Sasalimbengan nen Jehova Iramay Maniilalo ed Sikato

“Say maaro ya abig na linawam tan say katuaan mo so mangiyapiger lawas ed siak.”​—SALMO 40:11.

1. Anto so inkerew nen Arin David ed si Jehova, tan panon so kipapagamor na satan a kerew diad kaplesan?

 SI Arin David na Israel nensaman so ‘maan-anos a nanalagar ed si Jehova’ tan apakiwas a mangibagan ‘kinmiling tan dinmengel si Jehova ed akis to.’ (Salmo 40:1) Aminpiga ton naimatonan so impanalimbeng nen Jehova ed saramay angaro ed Sikato. Kanian nayarian nen David a kerewen so lawas panangiyagel nen Jehova ed sikato. (Salmo 40:11) Lapud kabiangan si David ed saray matoor a lalaki tan bibii ya angisipanan na ‘magmaong a kikioli,’ sikatoy akaseguro lan walad pakanodnonotan nen Jehova bilang sakey ed saramay mangawat ed satan a tumang. (Hebreos 11:32-35) Say arapen to sirin so nipaseguro ed sankaabigan a paraan. Niyukit so ngaran to diad “sakey a libro a pakanodnonotan.”​—Malaquias 3:16.

2. Panon itayon natulongan na Kasulatan pian natalosan so kabaliksan na pananalimbeng nen Jehova?

² Anggaman saramay matoor ya asalambit ed Hebreos kapitulo 11 so nambilay sakbay na impanayam nen Jesu-Kristo diad dalin, sikara so nambilay a mitunosan ed imbangat nen Jesus sanen inkuan ton: “Say mangaro na bilay to sikato so nabalang to, et say manggula na bilay to ed sayan mundo sikato so ’yatol to angga ed bilay a maando.” (Juan 12:25) Say pananalimbeng sirin nen Jehova so agmankabaliksan na kipaliis ed irap odino panamasegsegang. Say kabaliksan na satan et nasalimbengan so sakey diad espiritual a paraan ta pian napansiansia to so maabig a talindeg ed arapan na Dios.

3. Anto so ebidensya tayo a sinalimbengan nen Jehova si Kristo Jesus, tan anto so nansumpalan?

³ Si Jesus a mismo et puntirya na maruksan panamasegsegang tan panagpabanday, tan saray kabusol to so tinmalona ed kaunoran diad impangidunget ed sikato ed makapabaing tan makapaot-ot ya ipapatey. Balet anggapo so pisumlangan na saya ed sipan na Dios ya iyagel To so Mesias. (Isaias 42:1-6) Say inkioli nen Jesus ed komatlon agew kayari na makapabaing ya impatey to so mamaneknek a dinengel nen Jehova so inkerew toy tulong​—a singa ed indengel nen Jehova ed kerew nen David. Bilang ebat, si Jesus so pinabiskeg nen Jehova pian mansiansian matoor. (Mateo 26:39) Lapud asalimbengan si Jesus ed ontan a paraan, agamoran to so imortalidad ed katawenan, tan minilyon a totoo ya angagamil na pananisia ed dondon so awalaan  met na ilalon manbilay ya andi-anggaan.

4. Anto so panamaseguro ed saray alanaan a Kristiano tan ed ‘arum a karnero’?

⁴ Makapanmatalek itayo a si Jehova so mabulos tan makayarin manalimbeng ed saray lingkor to natan a singa met ed panaon nen David tan si Jesus. (Santiago 1:17) Say daiset a nakekeraan ya alanaan ya agagi nen Jesus a wadia ni ed dalin so makapanmatalek ed sayan sipan nen Jehova: “[Say] tawir ya agnaderal, tan agnarumsisan tan agnaumas a dia ed katawenan nigana ed sikayo: A natatalima ed pakayari Dios, lapu ed pananisia ed kilalaban ya atadia a nipanengneng ed kaunoran ya agew.” (1 Pedro 1:4, 5) Say ‘arum a karnero,’ a walaay mangaraldalin ya ilalo, so makapanmatalek met ed Dios tan ed sipan to panamegley na salmista: “O aroen yo si Jehova, amin yo a sasantos: ta si Jehova yapiger to so saray matotoor.”​—Juan 10:16; Salmo 31:23.

