Gobierno na Panarian na Dios​—Petepeteg la Natan

“Panon a manpapakna so dakerakel a bansa, a walaan na nambabangil a kultura diad nanduruman panaon na iyaaligwas? Nibaga a say iyataki lambengat na sananey a planeta so mamakasakey ed rasa na too.”​—The Age, peryodiko ed Australia.

IYATAKI na sananey a planeta? Balanglan pansengegan itan na pankakasakey na amin a bansa ed mundo odino andi, say propesiya ed Biblia so manasaglawi ed asingsingger lan krisis a sengegan na pankakasakey na saray bansa ed interon mundo. Tan peteg a niwala so krisis panamegley na saray puersa ed paway na liwang.

Si Arin David na kadaanan ya Israel so mapropetikon analambit ed sayan kipapasen na mundo. Sikatoy pinuyanan na Dios a mangisulat: “Saray arari dalin impasen da so inkasikara, tan saray manuley mandaragup ira a mansisingbat, na sumpa ed Jehova, tan sumpa ed pinuyokan to, a kuan da, Pultoten tayo so impanaker da, tan ipulisay tayo so saray lubilubir da ed sikatayo.” (Salmo 2:2, 3; Gawa 4:25, 26) Imanoen a saray arari ed mundo so mannononong a sumpa ed si Jehova, say Amalsa ed uniberso, tan say nilanaan ton Ari, si Jesu-Kristo. Panon itan a nagawa?

Unong ed kronolohiya na Biblia tan saray asumpal a propesiya, nen taon 1914 et niletneg so Panarian na Dios ed katawenan a si Jesu-Kristo so Ari. * Diad saman a panaon et nankakasakey so kanonotan na saray bansa ed mundo. Imbes a manpasakop ira ed inkasoberano  na kapkapangiletneg a Panarian na Dios, sikaray alanor ed pansasamsaman na pakayari​—diad Baleg a Bakal, odino Guerra Mundial I.

Panon a momoriaen nen Jehova a Dios so ontan ya inkiwas na saray manuley a totoo? “Saman so manyurong ed katawenan onelek naani: say Katawan balawen to ra naani. Dia ed satan sikato pisalitaan to ra naani ed kaplesan na sanok to, tan punawen to ra ed masakit ya ingongo’to.” Insan, oniay ibaga nen Jehova ed Anak to, say alanaan ya Ari na Panarian: “Kerew ka ed siak, et iter ko ed sika so saray nasyon ya onkana a tawir mo, tan say kasampotan a kabiangan na dalin ya onkana a kayarian mo. Sika buyaken mo ra ed lewet a balatyang; sika ibalsak mo ra a mekmeken a singa pomapalba.”​—Salmo 2:4, 5, 8, 9.

Nagawa iyan kaunoran a panmekmek ed saray bansan onsusumpa panamegley na balatyang a setro diad Armagedon, odino Har–​Magedon. Say Apocalipsis, ya unor a libro na Biblia, so manideskribe ed sayan kapantokan ya ebento bilang “bakal na baleg ya agew na Dios, a Makapanyarin-amin,” a natiptipon ‘iray arari na amin a mundo.’ (Apocalipsis 16:14, 16) Diad panangimpluensya na demonyo, saray nasyon na dalin so mankakasakey diad kaunoran a saksakey so gagala ra​—pian mibakal ed Dios a Makapanyarin-amin.

Asingsingger la so panaon a saray totoo so mannononong ya onsumpa ed inkasoberano na Dios. Balet, satan a “pankakasakey” da so agmangitarok na saray gunggona ed sikara. Imbes, say ikiwas da so gapoan na abayag lan aalagaren a kareenan parad amin a katooan. Panon ya ontan? Diad satan ya unor a bakal, say Panarian na Dios et “buybuyaken to naani tan upoten to naani so saraya ya amin a panarian [na mundo], et sikato so mansiansia lawas.” (Daniel 2:44) Say gobierno na Panarian na Dios, aliwan say organisasyon na too, so manumpal ed pilalek na katooan parad sankamundoan a kareenan.

Say Pangulon Administrador ed Gobierno na Panarian

Satan imay Panarian ya ipipikasi na dakel a masimoon a totoo, a kuan da: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:10) Say Panarian na Dios et sakey a peteg a gobierno, aliwan sakey ya agnatebek a kipapasen na puso, a manusumpal ed alay abig iran gawa manlapu la’d inkiletneg na satan ed tawen nen 1914. Konsideraen tayo so pigaran importantin katuaan a mangipapatnag a petepeteg so Panarian na Dios, a sigpot lan onkukurang natan.

