Panarian na Dios—Superyor ed Amin a Pamaakaran

IMBANGAT nen Jesu-Kristo iray patumbok to: “Onia sirin no mikasi kayo; Ama min wala ka ed tawen, nagalang komon so ngaran mo. Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) Sayan pikakasi, a kabkabat na karaklan bilang Ama Mi, odino Pikakasi na Katawan, so mangipapaliwawa ed gagala na Panarian na Dios.

Diad panamegley na Panarian, say ngaran na Dios so nagalang odino napasanto. Naandi la ed satan a ngaran so amin a kabandayan ya intarok na impanrebelde nen Satanas tan say too. Saya so makanakana; akadepende so panliket na amin ya intelihentin pinalsa diad pangipasen dan sagrado so ngaran na Dios tan diad mabulos a pangawat da ed kanepegan to a manuley.—Apocalipsis 4:11.

Niarum ni, inletneg so Panarian pian ‘nagawa so linawa na Dios, unong ed tawen, ontan met ed dalin.’ Tan anto itan a linawa? Say kipawil na relasyon ed baetan na Dios tan katooan ya imbalang nen Adan. Sumpalen met na Panarian so gagala na Soberano ed Uniberso, si Jehova, ya iletneg so paraiso ed dalin a panayaman na maong a totoo ed andi-angga. On, ekalen na Panarian na Dios so amin a deral a resulta na sankaunaan a kasalanan tan pagmaliwen na satan a tudtua so maaron gagala na Dios parad dalin. (1 Juan 3:8) Diad katuaan to, say manunan mensahe na Biblia et say Panarian tan say gawaen na satan.

Superyor ed Antoran Pamaakaran?

Say Panarian na Dios et peteg a gobierno a walaan na baleg a pakayari. Inikdan itayo nen propetan Daniel na ideya no panon kabiskeg itan. Onia so abayag to lan impropesiya: ‘Say Dios na tawen mamaalagey na sakey a panarian a mamuyak tan mangupot ed amin a panarian [na too].’ Niarum ni, aliwan singa saray gobierno na too a mansalat-salat diad inlalabas na panaon, say Panarian na Dios so “anggan kapigan agnaani naderal.” (Daniel 2:44) Aliwan satan labat. Diad amin ya aspekto, sayan Panarian et superyor a tuloy nen say anggan dinan a gobierno na too.

Superyor so Ari na Panarian na Dios. Konsideraen pa no siopa itan ya Ari. Diad inter a “kugip tan paspasingawey” ed si Daniel, anengneng to a say Manuley ed Panarian na Dios et “singa sakey ya anak na too” ya inawit ed arap na Makapanyarin-amin a Dios tan inikdan na magnayon a “panuley, tan gayaga, tan sakey a panarian.” (Daniel 7:1, 13, 14) Satan ya Anak na too et anggapoy arum noag si Jesu-Kristo—say Mesias. (Mateo 16:13-17) Tinuro nen Jehova a Dios so mismon Anak to, si Jesus, a magmaliw ya Ari ed Panarian To. Sanen wadiad dalin si Jesus, oniay inkuan to ed saray marelmeng a Fariseo: “Say panarian na Dios et wala ed pegley yo,” a say labay ton ibaga et sikato, say Ari na Panarian ed arapen, et walad limog da.—Lucas 17:21, NW.

Siopa ed katooan so makapipara ed saray kredensial nen Jesus bilang Manuley? Apaneknekan la nen Jesus a sikatoy sakey a Lider a sigpot a maptek, napanmatalkan, tan mapangasi. Sikatoy idedeskribe na saray Ebanghelyo bilang personan aliwa labat lan anangga’d salita, matamoy,  tan talagan mililikna. (Mateo 4:23; Marcos 1:40, 41; 6:31-34; Lucas 7:11-17) Niarum ni, say inmoli’d bilay a Jesus et aliwan singa too ya ompatey nisay walaan na arum niran limitasyon.— Isaias 9:6, 7.

