Manilalo ed si Jehova, tan Manpakpel

“Manalagar ka ed Jehova: ibalap mo so pusom et sikato pabiskegen to so pusom: on, manalagar ka ed Jehova.”—SALMO 27:14.

1. Kaunongan kaimportante so ilalo, tan panon itan a nausar ed Kasulatan?

 SAY puron ilalo et singa masnag a liwawa. Ontulong itan pian nanengneng tayo so walad benegan na saray kaplesan a subok tan naarap tayo so walad arapen tekep na inkakpel tan gayaga. Si Jehova lambengat so makapangiter ed sikatayo na seguradon ilalo, a gagawaen to ed panamegley na apuyanan a Salita to. (2 Timoteo 3:16) Diad tua et masulok a 160 danay a pinmatnag ed Biblia so salitan “ilalo,” “inilaloan,” tan “iilaloan” tan tutukoyen na satan so magunaet tan seguradon panilalo ed bengatlan maabig tan ed samay iilaloan. * Satan ya ilalo et aliwa labat a pampirawat, ya andian na basiyan odino posibilidad a nasumpal.

2. Anto so epekto na ilalo ed bilay nen Jesus?

² Sanen nidunget ed saray subok tan kairapan, aglambengat ninengneng nen Jesus so peles a kipapasen, noagta sikato so nanilalo ed si Jehova. “Lapud gayaga a niyan ed arap to sinungdoan to so krus [“panamairapan a kiew,” NW], ya imbantak to so baing, et yinmurong ed kawanan na trono na Dios.” (Hebreos 12:2) Lapud akasentro si Jesus ed ilalon niyalangon so inkasoberano nen Jehova tan napasantos so ngaran To, sikato so agbalot kinmasipa diad katutulok to ed Dios, antokaman iray pansumpalan a sungdoan to.

3. Anto so epekto na ilalo ed bilay na saray lingkor na Dios?

³ Sinalambit nen Arin David so pansiglaotan na ilalo tan inkakpel, a kuan to: “Manalagar ka ed Jehova: ibalap mo so pusom et sikato pabiskegen to so pusom: on, manalagar ka ed Jehova.” (Salmo 27:14) Pian ombiskeg so puso tayo, agtayon balot aabuloyan ya omburagas so ilalo tayo noagta lawas tayon pansiansiaen itan a malinew diad nonot tan puso tayo. No ontan so gawaen tayo, naalig tayo si Jesus diad panangipatnag na inkakpel tan seseg leleg itayon mibibiang ed kimey ya ingganggan ton gawaen na saray babangatan to. (Mateo 24:14; 28:19, 20) On, say ilalo so asalambit a kabiangan na pananisia tan aro bilang importante tan  magnayon a kalidad a napatnagan ed bilay na saray lingkor na Dios.—1 Corinto 13:13.

Kasin ‘Alimbos Kayo na Ilalo’?

4. Anto so magunaet ya iilaloan na saray alanaan a Kristiano tan say kaiba ran “arum a karnero”?

⁴ Saray totoo na Dios so walaan na alay abig ya arapen. Magunaet ya aalagaren na saray alanaan a Kristiano so panlingkor da a kaiba si Kristo diad tawen, bangta iilaloan na “arum a karnero” so ‘kiliktar ed inkaaripen na kabulokan ya onloob ed kawayangan na gloria na saray [mangaraldalin ya] anak na Dios.’ (Juan 10:16; Roma 8:19-21; Filipos 3:20) Satan a “kawayangan na gloria” so mangilaktip ed kibulos manlapud kasalanan tan ed makapasinagem iran epekto na satan. On, sankaabigan so ipalabo nen Jehova—say Manangiter na “amin a maong a palangkap tan amin ya ayadyarin palangkap,” ed saray matoor ed sikato.—Santiago 1:17, Isaias 25:8.

