Saray Anghel​—‘Espiritun Nibaki a Manlingkor’

“Aliwa ta ra ya espiritu ya amin, a nibaki a manlingkor a pinabangan na saray manawir naani na kilalaban?”​—HEB. 1:14.

1. Anto so makapaligliwan mensahe na Mateo 18:10 tan Hebreos 1:14?

PINASAKBAYAN nen Jesu-Kristo so siopaman a nayarin makapangigapol ed saray papatumbok to: “Seguroen yo ya agyo mudmoraen so sakey ed sarayan angkekelag, ta ibagak ed sikayo a saray anghel da ed tawen so naynay a makakanengneng ed lupa na Amak a walad tawen.” (Mat. 18:10, NW) Nipaakar ed saray matoor ya anghel, oniay insulat nen apostol Pablo: “Aliwa ta ra ya espiritu ya amin, a nibaki a manlingkor a pinabangan na saray manawir naani na kilalaban?” (Heb. 1:14) Sarayan panamaseguro ya uusaren na Dios iray anghel pian ontulong ed katooan et makapaligliwa. Antoy ibabaga na Biblia nipaakar ed saray anghel? Panon da itayon tutulongan? Antoy naaralan tayo ed ehemplo ra?

2, 3. Anto so pigaran kimey na saray anghel?

² Diad tawen et wala so minilyon a matoor ya anghel. Amin da et “mabiskeg, [tan] manguunor na salita [na Dios].” (Sal. 103:20; basaen so Apocalipsis 5:11.) Nanduruma so personalidad na sarayan espiritun ananak to. Walaan met iray kalidad a mipara ed Dios, tan bulos a panagdesisyon. Makapadindinayew so inka-organisa ra tan ataragey so posisyon da ed uksoyan na Dios. Say sankatageyan et say arkanghel a si Miguel (ngaran nen Jesus ed tawen). (Dan. 10:13; Jud. 9) Sayan “panguloan ed amin a pinalsa” so “say Verbo,” odino Pinagkasangiyan nen Jehova tan inusar To ed impanggawa na amin a bengatla.​—Col. 1:15-17; Juan 1:1-3.

³ Say onsublay et saray serafin, a mangiyaabawag ed kasantosan nen Jehova tan ontutulong ed totoo to a mansiansian malinis ed espiritual. Wala met iray kerubin, a manlilingkor bilang manangitandoro ed inkasoberano na Dios. (Gen. 3:24; Isa. 6:1-3, 6, 7) Saray arum nin anghel, odino mensahero et walaay nanduruman kimey ed pananumpal na linaway Dios.​—Heb. 12:22, 23.

4. (a) Anto so reaksion na saray anghel sanen niletneg so dalin? (b) Anto komon so apanggayagaan na katooan no duga so impangusar ed bulos a panagdesisyon?

⁴ Amin ya anghel et nanggayaga sanen ‘niletneg so dalin’ tan sililiket ya anumpal ed kimey da legan ya ipaparaan nen Jehova so dalin pian magmaliw a marakdakep ya ayaman na katooan. (Job 38:4, 7) Pinalsa nen Jehova so too ya  “abebbebay daiset nen saray angheles” balet siansia nin unong ed “indengan” To, kanian sarag na too ya ipatnag so alay abig a kualidad na Manamalsa. (Heb. 2:7; Gen. 1:27) No duga komon so impangusar di Adan tan Eva ed regalon bulos a panagdesisyon, di nanggayagaan da tan saray anak da so bilay ed paraiso bilang kabiangan na sankatalbaan a pamilya nen Jehova.

5, 6. Anto so agawan rebelyon ed tawen, tan panoy inkiwas na Dios?

⁵ Maseguron abigbigla iray anghel sanen naimatonan day inggapo na rebelyon diad mangatatawen a sankaabungan na Dios. Walay sakey ed sikara ya agla kontento tan agla maliket ed panangidayew ed si Jehova tan labay toy nadayew. Ginawa ton Satanas (mankabaliksan a “Sumusumpa”) so inkasikato diad impanguestion to ed inkamakanepegan na uley nen Jehova tan diad mapalakbat ya impanali ton mangiletneg na kalaban a soberanya. Sanen nantila si Satanas, mapalikdo ton tinukso so unonan sanasawa a mila ed sikaton manrebelde ed maaron Manamalsa.​—Gen. 3:4, 5; Juan 8:44.

