Sikayoran Kristiano​—Ikinon Yo No Siopa Kayo!

“Say manpasirayew, ipasirayew to si Jehova.”​—1 CORINTO 1:31, NW.

1. Anto so mapatnag a nagagawa ed awawey na totoo no nipaakar ed relihyon?

 “DIAD agano ni et indeskribe na sakey a komentarista ed saray pamaakaran na relihyon so awawey na dakel a totoo nipaakar ed pananisia ra. Oniay insalaysay to: “Say makatantandan nagagawa ed relihyon natan et aliwan say nipaakar ed relihyon a mismo noagta say agmananginenen ya awawey na saray membro.” Diad impamalaknab to ni, tinukoy to itan ya awawey bilang say “agpanlabay na sakey ed relihyon ton dili.” Inkuan to a dakel a totoo so “manisia ed Dios . . . ; ag-ira labat interesado ed sikato.”

2. (a) Akin ya agmakapasurprisa so agpananginenen na saray totoo ed espiritual? (b) Anto so mapeligron epekto na agpananginenen parad saray tuan Kristiano?

² Sayan onkakasmak ya awawey ya agpananginenen so aliwan makapasurprisa ed saray estudyante na Biblia. (Lucas 18:8) Tan diad karaklan a relihyon et nailaloan so ontan a pakaandian na interes. Lapud, say palson relihyon so abayag lan mangibabalang tan manidismaya ed katooan. (Apocalipsis 17:15, 16) Balet, parad saray tuan Kristiano et mapeligro so ikakayat na awawey ya inkaandian na interes tan seseg. Agtayo nayarian ya ibaliwala so pananisia tayo tan paandien so seseg tayo ed panaglingkor ed Dios tan ed katuaan na Biblia. Amasakbay si Jesus sumpad ontan ya inkamalainem-em sanen oniay imbaga to ed saray inmunan-siglon Kristiano a manaayam ed Laodicea: “Aliwa ka ya ambetel tan aliwa ka ya ampetang: Labay ko komon ya ambetel ka o ampetang ka. . . . Malainem-em ka.”​—Apocalipsis 3:15-18.

Motekteken No Siopa Itayo

3. Antoran aspekto na talindeg na saray Kristiano so nikinon da?

³ Pian naresistian so agpananginenen ed espiritual, nakaukolan a malinew so pakatebek na saray Kristiano ed no siopa ira, tan nepeg dan makatunongan ya ikinon so nikabiig a talindeg da. Bilang lingkor nen Jehova tan babangatan nen Kristo, naromog tayo ed Biblia iray deskripsion ed no siopa itayo. Sikatayo iray “tasi” nen Jehova, “kakimeyan na Dios,” diad aktibon panginanabang tayo na “ebanghelyo” ed arum. (Isaias 43:10; 1 Corinto 3:9; Mateo 24:14) Sikatayo so totoo a ‘manaaroan ed sakey tan sakey.’ (Juan 13:34) Saray tuan Kristiano et totoo a ‘lapud panangagamil [odino panangiyaplika], saray pakalikna ra so apasal a mangibiig na maong tan mauges.’ (Hebreos 5:14) Sikatayo so “silesilew dia ed mundo.” (Filipos 2:15) Panggugunaetan tayo a mansiansian ‘masimpit so tongtongan tayo diad utel na saray bugkalot.’​—1 Pedro 2:12; 2 Pedro 3:11, 14.

4. Panon a nibiig na sakey a mandadayew ed si Jehova no anto so agto nepeg a pagmaliwan?

⁴ Amta met na saray tuan mandadayew ed si Jehova no anto so agda nepeg a pagmaliwan. “Ag-ira taga-mundo,” a singa say Lider da, si Jesu-Kristo et agkabiangan na mundo. (Juan 17:16) Mansiasiansia ira a biig manlapud “saray Gentil,” odino nasyones, ya “abilungetan so kalakal da, a niarawi ira ed bilay na Dios.” (Efeso 4:17, 18) Bilang resulta, saray patumbok nen Jesus et ‘ibebeneg da so ag-inkamaridios tan saray ibibeg a mangaraldalin, a manbibilay ira ed sayan panaon a sidarangka  tan situtunong tan sisasalamsam.’​—Tito 2:12.

