Alay Abig a Diskarte

WALAY taloran kalangweran a lalaki a taga Sentral Aprika a labalabay day makaatendi ed distriton kombension da. Panoy pakakar da balet, ta ngalngali 90 kilometro so kaarawi na satan, a say dalanen da et atibtibagkol, marabok, tan anggapo ni pati naluganan da? Anonotan da met so ombayes na taloran bisiklita, ingen ta anggapoy naromog dan sarag toran isabi ed laen da.

Akabatan natan na sakey ya elder so problema ra, kanian impabayes toy bisiklita to, a daan la balet ta sarag to ni. Inyistorya na sayan elder no antoy ginawa ran remedyo nensaman pian makaatendi ira ed kombension. Insan insuheri ton pansusublayan dan talo imay bisiklita to. Simplin solusyon, ingen ta kaukolan toy diskarte. Panon da balet a nagawaan itan?

Pian napaliisan day mansasnit a petang na agew, sarayan tobonbalon agagi so angabkabuasan a nambabana, tan intaker da iray bagahe ra ed bisiklita. Insan inmuna lan nambisiklita imay sakey, samay duara balet et manumtombok a manaakar. Kalampas na mga kapalduay kilometro, tinmunda imay akabisiklita tan impasaral toy bisiklita ed sengeg na kiew. Siempre, say angipasaralan to et diad samay seguradon nanengneng na duaran iba to pian agsublayen na matakew. Insan to nanakar.

Kasabi na saramay duara ed kawalaay bisiklita, linmugan met imay sakey, ingen ta nantultuloy nin nanakar imay kaiba to na manga kapalduay kilometro lamet, antis na turno ton manbisiklita. Kanian, lapud maong a panagplano tan determinasyon da, nagmaliw labat lan 60 kilometro so aakaren da, imbes a 90 kilometro komon. Anggaman ontan, talagan abawbawi ray impansagpot da, ta akapinengnengan ira’d saray agagi ed kombension tan nanggayagaan day espiritual a piesta. (Deu. 31:12) Diad sayan taon, gawaen yo met kasi anggaay nayarian yo pian makaatendi ed distriton kombension yo?