“Gala Magmaliw Kan Patumbok Ko”

“No siopaman a too, maliket ya ontumbok ed siak, iburi to so inkasikato, tan sakbaten to so [“panamairapan a kiew to,” NW] ya inagew-agew, tan tumboken to ak.”​—LUC. 9:23.

1, 2. (a) Anton maaron imbitasyon so inyopresi nen Jesus? (b) Panoy inkiwas mo ed imbitasyon nen Jesus?

DIAD pansamposampot na ministeryo nen Jesus, sikatoy nampulong ed Perea, a rehyon ed biek na Jordan diad amianen-bukig na Judea. Sikatoy dinago na sakey a balolaki a nantepet no antoy kaukolan ton gawaen pian makatawir na bilay ya andi-anggaan. Sanen atebek nen Jesus a matoor a tutumboken na balolaki so Mosaikon Ganggan, inopresian to iyan balolaki na alay dakep ya imbitasyon. Oniay inkuan to: “Onla ka, ilakom so anggan anton wala ed sika, et iter mo ed saray duruka, et wala naani kayamanan mo ed tawen. Et gala, tumbok mo ak [“gala magmaliw kan patumbok ko,” NW].” (Mar. 10:21) Nonoten pa, imbitasyon a tumboken si Jesus, say bogbogtong ya Anak na Sankatagyan a Dios!

² Ag-inawat na balolaki so imbitasyon nen Jesus, balet inawat itan na arum. Singa bilang, diad apalabas et oniay inkuan nen Jesus ed si Felipe: “Magmaliw kan patumbok ko.” (Juan 1:43, NW) Inawat itan nen Felipe tan diad saginonor et nagmaliw ya apostol. Inimbitaan met nen Jesus si Mateo, tan inawat to met itan. (Mat. 9:9; 10:2-4) On, inimbitaan nen Jesus so amin a mangaaro ed katunongan sanen inkuan to: “No siopaman a too, maliket ya ontumbok ed siak, iburi to so inkasikato, tan sakbaten to so [“panamairapan a kiew to,” NW] ya inagew-agew, tan tumboken to ak.” (Luc. 9:23) Kanian, nayarin magmaliw a patumbok nen Jesus so siopaman no talagan labay to. Kasin kaliktan mo itan? Inawat la na maslak ed sikatayo so maaron imbitasyon nen Jesus, kanian diad lawak na kimeyan et iyiimbita tayo met itan ed arum.

3. Antoy gawaen tayo pian agtayo niarawi diad panutumbok ed si Jesus?

³ Balet, makapaermen ta arum ed saray manaaral na katuaan na Biblia et agnantultuloy. Noagta, sikaray tinmayam tan diad saginonor ed “niagus” odino niarawi diad panutumbok ed si Jesus. (Heb. 2:1) Panon tayon napaliisan itan a patit? Makatulong so panepet tayo ed inkasikatayo: ‘Anton talagay rason no akin a denesidik a tumboken si Jesus? Antoy kabaliksan na panumbok ed sikato?’ No nodnonoten tayo iray ebat ed saratan a tepet, ontulong iratan pian napabiskeg so determinasyon tayon mansiansia ed makabat a desisyon a pinili tayo. Ontulong met iratan ed sikatayo pian napaseseg so arum a manumbok ed si Jesus.

Akin a Tumboken si Jesus?

4, 5. Akin a kualipikado si Jesus a magmaliw a Lider?

⁴ Oniay inkuan nen propeta Jeremias: “O Jehova, amtak a say dalan na too anggapo ed sikato lanlamang, aliwa a wala ed too a manakar a mangitonton ed saray kurang to.” (Jer. 10:23) Diad inlalabas na panaon et apekderan a tua so imbaga nen Jeremias. Lalon apatnagan ya agsarag na ag-ayadyarin totoo a matalonan uleyan so inkasikaran dili. Inawat tayoy imbitasyon a manumbok ed si Jesus lapud naamtaan tayon sikatoy kualipikadon magmaliw a Lider tayo diad paraan ya agnasarag na anggan siopan too. Imanoen pay pigara ed saray kualipikasyon nen Jesus.