Si Jesus tan saray kaiba to so manuuley manlapud superyor a posisyon. Diad kugip a pasingawey ed si Daniel, anengneng to met a “say panarian tan panuley . . . niiter naani ed saray baley na saray sasanto.” (Daniel 7:27) Agbukbukor nen Jesus so manuley. Walaray iba to a manuley bilang arari tan manserbi bilang saserdote. (Apocalipsis 5:9, 10; 20:6) Nipaakar ed sikara et oniay insulat nen apostol Juan: “Ninmengneng ak, tan say Kordero manalalagey ed tapew na palandey na Sion, et niulop ira ed sikato so sanlasus tan apataplo tan apat a libo . . . a sikara so asaliw dia ed saray taga dalin.”—Apocalipsis 14:1-3.

Say Kordero et si Jesu-Kristo sanen sikatoy nagmaliw lan Ari ed Panarian. (Juan 1:29; Apocalipsis 22:3) Say Palandey Sion et ontutukoy ed tawen. * (Hebreos 12:22) Si Jesus tan saray kaiba ton 144,000 so manuuley manlapud tawen. Agaylan atagey a pasen a panuleyan! Lapud wala ra ed tawen, mas malaknab so panmoria ra. Tan lapud tawen so kawalaay trono na “panarian na Dios,” satan met so tinawag a “panarian na tawen.” (Lucas 8:10; Mateo 13:11) Anggapoy armas, ni anggan saray nuklear a panangataki, a makapagyaw tan makatalo ed satan a mangatatawen a gobierno. Agbalot iya nadaeg tan sumpalen na saya so inggetma nen Jehova parad saya.—Hebreos 12:28.

Say Panarian na Dios so walaan na napanmatalkan iran representanti odino manangilaman diad dalin. Panon tayon amta iya? Oniay inkuan na Salmo 45:16: “Ipasen mo [iray] prinsipes ed amin a dalin.” Say “mo” ed sayan propesiya et say Anak na Dios. (Salmo 45:6, 7; Hebreos 1:7, 8, NW) Kanian, si Jesu-Kristo a mismo so manuro na saray representanti a prinsipe. Segurado itayon napanmatalkan iraya a manumpal ed igaganggan to. Anggan natan et saray kualipikadon lalaki a manlilingkor bilang mamatatken ed Kristianon kongregasyon so nibabangat ya ‘ag-ira pakakatawan’ ed saray kapara ran mananisia, noagta saratan so salimbengan da, agda pabebelatan, tan pasesegen da.—Mateo 20:25-28; Isaias 32:2.

Say Panarian so walaan na matunong iran uuleyan. Sikaray ayadyari tan maptek ed imaton na Dios. (Uliran 2:21, 22) “Saray mauyamo tawiren da naani dalin” kuan na Biblia, “tan manliket ira a dili ed inkadaakan na kareenan.” (Salmo 37:11) Saray uuleyan na Panarian et mauyamo—paibangat tan mapaabeba, maulimek tan maamo. Say manunan nononoten da et saray espiritual a pamaakaran. (Mateo 5:3, MB) Kaliktan dan gawaen so duga tan akaparaan iran onkiwas ed saray panangidirehi na Dios.

Say Panarian na Dios so iwawanwan na superyor iran ganggan. Say panlalapuan na saray ganggan tan prinsipyo a mangiwawanwan ed Panarian et si Jehova a Dios a mismo. Imbes a saratan so agmakatunongan a mameget ed sikatayo, nagunggonaan itayo ed saratan. (Salmo 19:7-11) Dakel lan totoo so nagugunggonaan diad pangiyaaplika ra ed matunong iran kakaukolanen nen Jehova. Alimbawa, say italineng na kaasawaan a lalaki, bibii, tan ananak ed simbawa na Biblia so mamaaligwas ed bilay na pamilya tayo. (Efeso 5:33–6:3) Sano tuloken tayo so ganggan a ‘kawesan tayoy inkasikatayo na aro,’ ondakep so relasyon tayo ed arum. (Colosas 3:13, 14) Legan tayon iyaaplika iray Makasulatan a prinsipyo, nababayuboan tayo met so maong iran ugali ed panagtrabaho tan balansin panmoria ed kuarta. (Uliran 13:4; 1 Timoteo 6:9, 10) Say ipaliis tayo ed panagbuanges, seksual ya imoralidad, panagsigarilyo tan panagdruga so ontulong pian naprotektaan so bunigas tayo.—Uliran 7:21-23; 23:29, 30; 2 Corinto 7:1.