5. Anto so kabaliksan na simbawan ‘mangipasirayew ed si Jehova’?

⁵ Say malinew a panmoria tayo ed talindeg tayo tan say relasyon tayo ed Soberanon Manuley ed uniberso so mamakiwas ed sikatayon ‘mangipasirayew ed si Jehova.’ (1 Corinto 1:31) Anton klase na panagpasirayew itan? Bilang tuan Kristiano, maliket itayo lapud si Jehova so Dios tayo. Tutumboken tayo iyan simbawa: “Say manpasirayew, manpasirayew komon ed saya, a sikato walaan na pakatalos tan amta to ak, a siak si Jehova a manggawa a managamil na maaro ya abig na linawa, inkatunong, tan kaptekan, dia ed dalin.” (Jeremias 9:24) “Manpasirayew” itayo lapud pribilehyon akabat tayo so Dios tan lapud uusaren to itayo ya ontulong ed arum.

Say Angat

6. Akin a mairap parad arum so pamasiansia ed malinew a panmoria ed talindeg da bilang Kristiano?

⁶ Tua, aliwan mainomay a pansiansiaen so malinew a panmoria ed nikadkaduman talindeg tayo bilang Kristiano. Oniay nanonotan na sakey a kalangweran a laki a pinabaleg bilang Kristiano sanen sikatoy temporaryon linmetey ed espiritual: “Panapanaon et aliknak nensaman ya agko amta no akin a sakey ak ed saray Tasi nen Jehova. Nibangat ak la ed katuaan na Biblia manlapud inkaugaw ko. No maminsan et isipen kon sakey labat iyan niletneg tan aawaten a relihyon.” Inabuloyan na arum a naimpluensyaan so talindeg da makasengeg ed saray panligliwaan, media, tan say peles ya agmaridios a panmoria ed bilay. (Efeso 2:2, 3) Arum a Kristiano so nayarin sagpaminsan a manduaruwa ed inkasikara tan manuusisa lamet ed saray estandarte tan kalakalat da.

7. (a) Anton klase na panangusisa ed dili so matukoy parad saray lingkor na Dios? (b) Iner so lesaan na kapeligroan?

⁷ Kasin makapuy so panapanaon a maalwar a panusisa ed dili? Andi. Nayarin nanonotan yo so impaseseg nen apostol Pablo ed saray Kristiano a mantultuloy dan usisaen so inkasikara: “Dalepdep yo ed sikayon dili, no wala kayo ed pananisia, sali yo so sikayon dili.” (2 Corinto 13:5) Impaseseg dia na apostol so makagunggonan panagsagpot pian natebek so antokaman iran kaleteyan ed espiritual a nayarin linmesa, tekep na gagala a manggawa na nakaukolan iran kundang pian ipetek iratan. Pian napaneknekan to no kasin sikato so walad pananisia, say sakey a Kristiano so nepeg a mandetermina no kasin say panagsalita tan kagagawa to so mitunosan ed papanisiaan to. Balet no gawaen ed lingon paraan, say panusisa ed dili a mamakiwas ed sikatayon mangimano ed “talindeg” tayo odino mananap na saray ebat ya agmangilalanor ed relasyon tayo ed si Jehova odino ed Kristianon kongregasyon, so magmaliw ya andiay-kakanaan tan mapeligro ed espiritual. * Agtayon balot labayen a naeksperiensya so ‘pakageba na pananisia tayo’!​—1 Timoteo 1:19.

Ag-itayo Nipuera ed Saray Angat

8, 9. (a) Panon ya imbalikas nen Moises so panduaruwa to ed inkasikaton dili? (b) Panon so inkiwas nen Jehova ed inkamasuyat nen Moises? (c) Panon kayon naapektoan ed saray panamaseguro nen Jehova?