Asalimbengan ed Espiritual

5, 6. (a) Panon a nasasalimbengan so totoo na Dios ed modernon panaon? (b) Anto so relasyon na saray alanaan ed si Jehova, tan komusta met iramay walaan na mangaraldalin ya ilalo?

⁵ Diad sayan panaon, si Jehova so angitarya na saray probisyon pian nasalimbengan so totoo to ed espiritual a paraan. Anggaman agto ra iyaagel ed panamasegsegang odino ed ir-irap tan trahedya a kaslakan a nagagawa ed bilay, sikato so matoor ya ontutulong tan mamapaseseg ed sikara pian nasalimbengan so maapit a relasyon da ed sikato. Say pundasyon na relasyon da ed Dios et say pananisia ra ed maaron probisyon To a dondon. Arum ed sarayan matoor a Kristiano so nilanaan na espiritu na Dios pian magmaliw a kaiban manuley nen Kristo diad tawen. Sikara so niyabawag a matunong bilang espiritual ya ananak na Dios, tan sarayan salita so onaplika ed sikara: “Sikatoy angilaban ed sikatayo ed biskeg na kabilungetan, tan angiyalis ed sikatayo ed panariay Anak na aro to; a dia ed sikato so kawalaan na karondon tayo, say pamerdona ed saray kasalanan tayo.”​—Colosas 1:13, 14.

⁶ Minilyon nin matoor a Kristiano so apaseguroan a nagunggonaan met ed probisyon na Dios nipaakar ed dondon. Oniay nabasa tayo: “Say Anak na too aglinma dia a panlingkoran, noag say manlingkor, tan mangiter na bilay to a sakey a dondon nipaakar ed amayamay.” (Marcos 10:45) Maniilalo iratan a Kristiano a manggayaga ed nasabin “kawayangan na gloria na saray anak na Dios” ed dugan panaon. (Roma 8:21) Kaleganan ni, papablien da so personal a pikakaaro ra ed Dios tan masimoon dan panggugunaetan a paeleten itan a relasyon.

7. Anto so sakey a paraan na panasalimbeng natan nen Jehova ed espiritual a pankaabigan na totoo to?

⁷ Sakey lan paraan na panasalimbeng nen Jehova ed espiritual a pankaabigan na totoo to et say pangitatarya to ed sikara na sakey a programa na progresibon panangipasal. Lapud saya et sikara so nawalaan na mas suston pikakabat ed katuaan. Itatarya met nen Jehova so tuloytuloy a panangigiya diad panamegley na  Salita to, organisasyon to, tan say masanton espiritu to. Diad panangiwanwan na “matoor tan makabat ya aripen,” saray totoo na Dios ed interon mundo et singa sakey ya internasyonal a pamilya. Aasikasoen na aripen a klase iray espiritual a pankaukolan, tan no posible et pati saray materyal a pankaukolan, na sankaabungan na saray lingkor na Dios​—antokaman so nanlapuan dan nasyon odino kipapasen na panagbilay.​—Mateo 24:45.

8. Anto so pankokompiyansaan nen Jehova ed saray matoor ed sikato, tan anto so ipapaseguro to ed sikara?

⁸ No panon a si Jesus et ag-inyagel nen Jehova ed pisikal a panangataki na kakabusol to, agto met iyaagel iray Kristiano ed ontan a paraan natan. Balet aliwa itan a pakapatnagan ya anggapoy panangabobon na Dios ed sikara. Andin balot! Imbes, ipaparungtal na satan so kompiyansa to ya itandoro da so dapag to nipaakar ed baleg tan sankatalbaan ya isyu. (Job 1:8-12; Uliran 27:11) Agbalot ikaindan nen Jehova iramay matoor ed sikato, “ta si Jehova aroen to so kaalasan, tan agto ikaindan so sasantos to; niapiger ira lawas.”​—Salmo 37:28.

Asalimbengan na Maaron-Panangasi tan Inkamatua

9, 10. (a) Panon a say inkamatua nen Jehova so manalimbeng ed totoo to? (b) Panon ya ipapabitar na Biblia a sasalimbengan nen Jehova iray matoor ed sikato diad panamegley na maaron-panangasi to?