Manuna ed amin, walaan itan na mabiskeg tan epektibon sangan manangipaakseb ya idadaulo na nitrono lan Ari, si Jesu-Kristo. Nen 33 K.P., tinuro nen Jehova a Dios si Jesu-Kristo bilang Ulo na Kristianon kongregasyon. (Efeso 1:22) Manlapu la’d saman, susumpalen nen Jesus so responsabilidad to bilang Ulo, kanian ipapatnag toy pakayari ton mangasikaso. Alimbawa, sanen agawa so pirmin eras diad Judea nen inmunan siglo, kinmiwas a tampol so Kristianon kongregasyon pian tulongan iray membro na satan. Inorganisa so kimey a pananulong, tan nibaki ira di Bernabe tan Saul manlapud Antioquia a mangawit ed payabol.​—Gawa 11:27-30.

Dakel ni so nailaloan tayo manlapud si Jesu-Kristo natan ya onkukurang la so gobierno na Panarian. Bektaman a nagawa iray kalamidad a singa saray yegyeg, eras, delap, maksil a bagyo, odino insabog na bolkan, onkikiwas a tampol so Kristianon kongregasyon na saray Tasi nen Jehova pian tulongan iray kapananisiaan da tan arum ni ra diad lugar ya apektado. Singa bilang, sanen agawa so maksil a yegyeg diad El Salvador nen Enero tan Pebrero 2001, inorganisa iray kimey a  pananulong diad amin a parte na bansa, tan tinmulong iray grupo na saray Tasi nen Jehova ed Canada, Guatemala, tan Estados Unidos. Agangganon nipaalagey lamet so talora ed saray pasen a panagdayewan da ontan met ed masulok a 500 a kaabungan.

Saray Uuleyan na Gobierno na Panarian na Dios

Manlapu la nen niletneg so mangatatawen a Panarian na Dios nen 1914, satan so manitipon tan mangoorganisa ed saray uuleyan ton totoo ed interon mundo. Saya so kasumpalan na makatantandan propesiya ya inkurit nen Isaias: “Nagawa dia ed saray kaunoran ya agew, a say palandey na abung nen Jehova [say nipaatagey a tuan panagdayew ed sikato] niletneg ed toktok na saray palandey, . . . et saray amin a nasyon onagus ira ya angga ed sikato.” Ipapabitar na propesiya a “dakerakel a baley” odino totoo so ontatdang ed satan a palandey pian mangawat ed saray panamilin tan ganggan nen Jehova.​—Isaias 2:2, 3.

Sayan aktibidad so manreresulta ed makatantandan tuloy a muyongan ed modernon panaon​—say internasyonal ya impanaagi na masulok a 6,000,000 a Kristiano diad masulok a 230 a daldalin ed sankamundoan. Diad internasyonal iran kombension na saray Tasi nen Jehova, mabetbet a mandinayew iray makakaimaton ed pakakanengneng da ed aroan, kareenan, tan pankakasakey diad limog na alay karakel a totoo, a tatalonaan na satan iray panbibiigan ed nasyonalidad, kultura, tan lenguahe. (Gawa 10:34, 35) Agka ta onabobon a pian nitarok na sakey a gobierno so nilasus ya etnikon grupo ed pankakasakey tan pantutunosan et nepeg a satan so epektibo, malet a niletneg, tan peteg?

Panarian na Dios tan Edukasyon

Amin a gobierno so walaan na saray kakaukolanen ya iilaloan a kapeten na saray ombaley na satan, tan amin a malabay a manbilay ed silong na satan a gobierno so nepeg a mangapet ed saratan a kakaukolanen. Mipadpara, say Panarian na Dios so walaan na saray kakaukolanen a nepeg a kapeten na saramay onkualipika bilang uuleyan na satan. Balet, talagan balbaleg a kimey so nakaukolan pian natulongan so dakel a totoon nandurumay abenegan a mangawat tan mangunor ed pareho iran estandarte. Kanian, nia so sananey nin katuaan a mamaneknek ed inkapeteg na Panarian na Dios​—say epektibon programa na edukasyon na satan a manasabi tan mamapasimbalo ed puso ya aliwa labat a nonot.

