaro ed inkatunong?

¹⁰ No manggawa itayo na makapuy, kondenaen odino ag-itayo pandeenen na konsiensia tayo. Alimbawa, walay sakey a kalangweran ya inmarawi ed “basbas na inkatunong.” Sikatoy naadik ed pornograpiya tan marihuana. Lapud nakokonsiensia sano mimiaral tan liknaen ton sikatoy mankunkunwari no manpupulong, tinmunda lan mibiang ed saray Kristianon kimkimey. “Balet,” inkuan ton, “agko amtan kalabanen ak manaya na konsiensiak. Binmayag na apat taon so kalokoan ko.” Insan, ninonot toy ompawil la’d katuaan. Anggano lingo ton inisip ya agdengelen nen Jehova so pikakasi to, siansia nin nampikasi tan kinmerew na perdona. Anggapo ni samploran minuto, nitan lay ina to ya amaseseg ed sikaton miaral lamet. Sikatoy akiaral tan kinerew to’d sakey ya elder ya iyaralan da. Asabi panaon, sikatoy abautismoan, tan agaylay pisalsalamat to lapud impanulong nen Jehova ed sikato.

¹¹ Agta mipakna tayo a say peteg a liket et manlalapud panggaway duga? Legan tayon aaralen ya aroen so inkatunong tan ipanengneng itan a nagkalalo, mas panggayagaan tayoy manggawa na makapaliket ed Ama tayon walad tawen. Tan nonoten pa! Nasabi panaon, liket labat so nalikna na amin a totoo lapud malinis so konsiensia ra. Sigpot ti’ lan nipatnag iray kualidad na Dios. Kanian, kaukolan tayon itanem ed puso tayo so panangaro ed inkatunong pian napaliket si Jehova.​—Uli. 23:15, 16.

12, 13. Panon tayon nipasal so konsiensia tayo?

¹² Panon tayon nipasal so konsiensia tayo? Sano aaralen tayo so Biblia tan saray base’d Biblian publikasyon, kaukolan a tandaan a “say puso na maptek aralen [odino dalepdepen] to so onebat.” (Uli. 15:28) Imanoen no panon a makagunggona iya sano walaray dedesisyonan tayo nipaakar ed trabaho. No say sakey a trabaho et talagan misumlangan ed saray kakaukolanen na Kasulatan, maslak ed sikatayo et tampol ya ontalineng ed bilin ya inter panamegley na matoor tan makabat ya aripen. Balet, no say sakey a trabaho et aliwan malinew no kasin naabobonan odino andi, nepeg tayon aralen iray prinsipyo na Biblia tan ipikasi so nipaakar ed saratan. * Kaiba ed sarayan prinsipyo so pangonsidera ed no kasin pakatiroran itan na arum. (1 Cor. 10:31-33) Say nagkalalo lan ikonsidera tayo et saray  prinsipyon mangilalanor ed relasyon tayo’d Dios. No talagan tudtua si Jehova ed sikatayo, itepet tayo ni ed inkasikatayo, ‘Kasin nasakitan koy Jehova no awaten ko iyan trabaho?’​—Sal. 78:40, 41.

¹³ Sano manpaparaan parad Panagaral na Panag-Bantayan odino Panagaral na Kongregasyon ed Biblia, tandaan a kaukolan tayon dalepdepen so impormasyon. Kasin basta tayo labat la gugulisan so ebat insan la ombaliksat ed onsublay a parapo? Say onian panagaral et agmamaaralem ed panangaro tayo’d inkatunong tan agnabayuboan so sensitibon konsiensia. Pian naaro tayo so inkatunong, kaukolan ya makuli tayon aralen tan dalepdepen iray nababasa tayo ed Salita na Dios. On, pian naaralan tayoy inkatunong ed interon puso, kaukolay pansagpot!

Naeerasan tan Napepegaan ed Inkatunong

14. Antoy labay nen Jehova a Dios tan nen Jesu-Kristo a nalikna tayo’d sagradon serbisyo tayo?

¹⁴ Labay nen Jehova a Dios tan nen Jesu-Kristo a magmaliw itayon maliket legan a gagawaen so sagradon serbisyo. Antoy mamaliket ed sikatayo? Siempre, say panangaro ed inkatunong! Diad Sermon nen Jesus ed Palandey, inkuanto: “Maliket iramay naeerasan tan napepegaan parad inkatunong, ta napenek ira.” (Mat. 5:6) Antoy kabaliksan na saya ed saray manpipilalek a mangaro ed inkatunong?

15, 16. Panon a napenek so pakakaerasan tan pakakapgaan ed espiritual na saray mangaaro ed inkatunong?

