Si Jehova so Soberanon Katawan Tayo!

“Say Soberanon Katawan a Jehova so pansasalimbengan ko.”​—SAL. 73:28, NW.

1. Antoy tutukoyen nen Pablo diad 1 Corinto 7:31?

“SAY nanenengneng tayo natan ed sayan mundo et manguuman,” kuan nen apostol Pablo. (1 Cor. 7:31) Diad saya et inyaliling to so mundo ed sakey ya entablado, a wala ray artista ed drama ya onaakton bida o kontrabida, ya anggad manguman iray eksena.

2, 3. (a) Say impangataki ed soberanya nen Jehova et niyaliling ed anto? (b) Antoran tepet so aralen tayo?

² Diad panaon tayo, walay nagagawan drama ya im-importante, tan nalalanor ka! Nipaakar iya ed kiyalangon na soberanya nen Jehova a Dios. Say istorya na sayan drama et singa diad sakey a bansa ya walay legal a gobiernon manguuley pian napansiansiay uksoy. Balet, walay grupon rebelde a manasaol, manuduksa, tan mamapatey. Sayan ilegal ya organisasyon et kontra ed manuuley, tan nasusubok so katooran na amin ya sakop na gobierno.

³ Ontan so situasyon ed interon uniberso. Walay legal ya inletneg a gobierno na “Soberanon Katawan a Jehova.” (Sal. 71:5, NW) Balet, saray totoo natan et napepeligro’d sakey ya rebelden organisasyon ya idadaulo na “sakey a mauges.” (1 Juan 5:19) Subok itan ed legal a gobierno na Dios tan ed katooran na amin a sakop to. Akin et oniay agawa? Akin et inabuloyan iya na Dios? Antoy nagawaan na balang sakey ed sikatayo diad saya?

Detalye na Drama

4. Anto so duaran isyu a nalalanor so interon uniberso?

⁴ Sayan drama a nalalanor so interon uniberso et walay duaran isyu: Say soberanya nen Jehova tan integridad na too. Diad Biblia, mabetbet a natatawag si Jehova a “say Soberanon Katawan.” Singa bilang, lapud manmamatalek a maong so salmista, inkanta to: “Say Soberanon Katawan a Jehova so pansasalimbengan ko.” (Sal. 73:28, NW) Say “soberanya” et sankatagyan a pakayari o pananguley. Say sakey a soberano et walaan na atagey a pakauley. Walaray maabig a rason no akin ya ipapasen tayoy Jehova a Dios a Sankatagyan.​—Dan. 7:22.

5. Akin et napakiwas tayon suportaan so soberanya nen Jehova?

⁵ Lapud si Jehova a Dios so Manamalsa, sikato so Soberano ed dalin tan ed interon uniberso.  (Basaen so Apocalipsis 4:11.) Si Jehova met so Ukom, Manangiter na Ganggan, tan Ari tayo, ta sakop to so amin a kabiangan na gobierno ed uniberso​—say hudisyal, legislative, tan executive. (Isa. 33:22) Lapud utang ti’d Dios so bilay tayo tan mandedepende tayo’d sikato, nepeg a sikatoy bidbiren tayo bilang Soberanon Katawan. No lawas tayon tandaan ya “si Jehova impaletneg to so trono to ed saray katawenan; tan say panarian to uleyan to ya amin,” napakiwas tayon suportaan so atagey a posisyon to.​—Sal. 103:19; Gawa 4:24.

6. Anto so integridad?

⁶ Pian nasuportaan tayoy soberanya nen Jehova, nepeg a pansiansiaen tayoy integridad tayo’d sikato. Say “integridad” et inkakompleto tan inkalimpio ed moral. Say toon walaay integridad et anggapoy pakabalawan to tan matunong. Ontan si patriarkan Job.​—Job 1:1.

Say Gapo na Drama

7, 8. Panon a kinuestion nen Satanas so kanepegan nen Jehova a manguley?

⁷ Manga 6,000 a taon lay linmabas, walay sakey ya espiritun pinalsa ya kinuestion to no kasin kanepegan nen Jehova so manguley. Napatnagan ed imbaga tan inkiwas na sayan rebelde a sinisiblet ton pinilalek ya sikato so dayewen. Tinukso toy unonan sanasawa, si Adan tan Eva, ya agmanmatoor ed Soberanon Dios tan dineral toy ngaran nen Jehova, a pinapaway ton nantila kuno. (Basaen so Genesis 3:1-5.) Sayan rebelde et nagmaliw ya manunan Kalaban, Satanas (Sumusumpa), Diablo (Managpauges), uleg (managpalikdo), tan dragon (managbuag).​—Apo. 12:9.

