Say Salita nen Jehova et Mabilay

Saray Pabitar ed Libro na Malaquias

PITOMPLON taon lay linmabas manlapud impakasumpal na inkipaalagey lamet na templo ed Jerusalem. Ingen diad ilalabas na panaon, say espiritualidad na saray Judio et linmetey a maong. Anggan saray saserdote et nagmaliw lan marelmeng. Siopa so mangipaimano ed tuan kipapasen da tan manggunaet ya ontulong ed sikaran onapit ed Dios? Inter nen Jehova iyan kimey ed si propetan Malaquias.

Insulat nen Malaquias so unor a libro na Hebreon Kasulatan a mankargay propesiyan impuyan na Dios. Mapuersa so impangisulat to ed satan. Say italineng ed sayan mapropetikon salita nen Malaquias so makatulong ed sikatayo pian makapanparaan ed “baleg tan makapataktakot ya agew nen Jehova,” sano sayan marelmeng a sistema na bengabengatla et mangangga la.​—Malaquias 4:5.

SARAY SASERDOTE SO ‘NANSENGEGAY INKAGAPOL NA DAKEL’

(Malaquias 1:1–2:17)

Imbalikas nen Jehova so liknaan to ed Israel, sanen inkuan ton: “Inaro takayo.” Balet ta minudmora na saray saserdote so ngaran na Dios. Panon? Diad ‘impangibagat da na marutak a tinapay ed tapew na altar’ to tan diad impangiyapay da na “piley tan mabeblay” a bagat.​—Malaquias 1:2, 6-8.

Lapud saray saserdote et ‘agapol so dakel dia ed tunong [ganggan].’ Saray totoo et mangaagamil na “liputan, balang too sumpa ed agi to.” Akiasawa met so arum ed saray bibiin aliwan Judio. Tan trinaidor na arum so “asawa na inkaugaw da.”​—Malaquias 2:8, 10, 11, 14-16.

Makasulatan Iran Tepet a Naebatan:

2:2​—Panon ya ‘inayew [nen Jehova] so panamendisyon’ na sarayan matungangan saserdote? Ginawa iya na Dios sanen impagmaliw ton ayew so panamendisyon ya impikasi na sarayan saserdote.

2:3​—Anto so kabaliksan na ‘pangiwalsik na dutak’ ed lupa na saray saserdote? Unong ed ganggan, say dutak na saray imbagat ya ayayep et kaukolan ya awiten ed paway na kampo insan poolan. (Levitico 16:27) Say pangiwalsik na dutak ed lupa na saray saserdote et mankabaliksay impangipulisay nen Jehova ed saray bagat tan panggula to ed saray mangiyaapay.

2:13​—Lua na siopa so anelap ed altar nen Jehova? Lua iratan na saramay kaasawaan a bibii a linma ed santuaryo na templo tan inmey-ey ed si Jehova. Antoy sengegan na ermen da? Saray Judion kaasawaan da so angidiborsio ed sikara diad agmakatunongan iran rason tan tinaynan da iraya pian makapangasawa na mas ug-ugaw a bibiin aliwan Judio.

 Saray Leksion Parad Sikatayo:

1:10. Agnaliliketan si Jehova ed bagat na saray maagum a saserdote, a manpapabayar ed anggan saray ordinaryon serbisyo labat a singa say pangikapot na puerta odino pamparlang ed altar. Talagan importante a say mamapakiwas ed sikatayo diad panagdayew ontan met ed ministeryo et say puron panangaro tayo ed si Jehova tan ed saray kaparan too, aliwan pian makaganansia!​—Mateo 22:37-39; 2 Corinto 11:7.

1:14; 2:17. Ag-aabuloyan nen Jehova so pansimpisimpitan.

2:7-9. Saramay naikdan na pribilehyo a manbangat ed kongregasyon so kaukolan a maneguro a say ibabangat da et mitukoyan ed Salita na Dios, say Masanton Kasulatan, tan diad saray nibase ed Biblia iran publikasyon na “managpaga a napanmatalkan.”​—Lucas 12:42; Santiago 3:11.

2:10, 11. Iilaloan nen Jehova ya ipapuso na saray mandadayew ed sikato so simbawan miasawa lambengat unong ed “linawa na katawan.”​—1 Corinto 7:39.

2:15, 16. Kaukolan a tooren na saray tuan managdayew so impisipanan da diad asawa na inkaugaw da.

