Dinan a Relihyon so Nepeg Mon Pilien?

‘SAY nanduruman relihyon et singa labat nanduruman dalan a saksakey so pugtaan da. Diad tua et saksakey so Dios, agta ontan?’ Ontan so panmoria na dakel ya anggaman liknaen dan importante so pilimog ed sakey a relihyon, agla balet makana no dinan a relihyon so pilien na sakey a tumboken.

Diad primero, ompatnag a makatunongan iyan argumento, lapud tua a saksakey labat so Dios, a Makapanyarin-amin. (Isaias 44:6; Juan 17:3; 1 Corinto 8:5, 6) Balet, agtayo nayarin ibaliwala iray mabitar a pandurumaan​—saray pansusumlangan ni ingen​—na dakel a relihyoson grupo a mangibabagan manlilingkor ira ed tuan Dios. Baleg so pandurumaan da diad ag-agamil, sisisiaen, bangabangat, tan saray kakaukolanen da. Ontanlan kabaleg so pandurumaan kanian saramay kabiangan ed sakey a relihyon odino grupo so naiirapan a mantalos odino mangawat ed ibabangat odino papanisiaan na arum.

Diad biek a dapag, oniay inkuan nen Jesus: “Say Dios sikatoy sakey ya espiritu: et saray mangigalang ed sikato nepeg dan igalang ed espiritu tan katuaan.” (Juan 4:24) Kasin say pandayew ed Dios ed katuaan et mangiyabuloy ed dakel a mansusumlangan ya ideya nipaakar ed no siopa so Dios, no anto iray gagala to, tan no panon so labay ton pandayew ed sikato? Kasin makatunongan a panisiaan ya aliwan importante ed Dios a Makapanyarin-amin no panon so pandayew tayo ed sikato?

Saray Tuan Kristiano Nensaman tan Natan

No maminsan, saray Kristiano nen inmunan siglo et walaan na nanduruman opinyon nipaakar ed saray bengatla. Alimbawa, oniay inkuan nen apostol Pablo bilang panutukoy ed saray taga-Corinto: “Imbaga ra ed siak, so nisengeg ed sikayo, agagik, na saray kaamong nen Cloe, dia ed sikayo wala so saray siblangan. Labay ko ya ibaga, a balang sinansakey ed sikayo kuan to, Siak kien ak nen Pablo; tan siak kien ak nen Apolos; tan siak kien ak nen Cefas; tan siak kien ak nen Kristo.”​—1 Corinto 1:11, 12.

Kasin imbaliwala nen Pablo iyan pandurumaan? Kasin tutumboken lambengat na kada indibidual so dilin kurang to parad kilalaban? Andin balot! Oniay insimbawa nen Pablo: “Pikasik sirin ed sikayo, agagi, dia ed ngaran na Katawan tayon Jesu-Kristo, ta sikayon amin salitaen yo so saksakey a bengatla, tan anggapo so pansisian ed sikayo: noag ingen ayadyari a pannononong yo ed saksakey a nonot tan saksakey ya isip.”​—1 Corinto 1:10.

Siempre, agnagamoran so pankakasakey na pananisia diad panamegley na panamilit. Nagamoran lambengat itan sano maalwar ya usisaen na saray indibidual iray pamaakaran tan sikaray makarapat tan mangawat ed pareparehon konklusyon. Kanian, say personal a panaral ed Salita na Dios tan masimoon a pilalek a mangiyaplika ed naaaralan so makana iran kundang  pian niwala so pankakasakey a sinalambit nen Pablo. Kasin naromog so ontan a pankakasakey? Unong ed akonsidera tayo la, say Dios so abayag lan midedeneng ed totoo to bilang sakey a grupo. Kasin posible a nabidbir itan a grupo natan?

Saray Gunggona ed Dugan Pililimog

Oniay aminsan ya intepet nen salmistan David: “Jehova, siopa naani manayam ed tabernakulom? Siopa naani manayam ed masanto a pukdol mo?” Seguradon pannodnonotan itan a tepet. Inmebat si David: “Say manakar a mapmaptek, tan manggawa na matunong, tan mansalita na matua ed puso.” (Salmo 15:1, 2) Say suston pakatalos ed Biblia so ontulong ed sakey pian nabidbir to so relihyon a makasusumpal ed saratan a kakaukolanen na Dios. Insan, diad piulop ed satan a grupo, panggayagaan na sakey so makapabiskeg a pililimog ed totoon mandadayew ed Dios a nankakasakey tan “ed espiritu tan katuaan.”

Papaneknekan na saray Tasi nen Jehova a posiblin nagamoran so pankakasakey ed pananisia tan gawa anggaman ed sayan agnankakasakey a mundo. Kaulop da natan iray datin membro na dakel a nanduruman relihyon tan etnikon grupo. Arum ed saray Tasi et datin agnostiko odino ateista. Saray arum met et aliwan seryoso ed relihyon. Diad sayan nanduruma a relihyon, kultura, tan pilosopiya so nanlapuan na saray indibidual a manggagayaga natan ed relihyoson pankakasakey ya agnaiimano ed arum diad mundo natan.