5. Panon itayon ‘nalimbos na ilalo’?

⁵ Panon kaimportante so Makristianon ilalo diad bilay tayo? Oniay nabasa tayo ed Roma 15:13: “Say Dios na ilalo panoen to kayo komon ed amin a gayaga tan kareenan dia ed panisia yo, pian nalimbos kayo na ilalo, dia ed pakayari na espiritu santo.” On, say ilalo so niyaliling, aliwan diad sakey a kandila a walad kabilungetan, noagta diad masnag iran sinag na agew ed kabuasan, a mamapawala na deen, liket, gagala, tan inkakpel ed bilay na sakey. Tandaan a sikatayo so ‘nalimbos na ilalo’ sano panisiaan tayo so nisulat a Salita na Dios tan awaten tayo so masanton espiritu to. Oniay inkuan na Roma 15:4: “Saray bengatla a nisulsulat nensaman, nisulat ira ya onkana ed kibanga ’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” Kanian oniay itepet yo ed inkasikayo: ‘Kasin pansiasiansiaen kon masnag so ilalok diad pagmaliw a maong ya estudyante na Biblia, a babasaen ko itan a naynay? Kasin mabetbet kon kekerewen ed pikakasi so espiritu na Dios?—Lucas 11:13.

6. Pian mansiansian masnag so ilalo tayo, sumpad anto so nepeg tayon pambantayan?

⁶ Say Ehemplo tayo, si Jesus, so apabiskeg a maong lapud Salitay Dios. No nodnonoten tayon maong so nipaakar ed sikato, ag-itayo ‘onkesaw tan onkapuy ed saray kamarerwa tayo.’ (Hebreos 12:3) Natural labat ya onkesaw itayo ed espiritual no naburagas ed nonot tan puso tayo so ilalon inter na Dios ed sikatayo odino nipaarap la ed arum so imano tayo—a singa diad materyal iran bengatla odino sekular iran ambisyon. No ontan so awawey tayo, nayarin naeksperiensya tayo ni ingen so ‘pakagba na pananisia tayo.’ (1 Timoteo 1:19) Diad biek a dapag, say tuan ilalo so mamabiskeg ed pananisia tayo.

Ilalo—Makanakana ed Pananisia Tayo

7. Diad anton paraan a makanakana so ilalo ed pananisia?

⁷ “Say pananisia sikato so agpanduaruwa ed saray bengatla ya iilaloan, say panangipatnag ed saray bengatla ya agni anengneng,” so inkuan na Biblia. (Hebreos 11:1) Sirin, say ilalo et aliwa labat a melag a kabiangan na pananisia; satan so makanakanan kabiangan na pananisia. Konsideraen pa si Abraham. Diad punto de bista na too, sikara nen asawa ton Sara so agla makaanak sanen insipan nen Jehova a nawalaan ira na sakey a mananawir. (Genesis 17:15-17) Panon so inkiwas nen Abraham? “Anggaman andian lay ilalo, siansia nin sikato so awalaan na pananisia unong ed ilalo, ta pian sikato so magmaliw ya ama na dakel a nasyones.” (Roma 4:18, NW) On, lapud ilalo ya inter na Dios ed sikato, binmiskeg so pundasyon na pananisia to a sikatoy nawalaan na ilalak. Bilang resulta, say pananisia to so amabiskeg tan amaputel ed ilalo to. Agayla, si Abraham tan si Sara so akapampakpel ni ingen a manaynan ed ayaman da tan kakanayon da pian manayam ed saray tolda diad arum a dalin legay bilay da!

8. Panon a say matoor a panagsungdo et mamabiskeg ed ilalo?

⁸ Pinansiansia nen Abraham a segurado so ilalo to diad sigpot ya impangunor to ed si Jehova, anggaman mairap so panggawa ed satan. (Genesis 22:2, 12) Mipadpara, diad itulok tan pansungdo tayo ed panaglingkor ed si Jehova, makaseguro itayo ed tumang tayo. “Say anos,” so insulat nen Pablo, so manresulta ed “pakapatnagan” odino naabobonan a talindeg, a mansumpal ed pakawalaan na ilalo, “tan say ilalo agmangibabaing.” (Roma 5:4, 5) Satan so rason no akin ya oniay insulat met nen Pablo: “Pampirpirawatan mi a balang sakey ed sikayo ipanengneng to so onman a seet nipaakar  ed inkapno na andi-kaatapan ya ilalo angga ed kasampotan.” (Hebreos 6:11) Say ontan a positibon panmoria, a nibase ed maapit a relasyon ed si Jehova, so makatulong ed sikatayo pian naarap so antokaman a kairapan tekep na inkakpel tan liket ni ingen.