Say Panarian na Dios et gobiernon inletneg na Dios. Say Ari na satan, say Mesias, salanti si Jesu-Kristo, tan say amin a kaiba ton manuley, so  walaan na responsabilidad ed Dios a suportaan iray maptek a ganggan tan saray maaron prinsipyo To. Panliliketan na saray uuleyan na Panarian, pati saray mangaraldalin a representanti na satan, so manbilay unong ed saray ganggan na Dios. Diad ontan et manuna so Dios ed bilay na saray manuley tan saray uuleyan na Panarian. Kanian, say Panarian et peteg a teokrasya—uley na Dios. Seguradon matalonan sumpalen na satan so gagala ed no akin a niletneg itan. Balet, kapigan so igapon panuley na Panarian na Dios, a kabkabat met bilang Mesianikon Panarian?

Ginmapo La so Uley na Panarian

Makatulong iray salita nen Jesus pian natalosan no kapigan so inggapo na uley na Panarian. Inkuan to: “Say Jerusalem igatin naani na saray Gentiles, angga ed kasumpal na saray agew na saray Gentiles [“saray aturon panaon na saray nasyon,” NW].” (Lucas 21:24) Say Jerusalem so alenleneg a syudad nensaman ed interon dalin a direktan nisiglaot ed ngaran na Dios. (1 Arari 11:36; Mateo 5:35) Saman so kabisera na inabobonan na Dios a panarian diad dalin. Saman a syudad so igatin-gatin na gentiles odino saray nasyon diad paraan a say uley na Dios ed totoo to et saletan na saray gobierno na mundo. Kapigan iya onggapo?

Onia so imbaga ed unor ya ari a yinmurong ed trono nen Jehova ed Jerusalem: “Yalis mo so mitra, tan ekalen mo so balanget. . . . Saya anggapo met la naani, angga ed onsabi so akankanepegan; et sikato naani iter ko ed sikato.” (Ezequiel 21:25-27) Say balanget odino korona so ekalen ed ulo na satan ya ari, tan say pananguley na Dios ed totoo To et napatunda. Agawa iya nen 607 B.C.E. sanen dineral na saray taga Babilonia so Jerusalem. Kaleganan na onsaginonor iran “aturon panaon,” say Dios so andian na gobierno ed dalin a mangirepresenta ed uley to. Dia labat ed panampot na saraman a panaon ya iter nen Jehova so pakayarin manuley ed “akankanepegan”—si Jesu-Kristo. Kaunongan karukey itan a peryodo?

Oniay inkuan na sakey a propesiya ed libro na Biblia a Daniel: “Batangen yo so kiew, tan sikato so deralen yo; anggan ontan paulyan yo so panokor na sengeg to ed dalin, pati sakey a balatyang tan gansa . . . angga ed onlabas ed sikato so saray pitoran panaon.” (Daniel 4:23) Unong a naamtaan tayo, pareho so karukey na “saray pitoran panaon” ya asalambit dia tan “saray aturon panaon na saray nasyon.”