⁶ Tampol ya angipaakseb si Jehova na panangukom ed si Satanas diad impangibaga Toy sankaunaan a propesiya ed Biblia: “Mangiyan ak na gulaan ed sika tan say bii, tan gulaan ed saray ilalak mo tan ilalak to. Sikato sugaten to so ulom, et sika sugaten mo so mukor to.” (Gen. 3:15) Walay gulaan a niwala ed baetan nen Satanas tan “say bii” a pinagka-asawa na Dios, tan mantultuloy itan. On, say mangatatawen ya organisasyon a tutugyopen na matoor iran anghel et momoriaen nen Jehova bilang inad-aron asawan bii a nikasakey ed sikato bilang Asawan Laki. Sayan propesiya et angitaryay basiyan na seguradon ilalo, anggaman saray detalye et “misteryo” ni, tan kalkalna ni labat ya iparungtal. Gagala na Dios a sakey ed saray kabiangan na mangatatawen ya organisasyon to so maneral ed amin a rebelde, tan panamegley na satan et natipon iray “bengatlan wala ed tawen, a singa met saray wala ed tapew na dalin.”​—Efe. 1:8-10.

7. Diad panaon nen Noe, anto so ginawa na arum ya anghel, tan antoy nansumpalan da?

⁷ Diad panaon nen Noe, tinaynan na pigaran anghel so “nigetar a panaayaman da” tan nansulong iray laman na too pian nagawaan da ed dalin iray sinisiblet a pilalek da. (Jud. 6; Gen. 6:1-4) Imbasileng nen Jehova irayan rebelde diad pirmin kabilungetan, tan sirin et nagmaliw la ran kapara nen Satanas a “mauges ya espiritu” tan maruksan kalaban na saray lingkor na Dios.​—Efe. 6:11-13; 2 Ped. 2:4.

Panon Itayon Tutulongan na Saray Anghel?

8, 9. Panon ya inusar nen Jehova iray anghel pian ontulong ed totoo?

⁸ Si Abraham, Jacob, Moises, Josue, Isaias, Daniel, Jesus, Pedro, Juan, tan Pablo so pigara ed saramay nilingkoran na anghel. Saray matunong ya anghel et angipaakseb na saray panangukom na Dios tan angipasabi na saray propesiya tan instruksion, kaiba lay Mosaikon Ganggan. (2 Ara. 19:35; Dan. 10:5, 11, 14; Gawa 7:53; Apo. 1:1) Lapud wala la’d sikatayoy kompleton Salita na Dios natan, nayarin agla kaukolan ya ipasabi na saray anghel so mensahe na Dios. (2 Tim. 3:16, 17) Balet, anggan agtayo ra nanenengneng, makulikuli iran manusumpal ed linawa na Dios tan manusuporta ed saray lingkor to.

⁹ Oniay ipapaseguro na Biblia: “Say anghel nen Jehova mankampamento ed liberliber na saray ontakot ed sikato, tan iliktar to ra.” (Sal. 34:7; 91:11) Lapud kukuestionen nen Satanas so integridad na too, sikatoy aabuloyan nen Jehova a mangitarok na amin a klase na subok ed sikatayo. (Luc. 21:16-19) Balet amta na Dios no anggad iner so nasarag tayon sungdoan, tan no apaneknekan la ed pansusungdo tayo a pansiansiaen tayoy integridad tayo. (Basaen so 1 Corinto 10:13.) Lawas alerto iray anghel ya onsalet unong ed linawa na Dios. Inliktar day Sidrac, Mesac, Abednego, Daniel, tan Pedro, balet agda inamper so impamatey na saray kakabusol ed si Esteban tan Santiago. (Dan. 3:17, 18, 28; 6:22; Gawa 7:59, 60; 12:1-3, 7, 11) Nanduruma so situasyon tan isyun nalalanor. Mipadpara, walaray agagi tayo ed panaon nen Hitler a pinapatey, balet sinegurado nen Jehova a niliktar so maslak ed sikara.