Panon a nasusumpal na gobierno na Panarian iyan makapaangat a kimey? Diad panamegley na panagpulong ed “saray kaabungan” tan panangibangat ed Salitay Dios ed saray indibidual a singa ginawa na saray apostol. (Gawa 5:42; 20:20) Panon kaepektibo iyan nengneng na edukasyon? Nansulat si Jacques Johnson, sakey a Katolikon pari, diad sinimban peryodiko ed Canada nipaakar ed impansagpot ton patundaen so sakey a biin paiyaaralan ed saray Tasi nen Jehova. “Siak so akewkew a maong tan amoriak a milalaban ak ya anggapo so pananalok,” so inkuan to. “Naamtaan ko a diad inlabas na pigaran  bulan et sarayan Tasi nen Jehova a bibii so awalaan la na makabkabaliksan iran siglaotan ed sayan malangwer ya ina ya apukok la ed abung to. Akapisiglaotan ira ed sikato lapud sikatoy tinulongan da, kinaaro ra, a pinaelet da so makabkabaliksan iran siglaotan na liknaan da. Ag-abayag et sikatoy nagmaliw ya aktibon membro na relihyon da tan anggapo lay nagawaan ko pian naamper itan.” No panon ya apakiwas so puso na sayan datin Katoliko ed mensahe na Biblia ya imbangat na saray Tasi nen Jehova tan ed Makristianon kondukta ra, ontan met so impakatenyeg na kapusoan na minilyon ed sankamundoan.

Sayan nengneng na edukasyon nipaakar ed Panarian so nisentro ed Biblia, a mangitatandoro ed saray kablian tan estandarte na satan ed moral. Ibabangat na satan so totoo a manaaroan tan manpapagalangan antokaman so abenegan da. (Juan 13:34, 35) Tutulongan met na satan iray totoo ya onkiwas ed simbawan: “Agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Diad impangitalirak da ed datin paraan na kabibilay da tan diad maliket a panguunor da ed saray ganggan tan prinsipyo na gobierno na Panarian, naroromog na minilyon so kareenan tan liket natan tan say masnag iran ilalo ed arapen.​—Colosas 3:9-11.

Sayan magasin a Say Panag-Bantayan so alay abig a tulong pian nagamoran iyan sankamundoan a pankakasakey. Diad panamegley na organisado iran metodo ed panagpatalos tan say kagawaan ed panangipalapag na dakel a lenguahe, saray manunan artikulo na Say Panag-Bantayan so bansag a nipapalapag ed 135 a lenguahe, tan masulok a 95 porsiento na saray manbabasa na satan ed sankamundoan so manbabansag lan makaaral ed materyal diad dilin lenguahe ra.

Walay sakey a Mormon a managsulat ya angilista ed sankatalonggaringan iran aligwas ed panagmisionaryo na arum a relihyon. Inlista to so Say Panag-Bantayan tan Awake!, ya ipapalapag na saray Tasi nen Jehova, bilang sankaabigan iran magasin ed panag-ebanghelyo tan inkuan to: “Anggapon balot so nayarin mangakusa ed Watchtower odino Awake! a mangikakayat itan na agpangingalngalep​—bilang kasunian, ipapaseseg na saratan so pagmaliw ya alerto a mataltalag kon naiimano ed arum a relihyoson publikasyon. Makaparepresko so lugan na Watchtower tan Awake! lapud satan so nibase ed katuaan, sinukimat a maong, tan realistiko.”

Dakerakel so ebidensya a petepeteg so Panarian na Dios a sigpot ya onkukurang. Malikeliket tan maligligsa iray Tasi nen Jehova a manginanabang ed “saya ya ebanghelyo na panarian” ed kakaabay da, ya iimbitaan da ran magmaliw ya uuleyan na satan. (Mateo 24:14) Kasin makapasagyat itan ya ilalo parad sika? Napanggayagaan mo iray bendisyon ed pililimog ed saraman so nababangatan tan manbabanikel a manbilay unong ed saray estandarte na Panarian. Nagkalalo ni, nayarian mon panggayagaan so ilalon manbilay ed silong na uley na Panarian diad insipan a balon mundo a “panayaman na katunongan.”​—2 Pedro 3:13.

[Paimano ed leksab]

[Litrato ed pahina 4, 5]

Nen 1914 et alanor iray bansa ed sankamundoan a bakal

[Saray litrato ed pahina 6]

Say boluntaryon pananulong a kimey et ebidensya ya onkukurang so Makristianon panangaro

[Litrato ed pahina 7]

Saray Tasi nen Jehova ed sankamundoan so nagugunggonaan ed parehon programa na edukasyon