⁸ Nepeg kasin isipen na saray Kristiano ya onsasaew ira lapud manduaruwa ira no maminsan ed inkasikaran dili? Andin balot! Petepeteg a naligliwa ira no naamtaan da ya aliwa lan balo iratan a liknaan. Ontan met so alikna na saray matoor a tasi nensaman. Sakey ya alimbawa et si Moises, ya angipatnag na nikadkaduman pananisia, katooran, tan debosyon. Sanen sikatoy nibaki ed singa mair-irap a kimey, si Moises so masuyat ya angitepet: “Siopa ak?” (Exodo 3:11) Malinew, say ebat a walad kanonotan to et, ‘Aliwa ak a makana!’ odino ‘Aliwa ak a kualipikado!’ Wala so pigaran aspekto na abenegan nen Moises a nayarin sengegan no akin ya ontan so alikna to: Sikato so nanlapu ed nasyon na saray aripen. Sikato so impulisay na saray Israelita. Aliwan marlas so panagsalita to. (Exodo 1:13, 14; 2:11-14; 4:10) Sikatoy sakey a managpastol​—sakey a trabaho a kabkabusol na saray Ehipsio. (Genesis 46:34) Agpankelawan sirin no akin  ya inisip ton sikatoy agkualipikadon mangibulos ed naaripen a totoo na Dios!

⁹ Pinaseguroan lamet nen Jehova si Moises diad impangiter To na duaran alay abig a sipan: “Iba mo ak naani; et nia so pakabidbiran naani ya imbaki ta ka: kayari pangalam na katooan diman ed Ehipto, mangigalang kayo naani ed Dios dia ed tapew na sayan palandey.” (Exodo 3:12) Imbaga na Dios ed sayan masuyat a lingkor to a Sikato so kaiba ton naynay. Niarum ni, impabitar ed sikato nen Jehova a seguradon niliktar to so totoo To. Diad inlabas na dakel a siglo et ontan met a pananulong so insipan na Dios. Singa bilang, diad panamegley nen Moises et oniay imbaga to ed nasyon na Israel sanen magano la ran onloob ed Insipan a Dalin: “Ombiskeg ka, tan manliket ka a maong, . . . si Jehova a Dios mo sikato so mila a miulop ed sika: agnaani onkulang ed sika, nisay manpaulyan ed sika.” (Deuteronomio 31:6) Onia so impaseguro met nen Jehova ed si Josue: “Anggapo so siopaman a too a makatalindeg ed arap mo ed amin na saray agew na bilay mo: . . . Wala ak ed sika; agak onliwat ed sika, tan sika so agko ikaindan.” (Josue 1:5) Tan oniay insipan to ed saray Kristiano: “Agta ka naani taynan, tan agta ka naani ikaindan.” (Hebreos 13:5) Lapud walaan itayo na ontan a mabiskeg a tulong, nepeg tayon ikinon so impagmaliw tayon Kristianos!

10, 11. Panon ya atulongan so Levitan si Asap pian napansiansia so suston awawey to ed kaimportantian na serbisyo ed si Jehova?

¹⁰ Manga limaran siglo kayari nen Moises, sakey a matoor a Levita a manngaray Asap so prangkan angisulat ed saray panduaruwa to nipaakar ed kaimportantian na pangegemtan ed maptek a kurang. Sanen sikato so mipupuligesgesan diad panlilingkor to ed Dios lapud saray subok tan tukso, naimano nen Asap a walaray manmumudmora ed Dios a lalon ombibiskeg tan onaaligwas. Panon a naapektoan si Asap? “No nipaakar ed siak, saray salisalik ngalngali a sinmipa ra wari,” so inaksobi to. “Saray kundang ko asingsingger lawari a kinmaruskos. Ta makaibeg ak wari ed andi-kalakal, sanen anengneng ko so imbulaslas na bagel.” Sikato so nanduaruwa la ed kaimportantian na pagmaliw a managdayew ed si Jehova. “Tuatua a nilinisan ko so pusok ed maapa, tan inurasan ko so limalimak ed inkaandi kasalanan,” so inisip nen Asap. “Ta dia ed amin a dukey na agew asalotan ak.”​—Salmo 73:2, 3, 13, 14.

¹¹ Panon a tinalonaan nen Asap iratan a makapagonigon a liknaan? Kasin imburi to iratan? Andi. Imbalikas to iratan diad pikakasi to ed Dios, unong a nanengneng tayo ed koma-73 a Salmo. Makatantanda so impanguman na awawey nen Asap sanen binisita to so santuaryo na templo. Legan a wadman, amoria to a say debosyon ed Dios so siansia nin sankaabigan a kurang. Lapud apasimbalo so panamabli to ed espiritual, atalosan to a kagula nen Jehova so kaugsan tan diad dugan panaon et dusaen to iray marelmeng. (Salmo 73:17-19) Sanen nipetek lay awawey to, pinabiskeg nen Asap so panamabli ed talindeg to bilang apribilehyoan a lingkor nen Jehova. Inkuan to ed Dios: “Wala ak a lanang ed sika: sika intabin mo ak ed limak a kawanan. Sika ibasbas mo ak a pati pamilin mo, tan naani awaten mo ak ed gloria.” (Salmo 73:23, 24) Nanliket lamet si Asap ed Dios to.​—Salmo 34:2.

