Ombiskeg Komon so Kongregasyon

“Say kongregasyon . . . so awalaan na sakey a peryodo na kareenan, a napapabiskeg.”​—GAWA 9:31, NW.

1. Antoray nayarin nitepet nipaakar ed “kongregasyon na Dios”?

 NEN Pentecostes 33 C.E., inabobonan nen Jehova so sakey a grupo na saray babangatan nen Kristo bilang sakey a nasyon, say “Israel na Dios.” (Galacia 6:16) Sarayan Kristiano ya alanaan na espiritu so nagmaliw met a “kongregasyon na Dios,” unong ed impanukoy na Biblia. (1 Corinto 11:22, NW) Anto so nalalanor ed pagmaliw a kongregasyon na Dios? Panon iyan naorganisa? Panon iyan onkukurang diad dalin, anggaman saray membro na satan et walad nanduruman pasen? Tan panon a naapektoan so bilay tan liket tayo?

2, 3. Panon ya impabitar nen Jesus a mauksoy so inkaorganisa na kongregasyon?

² Unong ed inmunan artikulo, impasakbay nen Jesus so kiletneg na sayan kongregasyon na saray alanaan a patumbok to, ya oniay imbaga to ed si apostol Pedro: “Dia ed tapew na sayan baton dampay [Jesu-Kristo] ipaalagey ko naani so iglesiak; et saray pinto na Hades ag-ontalona naani ed sikato.” (Mateo 16:18) Niarum ni, sanen kaiba nen Jesus iray apostoles to, insalaysay to no anto so betang tan uksoyan ed loob na niletneg a kongregasyon.

³ Imbangat nen Jesus diad panamegley na gawa tan salita to a walaray mangidaulo ed kongregasyon. Panserbian, odino panlingkoran da so kakaiba ra ed grupo. Oniay imbaga nen Kristo: “Amta yo a saray imbilang a manuley ed saray Gentiles pakatawan ira ed sikara; et saray angatagey da agamilen day pakauley ed sikara. Balet aliwan ontan ed sikayo: ingen siopaman a malabay a magmaliw a baleg ed sikayo, sikato naani managlingkor yo. Tan siopaman a malabay a sikatoy unaan ed sikayo sikato naani aripen na amin.” (Marcos 10:42-44) Malinew, say “kongregasyon na Dios” et aliwan ataytayak tan akabiigbiig iran indibidual, a pakapatnagan ya andian itan na uksoy. Imbes, wala so mauksoy ya inkaorganisa ed kongregasyon, a saray indibidual et sankakaiban mankikimey tan maapit ed balang sakey.

4, 5. Panon tayon naseguro a say kongregasyon et mankaukolan na maespiritual a panamilin?

⁴ Impabitar nen Jesus, say Ulo na “kongregasyon na Dios,” a saray apostol to tan arum niran akaaral ed sikato so walaan na espisipiko iran responsabilidad ed kongregasyon. Anto iratan a responsabilidad? Say importantin betang da et say maespiritual a panangibangat ed saray membro na kongregasyon. Nodnonoten pa so imbaga nen Jesus ed si Pedro diad arap na arum niran apostol: “Simon, ya anak nen Jonas, inaro mo ak a nagkalalo nen saraya?” Tan inmebat si Pedro: “On, Katawan, sika amtam ya inaro ta ka.” Insan imbaga nen Jesus ed sikato: “Pakan mo so saray karnerok. . . . Ipakabkab mo so saray karnerok. . . . Pakan mo so saray karnerok.” (Juan 21:15-17) Talagan ambelat iyan responsabilidad!

⁵ Natebek tayo ed sarayan salita nen Jesus a saray kabiangan na kongregasyon so niyaliling ed saray karneron walad kasimpukokan. Sarayan karnero​—Kristianon lalaki, bibii, tan ugugaw​—so kaukolan a natagano ed espiritual tan napastolan a maong. Niarum ni, lapud ingganggan nen Jesus so amin a patumbok to ya ibangat da so arum tan manggawa ira na babangatan, siopaman a magmaliw a karnero to  so kaukolan a nipasal no panon dan sumpalen iyan ganggan a nanlapud Dios.​—Mateo 28:19, 20.