⁹ Diad pikakasi nen David a nikurit ed Salmo 40, inkerew ton sikatoy nasalimbengan na maaron-panangasi odino abig linawa tan inkamatua nen Jehova. Lapud inkamatua tan panangaro nen Jehova ed inkatunong, kinaukolan ton idatak a malinew no anto iray estandarte to. Saramay manbibilay unong ed saratan ya estandarte so nasalimbengan a tuloy manlapud saray gonigon, takot, tan problema a naeeksperiensya na saramay mangibabaliwala ed saratan. Alimbawa, naprotektaan tayoy inkasikatayo tan saray inad-aro tayo manlapud makapaermen iran problema no paliisan tayo so panag-abuso ed druga tan alak, kagletan ed sekso, tan marawal ya estiloy-kabibilay. Tan anggan saramay kinmasipa ed dalan na inkamatua nen Jehova​—a singa agawa ed si David​—so walaan na panamaseguro a say Dios et siansia nin ‘panagsalimbengan a pasen’ parad saray magbabawin nankasalanan. Onia so nayarin magayagan nikelyaw da: “Sika yapiger mo ak a yarawi ed gotgot.” (Salmo 32:7) Agaylan balikas na maaron-panangasi na Dios!

¹⁰ Sakey nin alimbawa na maaron-panangasi na Dios et papasakbayan to iray lingkor to a mansiansian biig ed marelmeng a mundo, a magano to lan deralen. Oniay nabasa tayo: “Aleg ya aroen yo so mundo, ni saray bengatla a wala ed mundo. No siopaman a too aroen to so mundo say aro na Ama andi ed sikato. Ta amin a wala ed mundo, kilalawan na laman tan kilalawan na mata tan maapan gloria na bilay, aliwa a kien na Ama noag kien na mundo.” No talinengen tayo iyan pasakbay tan onkiwas itayo unong ed satan, literal tayon nasalimbengan so bilay tayo diad andi-anggaan, lapud oniay intuloy na teksto: “Say mundo mangangga, tan saray penel to: sabalet so mangunor ed linawa na Dios onsiansia lawas.”​—1 Juan 2:15-17.

 Asalimbengan na Kalakal, Pakatebek, tan Kakabatan

11, 12. Ipaliwawa no akin a say kalakal, pakatebek, tan kakabatan so manalimbeng ed sikatayo.

¹¹ Diad saramay maniilalon makagamor na panangabobon na Dios, oniay nipuyan ya insulat na ilalak nen David a si Solomon: “Say kalakal sikato naani bantay ed tagey mo; say pakatalos [odino, pakatebek] sikato naani mangiyagel ed sika.” Onia met so impaseseg to: “Gamoran mo so kakabatan . . . Sikato so agmo ikaindan, et yagel to ka; sikato so aroen mo, et sikato bantayan to ka.”​—Uliran 2:11; 4:5, 6.

¹² Uusaren tayo so kalakal odino abilidad tayon mannonot no dalepdepen tayo so nanaaralan tayo ed Salitay Dios. Say panggawa ed satan so ontulong ed sikatayon makabayubo na mas aralem a pakatebek ta pian niletneg tayo iray manepeg a prayuridad. Saya so makana, lapud amta na maslak ed sikatayo, unong ed eksperiensya tayon mismo, ya onlelesa iray problema sano inggagala odino agginagalan inletneg na totoo iray agmakabat a prayuridad. Sasagyaten itayo na mundo nen Satanas diad panamegley na materyal a kaykayamanan, inkabantog, tan pakayari, bangta idadanet nen Jehova so mas importante iran espiritual a bengatla. Say agpangiyuna ed saray maespiritual a bengatla et pansengegan na kabuyak na saray pamilya, kaderal na pankakaaro, tan kaandi na saray maespiritual a kalat. Bilang resulta, anien na sakey a too so makapaermen a bengatla, a nipabitar diad saray salita nen Jesus: “Anto so pinabangan na sakey a too, a makagamor na sankamundoan, tan nabalang to so bilay to?” (Marcos 8:36) Ipapaseseg na kakabatan a talinengen tayo so simbawa nen Jesus: “Anapen yo nin unona so panarian, tan say inkatunong to; et amin iraya a bengatla niarum ira ed sikayo.”​—Mateo 6:33.

Say Kapeligroan na Pannonot Labat ed Inkasikatayon Dili

13, 14. Anto so kabaliksan na pannonot labat ed dili, tan akin ya agmakabat so pagmaliw ya ontan?