“Manliket ed Ilalo”

9. Anto so naynay tayon gawaen ta pian ‘makapanliket itayo ed ilalo’?

⁹ Say ilalon inter na Dios so matalonggaring lawas nen say antokaman ya opresi na mundo. Oniay imbaga na Salmo 37:34: “Manalagar ka ed Jehova, tan tonton mo so dalan to, et itandoro to ka a manawir na dalin: sano napater so saray bagel, nanengneng mo.” On, walaan itayo na amin a rason pian “manliket ed ilalo.” (Roma 12:12) Balet ta pian nagawaan itan, say ilalo tayo so nepeg tayon pansiansiaen a malinew diad kanonotan tayo. Kasin naynay yon momorekdeken so ilalo ya inter na Dios? Sarag yo kasin ilitrato so inkasikayo a walad Paraiso, a walaan na alay abig a bunigas, ya andian laray kapagaan, apaliberan na totoon pinabpabli yo, tan mibibiang ed makapaliket a tuloy a kimey? Kasin dadalepdepen yo iray eksena ed Paraiso a nilitrato ed saray publikasyon tayo? Say ontan a regular a panmorekdek so nayarin iyaliling ed panaglinis ed salming a bintana pian malinew a nanengneng so marakdakep a nenengnengen ed paway. No napaulyanan tayon linisan so salming, agmanbayag et satan so buragasen la na dabok tan dingot kanian agtayo la nanengneng so malinew tan makapasagyat a nenengnengen. Ompan nipaarap ni ingen so imano tayo ed arum iran bengatla. Agtayon balot komon aabuloyan itan a nagawa!

10. Akin a say panilalo ed tumang et maabig a pakapatnagan na relasyon tayo ed si Jehova?

¹⁰ Siempre, say manunan rason no akin a manlilingkor itayo ed si Jehova et say aro tayo ed sikato. (Marcos 12:30) Balet, nepeg tayon magunaet ya ilaloan so tumang. Diad tua, iilaloan itayo nen Jehova a gawaen so ontan! Oniay ibabaga na Hebreos 11:6: “No anggapo so pananisia [si Jehova so] agnayarin paliketen: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” Akin a labay nen Jehova a sikatoy moriaen tayo bilang Mananumang? Lapud no ontan so gawaen tayo, nipatnag tayo a kabkabat tayo so mangatatawen ya Ama tayo. Sikato so mabunlok, tan aaroen to so ananak to. Isipen pa so ermen tan pakadismaya tayon maong no andian itayo na “arapen tan ilalo.”—Jeremias 29:11, NW.

11. Panon ya akatulong ed si Moises so ilalon inter na Dios ed sikato pian makagawa na makabat iran desisyon?

¹¹ Sakey ya alay abig ya ehemplo ya angiyapasakey ed ilalon inter ed sikato na Dios et si Moises. Bilang ‘anak na marikit nen Faraon,’ si Moises so awalaan na pakayari, posisyon, tan kayamanan ed Ehipto. Kasin intultuloy ton pinabli iratan a bengatla, odino nanlingkoran to si Jehova? Si Moises so makpel a nandesidin manlingkor ed si Jehova. Akin? Lapud “inyan to so mata to ed katumangan.”  (Hebreos 11:24-26) On, si Moises so maseguron ag-angibaliwala ed ilalo ya inyopresi nen Jehova ed sikato.

12. Akin a say Makristianon ilalo et singa helmet?

¹² Say ilalo et inyaliling nen apostol Pablo diad sakey a helmet. Say piguratibon helmet tayo so manalimbeng ed panag-isip tayo, a makatulong ed sikatayon manggawa na makabat iran desisyon, mangiletneg na maabig iran prayuridad, tan mamasiansia ed katooran tayo. (1 Tesalonica 5:8) Kasin isusulong yon naynay so piguratibon helmet yo? No ontan, singa di Moises tan Pablo nensaman, sikayo so manilalo, aliwan dia “ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo.” Tua a mankaukolan na inkakpel so ipaliis ed saray bantog ya ipapauso natan diad pangipulisay ed sinisiblet iran gegemtan, balet ta makagunggonan tuloy so panggawa ed satan! Diad tua, akin ya awaten ni so antokaman nen say ‘peteg a bilay,’ a niparaan ed saramay maniilalo tan mangaaro ed si Jehova?—1 Timoteo 6:17, 19.