⁸ Ginawa nen Satanas so inkasikato a karibal a manuley. Lapud saya, antoy gawaen na Soberanon Katawan a Jehova? Tampol to kasin deralen iray taloran rebelde, si Satanas, Adan, tan Eva? Sarasarag to itan a gawaen, tan napaneknekan a sikaton talagay sankamakapanyarian. Napaneknekan met a tuay ibabaga to ya dusaen to ray manumlang ed ganggan to. Akin balet et agto itan ginawa?

9. Antoy kinuestion nen Satanas?

⁹ Diad impantila tan impanagyat nen Satanas ed si Adan tan Eva ya ibeneg so Dios, kinuestion to no kasin kanepegan nen Jehova a Sikatoy tuloken na totoo. Aliwan satan labat, diad impan-ingganyo to’d unonan sanasawa ya ag-unorey Dios, kinuestion to no kasin manmatoor ed Dios so amin a totoo. Singa ed samay agawa’d si Job, a nanmatoor ed soberanya nen Jehova, papapawayen nen Satanas ya sarag ton pabenegen so amin ya totoo ed Dios.​—Job 2:1-5.

10. Akin et agnin tampol indepensa na Dios so inkasoberano to?

¹⁰ Lapud agnin tampol indepensa nen Jehova so inkasoberano to, naikday panaon si Satanas a paneknekay ibabaga to. Inikdan met na Dios so totoo na pankanawnawa ya ipanengneng so katooran da ed soberanya to. Antoy agawa diad inlalabas na saray siglo? Akapangiletneg si Satanas na mabiskeg tan marelmeng ya organisasyon. Diad kaunoran, sayan organisasyon tan say Diablo et deralen la nen Jehova, a mangiter na agnasuppiat ya paneknek a kanepegan Toy manuley. Segsegurado si Jehova a sikatoy ontalona kanian impasakbay to la itan sanen agawa so impanrebelde ed Eden.​—Gen. 3:15.

11. No nipaakar ed uley nen Jehova, antoy inkiwas na dakel a totoo?

¹¹ Dakel a totoo so awalaan na pananisia tan nansiansian matoor ed uley nen Jehova tan pinasanto ray ngaran to. Kaiba ed saraya si Abel, Enoc, Noe, Abraham, Sara, Moises, Rut, David, Jesus, saray inmunan disipulo nen Kristo, tan saray minilyon a manmamatoor natan. Papaneknekan na sarayan ondadapag ed pananguley nen Jehova a matila si Satanas tan nalilinisan so ngaran nen Jehova ed impamauges na Diablo sanen inlastog  ton napabeneg to ed Dios so amin a totoo.​—Uli. 27:11.

Amta Tayo Lay Sampot na Drama

12. Panon tayon naseguro ya ag-abuloyan na Dios a mansiansia ed andi-angga so karelmengan?

¹² Segurado itayo ya magano lan idepensa nen Jehova so soberanya to. Agto abuloyan a mansiansia ed andi-angga so karelmengan, tan amta tayon manbibilay ti la’d kaunoran iran agew. Dineral nen Jehova iray mauges a totoo panamegley na Delap. Dineral to met so Sodoma tan Gomorra, si Faraon tan say armada to. Si Sisera tan say armada to, si Senakerib tan saray Asiryanon sundalo to, et anggapoy kalaban-laban da ed Dios a Sankatagyan. (Gen. 7:1, 23; 19:24, 25; Exo. 14:30, 31; Uko. 4:15, 16; 2 Ara. 19:35, 36) Makapanmatalek tayo sirin ya ag-abuloyan nen Jehova a Dios a mantultuloy ed andi-angga so pamapauges ed ngaran to tan panmamaltrato ed saray Tasi to. Niarum ni, nanenengneng tayo lay tanda na kiwawala nen Jesus tan say kasampotan na sistema na mundo.​—Mat. 24:3.