¹³ Nikasiporan la a saray totoo et interesado ed inkasikaran dili. Balet sano say personal iran pilalek tan interes so manunaan la ed bilay, satan so manresulta ed problema. Kanian, pian nasalimbengan so pikakaaro tayo ed si Jehova, bibilinen to itayo ya agtayo nonoten labat so inkasikatayon dili. Sayan balikas so mankabaliksan na pagmaliw a “manonot lambengat na sakey ed dili iran pilalek, pankaukolan, odino interes to.” Agta satan so suston manideskribe ed dakel a totoo natan? Makatantanda ta ipapasakbay na Biblia a “dia ed saray kaunoran ya agew” na marelmeng a sistema nen Satanas, “saray totoo sikara naani so mangaro ed saray lamalaman da” odino nononoten da labat so inkasikaran dili.​—2 Timoteo 3:1, 2.

 ¹⁴ Papablien na saray Kristiano so kakabatan na itulok ed ganggan na Biblia a nonoten so pankaabigan na arum, ya aroen ira a singa pangaaro na sakey ed inkasikaton dili. (Lucas 10:27; Filipos 2:4) Nayarin moriaen na totoo ed inkalapagan ya aliwa itan a praktikal, ingen ta importante itan ta pian panggayagaan tayo so maaligwas a panamaley, maliket a relasyon ed pamilya, tan makapaliket a pikakaaro. Kanian, agbalot nepeg ya abuloyan na sakey a tuan lingkor nen Jehova so nisipor ya interes ed dili a mangimpluensya ed bilay to anggad punton ipuera to la so mas importante iran gegemtan. Say sankaimportantian et misiglaotan itan ed interes nen Jehova, say Dios a dadayewen to.

15, 16. (a) Anto so pansumpalan na awawey a pannonot labat ed dili, tan siopa so angipatnag na ontan? (b) Diad katuaan to, anto so gagawaen na sakey a too sano sikato so main-inomay a manhusga ed arum?

¹⁵ No say nononoten labat na sakey et say inkasikaton dili nayarin mangitonton itan ed pagmaliw a mantunongtunongan, a bilang resulta et magmaliw lan makisir-kanonotan tan mapalakbat so sakey a too. Oniay matukoy ya ibabaga na Biblia: “Anggapo so baraan mo, O too, anggan siopa ka a mangukom: ta dia ed pangukom mo ed arum, dusaen mo so inkasika; ta sika a mangukom gawaen mo so saray ontan a bengatla.” (Roma 2:1; 14:4, 10) Saray relihyoson lider ed panaon nen Jesus so kombinsidon tuloy ed inkatunong dan dili kanian moriaen dan kualipikado ira a mangondena ed si Jesus tan saray patumbok to. Diad ontan et pagmamaliwen day inkasikara ya uko-ukom. Lapud agda natetebek so dilin kalilingoan da, sikara so diad tua et mangokondena ed inkasikaran dili.

¹⁶ Si Judas, a patumbok nen Jesus ya angitapat ed sikato, so angiyabuloy ed inkasikaton dili a magmaliw a mahusga ed arum. Diad samay agawa ed Betania sanen si Maria, ya agi nen Lazaro, so angipuyok na ambalingit a larak ed si Jesus, si Judas so sinmuppiat a maong. Onia so impangibalikas to ed ingongot to: “Akin et ag-inlako so sayan unguento ed talonlasus a denario, tan inter ed saray duruka?” Balet oniay impangipaliwawa ni na salaysay: “Bang saya inkuanto, aliwan lapud panangimaton to ed duruka, noag lapud sikatoy matakew tan lapud wala ed sikato so supot inala to so impepelag diman.” (Juan 12:1-6) Agtayon balot komon aaligen si Judas odino saray relihyoson lider, a maples a nanhusga ed arum, a nanresulta ed inkakondena ra.