‘SAY [TUAN] KATAWAN ONSABI NAANI ED TEMPLO TO’

(Malaquias 3:1–4:6)

‘Biglan onsabi ed templo to so [tuan] Katawan [si Jehova a Dios]’ a kaibay “igaganggan na sipan [si Jesu-Kristo].” Say Dios “onasingger naani ed [baley to] ed panangukom,” tan masiglat naani a mantasi sumpad saray managgawa na mauges. Niarum ni, sakey a “libro a pakanodnonotan” so nisulat nipaakar ed saramay tinmakot ed Jehova.​—Malaquias 3:1, 3, 5, 16.

Say agew ya ‘onaapoy a singa palbaan’ so onsabi tan mangakmon ed amin a mauges. Balet, sakbay ya onsabi itan, sakey a propeta so nibaki pian “ipawil to naani so puso na saray atateng ed saray ananak, tan say puso na saray anak ed saray atateng.”​—Malaquias 4:1, 5, 6.

Makasulatan Iran Tepet a Naebatan:

3:1-3​—Kapigan linma ed templo so “[tuan] Katawan” tan say “igaganggan na sipan,” tan siopa so imbaki ya akauna ed sikara? Si Jehova so linma ed templo to panamegley na say manangilaman to tan nilinisan to itan nen Nisan 10, 33 C.E. Saya so agawa sanen linmoob si Jesus ed templo tan inaablog to iramay managtagilako  tan saray sumasaliw ditan. (Marcos 11:15) Agawa iya talora tan kapalduan taon kayarin alanaan si Jesus bilang say Aturon-Ari. Ontan met, ompapatnag a kayari na talora tan kapalduan taon na inkaturo nen Jesus ed tawen bilang Ari, inibaan to si Jehova ed espiritual a templo tan asukayan dan kaukolan a nalinisan iray totoo na Dios. Pian niparaan iray Judio ed isabi nen Jesu-Kristo, si Juan a managbautismo so nibaki nen inmunan siglo. Diad panaon tayo, sakey a mensahero so akauna lan imbaki pian manparaan ed isabi nen Jehova ed espiritual a templo to. Sani nen 1880, ginapoan la na sakey a grupo na saray estudyante na Biblia ya ibangat iray Makasulatan a katuaan pian nipawil iratan ed kapusoan na saray masimoon ya indibidual.

3:10​—Kasin say pangiter na “amin a kakaplo” et mankabaliksan na pangiter tayo na anggaay nayarian tayo ed si Jehova? Diad impatey nen Jesus, anampot met la so Mosaikon Ganggan, kanian say panangiter na kakaplo na kuartan nalmo na sakey et agla kakaukolanen. Ingen say panangiter na kakaplo et walaan na simbolikon kabaliksan. (Efeso 2:15) Aliwan say pangiter tayo na anggaay nayarian tayo so irerepresenta na satan. Nensaman, say kakaplo et iiter kada taon, ingen aminpinsan tayon inter so anggaan na nayarian tayo, sanen indedika tayoy inkasikatayo ed si Jehova panamegley na bautismo ed danum. Manlapu la ed satan, amin a kayarian tayo et kien la nen Jehova. Ingen, aabuloyan to ya usaren tayo ed panlingkor ed sikato so simbolikon kakaplo tayo, salanti, say niiter tayo manlapud saray kayarian tayo. Satan so nausar tayo depende ed kipapasen tayo odino anggad iner so iyabuloy na puso tayo. Kabiangan ed saray bagat ya iiter tayo ed si Jehova so panaon, biskeg, tan saray kayarian tayo ya uusaren ed panagpulong na Panarian tan panggagawa na babangatan. Ontan met ed pipiaral, pambisita ed saray mansasakit odino matatken lan kapananisiaan, tan pangiter na pinansyal a tulong parad kiyalibansay tuan panagdayew.

4:3​—Panon ya ‘igatin [na saray lingkor nen Jehova] iray marelmeng’? Aliwan literal a mibiang iray lingkor na Dios diad dalin ed ‘pangigatin na saray marelmeng,’ salanti, diad pangipaakseb na panangukom ed sikara. Imbes et ipapabitar na saya a nagawaan iya na lingkor nen Jehova diad piguratibon dalan panamegley na interon puson pibiang da ed panselebra na impanalo kayari na kadederal na sayan mundo nen Satanas.​—Salmo 145:20; Apocalipsis 20:1-3.