10. Nilikud ed saray manlalapud anghel, anto niran tulong so nayarin naawat tayo?

¹⁰ Ag-ibabangat na Kasulatan a say kada too ed  dalin et walay anghel-dela-guardia to. Diad saray pikakasi tayo, matalek itayo a “no mankerew itayo na bengatla unong ed linawa to, [say Dios] dengelen to itayo.” (1 Juan 5:14) Siempre, sarag nen Jehova so mangibaki na anghel ya ontulong ed sikatayo, balet nayarin naawat tayo so tulong ed arum nin paraan. Nayarin napakiwas iray agagi ya ontulong tan manligliwa. Nayari itayo met ya ikdan na Dios na kakabatan tan biskeg pian nasungdoan so “sakey a sabit ed laman” a mamapairap ed sikatayo a singa itayo ‘tatampalen na ibabaki [odino, anghel] nen Satanas.’​—2 Cor. 12:7-10; 1 Tes. 5:14.

Aligen si Jesus

11. Panon ya inusar iray anghel pian ontulong ed si Jesus, tan antoy agawaan na impansiansia ton matoor ed Dios?

¹¹ Imanoen pa no panon ya inusar nen Jehova iray anghel diad kinen Jesus. Inyanunsio ra so inkianak tan inkioli to, tan nanlingkoran da sanen wadiad dalin. Sarag komon na saray anghel ya amperen so kaerel tan ansakisakit ya ipapatey to. Balet aliwan ontan so agawa, noagta nibaki so sakey ya anghel pian mamabiskeg ed sikato. (Mat. 28:5, 6; Luc. 2:8-11; 22:43) Bilang pitunosan ed gagala nen Jehova, say impatey nen Jesus et kinmanan bagat tan paneknek a sarag na perpekton too a pansiansiaen so integridad ed Dios anggano nasubok na pinasya. Kanian si Jesus et pinaoli nen Jehova bilang imortal ya espiritu, ya inter ed sikato so “amin a pakauley” tan nipasakop ed sikato iray anghel. (Mat. 28:18; Gawa 2:32; 1 Ped. 3:22) Si Jesus sirin so manunan kabiangan na “ilalak” na “bii” ya pinagka-asawa na Dios.​—Gen. 3:15; Gal. 3:16.

12. Panon tayon naalig so “limpion panagnonot” nen Jesus?

¹² Amta nen Jesus ya agto nepeg a suboken si Jehova, ya anggano gagalaen ton iyan ed peligro so bilay to et nailaloan toy panangiliktar na saray anghel. (Basaen so Mateo 4:5-7.) Kanian aligen tayoy Jesus, ya ipatnag tayoy “limpion panagnonot,” ya agtayo komon gagagalaen ya ipeligroy bilay tayo, balet agtayo met ontatakot a mangarap ed panamasegsegang.​—Tito 2:12, NW.

No Antoy Naaralan Tayo ed Saray Matoor ya Anghel

13. Anto so naaralan tayo ed ehemplo na saray matunong ya anghel ya asalambit ed 2 Pedro 2:9-11?

¹³ Sanen binaat nen apostol Pedro iramay ‘mantatalabutob’ sumpad saray alanaan a lingkor nen Jehova, tinukoy to so maabig ya alimbawa na saray matunong ya anghel. Anggano baleg so pakayari ra, mapaabeba ran papaliisay mahusgan panag-akusa “lapud respeto ra ed si Jehova.” (Basaen so 2 Pedro 2:9, 11. *) Komon ta agtayo met mahusga ed arum, respetoen tayo iramay apabtangan a mangasikaso ed kongregasyon, tan imatalek tayo iray bengatla ed si Jehova, say Sankatagyan ya Ukom.​—Roma 12:18, 19; Heb. 13:17.

