Kasin Nanonotan Yo?

Nanggayagaan mo ta so impamasa ed agano niran paway na Say Panag-Bantayan tan The Watchtower? Salim pa sirin ya ebatan iray onggendan a tepet:

• Akin et importantin tuloy a pansiansiaen tayoy Kristianon integridad tayo?

Diad pamasiansia na integridad tayo, nipatnag tayo a manpapasakop tayo’d uley nen Jehova lapud panangaro, tan papaneknekan tayon matila si Satanas. Say integridad tayo met so basiyan na pangukom na Dios ed sikatayo, tan sirin saya so makanakana ed ilalo tayo’d arapen.​—12/15, pahina 4-6.

• Antoray pigaran titulo a mangipapabitar ed betang nen Jesus diad gagala na Dios?

Say bogbogtong ya Anak. Say Verbo. Say Amen. Say Manamegley na balon sipan. Say Atagey a Saserdote. Say insipan a Bini.​—12/15, pahina 15.

• Anto so kabaliksan na impangiganggan nen Elias ed lingkor to ya onnengneng ed dapit dayat legan a manpipikasi so propeta ya onuran? (1 Ara. 18:43-45)

Impatnag nen Elias a sikatoy pamilyar ed sikulo na uran. Saray lurem ya aporma ed petek na dayat so isiplog na dagem paarap ed dalin a pelagay uran.​—1/1, pahina 15-16.

• Antoray gawaen tayo pian mas lalo itayon maliket ed ministeryo?

Iparaan so kapusoan tayo, a say pangiyapasakeyan tayoy imano et say panulong ed arum. Manpulong itayo ed gagalan mangigapo na panagaral na Biblia. No andian na interes iray totoo ed teritorya tayo, itukoy tayoy presentasyon tayo diad paraan a makasagyat ed sikara.​—1/15, pahina 8-10.

• Kasin samay kating ya abitla ed Biblia et sikato lanlamang imay sakit a kating natan?

Say impeksion lapud bakterya a tatawagey kating et talagan wala nensaman. (Lev. 13:4, 5) Sinalambit met na Biblia so sakey a klase na kating ya onlelesa ed saray kawes tan abung. Nayarin ontutukoy itan ed sakey a klase na buot. (Lev. 13:47-52)​—2/1-E, pahina 19.

• Panon ya impluensyaan na saray bangat na Biblia so ugali tan tradisyon na saray Kristiano nipaakar ed ponpon?

Anggaman manermen so sakey a Kristiano lapud impatey na inadaro to, kabat ton anggapo lay amta na saray inaatey. Kanian, anggan sikatoy balawen na saray agmananisia, papaliisan to iray tradisyon a manuporta’d sisisiaen a wala ni nagawaan na saray inaatey ed saray mabilay. Pian napaliisan iray problema, insulat na arum a Kristiano iray instruksion parad ponpon da.​—2/15, pahina 29-31.

• Unong ed Salmo 1:1, anton taloran bengatla so kaukolan tayon paliisan pian magmaliw itayon maliket?

Sinalambit na satan a bersikulo irayan bengatla: “Panangibangat na saray agmatunong,” “dalan na saray managkasalanan,” tan “yurongan na saray managbalaw.” On, pian magmaliw itayon maliket, kaukolan ya arawian tayo iramay manbabalaw odino mangibabaliwala ed saray ganggan na Dios. Imbes, kaukolan a say panggayagaan tayo et saray ganggan nen Jehova.​—3/1-E, pahina 17.

• Kasin say “libro nen Jaser” tan “libro na saray impibabakal nen Jehova” et nababalang a libro na Biblia? (Jos. 10:13; Num. 21:14)

Andi. Ompatnag a sarayan dokumento nensaman et ag-apuyanan tan tinukoy labat na saray managsulat na Biblia.​—3/15, pahina 32.

• Anton makatantandan pananguman so ginawa ed modernon patalos na Biblian Latin?

Nen 1979, inaprobaan nen Pope John Paul II so balon patalos na Biblian Latin a Nova Vulgata. Karga na unonan edisyon so madibinon ngaran a “Iahveh” ed pigaran bersikulo. (Exo. 3:15; 6:3) Anggaman ontan, diad komaduan opisyal ya edisyon a nipalapag nen 1986, say salitan Dominus [Katawan] et insalat ed “Iahveh.”​—4/1, pahina 22.