 Malinlinew ed Isip Da No Siopa Ira

12, 13. Mangiter na saray alimbawa na karakter ed Biblia ya angikinon ed relasyon da ed Dios.

¹² Sakey lan paraan pian napabiskeg so panmoria tayo ed talindeg tayo bilang Kristiano et say panusisa tan pangalig ed pananisia na saray matoor a managdayew, ya anggaman ed kairapan et peteg a nanliketan da so relasyon da ed Dios. Nodnonoten pa si Jose, ya ilalak nen Jacob. Diad malangwer ya edad to, sikato so sililiput ya inlako bilang aripen tan inawit ed Ehipto, a piganlasus kilometro kaarawi manlapud matakot ed Dios ya ama to tan arawin tuloy ed maapit tan masuportan kipapasen na ayaman to. Legan a wadman ed Ehipto, anggapo so toon nakerewan nen Jose na maridios a bilin, tan kinaukolan ton arapen so makapaangat iran situasyon ya anubok ed moralidad to tan panagmatalek to ed Dios. Balet ta nansagpotan ton maong a pansiansiaen a mabiskeg so panmoria ed talindeg to bilang lingkor na Dios, tan sikato so nansiansian matoor ed amta to a maptek. Nanliketan to so impagmaliw ton managdayew ed si Jehova anggaman ed maruksan kaliberliber, tan agto masuyat ya imbalikas so nalilikna to.​—Genesis 39:7-10.

¹³ Kayari na waloran siglo, sakey ya akautibon Israelitan ugaw a bii a nagmaliw ya aripen na Siryanon heneral a si Naaman so ag-akalingwan ed talindeg to bilang managdayew ed si Jehova. Sanen niwala so pankanawnawa, sikato so makpel ya angiter na maabig a pantasi parad si Jehova sanen impakabat to si Eliseo bilang propeta na tuan Dios. (2 Arari 5:1-19) Pigaran taon kayari na satan, say malangwer nin Arin Josias, anggaman ed mauges a kaliberliber to, so angipaakseb na tuloy-tuloy a panamasimbalo ed relihyon, impaapiger to so templo na Dios, tan impawil to so nasyon pian mandayew ed si Jehova. Inkinon to so pananisia tan panagdayew  to. (2 Awaran, kapitulo 34, 35) Si Daniel tan say taloran Hebreon kakaiba to diad Babilonia so agbalot akalingwan ed talindeg da bilang lingkor nen Jehova, tan anggan diad pananesdes tan tukso et nanmatoor ira. Malinew, inkinon da so impagmaliw dan lingkor nen Jehova. ​—Daniel 1:8-20.

Ikinon Yo No Siopa Kayo

14, 15. Anto so nalalanor ed pangipasirayew ed talindeg tayo bilang Kristiano?

¹⁴ Matalona iratan a lingkor na Dios lapud binayuboan da so maabig a panangikinon ed talindeg da ed arapan na Dios. Komusta itayo met natan? Anto so nalalanor ed pangikinon ed talindeg tayo bilang Kristiano?

¹⁵ Unona, saya so mangilaktip ed aralem a panamabli ed impagmaliw tayon kabiangan na totoo a tinawag ed ngaran nen Jehova, a bebendisyonan tan aabobonan to. Agpanduaruwaan na Dios no siopa iray totoo to. Si apostol Pablo, a nambilay ed panaon na pirmin inkawetwet ed relihyon, so nansulat: “Amta na Katawan so saray totoo to.” (2 Timoteo 2:19; Numeros 16:5) Papablien nen Jehova iray “totoo to.” Oniay inyabawag To: ‘Say maniwit ed sikayo diwiten to so bukel na matak.’ (Zacarias 2:8) Malinew, aaroen itayo nen Jehova. Kanian, say relasyon tayo ed sikato so kaukolan a niletneg met ed aralem a panangaro ed sikato. Oniay naimano nen Pablo: “No siopaman a too kaba’to so Dios, ontan met a sikatoy kabat na Dios.”​—1 Corinto 8:3.