⁵ Unona, si Jehova a mismo so amili ed si Jesus pian magmaliw a Mesias a Lider. Wala ni kasi mas makaamta nen say Manamalsa tayo ed no siopay turoen a Lider tayo? Komadua, wala ray kalidad nen Jesus a napandinayewan tan naalig tayo. (Basaen so Isaias 11:2, 3.) Sikatoy naspot ya ehemplo. (1 Ped. 2:21) Komatlo, talagan iyaansakit nen Jesus iray manutumbok ed sikato. Impanengneng to itan sanen insuko toy bilay to parad sikatayo. (Basaen so Juan 10:14, 15.) Pinaneknekan to met a sikatoy maasikason pastol legan to itayon iwawanwan ed bilay a mangiter ed sikatayo na liket natan tan marakdakep a magnayon ya arapen. (Juan 10:10, 11; Apo. 7:16, 17) Lapud saraya tan arum ni ran  rason, dugay desisyon tayo sanen pinili tayo a sikatoy tumboken. Balet, antoy nalalanor diad panumbok ed si Jesus?

6. Antoy nalalanor diad panumbok ed si Jesus?

⁶ Say pagmaliw a patumbok nen Kristo et aliwa labat lan angangga’d panawag ed inkasikatayo a Kristiano. Diad tua, manga duaran bilyon a totoo natan so mangibabagan Kristiano ira, balet ipapatnag na kakikiwas da a “managgawa [ira] na kaugsan.” (Basaen so Mateo 7:21-23.) Sano wala ray interesado ed imbitasyon a manumbok ed si Jesus, ipapaliwawa tayo ed sikara a saray tuan Kristiano et itutunos day interon kabibilay da ed saray bangat tan ehemplo nen Jesus​—tan inagew-agew da itan a gagawaen. Pian nipalinew iya, aralen tayo pay pigara ed saray bengatlan amta tayo nipaakar ed si Jesus.

Aligen so Napanuliranan a Karunongan nen Jesus

7, 8. (a) Anto so karunongan, tan akin et agaylay dunong nen Jesus? (b) Panon ya impanengneng nen Jesus so karunongan, tan panon tayon naalig si Jesus?

⁷ Dakel iray pandinayewan a kalidad nen Jesus, balet ta singbaten tayo labat so apatira: say karunongan, inkamapaabeba, inkaseseg, tan panangaro to. Unona, pantongtongan tayo pa so karunongan to, salanti, say abilidad ton iyaplika ed praktikal a paraan so kakabatan tan pakatalos. Oniay insulat nen apostol Pablo: “Wala ra ed [si Jesus so] amin ya akaamot [a] kayamanan na karunongan tan pakatalos.” (Col. 2:3) Angalaan nen Jesus na ontan a karunongan? Oniay inkuan ton mismo: “Unong na imbangat na Ama ed siak, salitaen ko so sarayan bengatla.” (Juan 8:28) Nanlapud si Jehova so karunongan to, kanian agtayo la pankelawan so agaylan kamaong na pakatebek nen Jesus.

⁸ Alimbawa, inusar nen Jesus so maong a pakatebek to diad impamili na paraan na kabibilay to. Denesidi ton pansiansiaen a simpli so bilay to, ya inyapasakey toy imano to ed saksakey a bengatla: say panggawa na linawa na Dios. Sikakabat ton inusar so panaon tan sagpot to pian unaen so Panarian. Tutumboken tayoy ehemplo nen Jesus panamegley na panggugunaet a pansiansiaen a ‘simpli so mata’ tayo. (Mat. 6:22, NW) Diad ontan et napapaliisan tayon pabelatan so inkasikatayo na agnakaukolan iran bengatla a makapakesaw tan makapangupot na panaon tayo. Dakel a Kristiano so nanggawa na paraan a mamasimpli ed kabibilay da pian mas dakel so panaon da ed ministeryo. Diad ontan et asarag na arum so nampayunir. No sakey ka ed sikara, talagan nakomendaan ka. Say ‘pananap nin unona ed panarian’ et peteg a makapaliket tan makapenek.​—Mat. 6:33.

Magmaliw a Mapaabeba a Singa si Jesus

9, 10. Panon ya impanengneng nen Jesus so inkamapaabeba to?