13. Panon tayon makaliktar sano deralen la nen Jehova iray kalaban to?

¹³ Pian agtayo napilanlanor sano deralen la nen Jehova iray kalaban to, nepeg a paneknekan tayon matoor tayo ed soberanya to. Panon tayon nagawaan itan? Diad pansiansia tayon biig ed mauges a pananguley nen Satanas tan agpatataktakot ed saray alipores to. (Isa. 52:11; Juan 17:16; Gawa 5:29) Diad ontan a paraan ti’ labat niyalangon so inkasoberano na Ama tayon walad tawen tan nawalaan na ilalon niliktar sano pasantosen la nen Jehova so pinauges a ngaran to tan ipanengneng ton sikato so Soberano ed Uniberso.

14. Antoray imparungtal ed nanduruman kabiangan na Biblia?

¹⁴ Saray detalye nipaakar ed katooan tan ed soberanya nen Jehova et imparungtal ed interon Biblia. Say unonan talora a kapitulo et nipaakar ed impamalsa tan impankasalanan na too, bangta say unor a taloran kapitulo et nipaakar ed iyabig na totoo. Saray baetan a kapitulo et detalye nipaakar ed ginawa na Soberanon Katawan a Jehova pian nasumpal so gagala to parad totoo, dalin, tan uniberso. Impanengneng na Genesis no panon ya inmeksenay Satanas tan say karelmengan diad mundo, tan ipaparungtal na unor a kabiangan na Apocalipsis no panon a naandi so karelmengan, naderal so Diablo, tan nagawa so linawa na Dios diad dalin a singa ed tawen. On, ipapaamta na Biblia no akin a walay kasalanan tan patey tan no panon a naekal iratan diad dalin, a nasalatan na agmanganggan liket tan bilay parad saray matoor.

15. Pian personal a nagunggonaan sano manampot lay drama, antoy nepeg tayon gawaen?

¹⁵ Agmanbayag, say eksena ed sayan mundo et sigpot a manguman. Manampot lay pigay  siglon “drama” nipaakar ed no siopan talagay manepeg a manuley. Paekalen la’d entablado si Satanas, sikatoy deralen la, tan seguradon manaltalo so Dios. Balet, pian nagunggonaan itayo ed saya tan napanggayagaan so dakel a bendisyon ya impasakbay na Salita na Dios, kaukolan ya suportaan tayoy inkasoberano nen Jehova natan. Agnayarin neutral tayo labat ed saya. Pian nibaga tayon “si Jehova wala ed abay ko,” kaukolan a mansiansia tayo ed dapag to.​—Sal. 118:6, 7.

Makapansiansia Itayon Matoor!

16. Akin et seguradon sarag na too so mansiansian matoor ed Dios?

¹⁶ Sarag tayon suportaan so soberanya nen Jehova tan mansiansian matoor, lapud insulat nen apostol Pablo: “Anggapo ni sinmabin tukso ed sikayo ya agni asali na arum a totoo. Balet matoor so Dios, tan agto abuloyan a nipaarap kayo ed tukso ya agyo nitepel, balet sano onsabi so tukso et sikatoy manggawa met na dalan a pawayan ta pian nasungdoan yo itan.” (1 Cor. 10:13) Iner manlalapu so tukson binitla nen Pablo, tan panon a manggagawa na dalan so Dios a pawayan tayo?

17-19. (a) Anto so akatuksoan na saray Israelita diad kalawakan? (b) Akin et sarag tayon napansiansiay integridad tayo’d si Jehova?

¹⁷ Unong ya ipapanengneng na agawa’d saray Israelita diad kalawakan, say “tukso” et manlalapud saray sirkumstansya ya managyat ed sikatayon sumlangey ganggan na Dios. (Basaen so 1 Corinto 10:6-10.) Sarag na saray Israelita a labanay tukso, balet ta pinilalek day “makaderal iran bengatla” sanen mamilagron intaryaan ira nen Jehova na sikling odino pugo, diad loob na sakey bulan. Anggano walay panaon ya ag-ira angan na karne, inikdan ira nen Jehova na mana. Balet, atukso ran magmaliw ya alabas a maagum ta sandarakel so ineerel dan pugo.​—Num. 11:19, 20, 31-35.