“Agtaka Naani Taynan, tan Agtaka Naani Ikaindan”

13. Anto so panamaseguro nen Jehova ed saray matoor a lingkor to?

¹³ Saray totoon maniilalo ed sayan peles a sistema na bengabengatla so nepeg lan manisip nipaakar ed saray makapasinagem a bengatla ya aarapen da lapud sasagmaken la na mundo natan so ondedenden a “kairapan.” (Mateo 24:8) Balet saramay maniilalo ed si Jehova so andian na ontan iran tatakotan. Sikara so mantutultuloy a ‘manayam ed katalkan tan mareen ya andi takot ed mauges.’ (Uliran 1:33) Lapud say ilalo ra et anggapo ed sayan peles a sistema, sikara so maliket ya ontutulok ed simbawa nen Pablo: “Nabulos kayo komon a manlapu ed aro na pilak, panliketan yo so bengatla a wala ed sikayo: ta sikaton dili imbaga to: Agtaka naani taynan, tan agtaka naani ikaindan.”—Hebreos 13:5.

14. Akin ya agnakaukolan a mapagpaga iray Kristiano nipaakar ed materyal iran pankaukolan da?

¹⁴ Saray maranet a balikas ya “agtaka naani” so mangipapabitar ya asikasoen itayo na Dios. Pinaseguroan itayo met nen Jesus nipaakar ed maaron panangiyansakit na Dios, a kuan to: “Ingen anapen yo nin unona so panarian, tan say inkatunong to; et amin iraya a bengatla [materyal iran pankaukolan ed bilay] niarum ira ed sikayo. Kanian agkayo sirin mapaga nipaakar ed agew ya onsabi; ta say agew ya onsabi manpaga nipaakar ed sikaton dili.” (Mateo 6:33, 34) Amta nen Jehova a mairap ed sikatayo so pagmaliw a maseseg parad Panarian to legan tayon sasakbaten met so ambelat a responsabilidad a mangitarya na pisikal iran pankaukolan tayo. Kanian sigpot itayon manmatalek ed abilidad to tan say pilalek ton mangasikaso ed saray pankaukolan tayo.—Mateo 6:25-32; 11:28-30.

15. Panon a napansiansia na saray Kristiano so simplin mata?

¹⁵ Ipapatnag tayo so panagmatalek tayo ed si Jehova sano pansiansiaen tayon simpli odino “maralus” so mata tayo. (Mateo 6:22, 23) Say simplin mata et masimoon, maralus ed motibo, tan andian na inkaagum tan sinisiblet ya ambisyon. Say pakawalaan na simplin mata et agmankabaliksan a manbilay tayo ed pirmin kairapan odino paulyanan la iray Makristianon responsabilidad tayo. Imbes, mankabaliksan itan na pangipatnag na “inkalimpio na kanonotan” legan tayon iyuuna so panaglingkor ed si Jehova.—2 Timoteo 1:7, NW.

16. Akin a nakaukolan so pananisia tan inkakpel pian napansiansia so simplin mata?

¹⁶ Nakaukolan so pananisia tan inkakpel ta pian napansiansia tayo so simplin mata. Alimbawa, no ipilit na amo yo a regular kayon mantrabaho ed oras a niyeskedyul parad Makristianon pantitipon, kasin makpel kayon mansiansia ed saray espiritual a prayuridad yo bilang Kristiano? No panduaruwaan na sakey a too so sipan nen Jehova ya asikasoen To iray lingkor To, sikato so lalon desdesen nen Satanas tan nayarin aglan balot onatendi itan a too diad saray pantitipon. On, no onkulang itayo na pananisia, iikdan tayo na pankanawnawa si Satanas a mangontrol ed sikatayo tan sikato so aabuloyan tayon mangiletneg ed saray prayuridad tayo, aliwan si Jehova. Agaylan makapadesyang itan!—2 Corinto 13:5.

‘Manalagar ed si Jehova’ Tekep na Ilalo

17. Panon a natutumangan natan iramay manmamatalek ed si Jehova?

¹⁷ Aminpigan impabitar na Kasulatan a saramay  maniilalo tan manmamatalek ed si Jehova so agbalot onsaew. (Uliran 3:5, 6; Jeremias 17:7) Tua, no maminsan et nakaukolan a mankontento ira ed daiset, balet ipapasen da itan a melag a panangisakripisyo no ikompara ed saray bendisyon a mantatalaran ed sikara. Ipapatnag da sirin a maniilalo ira ed si Jehova tan manmamatalek ira a diad kaunoran et iter to ed saray matoor ed sikato so amin a matunong a pilalek na puso ra. (Salmo 37:4, 34) Kanian, sikara so peteg a manliliket anggan natan. “Say ilalo na matunong sikato naani kagayagaan; balet say panalagar na marelmeng natawtaw.”—Uliran 10:28.