⁹ Say komaduan aspekto na personalidad nen Jesus a pantongtongan tayo et say inkamapaabeba to. No saray aliwan perpekton totoo et naikdan na autoridad, kaslakan lan sikaray magmamaliw a makinon. Agaylay pidumaan nen Jesus ed sikara! Anggaman sikatoy walaan na importantin posisyon diad panumpal ed gagala nen Jehova, anggapoy napatnagan ya anggan samet labat a panagpaatagey ed sikato. Tan papasesegen itayon mangalig ed inkamapaabeba to. Oniay insulat nen apostol Pablo: “Yatol yo so sayan kalakal ed sikayo, a wala met nensaman ed Kristo Jesus; a bangta sikatoy wala ed ereng na Dios, agto imbilang a say inkaparpara to ed Dios [et] sakey a bengatlan bebembenan to nensaman. Noag ingen nilukpos to so inkasikato, ya inala to so ereng na sakey ya aripen, ya agawan kaulibay na saray totoo.” (Fil. 2:5-7) Antoy lalanoren na satan?

¹⁰ Agaylay kabaleg na pribilehyo nen Jesus a nakaiba so Ama to diad tawen, balet ta mabulbulos ton ‘nilukpos so inkasikato.’ Inyalis so bilay to diad panag-anakan na sakey a Judion birhen, pian ombaleg  ditan ed loob na siam bulan anggad sikatoy inyanak bilang sakey ya ugaw ya agmakapangiyagel ed inkasikato. Insan sikatoy binmaleg diad sankaabungan na ordinaryon karpentero a si Jose, ya anggad nagmaliw a tin-edyer. Anggaman perpekto si Jesus, sanlegay inkatobonbalo to et nantultuloy a nampasakop ed aliwan perpekton atateng. (Luc. 2:51, 52) Agaylan nikadkaduman kapaabebaan!

11. Diad antoran paraan a naalig tayo so kapaabebaan nen Jesus?

¹¹ Naalig tayo so inkamapaabeba nen Jesus sano mabulos tayon awaten iray asainmin a singano abebbeba. Alimbawa, imanoen pay asainmin tayon ipulong so maong a balita. Satan a kimey et singa abebbeba, lalo la no lapud satan et ibabaliwala, babalawen, odino bubusolen itayo na totoo. Balet, no manseet itayon manpulong, natulongan tayo ray arum a mangawat ed imbitasyon nen Jesus ya ontumbok ed sikato. Diad ontan et ontutulong itayon makapangiliktar na bilay. (Basaen so 2 Timoteo 4:1-5.) Say sananey nin alimbawa et say panmintina ed Kingdom Hall tayo. Kabiangan ed satan so pambantak na basura, pampanis, tan panlinis na kasilyas​—kimkimey a singano abebbeba! Anggaman ontan, amta tayon kabiangan na sagradon panaglingkor tayo so panmintina ed Kingdom Hall, say sentro na malinis a panagdayew diad lugar tayo. Diad mabulos a panumpal ed kimkimey a singano abebbeba, ipapanengneng tayo so kapaabebaan, sirin et natutumbok tayo so bakat nen Kristo.

Magmaliw a Maseseg a Singa si Jesus

12, 13. (a) Panon ya impanengneng nen Jesus so inkaseseg to, tan antoy amakiwas ed sikato? (b) Antoy mamakiwas ed sikatayon magmaliw a maseseg ed ministeryo?

¹² Imanoen pay inkaseseg nen Jesus ed ministeryo. Dakel so ginawa to sanen wadiad dalin. Sanen kalangweran ni, nayarin inibaan toy pinagka-ama ton si Jose a mankarpentero. Legan ton manmiministeryo, sikatoy nanggawa na saray milagro, a kabiangan ed satan so impamaabig ed saray mansasakit tan impamaoli ed saray inaatey. Balet say manunan kimey to et say panangipulong ed maong a balita tan panangibangat ed saray ondengel. (Mat. 4:23) Bilang papatumbok to, satan met so kimey a nepeg tayon gawaen. Panon tayon natumbok so ehemplo to? Nagawaan tayo itan no mipara’d si Jesus so motibo tayo.