17. Iyilustra so kapeligroan a resulta na pagmaliw a mapasirayew odino mataletalek ed dili.

¹⁷ Makapaermen ta arum ed saray akadkaunan Kristiano, ya anggaman agnagmaliw a matakew a singa si Judas, so nagmaliw a biktima na kinon tan nagmaliw a mapasirayew. Oniay insulat nen Santiago nipaakar ed sikara: “Maliket kayo ed saray pasirayew yo.” Insan inyarum to ni: “Amin itan a panagliket [et] mauges.” (Santiago 4:16) Anggapoy nagunggona no ilastog tayo so agawaan tayo odino saray pribilehyo tayo ed serbisyo ed si Jehova. (Uliran 14:16) Nanonotan tayo so agawa sanen oniay inlastog nen apostol Pedro, diad samay bektan alablabas so impanmatalek to ed dili to: “No nagulo ra ya amin nisengeg ed sika, agak balot nagulo. . . . Anggan ompatey ak a midamay ed sika, agtaka ni iburi.” Diad katuaan to et anggapo so nilastog tayon mismo. Amin a panggagayagaan tayo et makasengeg lambengat ed maaron-panangasi nen Jehova. No tandaan tayo iya, ag-itayo magmaliw a mapaatagey.​—Mateo 26:33-35, 69-75.

18. Anto so liknaan nen Jehova nipaakar ed inkamapangta odino kinon?

¹⁸ “Say mapangta onla ed unaan na kabagbag, tan say mapasang ya espiritu ed unaan na kabagbag,” so nibaga ed sikatayo. Akin? Oniay ebat nen Jehova: “[Say] pangta, tan karangalan, . . . kagulak.” (Uliran 8:13; 16:18) Agpankelawan no akin a kagula nen Jehova so “masunggay a puso na ari ed Asirya, tan say gayaga na saray marangal a  kanenengneng to”! (Isaias 10:12) Sikato so dinusa nen Jehova lapud satan. Agmanbayag et nadusa met so amin diad mundo nen Satanas, pati saray mapaatagey tan paimportantin lider, nanengneng man ira odino andi. Komon ta agtayon balot aaligen so mapalakbat ya awawey na saray kabusol nen Jehova!

19. Diad anton aspekto a saray totoo na Dios et mangikikinon ingen ta mapaabeba?

¹⁹ Saray tuan Kristiano so walaan na rason a mangikinon ed impagmaliw dan lingkor nen Jehova. (Jeremias 9:24) Ontan met, walaan ira na rason pian mansiansian mapaabeba. Akin? Lapud “amin [et] nankasalanan, tan makulang ira ed gloria na Dios.” (Roma 3:23) Kanian pian nasalimbengan tayoy talindeg tayo bilang lingkor nen Jehova, nepeg tayon aligen so awawey nen apostol Pablo, ya oniay inkuan to: “Si Kristo Jesus linma dia ed mundo pian ilaban to so saray managkasalanan,” insan inyarum to: “Dia ed sikara siak so manunaan.”​—1 Timoteo 1:15.

20. Panon so panasalimbeng nen Jehova ed totoo to natan, tan panon to iran salimbengan ed arapen?

²⁰ Lapud panliketan na totoo nen Jehova ya iyuna so madibinon interes nen say personal ya interes da, nipaseguro ed sikatayo a mantultuloy si Jehova a manalimbeng ed sikara diad espiritual a paraan. Napaseguroan itayo met a sano nagawa la so baleg a kairapan, salimbengan nen Jehova so totoo to, diad espiritual ontan met ed pisikal a paraan. Diad iloob da ed balon mundo na Dios, onia so nayarin nikelyaw da: “Nia, saya sikato so Dios tayo; sikato so inalagar tayo, tan sikato ilaban to itayo: saya sikato si Jehova; sikato so inalagar tayo, manliket tan manggayaga itayo dia ed panangilaban to.”​—Isaias 25:9.

Kasin Natandaan Yo?

• Panon ya asalimbengan si Arin David tan si Jesu-Kristo?

• Panon a nasasalimbengan so totoo nen Jehova natan?

• Akin a nepeg tayon paliisan so pannonot labat ed inkasikatayon dili?

• Akin a nayarian tayo so mangikinon ingen ta mapaabeba?

[Tepetepet Parad Panagaral]

[Saray litrato ed pahina 9]

Panon so impanalimbeng nen Jehova ed si David tan si Jesus?

[Saray litrato ed pahina  10, 11]

Diad antoran paraan a nasasalimbengan so totoo na Dios natan diad espiritual a paraan?

[Saray litrato ed pahina 12]

Anggaman ikikinon tayo so panlilingkor tayo ed si Jehova, nepeg a mantultuloy itayon mapaabeba