16, 17. Akin a nayarian na saray Kristiano, malangwer man odino matakken, ya ikinon so espiritual a tawir da?

¹⁶ Nepeg a surien na saray kalangweran a pinabaleg bilang Tasi nen Jehova no kasin say talindeg da bilang Kristiano so ombibiskeg unong ed personal a relasyon da ed Dios. Ag-ira nayarin mandependi labat ed pananisia na atateng da. Oniay insulat nen Pablo nipaakar ed kada lingkor na Dios: “Dia ed katawan ton dili manalalagey, o napelag.” Kanian, oniay intuloy nen Pablo: “[Say] sakey tan sakey ed sikatayo [so] mangiyosa-osa naani nipaakar ed inkasikaton dili ed arap na Dios.” (Roma 14:4, 12) Mabitar, no aliwan interon puso so impangawat yo ed panagdayew na atateng yo ed si Jehova, agmansiansia so maapit tan magnayon a relasyon yo ed Sikato.

¹⁷ Diad interon awaran, wala so dasig na dakel a tasi nen Jehova. Onggapo itan ed matoor a toon si Abel​—manga 6,000 a taon lay apalabas​— anggad say “baleg ya ulop” na saray modernon Tasi ya onnatnat ni ed dakerakel a mandadayew ed si Jehova a manggayaga ed magnayon ya arapen. (Apocalipsis 7:9; Hebreos 11:4) Sikatayo so sankabaloan a grupo na sayan andukey a dasig na matoor iran managdayew. Agaylan abig so espiritual a tawir tayo!

18. Panon itayon nibiig ed mundo panamegley na saray prinsipyo tan estandarte tayo?

¹⁸ Kabiangan met ed say talindeg tayo bilang Kristiano iray prinsipyo, kalidad, estandarte, tan ugali a mangipabidbir ed sikatayo bilang Kristiano. Satan so ‘Say Dalan,’ say alenleneg a maaligwas a paraan na kabibilay tan pamaliket ed Dios. (Gawa 9:2; Efeso 4:22-24) Saray Kristiano et ‘sasalien da so amin a ganagana’ tan ‘mansiasiansia ira ed maong’! (1 Tesalonica 5:21) Sakey ni et malinew so pakatalos tayo ed baleg a pandumaan na Inkakristiano tan say mundo a sinmian ed Dios. Malinlinew ya ibibiig nen Jehova so tuan panagdayew manlapud palso. Diad panamegley na propeta ton si Malaquias, oniay inyabawag to: “Ompawil kayo naani tan mangibiig kayo naani na matunong tan marelmeng, say manlingkor ed Dios  tan say agmanlingkor ed sikato.”​—Malaquias 3:18.

19. Anto so agbalot pagmaliwan na saray tuan Kristiano?

¹⁹ Lapud importantin tuloy so pangipasirayew ed si Jehova diad sayan awetwet lan mundo, anto so makatulong ed sikatayo pian napansiansia tayo so maabig a panangipasirayew ed Dios tayo tan say aralem a pakatebek ed talindeg tayo bilang Kristiano? Naromog ed ontumbok ya artikulo iray makatulong a suhestion. Legan yon aaralen iratan, makapanseguro kayo ya: Agbalot ombetel so interes na saray tuan Kristiano ed pananisia ra.

[Paimano ed leksab]

Kasin Natandaan Yo?

• Panon a ‘nipasirayew na saray Kristiano si Jehova’?

• Anto so naaralan yo ed saray alimbawa nen Moises tan si Asap?

• Sioparan totoo ed Biblia so angipasirayew ed panlilingkor da ed Dios?

• Anto so nalalanor ed pangipasirayew ed talindeg tayo bilang Kristiano?

[Tepetepet Parad Panagaral]

[Litrato ed pahina 14]

Walay panaon ya alikna nen Moises so panduaruwa ed inkasikaton dili

[Saray litrato ed pahina 15]

Dakel iran lingkor nen Jehova nensaman so angipasirayew ed nikabkabiig a talindeg da