¹³ Manuna ed amin, say panangaro nen Jesus ed Dios so amakiwas ed sikaton manpulong tan manbangat. Ontan met, pinabli to ray katuaan ya imbangat to. Parad sikato, saratan a katuaan et mabmablin kayamanan, tan labalabay ton inabang iratan ed arum. Sikatayo ran “managbangat” et ontan met so nalilikna tayo. Isip yo pa iray pigaran mabmablin katuaan a naaralan tayo ed Salita na Dios! Amta tayo so isyu nipaakar ed sankatalbaan ya inkasoberano tan no panon itan a nasolbar. Malinlinew tayon atalosan no antoy ibabangat na Kasulatan nipaakar ed kipapasen na inaatey tan  saray bendisyon ya onsabi diad balon mundo na Dios. Balanglan agano ni odino nensaman tayo ni naaralan iratan a katuaan, mansiansia iratan a mabmabli. Daan man odino balo ni iratan a katuaan, peteg a mabmabli iratan a kayamanan. (Basaen so Mateo 13:52. *) Panamegley na impapuso tan maligsan pampulong, nipanengneng tayo ed arum a papablien tayo ray imbangat nen Jehova ed sikatayo.

14. Panon tayon naalig so paraan na impanbangat nen Jesus?

¹⁴ Imanoen met no panon a nambangat si Jesus. Lawas ton impaimano ed saray katongtong to so Kasulatan. Mabetbet ton imparungtal so importantin punto diad impangibagay: “Walan nisulat.” (Mat. 4:4; 21:13) Diad saray akasulat a balikas to, sikatoy angaon odino anukoy ed masulok a kapaldua na saray libro ed Hebreon Kasulatan. Singa si Jesus, lawas tayon uusaren so Biblia diad ministeryo tayo tan pampepelengan tayon iparungtal itan anggad posible. Diad ontan et tutulongan tayo ray maptek-impanpuson totoo a nanengneng a say ibabangat tayo et kanonotan na Dios, aliwan say opinyon tayo. Talagan panliketan tayo sano wala ray onabuloy ya ibasaan na Biblia tan isingbat so kakanaan tan kabaliksan na Salita na Dios! Tan sano awaten da so imbitasyon ya ontumbok ed si Jesus, agaylay liket tayo.

Say Panumbok ed si Jesus et Kabaliksan toy Pangaro ed Arum

15. Antoy nikadkaduman kalidad nen Jesus, tan antoy epekto ed sikatayo na panmolimoli ed satan?

¹⁵ Say unor ya aspekto na personalidad nen Jesus a pantongtongan tayo et talagan makapaligsay puso​—say panangaro to ed totoo. Oniay insulat nen apostol Pablo: “Say aro nen Kristo pasooten [odino tangguyoren] to kami.” (2 Cor. 5:14) No molimolien tayoy panangaro nen Jesus ed katooan tan ed balang sakey ed sikatayo, natenyeg so kapusoan tayo tan natangguyor itayon mangalig ed ehemplo to.

16, 17. Panon ya impanengneng nen Jesus so panangaro to ed arum?

¹⁶ Panon ya impanengneng nen Jesus so panangaro to ed arum? Say sankabalgan lan pakapatnagan na panangaro to et say mabulos ya impangitalaga to’d bilay to parad totoo. (Juan 15:13) Balet, legan na impanministeryo to, impanengneng to met so panangaro to ed arum ni ran paraan. Singa bilang, sikatoy akilikna ed saramay maniirap. Sanen anengneng toy panak-akis di Maria tan saray arum nin miaambegya ed impatey nen Lazaro, talagan atenyeg so puso to ed ermen da. Anggaman paolien to met lanlamang si Lazaro, ontan lay impakatenyeg na liknaan to a sikatoy “nannangis.”​—Juan 11:32-35.

¹⁷ Diad banda’d gapo na ministeryo nen Jesus, sikatoy dinago na sakey ya akating ya angikuan: “No labay mo, nayarian mo ak a linisan.” Antoy  reaksion nen Jesus? Inkuan na Biblia ya “atenyeg so panangabagey to.” Insan sikatoy nanggawa na bengatlan nikadkaduma. “Inyunat toy lima to, et sikatoy diniwit to tan inkuan to, ed sikato, Labay ko; nalinisan ka komon. Tan dingan na intaynan na kating ed sikato, et agawan malinis.” Unong ed Mosaikon Ganggan, marumsis iray akating, tan anggan agla bembenan nen Jesus so laki, seguradon napaabig to. Balet, legan ton paaabigen so akating, inabuloyan nen Jesus a nalikna na sayan laki so nayarin pigapigay taon lan agto naeksperiensya, salanti, say pangegna na arum a too. Agaylan panangabagey so impanengneng nen Jesus!​—Mar. 1:40-42.