6. Antoran uksoyan so ginawa diad kapkapangiletneg nin “kongregasyon na Dios”?

⁶ Sanen niletneg lay “kongregasyon na Dios,” saray membro so regular a nantitipon pian nabangatan tan makapanpapasesegan ira: “Nansiansia ran malet ed bangat na saray apostoles, tan ed panmumuyong tan panagpisag na tinapay tan ed saray pikakasi.” (Gawa 2:42, 46, 47) Sakey nin makatantandan detalye ed sayan salaysay et walaray kualipikadon lalaki ya aturon mangasikaso ed pigaran pamaakaran a makatulong ed saray kongregasyon. Sikara so apili aliwan lapud atagey so aral da, odino lapud walaan ira na dunong ed nanduruman kimey. Sikara so lalakin “napno na espiritu tan kakabatan.” Sakey la ed saratan et si Esteban, tan idadanet na salaysay so impagmaliw ton ‘laki a napno na pananisia tan masanton espiritu.’ Say epekto na sayan uksoyan na kongregasyon et ‘binmaleg so Salita na Dios, tan say bilang na saray binangatan dinmakerakel a tuloy ed Jerusalem.’​—Gawa 6:1-7.

Lalakin Inusar na Dios

7, 8. (a) Saray apostol tan mamasiken ed Jerusalem so nanlingkor bilang anto diad limog na inmuunan Kristiano? (b) Anto so resulta sanen nipawit so instruksion ed saray kongregasyon?

⁷ Tua, saray apostol so angidaulo ed inmunan uksoyan na kongregasyon, balet aliwan sikara labat so angidaulo. Diad sakey ya inkagawa, si Pablo tan saray kakaiba to so pinmawil diad Sirya Antioquia. Oniay insalaysay na Gawa 14:27: “Sanen akasabi ra, tan atipon da so iglesia, inulit da so saray amin a bengatlan ginawa na Dios ed sikara.” Sanen wadman ira ed satan a lokal a kongregasyon, walay linmesan isyu no kasin kinaukolan nin manpagalsim iray mananisian Gentil. Pian naresolbe so isyu, si Pablo tan Bernabe so imbaki ed ‘saray apostol tan mamasiken diad Jerusalem,’ a nanlingkor bilang mananguley ya ulop.​—Gawa 15:1-3.

⁸ Say Kristianon matatken a si Santiago, ya agi nen Jesus ed ina tan aliwan apostol, so angidaulo diad ‘impantitipon na saray apostol tan mamasiken pian motekteken da so sayan bengatla.’ (Gawa 15:6) Kayari na maalwar ya impangikonsidera ra ed satan ya isyu tan diad tulong na masanton espiritu, sikara so awalaan na desisyon  unong ed Kasulatan. Sayan desisyon so impawit ed saray kongregasyon panamegley na sulat. (Gawa 15:22-32) Saramay angipasabian ed sayan impormasyon so angawat tan angiyaplika ed saya. Anto so resulta na saya? Apabiskeg tan apaseseg iray agagi. Oniay kuan na Biblia: “Kanian saray iglesia apaletan ira ed pananisia, et dinmakel so bilang da ed inagew-agew.”​—Gawa 16:5.