14. Anto so naaralan tayo ed saray anghel nipaakar ed mapaabeban panaglingkor?

¹⁴ Makaaral tayo ed saray anghel nen Jehova na maabig ya ehemplo na mapaabeban panaglingkor. Walaray anghel ya agda  impaamtay ngaran da ed totoo. (Gen. 32:29; Uko. 13:17, 18) Anggano minilyon so espiritun pinalsa ed tawen, say sinalambit labat na Biblia et say ngaran nen Miguel tan Gabriel, ta pian napaliisan tayoy agmanepeg a pamagalang ed sikara. (Luc. 1:26; Apo. 12:7) Sanen dinakmomoan nen apostol Juan so sakey ya anghel, sikatoy binaat: “Nengneng mo ta agmo gawaen itan, ta aripen ak met a kaparam tan kapara na saray agagim.” (Apo. 22:8, 9) Say nepeg labat a dayewen tan pampikasian tayo et say Dios.​—Basaen so Mateo 4:8-10.

15. Anton maabig ya ehemplo na inkaanos so impanengneng na saray anghel?

¹⁵ Maabig met so ehemplo na saray anghel nipaakar ed inkaanos. Anggano labalabay dan naamtaan iray sagradon sekreto na Dios, ag-iratan niparungtal ya amin ed sikara. “Saraya a bengatla so kaliktan na saray angheles a nanengneng,” so kuan na Biblia. (1 Ped. 1:12) Balet, anto so awawey da? Sikaray maan-anos a manaalagar anggad isabi panaon ya ‘ipakabat la na Dios ed [kongregasyon] so amayamay a karunongan to.’​—Efe. 3:10, 11.

16. Anto so epekto na kondukta tayo ed saray anghel?

¹⁶ Saray Kristianon manasagmak na subok et ‘iimatonan na saray anghel.’ (1 Cor. 4:9) Saraya et napapaliket a maong no nanenengneng day panmamatoor tayo, tan mas lalo la no walay nankasalanan a nagbabawi. (Luc. 15:10) Iimanoen da met so maridios a kondukta na saray Kristianon bibii. Ibabaga na Biblia a “manepeg a say bii wala so sakey a tanda na pakayari ed tapew na ulo to lapu ed saray angheles.” (1 Cor. 11:3, 10) On, naliliketan iray anghel ed pakakanengneng dan tutuloken na saray Kristianon bibii tan arum nin lingkor na Dios ed dalin so teokratikon uksoyan tan inkaulo. Satan a katutulok et onkakanan panonot ed sarayan mangatatawen ya anak na Dios.

Aktibon Susuportaan na Saray Anghel so Kimey a Panagpulong

17, 18. Akin a nibaga tayon susuportaan na saray anghel so panagpulong tayo?

¹⁷ Walay pibibiang na saray anghel ed pigaran importantin ebento ed “agew na Katawan.” Kaiba ed saraya so inkiletneg na Panarian nen 1914 tan say impangibasileng nen “Miguel tan saray anghel to” ed si Satanas tan saray demonyo to manlapud tawen. (Apo. 1:10; 11:15; 12:5-9) Si apostol Juan et akanengneng na “anghel a mantiktikyab dia ed pegley na tawen, a wala ed sikato  so andi-angga a maabig a balita pian sikato so ipulong to ed saray manaayam dia ed dalin.” Oniay inyabawag na anghel: “Takotan yo so Dios, tan iter yo ed sikato so gloria: ta say oras na pangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.” (Apo. 14:6, 7) Nailaloan sirin na saray lingkor nen Jehova so tulong na saray anghel legan dan ipupulong so maong a balita nipaakar ed niletneg lan Panarian anggaman ed pinasyan isusumpa na Diablo.​—Apo. 12:13, 17.

¹⁸ Natan, sano igigiya itayo na saray anghel ed saray matuan impanpuso, agda la itan idadalan ed pitotongtong, a singa ed kaso nen Felipe tan samay Etiopen eunoko. (Gawa 8:26-29) Balet, papaneknekan na saray eksperiensya ed panaon tayo ya anggan agtayo nanenengneng iray anghel et wadtan iran onsusuporta ed panagpulong a kimey tan igigiya da tayo ed saray “walaan na dugan kipapasen na puso parad bilay ya andi-anggaan.” * (Gawa 13:48, NW) Talagan importante so regular a pibibiang ed ministeryo pian nagawaan tayoy betang tayo ed panag-anap na saramay malabay a ‘mangigalang ed Ama diad espiritu tan katuaan’!​—Juan 4:23, 24.