¹⁵ Say mundon pambibilayan tayo et uuleyan na sakey a mauges. (1 Juan 5:19) No manbasa tayo na dyaryo, naamtaan tayo iray onggagraben kaugsan tan karawalan diad nanduruman pasen. Makapagonigon ed sakey a matunong so inkaruksa na too ed kapara ton too. (Ecl. 8:9) Diad sikatayoran mangaaro ed si Jehova, amta tayo ya sikato labat so makapenek ed espiritual ya pakakaerasan tan pakakapgaan na totoon manpipilalek ya aralen so inkatunong. Magano lan naandi iray marelmeng, tan agla pakagonigonan na saray mangaaro ed inkatunong iray totoon mananumlang na ganggan tan saray mauges a kagagawa ra. (2 Ped. 2:7, 8) Agaylan pakainawaan iya!

¹⁶ Bilang lingkor nen Jehova tan papatumbok nen Jesu-Kristo, natatalosan tayo a “napenek” so amin ya naeerasan tan napepegaan ed inkatunong. Sigpot iran napenek panamegley na inyuksoy na Dios ya balon katawenan tan balon dalin a ‘panayaman na inkatunong.’ (2 Ped. 3:13) Kanian diad sayan mundo nen Satanas, agtayo komon naeekalay ilalo odino mankelaw no akin a say panamairap tan karawalan et adaeg toy inkatunong. (Ecl. 5:8) Si Jehova, say Sankatagyan ed Amin, so makaamta ed nagagawa tan magano to lan iliktar iray mangaaro ed inkatunong.

Gunggona na Pangaro ed Inkatunong

17. Antoray arum a gunggona na pangaro ed inkatunong?

¹⁷ Idadanet na Salmo 146:8 so manunan gunggona na panumbok ed basbas na inkatunong. Inkanta na salmista: “Si Jehova inaro to so saray matunong.” Nonot mo pa! Inaro itayo na Soberano ed uniberso lapud aaroen tayoy inkatunong! Lapud panangaro nen Jehova, seguradon taryaan to tayo legan ti’n iyuuna so Panarian ed bilay tayo. (Basaen so Salmo 37:25; Uliran 10:3.) Agmanbayag, tawiren na saray mangaaro ed inkatunong so dalin. (Uli. 13:22) Dakel ed saray totoo na Dios  ya angaro ed inkatunong et natumangan na agnasabsabaan a liket tan bilay ya andi-angga diad marakdakep ya paraison dalin. Natan ni labat, saray mangaaro ed inkatunong na Dios et natutumangan la na deen na nonot, diad ontan et mankakasakey iray pamilya tan kongregasyon da.​—Fil. 4:6, 7.

18. Antoray itultuloy tayon gawaen legan ya tatalaranan so agew nen Jehova?

¹⁸ Legan tayon tatalaranan so isabi na baleg ya agew nen Jehova, nepeg ya itultuloy tayon anapen so inkatunong to. (Sof. 2:2, 3) Ipanengneng tayo sirin so tuan panangaro ed maptek iran dalan nen Jehova a Dios. Kabiangan ed satan so lawas pangisulong na ‘samben ed pagew na inkatunong’ pian nasalimbengan so puso tayo. Kaukolan met a pansiansiaen ti’n malinis so konsiensia tayo, a mamaliket ed sikatayo tan ed Dios.​—Uli. 27:11.

19. Antoy determinado tayon gawaen, tan antoy aralen ed ontumbok ya artikulo?

¹⁹ “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awa. 16:9) Talagan makapaligliwa itan ed sikatayo legan tayon gagawaen so maptek diad sayan magulon mundo ya onloloor so ag-inkaligen, karawalan, tan kaugsan! Tua, nayarin pankelawan na dakel a totoon sinmian ed Dios so inkatunong tayo. Balet nagugunggonaan tayon maong diad panutumbok ed inkatunong nen Jehova. (Isa. 48:17; 1 Ped. 4:4) Kanian pian magmaliw itayon maliket, komon ta itultuloy tayon ipatnag tan aroen ed interon puso so inkatunong. Balet, say pangaro’d inkatunong ed interon puso et lalanoren toy pambusol ed kaugsan. Aralen ed onsublay ya artikulo no antoy kabaliksan na saya.

[Paimano ed leksab]

Antoy Ebat Mo?

• Akin a nakaukolan so panamabli’d dondon pian naaroy inkatunong?

• Akin et kaukolan tayon isulong so ‘samben ed pagew na inkatunong’?

• Panon tayon nipasal so konsiensia tayo?

[Tepetepet Parad Panagaral]

[Litrato ed pahina 26]

Ontulong so nipasal a konsiensia tayo sano walaray dedesisyonan nipaakar ed trabaho