9. Antoran betang na saray kualipikadon Kristianon lalaki so indatak na Biblia?

⁹ Balet panon so inkurang na saray kongregasyon ed inagew-agew? Konsideraen tayo pa iray kongregasyon ed isla na Creta. Anggaman mauges so reputasyon na karaklan a totoo ditan, arum so anguman tan nagmaliw a tuan Kristiano. (Tito 1:10-12; 2:2, 3) Sikara so manaayam ed nanduruman syudad, tan amin da so arawi ed mananguley ya ulop ed Jerusalem. Balet, aliwa itan a baleg a problema lapud walaray maespiritual a “mamasiken” ya aturo ed kada kongregasyon diad Creta tan diad arum met iran lugar. Akapet na sarayan lalaki iray kualipikasyon a nidatak diad Biblia. Sikara so aturo bilang mamatatken, odino manangasikaso, a “mangikalar na maabig a bangat, tan napasisia [ra] met so saray onsusumpa.” (Tito 1:5-9; 1 Timoteo 3:1-7) Arum ed saray maespiritual a lalaki so kualipikadon tinmulong ed saray kongregasyon bilang diakono, odino ministeryal a lingkor.​—1 Timoteo 3:8-10, 12, 13.

10. Unong ed Mateo 18:15-17, panon a naresolbe iray ambelat iran problema?

¹⁰ Impabitar nen Jesus a niwala so ontan ya uksoyan. Nonoten so salaysay ed Mateo 18:15-17 sanen inkuan ton walaray panaon a nayarin onlesa iray problema ed baetan na duaran lingkor na Dios, a mankasalanan so sakey sumpad agi to. Samay akapankasalananan so onasingger ed samay nankasalanan tan ‘ipaliwawa to ed sikato so kasalanan to,’ a sikaran dua lambengat. No sayan kundang so ag-akaresolbe ed problema, say sakey odino duaran akaamta ed agawa so nayarin nakerew ya ontulong. Panon to no agnin siansia aresolbe? Oniay imbaga nen Jesus: “No agto ra labay a dengelen, sikatoy ibagam ed iglesia; et no agto labay met a dengelen so iglesia, sikatoy ipasen mo ed sika a singa Gentil tan publikano.” Sanen imbaga itan nen Jesus, say “kongregasyon na Dios” so tugyopen ni na saray Judio, kanian diad sikara so primeron inkiyaplikaan na satan. * Balet, sanen niletneg la so Kristianon kongregasyon, onaplika la ed saya so panangidirehi nen Jesus. Sakey ni iyan pakapatnagan a say totoo na Dios et walaan na uksoyan ed loob na kongregasyon a mamapabiskeg tan mangigigiya ed kada sakey a Kristiano.

11. Anto so betang na saray mamatatken ed panresolbe na saray problema?

¹¹ Matukotukoy, saray mamasiken, odino manangasikaso, so mangirepresenta ed lokal a kongregasyon diad panresolbe ra ed saray problema odino diad pangasikaso ra ed saray kason kasalanan. Mitunosan iya ed saray kualipikasyon na mamatatken ya asalambit ed Tito 1:9. On, saray mamatatken et ag-ayadyari, a singa si Tito ya imbaki nen Pablo ed saray kongregasyon pian ‘manguksoy ed saray bengatlan kulang.’ (Tito 1:4, 5) Natan, saramay nirerekomenda bilang mamatatken et nepeg ya apaneknekan da lay pananisia tan debosyon da ed abayag lan panaon. Wala sirin so rason na agagi diad kongregasyon pian manmatalek ed panangidirehi tan panangidaulo ya itatarya diad panamegley na sayan uksoyan.

12. Anto so responsabilidad na mamatatken diad kongregasyon?

¹² Oniay imbaga nen Pablo ed saray mamatatken ed kongregasyon na Efeso: “Alwaran yo so inkasikayon dili, tan say amin a kasimpukokan ya anginan na espiritu santo ed sikayo a managbantay, pian pastolan yo so iglesia na Dios, a sikato so sinaliw to ed dala ton dili.” (Gawa 20:28) Petepeteg met iya natan ed saray manangasikaso na kongregasyon ya aturon ‘manpastol ed kongregasyon na Dios.’ Sikara so nepeg a manpastol ed maaron paraan, ya ag-ira pakatawan ed  pulok. (1 Pedro 5:2, 3) Nepeg a panggunaetan na mamatatken so pamabiskeg tan panulong ed ‘amin a pulok.’