18. Panon tayon nipanengneng so ‘panangabagey’?

¹⁸ Bilang papatumbok nen Kristo, say kakaukolanen ed sikatayo et say pangipanengneng na panangaro panamegley na ‘pangabagey.’ (1 Ped. 3:8) Nayarin mairap tayon talosay nalilikna na agin manasagmak na graben sakit odino depresyon, lalo la no agtayo nin balot asali iratan. Anggaman agbalot nansakit si Jesus, sikatoy siansia nin akilikna ed saray mansasakit. Panon tayo met a nabayuboan so ontan ya empatya? Panamegley na maanos ya idengel tayo legan ya ibebesngaw na saray maniirap so walad kapusoan da. Nayari tayo met a tepetay inkasikatayo, ‘No siak so walad kipapasen da, anto kasi naliknak?’ No magmaliw itayon malikas ed liknaan na arum, lalo itayon ‘makapangibalap [odino makapansalita na makaligliwa] ed saray apunaw ed puso.’ (1 Tes. 5:14) Diad ontan et natutumbok tayo si Jesus.

19. Panon itayon naapektoan na ehemplo nen Jesus?

¹⁹ Talagan makapalikliket ya aralen iray imbaga tan ginawa nen Jesu-Kristo! Mientras ondarakel so naaaralan tayo nipaakar ed si Jesus, lalon sikatoy labay tayon aligen, tan lalon labay tayon tulongay arum a mangalig met ed sikato. Panggayagaan tayo sirin a tumboken so Mesianikon Ari​—natan tan ed andi-angga!

[Paimano ed Leksab]

Sarag Mo Kasin Ipaliwawa?

• Singa si Jesus, panon tayon nipanengneng so karunongan?

• Diad antoran paraan a nipanengneng tayoy kapaabebaan?

• Panon tayon nabayuboan so inkaseseg ed ministeryo?

• Diad antoran paraan a naalig tayo so impanengneng nen Jesus a panangaro ed arum?

[Tepetepet Parad Panagaral]

[Kahon/Litrato ed pahina 5]

SAKEY A LIBRON MAKATULONG ED SIKATAYO A MANGALIG ED KRISTO

Legan na programa na 2007 a distriton kombension, walay impaway a libro ya apauloan na “Gala Magmaliw Kan Patumbok Ko.” Sayan libro, a walaay 192 a pahina, et denisinyon ontulong ed saray Kristiano pian nisentroy imano ra ed si Jesus, nagkalalo la ed saray kalidad tan ginawa to. Kayari na duaran kapitulo a pinagka-introduksion, imparungtal na unonan seksion iray pandinayewan a kalidad nen Jesus, salanti say kapaabebaan, pakpel, karunongan, katutulok, tan panagsungdo to.

Insan siningbat na saray sinmublay a seksion so nipaakar ed kimkimey nen Jesus bilang managbangat tan manangipulong ed maong a balita, tan say nipaakar ed pigaran paraan a napatnagan so pirmin panangaro to. Diad interon libro, say impormasyon et imparungtal pian natulongan iray Kristiano a mangalig ed si Jesus.

Matalek kami ya amin tayo et napakiwas na sayan libro a mangusisa ed inkasikatayo tan itepet: ‘Talaga kasin tutumboken koy Jesus? Panon kon lalon natumbok si Jesus?’ Natulongan met na saya “iramay walaan na dugan kipapasen na puso parad bilay ya andi-anggaan” a magmaliw a papatumbok nen Kristo.​—Gawa 13:48, NW.

[Litrato ed pahina 4]

Inmabuloy si Jesus ya onla diad dalin tan iyanak bilang too. Anton kalidad so kakaukolanen na satan?

[Litrato ed pahina 6]

Antoy mamakiwas ed sikatayo a magmaliw a maseseg ed ministeryo?