Say basiyan na ontan a pankakasakey et say Salita na Dios, say Biblia. Siempre, amta na saray Tasi nen Jehova ya agda nayarin diktaan so arum no antoy gawaen da. Balet aapresyaen da so pribilehyon mamaseseg ed arum a manaral ed Biblia ta pian magmaliw itan a malet a basiyan da diad pampili ra na panagdayew. Diad onian paraan et dakel ni so makapinabang ed saray gunggona manlapud panangidayew ed Dios “ed espiritu tan katuaan.”

Natan et baleg so kapeligroan a nabiktima ed makaderal iran impluensya tan pananagyat. Makanakana so pampili na dugan klase na pilimogan. Ibabaga na Biblia a ‘miulop ka ed saray makabat a totoo pian magmaliw ka a makabat’ lapud ta “saray mauges a kaulop deralen da so maong ya ug-ugali.” (Uliran 13:20; 1 Corinto 15:33) Sakey a proteksion so pilimog ed saray tuan mandadayew ed Dios. Kanian, papanonotan itayo na Biblia: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Agaylan bendisyon sano saray tuan sankakaaro, saray sanaagi ed espiritual, so maaron mantutulongan pian nasumpal da iray responsabilidad da ed Dios!

Pepekderan nen Ottmar itan a panmoria. Anggaman sikatoy pinabaleg ed Katolikon pamilya diad Alemanya, sikatoy agla mimimisa. Oniay impaliwawa to: “Kapag no mimisa ak, ompapaway ak ed simbaan a liknaen kon anggapo so agunggonak.” Anggaman ontan, agnaandi so pananisia to ed Dios. Diad saginonor et akatongtong to iray Tasi nen Jehova tan sikatoy akombinse a sikara so tuan lingkor na Dios. Atebek to so pankaukolan a milimog ed sikara. Oniay ibabaga to natan: “Bilang aktibo ed sankamundoan ya organisasyon, panggagayagaan ko so kareenan ed nonot ko tan pusok. Siak so kalkalnan natutulongan a nawalaan na mas suston pikakabat ed Biblia. Mabmablin bengatla itan parad siak.”

Sakey ya Imbitasyon ed Saramay Manaanap

Saray totoo a pareparehoy kanonotan da tan maapit a mankikimey bilang grupo so makasumpal ed kimey a lalon epektibo nen saray indibidual a nagsi-nagsin mankikimey. Alimbawa, oniay imbilin nen Jesus ed saray patumbok to sanen manpatanir la: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.”  (Mateo 28:19, 20) Panon a sigpot a nasumpal itan a kimey no anggapo so panangidirehi odino organisasyon? Panon a natumbok na sakey iyan Makasulatan a bilin no salien toy manlingkor ed Dios a bukbukor to?

Nen imbeneg a taon, saray Tasi nen Jehova ed sankamundoan so akapangibunog na 91,933,280 a nibase ed Biblia iran libro, bokleta, tan brosyur, nilikud ed 697,603,247 a magasin, a diad ontan et nipapasabi so mensahe na Salitay Dios ed nilasus milyon a totoo ed 235 a daldalin. Agaylan abig iyan paneknek a mas malaknab so nagawaan na pansasagpot na nankakasakey tan organisadon grupo nen say pansasagpot na manbukbukor ya indibidual!

Nilikud ed pangibubunog na literatura ed Biblia, saray Tasi nen Jehova so libren mangiyaaral na Biblia pian natulongan iray totoo ya onaralem so pakatalos da ed saray kakaukolanen na Dios. Nen katantaon, say promedyo a 5,726,509 na satan a panangiyaral ed Biblia so inkondukta ed kada simba diad saray indibidual odino grupo. Sayan panangibangat ed Biblia so akatulong ed minilyon a totoo pian nagamoran da so malet a pangibasiyan no manpili ira nipaakar ed panagdayew. Sika so papasesegen min manaral ed saray kakaukolanen na Dios unong a nidatak diad Biblia. Kayari na satan et makapanpili ka la.​—Efeso 4:13; Filipos 1:9; 1 Timoteo 6:20; 2 Pedro 3:18.

No labay mon paliketen so Dios, importante so pilimog ed sakey a relihyon​—balet aliwan diad anggan dinan a relihyoson grupo odino organisasyon. Kaukolan mon ibase so pampilim na relihyon diad suston pikakabat ed Biblia, aliwan diad andiay-basiyan iran doktrina odino diad ibabaga na arum. (Uliran 16:25) Aralen iray kakaukolanen ed tuan relihyon. Ikompara iratan ed saray mismon sisiaen mo. Insan ka manpili unong ed satan.​—Deuteronomio 30:19.

[Saray litrato ed pahina 7]

Panggagayagaan na saray Tasi nen Jehova so pankakasakey dia ed agnankakasakey a mundo