¹⁸ Antis na satan, sanen iiter ed si Moises so Ganggan diad Palandey Sinai, nandayew iray Israelita ed kilaw a baka tan mabanday a nanliliket. Lapud anggapoy nanenengneng dan mangidadaulo ed sikara, ag-ira apokpokan. (Exo. 32:1, 6) Antis a mismo na iloob da’d Insipan a Dalin, inayat na saray Moabita so nilibon Israelita, tan akilawanan ira. Diad saman, nilibon Israelita so inaatey lapud kasalanan da. (Num. 25:1, 9) Walaray inkagawan agaylay impanreklamo na saray Israelita, aminsan et aliwliway imbaga ra’d si Moises tan ed Dios a mismo! (Num. 21:5) Kinuestion da ni ingen so impamatey ed marelmeng a si Kora, Datan, Abiram, tan arum ni ran kaiba ra. Lingo dan inrason ya agmakatunongay impamatey ed sarayan rebelde. Kanian, 14,700 ya Israelita so inatey ed salot ya indapo na Dios.​—Num. 16:41, 49.

¹⁹ Diad saratan a “sinmabin tukso,” anggapoy anggan sakey ya agnasarag na saray Israelita. Adaeg ira na tukso ta kinmapuy so pananisia ra, nilingwanan day Jehova, say maaron panangasikaso to’d sikara, tan say kaptekan na paraan to. Singa ed saray Israelita, saray tukso ed sikatayo et kaslakan lan naeeksperiensya na anggan siopa. No pansagpotan tayon ipulisay iratan tan patulongan ed Dios, napansiansia tayoy integridad tayo. Napanmatalkan tayo iya ta “matoor so Dios tan agto abuloyan a nipaarap [tayo] ed tukso ya  [agtayo] nitepel.” Agbalot iyabuloy nen Jehova ya nasagmak tayo so situasyon ya anggad punton imposible lan nagawaan tayoy linawa to.​—Sal. 94:14.

20, 21. No natutukso tayo, panon a manggawa so Dios na “dalan a pawayan”?

²⁰ ‘Manggawa na dalan’ si Jehova a ‘napawayan’ tayo diad pamabiskeg to ed sikatayon nalabanay tukso. Alimbawa, nayarin maltratoen tayo na saray manamasegsegang pian isukoy pananisia tayo. Ompan natukso itayon mikompromiso pian napaliisay panamairap odino patey. Balet, base ed samay impuyan ed si Pablo a panamaseguro ya akarekord ed 1 Corinto 10:13, amta tayo a temporaryo labat iray tukso. Ag-abuloyan nen Jehova a nasagmak tayoy situasyon ya anggad punton agtayo la makapansiansian matoor ed sikato. Sarag na Dios a pabiskegen so pananisia tan espiritualidad tayo pian makapanmatoor.

²¹ Tutulongan itayo nen Jehova panamegley na masanton espiritu to. Ipapanonot met na sayan espiritu iray Kasulatan a nakaukolan tayo pian nalabanay tukso. (Juan 14:26) Kanian, agtayo napalikdon manggaway makapuy. Singa bilang, natatalosan tayo ray isyu nipaakar ed soberanya nen Jehova tan integridad na too. Lapud satan tan lapud tulong na Dios, dakel so nansiansian matoor anggad patey. Balet, aliwan say patey so ‘dalan a pinawayan’ da; noagta tinulongan ira nen Jehova ya akapansungdo anggad patey tan agnampadaeg ed tukso. Tulongan itayo met nen Jehova. Diad tua, uusaren to met iray matoor ya anghel to bilang “imbakin manlingkor ed saramay manawir na kilalaban.” (Heb. 1:14) Unong ya ipanengneng na onsublay ya artikulo, saray manmamatoor labat so nawalaay pribilehyon suportaay soberanya na Dios ed andi-angga. Sakey tayo ed sikara no ondapag tayo ed si Jehova bilang Soberanon Katawan tayo.

Antoy Ebat Mo?

• Akin et nepeg tayon bidbiren a si Jehova so Soberanon Katawan tayo?

• Antoy kabaliksan na pamasiansia ed integridad tayo’d Dios?

• Panon tayon amta a magano lan idepensa nen Jehova so inkasoberano to?

• Unong ed 1 Corinto 10:13, akin et sarag tayoy mansiansian matoor?

[Tepetepet Parad Panagaral]

[Litrato ed pahina 24]

Tinukso nen Satanas si Adan tan Eva ya agmanmatoor ed si Jehova

[Litrato ed pahina 26]

Pansagpotan a suportaay soberanya nen Jehova