Tepetepet Manlapud Saray Managbasa

Akin ya inabuloyan nen David, bilang matoor a lingkor nen Jehova, a nawalaan na terafim ya imahen odino talintao so asawa ton si Micol, unong a nipabitar diad 1 Samuel 19:12, 13?

Unona, konsideraen tayo ed antikey so konteksto. Sanen abalitaan na asawa nen David so plano nen Arin Saul a pateyen si David, sikatoy kinmiwas a tampol. Oniay ibabaga na Biblia: “Si Micol pinalasor to si David ed dorongawen: et linma, tan binmatik, tan tinmaynan. Et si Micol inala to so terafim [a mapatnag a singa kabaleg tan kurti na too], tan sikato so imparukol to dia ed dukolan, tan angiyan na danganan a bago na saray kanding ed ulo to, tan sikato so sinakbongan to ed saray kawes.” Sanen sinmabi iray igaganggan nen Saul pian erelen si David, imbaga nen Micol ed sikara: “Sikato so mabeblay.” Sayan taktika so angabala ed panaanap da ed si David, kanian sikatoy akatakas.​—1 Samuel 19:11-16.

Isusuheri na saray adiskobre na saray arkeologo a nensaman et isisimpen iray terafim ya imahen pian aglabat pandakmomoan noagta uusaren met parad legal a gagala. No panon ya uusaren natan iray titulo ed pankayarian tan nisulat a testamento bilang pamaneknek ed saray kanepegan a manawir, ontan met iray terafim ya imahen nensaman a panaon. Mapatnag a say pakawalaan na terafim, diad pigaran kipapasen, so mangiiter ed manugang a laki na kanepegan a manawir ed kaykayarian na inatey lan katulangan ton laki. Nayarin saya so rason no akin a, diad akadkaunan inkagawa, si Raquel so angala ed saray terafim ya imahen a kien nen ama to tan no akin a mapagpaga so ama to a nabawi iratan. Diad saman ya inkagawa, si Jacob, ya asawa nen Raquel, so agmikabat ed ginawa na akulaw to.​—Genesis 31:14-34.

Sanen nagmaliw lan nasyon iray Israelita, inawat da so Samploran Ganggan, a say mikadua ed satan so espisipikon angisebel ed panggawa na saray talintao. (Exodo 20:4, 5) Diad saginonor, impasagilig nen propetan Samuel itan a ganggan sanen mitotongtong ed si Arin Saul. Inkuan to: “Say iyaalagey sikato so singa kasalanan na ibawanen, tan say inkapangetpanget sikato so singa panangigalang ed saray talintao tan dirios [“terafim,” NW].” (1 Samuel 15:23) Lapud sayan rason, agla ikakana so terafim parad saray gagala na tawir diad Israel. Balet, sayan kadaanan a nengneng na Judion anito so ompatnag a nantultuloy ed pigaran sankaabungan na Israelita. (Uko-ukom 17:5, 6; 2 Arari 23:24) Samay impangisimpen nen Micol ed terafim ya imahen a kaiba na saray kagawaan to so pakapatnagan ya aliwan nagnap so puso to ed si Jehova. Ag-amta ingen nen David so nipaakar ed terafim ya imahen nisay inabuloyan to itan lapud si Micol et anak a bii nen Arin Saul.

Say panmoria nen David nipaakar ed nikabkabiig a debosyon ed si Jehova so nibalikas ed oniaran salita: “Baleg si Jehova, balbaleg a narayew: sikato met so takotan a manuna nen amin a dirios. Ta amin iray dirios na saray totoo sikara so talintao: balet si Jehova ginawa to so saray tawen.”​—1 Awaran 16:25, 26.

[Litrato ed pahina 29]

Say mikadua ed Samploran Ganggan so angisebel ed panggawa na saray talintao, a singa say terafim a nipanengneng dia

[Credit Line]

Nanlapud libron The Holy Land, Tomo II, 1859