Diad Biblia, saray indibidual, manuley, tan panarian so no maminsan et irerepresenta na saray kiew. (Salmo 1:3; Jeremias 17:7, 8; Ezequiel, kapitulo 31) Say simbolikon kiew “so nanengneng ed sampot na amin a dalin.” (Daniel 4:11) Kanian, say pananguley ya irerepresenta na kiew a nabatang tan nabedberan et “angga ed sampot na dalin” so laknab to, a saknapen to so interon panarian na katooan. (Daniel 4:17, 20, 22) Kanian irerepresenta sirin na kiew so supremon uley na Dios, nagkalalo la diad pisiglaotan na satan ed dalin. Walay panaon ya inagamil iyan pananguley panamegley na panarian ya inletneg nen Jehova ed nasyon na Israel. Say simbolikon kiew so binatang, tan say sengeg to so binedberay balatyang  tan gansa pian ag-onsimit. Ipapabitar na saya a say representantin uley na Dios ed dalin so ontundan onkurang, unong ya agawa nen 607 B.C.E.—balet satan so temporaryo labat. Say kiew so mansiansian abedberan anggad napalabas so “pitoran panaon.” Diad kasampotan na satan a peryodo, iter nen Jehova so pananguley ed legal a mananawir, si Jesu-Kristo. Malinew, parehon peryodo so tutukoyen na “pitoran panaon” tan saray “aturon panaon na saray nasyon.”

Tutulongan itayo na Biblia a nadetermina so karukey na “pitoran panaon.” Misimbangan so 1,260 ya ag-agew ed “sakey a panaon, tan saray panaon [duara a panaon], tan kapaldua na sakey a panaon”—ya ami-amin et talora tan kapaldua a “panaon.” (Apocalipsis 12:6, 14) Kabaliksan na saya a say dobli na satan a bilang, odino pitoran panaon et 2,520 ya ag-agew.

No manbilang itayo na literal a 2,520 ya ag-agew manlapud 607 B.C.E. nasabi tayo so 600 B.C.E. Balet, mas binmayag ni nen say satan so pitoran panaon. Peles nin nagagawa iratan sanen sinalita nen Jesus so “aturon panaon na saray nasyon.” Mapropetiko sirin so pitoran panaon. Kanian, kaukolan tayon iyaplika so Makasulatan a totontonen a: “[Say] sakey ya agew [et] sakey taon.” (Numeros 14:34; Ezequiel 4:6) Diad satan a kaso, say pitoran panaon a panuley ed dalin na saray pakayari ed mundo ya agpibabalian na Dios et 2,520 a taotaon. No manbilang itayo na 2,520 a taotaon manlapud 607 B.C.E., makasabi tayo ed 1914 C.E. Satan so taon ya anampot so “aturon panaon na saray nasyon,” odino pitoran panaon. Kabaliksan na saya a ginmapon nanuley si Jesu-Kristo bilang Ari ed Panarian na Dios nen 1914.

“Onsabi Komon so Panarian Mo”

Lapud niletneg la ed tawen so Mesianikon Panarian, manepeg ni kasin ipikasi tayo so isabi na satan, unong ya imbangat nen Jesus ed modelon pikakasi? (Mateo 6:9, 10) On. Satan a kerew et matukoy tan siansia nin makabkabaliksan. Dia ni’d arapen so sigpot a panuley na Panarian na Dios diad dalin.

Agaylan bendisyon so nagamoran na saray matoor a katooan sano nagawa la itan! “Say Dios met lanlamang so wala naani ed sikara,” kuan na Biblia, “tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:3, 4) Diad satan a panaon, “say manaayam agto naani ikuan, Mabeblay ak.” (Isaias 33:24) Nawalaan na andi-anggaan a bilay iramay mamapaliket ed Dios. (Juan 17:3) Legan tayon aalagden so pakasumpal na saraya tan saray arum nin makapalikliket a propesiya na Biblia, mantultuloy tayon “anapen nin unona so panarian, tan say inkatunong [na Dios].”—Mateo 6:33.

[Paimano ed leksab]

[Blurb ed pahina 4]

Tinuro nen Jehova si Jesu-Kristo a magmaliw ya Ari ed Panarian To

[Diagram/Saray litrato ed pahina 6]

2,520 a tao-taon

Oktubre 607 ◀ B.C.E. C.E. ▸ Oktubre 1914

606 1⁄4 a tao-taon 1,913 3⁄4 a tao-taon

“Saray aturon panaon na saray nasyon” so ginmapo nen 607 B.C.E. tan anampot nen 1914 C.E.

[Litrato ed pahina 7]

Panggayagaan na saray uuleyan ed dalin na Panarian na Dios so dakel a bendisyon