Mansiansian Maapit ed Kongregasyon

13. No maminsan, anto so nayarin nagawa ed loob na kongregasyon, tan akin?

¹³ Saray mamatatken tan arum nira et ag-ayadyari, kanian panapanaon a walaray nagawan agpantatalosan odino problema, a singa agawa met nen inmunan siglo sanen mabilay ni so arum ed saray apostol. (Filipos 4:2, 3) Nayarin makapansalita na ansakit odino agtanton tua so sakey a manangasikaso odino sananey ya agi. Odino nayarin isipen tayo a walay nagagawan agmakasulatan, tan ompatnag ya amta itan na saray mamatatken balet ta anggapo so gagawaen da pian ipetek itan. Siempre, nayarin say problema et inasikaso la odino aasikasoen ni unong ed Kasulatan tan unong ed saray detalye ya agtayo amta. Balet, anggaman walay situasyon ya ipapasen tayon agmakasulatan, konsideraen pa iya: Diad Corinto nensaman et walay nanggaway kasalanan diad loob na kongregasyon, sakey a kongregasyon ya aasikasoen nen Jehova. Sinmabi panaon, sineguro To a sayan problema et naasikaso, diad susto tan mapekder a paraan. (1 Corinto 5:1, 5, 9-11) Nayarin oniay itepet tayo, ‘No nambilay ak la ed Corinto nensaman, anto kasi so reaksion ko ed saman ya agawa?’

14, 15. Akin ya agla tinmumbok ed si Jesus so arum ed saray babangatan to, tan anto so leksion a naaralan tayo ed satan?

¹⁴ Konsideraen pa met so sakey nin posible a nagawa ed loob na kongregasyon. Ipasen pa a walay indibidual ya agto natalosan tan agto naawat so sakey a bangat na Biblia. Nayarin sikatoy nanusisa lan maong ed Biblia tan ed saray publikasyon a walad kongregasyon tan kinerew to ni ingen so tulong na maespiritual iran kaparan Kristiano, pati saray mamatatken. Balet, siansia nin agto natalosan tan agto naawat so eksplinasyon. Anto so gawaen to? Mipadpara iya ed samay agawa sakey taon antis na impatey nen Jesus. Imbaga to a sikato so “tinapay na bilay” tan nawalaan na bilay ya andi-anggaan so sakey a too no ‘kanen to so laman na Anak na too tan oninum ed dala to.’ Abigla ed satan so arum ed saray babangatan to. Imbes a maanos dan alagaren so pangipaliwawa ed satan, dakel a babangatan so “agla ra akila ed [si Jesus].” (Juan 6:35, 41-66) No wadman itayo met nensaman, anto kasi so gawaen tayo?

 ¹⁵ Natan, arum so agla mililimog ed kongregasyon, ya isipen dan makapanlingkor iran bukor ed Dios. Nayarin ibaga ra ya asakitan so liknaan da, wala so lingo ya agnipepetek, odino agda naawat so sakey a bangat. Makatunongan kasi so kiwas da? Tua, nepeg a pansiansiaen na kada sakey a Kristiano so relasyon to ed Dios, balet agtayo niburi ya uusaren To nin siansia so sankamundoan a kongregasyon, a singa ginawa to ed panaon na saray apostol. Niarum ni, inusar tan inabobonan nen Jehova iray lokal a kongregasyon nen inmunan siglo, tan intarya to iray kualipikadon mamatatken tan ministeryal a lingkor pian nagunggonaan iray kongregasyon. Ontan met so nagagawa natan.