19, 20. Anto so betang na saray anghel ed saray nagawa legay panaon na anggaay mundo?

¹⁹ Diad panutukoy nen Jesus ed “[“panaon na,” NW] anggaay mundo,” imbaga ton saray anghel et “ibiig da naani so saray mauges ed saray matunong.” (Mat. 13:37-43, 49) Walay betang na saray anghel ed unor a panagtipon tan panagtatak ed saray alanaan. (Basaen so Mateo 24:31; Apo. 7:1-3) Niarum ni, kaiba nen Jesus iray anghel sano ‘ibiig to la iray karnero manlapud saray kanding.’​—Mat. 25:31-33, 46.

²⁰ “Sano ompayawar so Katawan tayo a Jesus a manlapu ed tawen ya iba to so saray angheles na pakayari to,” amin na “saray agmikabat ed Dios, tan dia ed saray ag-ontulok ed ebanghelyo na Katawan tayon Jesus” et naderal. (2 Tes. 1:6-10) Diad pasingawey, anengneng nen Juan so miparan ebento, tan indeskribe toy Jesus tan say armada ed tawen a tutugyopen na saray anghel, ya akalugan ira ed amputin kabayo diad matunong a pibabakal.​—Apo. 19:11-14.

21. Anto so gawaen na samay anghel, “a wala ed sikato so tombok na kaaralman, tan sakey a golonggolong,” ed si Satanas tan saray demonyo to?

²¹ Anengneng met nen Juan so “sakey ya anghel ya inmepas a nanlapu ed tawen, a wala ed sikato so tombok na kaaralman, tan sakey a golonggolong dia ed lima to.” Saya et anggapoy arum noag si Miguel arkanghel, a mamalor tan mangibasileng ed Diablo, a mapatnag a kaiba iray demonyo, diad kaaralman. Sikaray nibulos a magano diad sampot na Milenyon Uley nen Kristo, sano ondalan ed unor a subok iray perpekton katooan. Insan kayari na satan, naderal lay Satanas tan arum nin rebelde. (Apo. 20:1-3, 7-10; 1 Juan 3:8) On, amin a nanrebelde ed Dios et naandi la.

22. Panon a nalalanor iray anghel ed saray magano lan nagawa ed arapen, tan antoy nepeg a nalikna tayo ed betang da?

²² Asingsingger lay kililiktar manlapud mauges a sistema nen Satanas. Walay makanakanan betang na saray anghel ed sarayan importantin ebento a mangiyalangon ed soberanya nen Jehova tan sigpot a manumpal ed gagala to parad dalin tan katooan. Petepeteg a saray matunong ya anghel et ‘espiritun nibaki a manlingkor parad saray manawir na kilalaban.’ Misalsalamat itayo sirin ed si Jehova a Dios ta uusaren to ray anghel ya ontulong ed sikatayon gawaen so linaway Dios pian nagamoray andi-anggaan a bilay.

[Saray paimano ed leksab]

Panon Mon Ebatan?

• Panon so inkaorganisa na saray mangatatawen ya espiritun pinalsa?

• Diad panaon nen Noe, anto so ginawa na arum ya anghel?

• Panon ya uusaren na Dios iray anghel pian tulongan itayo?

• Diad panaon tayo, anto so betang a susumpalen na saray matunong ya anghel?

[Tepetepet Parad Panagaral]

[Litrato ed pahina 21]

Maliket iray anghel ed panusumpal na linaway Dios

[Litrato ed pahina 23]

Singa ed kinen Daniel, lawas ya alerto iray anghel ya onsalet unong ed linaway Dios

[Saray litrato ed pahina 24]

Manpakpel, ta wadtan iray anghel ya onsusuporta ed kimey a panangipulong ed Panarian!

[Credit Line]

Globe: NASA photo