18, 19. (a) Anto so maaron panamaseguro nen Jehova ed sikatayo? (b) Panon tayon napansiansia a sankatabin nen Jehova so ‘kawanan a lima’ tayo?

¹⁸ Sano akatabin so melag ya ugaw ed ama to, nalilikna to so kaligenan tan proteksion. Ontan met ed sikatayo legan itayon mankukurang a kaiba so mangatatawen ya Ama tayo. “Agka antakot,” so imbaga nen Jehova ed Israel, “ta wala ak ed sika. . . . tulongan ta ka. . . . Ta siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan ta ka.”—Isaias 41:10, 13.

¹⁹ Agaylan maaron eksena so ililitrato na satan—bebembenan nen Jehova so lima na sakey! “Impasen ko a naynay si Jehova ed unaan ko,” so insulat nen David. “Lapu ed sikato et wala ed nikawanan ko, agak natenyeg.” (Salmo 16:8) Panon tayon napansiansia a sankatabin nen Jehova so ‘kawanan a lima’ tayo? Nagawaan tayo itan diad duaran paraan. Unona, abuloyan tayo so Salita to a mangigiya ed sikatayo diad amin ya aspekto na bilay tayo; komadua, iyapasakey tayo so imano tayo ed maglorian tumang ya ipaparaan nen Jehova parad sikatayo. Oniay inkanta nen salmistan Asap: “Wala ak a lanang ed sika: sika intabin mo ak ed limak a kawanan. Sika ibasbas mo ak a pati pamilin mo, tan naani awaten mo ak ed gloria.” (Salmo 73:23, 24) Tekep na ontan a panamaseguro, talagan naarap tayo so arapen tekep na panagmatalek.

‘Asingger la so Karondon Yo’

20, 21. Anton arapen so manatalaran ed saramay maniilalo ed si Jehova?

²⁰ Diad ilalabas na kada agew, lalon pankaganatan a pansiansiaen tayon sankatabin nen Jehova so kawanan a lima tayo. Agmanbayag, no onggapo lan naderal so palson relihyon, sagmaken la na mundo nen Satanas so kairapan ya agnin balot agawa nensaman. (Mateo 24:21) Say andiay-pananisian katooan so naliktob na takot. Ingen, legan na satan a magulon panaon, saray makpel a lingkor nen Jehova so manliket ed ilalo ra! “Sano onggapo a nagawa so saraya a bengatla,” so inkuan nen Jesus, “tangay kayo, et itangwa yo so saray ulo yo; ta say karondon yo asingger la.”—Lucas 21:28.

²¹ Komon ta panliketan tayo so ilalon inter na Dios ed sikatayo tan ag-itayo papalikdo odino patutukso ed masilib iran pananagyat nen Satanas. Ontan met, panseetan tayon bayuboan so pananisia, aro, tan maridios a takot. No gawaen tayo itan, makapanpakpel itayo a mangunor ed si Jehova diad amin a sirkumstansya tan nasumpa tayo so Diablo. (Santiago 4:7, 8) On, “manpabiskeg kayo, tan panliketen yo so puso yo, sikayo ya amin a manilalo ed Jehova.”—Salmo 31:24.

[Paimano ed Leksab]

Kasin Naebatan Yo?

• Panon ya akatulong so ilalo nen Jesus pian sikato so makapanpakpel?

• Panon a mansiglaotan so pananisia tan ilalo?

• Panon a say ilalo tekep na pananisia so makapangiter na pakpel ed sakey a Kristiano ta pian niletneg to iray maabig a prayuridad ed bilay to?

• Akin a saramay ‘maniilalo ed si Jehova’ et makapantalaran ed arapen tekep na panagmatalek?

[Tepetepet Parad Panagaral]

[Litrato ed pahina 28]

Malangwer man odino maedad la, kasin nilitrato yo so inkasikayo a walad Paraiso?