16. No nononoten na sakey ya agi so agla milimog ed kongregasyon, anto ni so nepeg ton isipen?

¹⁶ No isipen na sakey a Kristiano a magenap labat la so pakawalaan toy relasyon ed Dios, ibabaliwala to so uksoyan ya intarya na Dios, salanti, say sankamundoan a muyongan tan saray lokal a kongregasyon na totoo na Dios. Sayan indibidual so nayarin mandayew a bukor ed Dios odino pigpigara labat so pililimogan to, balet anto so kakanaan na impangiyuksoy ed saray mamatatken tan ministeryal a lingkor diad kongregasyon? Makatantanda so insulat nen Pablo ed kongregasyon na Colosas, ya impabasa to met ed saramay walad Laodicea, lapud sinaglawi to so ‘kilamot tan kipaalagey ed si Kristo.’ Saray agunggonaan ed saya et saramay nansiansia ed kongregasyon, aliwan saramay indibidual ya insian day inkasikara.​—Colosas 2:6, 7; 4:16.

Lusek tan Sakurong na Katuaan

17. Anto so ibabangat ed sikatayo na 1 Timoteo 3:15 nipaakar ed kongregasyon?

¹⁷ Diad primeron sulat to ed si Timoteo, a manlilingkor bilang matatken, indatak nen apostol Pablo iray kualipikasyon na saray mamatatken tan ministeryal a lingkor ed saray kongregasyon. Kayari na satan, sinalambit nen Pablo so “iglesia na Dios a mabilay,” ya inkuan ton saya so “lusek tan sakurong na katuaan.” (1 Timoteo 3:15) Say interon kongregasyon na saray alanaan a Kristiano so apaneknekan a lusek na kongregasyon nen inmunan siglo. Tan seguradon say manunan uksoyan pian naawat na saray Kristiano so katuaan et diad panamegley na lokal a kongregasyon. Diad kongregasyon so pakarengelan da ed nipaparungtal tan papablien a katuaan, a mamabiskeg ed sikara.

18. Akin ya importante iray pantitipon ed kongregasyon?

¹⁸ Mipadpara, say sankamundoan a Kristianon kongregasyon et say sankaabungan na Dios, say “lusek tan sakurong na katuaan.” Say regular ya iyatendi tan pibiang ed saray pantitipon ed kongregasyon so importantin paraan pian napabiskeg itayo tan napaelet so relasyon tayo ed Dios, tan kipasalan tayon manggawa na linawa to. Sanen sinulat to so kongregasyon diad Corinto, indanet nen Pablo so kaimportantian na saray nipapaliwawa diad saray pantitipon. Diad sulat to et impabitar to so pilalek to a malinew tan natalosan komon so nipapaliwawa diad saray pantitipon ta pian ‘napabiskeg’ iramay onatendi. (1 Corinto 14:12, 17-19) Napabiskeg tayo met natan no bidbiren tayo a si Jehova a Dios so angiletneg ed uksoyan parad saray kongregasyon tan sikato so manusuporta ed saratan.

19. Akin a nepeg yon apresyaen so kongregasyon?

¹⁹ On, no labay tayo so napabiskeg bilang Kristiano, nepeg itayon mansiansia ed loob na kongregasyon. Apaneknekan la a saya so manalimbeng ed sikatayo sumpad palso iran bangat, tan uusaren itan na Dios pian naseguro ton niyabawag ed sankamundoan so maong a balita na Mesianikon Panarian to. Segsegurado a dakel lay agawaan nen Jehova diad panamegley na Kristianon kongregasyon.​—Efeso 3:9, 10.

[Paimano ed leksab]

Kasin Natandaan Yo?

• Akin ya ilaloan tayon uusaren na Dios iray kongregasyon diad dalin?

• Anggaman ag-ayadyari iray mamatatken, anto so gagawaen da parad kongregasyon?

• Panon kayon napapabiskeg ed loob na kongregasyon?

[Tepetepet Parad Panagaral]

[Litrato ed pahina 26]

Saray apostol tan mamasiken ed Jerusalem so nanlingkor bilang mananguley ya ulop

[Litrato ed pahina 28]

Saray mamatatken tan ministeryal a lingkor so makakaawat na instruksion ta pian nagawaan dan maong iray responsabilidad da ed kongregasyon