4:4​—Akin et kaukolan a ‘nonoten tayo so tunong nen Moises’? Saray Kristiano et agkaukolan a manumbok ed satan a Ganggan, balet ta kinmana iyan “anino na saray penel a bengatla ya onsabi.” (Hebreos 10:1) Kanian say pangimano ed Mosaikon Ganggan so ontulong ed sikatayon naamtaan no panon ya asumpal iray akasulat ditan. (Lucas 24:44, 45) Kabiangan met na sayan Ganggan iray “alimbawa na saray bengatlan mangatatawen.” Kanian kaukolan so panaral ed saya no kaliktan tayon natalosan iray bangat na saray Kristiano tan naamtaan no panon itayon onkiwas.​—Hebreos 9:23.

4:5, 6​—Siopa so irerepresenta nen “Elias a Propeta”? Nipasakbay a si “Elias” so manggawa na panangipawil, kabaliksan na saya so pangiparaan ed kapusoan na totoo. Si Juan a managbautismo so tinukoy nen Jesu-Kristo ya “Elias” nen unonan siglo C.E. (Mateo 11:12-14; Marcos 9:11-13) Saray modernon agew a kapara to so imbaki “sakbay ya onsabi so baleg tan makapataktakot ya agew nen Jehova.” Anggapo lay arum a mangirerepresenta ed si Elias natan noag say “matoor tan makabat ya aripen.” (Mateo 24:45) Sayan ulop na alanaan a Kristiano et makulikulin ontutulong ed kada indibidual  a nawalaan lamet na maabig a relasyon ed Dios.

Saray Leksion Parad Sikatayo:

3:10. Ikikibot tayo ed inkasikatayo so bendisyon nen Jehova no agtayo iter ed sikato so anggaay nayarian tayo.

3:14, 15. Lapud mauges ya ehemplo na saray saserdote, nileglemew na saray Judio so panaglingkor ed Dios. Saray walaan na pribilehyo ed Kristianon kongregasyon so kaukolan a magmaliw ya ehemplo.​—1 Pedro 5:1-3.

3:16. Walaan si Jehova na rekord na saramay ontatakot tan manmamatoor ed sikato. Sikatoy sinononot ed sikara tan iliktar to ira sano panganggaen to la iyan marelmeng a mundo nen Satanas. Kanian pansiansiaen tayo so determinasyon tayon manmatoor ed Dios.​—Job 27:5.

4:1. Diad agew na pikuentaan ed si Jehova, pareho so pansumpalan na say “sanga” tan “lamot,” salanti, saray ugugaw ya anak so dusaen a singa met ed pandusa ed saray atateng da. Talagan baleg so responsabilidad na atateng ed angkekelag nin anak da! Kaukolan a mankimey na impasya iray ateng pian nagamoran da so panangabobon na Dios tan napansiansia ra so maabig a talindeg ed arap to.​—1 Corinto 7:14.

‘Takotan so Tuan Dios’

Siopa so makaliktar ed “baleg tan makapataktakot ya agew nen Jehova”? (Malaquias 4:5) Diad “sikayo ya antakot ed ngaran ko,” kuan nen Jehova, “ompaway naani so banwa na inkatunong a pati pananambal ed saray payak to; et sikayo onla kayo naani, tan manlukso kayo naani a singa say kilaw na baka ed atotong.”​—Malaquias 4:2.

“Say banwa na inkatunong,” si Jesu-Kristo, so onsisinag ed saramay marespeton ontatakot ed ngaran na Dios, tan panggagayagaan day panangabobon nen Jehova. (Juan 8:12) Parad sikara et wala met so “pananambal ed saray payak to,” salanti, iyabig ed espiritual natan, tan sigpot a kapaabig ed emosyonal, pisikal, tan mental, diad balon mundo na Dios. (Apocalipsis 22:1, 2) Lapud liket tan gayaga ra, sikaray onkikiwas a singa “kilaw na baka ed atotong.” Legan tayon tatalaranan irayan panamendisyon, lawas tayon ipapuso iray simbawa nen Arin Solomon: “Takotan mo so Dios tan unoren mo so saray ganggan to; ta saya sikato so katiponan na kanepegan na too.”​—Eclesiastes 12:13.

[Litrato ed pahina 26]

Sakey a maseseg tan debotado a lingkor na Dios si propetan Malaquias

[Litrato ed pahina 29]

Kaukolan a say ibabangat tayo et mitunosan ed Biblia

[Litrato ed pahina 29]

Totooren na saray lingkor nen Jehova so impisipanan da ed panangasawa