Sakey ya “Aripen” a Matoor tan Makabat

“Siopa sirin so matoor tan makabat ya aripen, a sikato’y impasen na katawan to a mangimaton ed sankaabungan to?”​—MATEO 24:45.

1, 2. Akin ya importante a makagamor itayo na regular a suplay na espiritual a tagano natan?

 DIAD samay Martes na ngarem, Nisan 11, 33 K.P., walay sakey a tepet a pinalesa na saray babangatan nen Jesus a makabkabaliksan ed sikatayo natan. Oniay intepet da ed sikato: “Anto kasi so tanda ed isabim tan say anggaan na mundo?” Bilang ebat, imbalikas nen Jesus so makatantandan propesiya. Sinaglawi to so nipaakar ed magulon panaon na bakabakal, eraeras, yegyegyeg, tan sakisakit. Tan satan et “gapo [ni labat] na kairapan.” Wala ni so mas alodloor ya onsabi! Agaylan makapataktakot a nagawa!​—Mateo 24:3, 7, 8, 15-22; Lucas 21:10, 11.

² Manlapu la’d 1914, nasusumpal so maslak ed saray aspekto na propesiya nen Jesus. Say “kairapan” so linmaknab lan tuloy ed katooan. Balet ta agnepeg ya ontakot iray tuan Kristiano. Insipan nen Jesus a sustunien to ira na makapabunigas ya espiritual a tagano. Lapud wala la’d tawen si Jesus, panon ton niyuksoy so pangitarya ed sikatayo na suplay na espiritual a tagano?

3. Antoran uksoyan so ginawa nen Jesus pian nagamoran tayo so “tagano ed panaon a kinepeg to”?

³ Impabitar a mismo nen Jesus so ebat ed satan a tepet. Legan na pangidadalatdat to ed malaknab a propesiya to, oniay intepet to: “Siopa sirin so matoor tan makabat ya aripen, a sikato’y impasen na katawan to a mangimaton ed sankaabungan to, a mangiter ed sikara na tagano ed panaon a kinepeg to?” Insan inkuanto: “Mapalar so satan ya aripen, a sikatoy nasabian na katawan to ya ontay gagawaen to. Tua kuan ko ed sikayo, a sikatoy ipasen to’d amin a wala ed sikato.” (Mateo 24:45-47) On, niwala so sakey ya “aripen” ya aturon mangitarya na espiritual a tagano, sakey ya “aripen” a magmaliw a matoor tan makabat. Kasin satan ya aripen et saksakey a too, mansusublayan ya indibidual, odino wala ni so arum? Lapud itatarya na matoor ya aripen so kakkaukolan ya espiritual a tagano, pankaabiganan tayo no naamtaan tayo so ebat ed satan.

Sakey ya Indibidual Odino Sakey a Grupo?

4. Panon tayon naseguro a say “matoor tan makabat ya aripen” et aliwan saksakey a too?

⁴ Say “matoor tan makabat ya aripen” et agnayarin saksakey a too. Akin ya andi? Lapud satan ya aripen et ginmapon angitarya na espiritual a tagano nen inmunan siglo ni, tan unong ed si Jesus et satan so itultuloy a gawaen na aripen anggad insabi na Katawan nen 1914. Ipapatnag na satan so manga 1,900 a taon na matoor a serbisyo parad sakey ya indibidual. Anggan si Matusalem et ag-akapambilay na ontan karukey!​—Genesis 5:27.

5. Ipaliwawa no akin a say terminon “matoor tan makabat ya aripen” et ag-onaplika ed sinansakey a Kristiano.

 ⁵ Bueno, kasin onaplika so terminon “matoor tan makabat ya aripen” ed sinansakey a Kristiano diad inkalapagan a pantalos? Tua, amin a Kristiano et nepeg a magmaliw a matoor tan makabat; balet ta mabitar a wala ni so bengatlan walad kanonotan nen Jesus sanen sinaglawi to so nipaakar ed “matoor tan makabat ya aripen.” Panon tayon naseguro itan? Lapud imbaga to a diad ‘isabi na katawan’ et manuro na aripen ya “ipasen to’d amin a wala ed sikato.” Panon a nipabtang ed sakey a Kristiano so pangasikaso ed amin a bengatla​—ed “amin” a kaykayarian na Katawan? Imposible!

6. Panon a say nasyon na Israel so niganan onkurang bilang “aripen” na Dios?

⁶ Say makatunongan labat sirin a konklusyon et tutukoyen nen Jesus so sakey a grupo na saray Kristiano bilang “matoor tan makabat ya aripen.” Posible kasi ya ontukoy itan ed sakey a tugyop na aripen? On. Pitonlasus a taon sakbay nen Kristo, tinukoy nen Jehova so interon nasyon na Israel bilang “saray tasik” tan “say aripen ko a pinilik.” (Isaias 43:10) Kabiangan ed sayan aripen a klase so kada membro na nasyon na Israel manlapud 1513 K.K.P., sanen niiter so Mosaikon Ganggan, anggad Pentecostes 33 K.P. Maslak ya Israelita so andian na direktan betang ed panangipakurang na saray kimey na nasyon odino ed panangasikaso ed programan espiritual a panagtagano. Inusar nen Jehova iray arari, uko-ukom, propeta, saserdote, tan saray Levita pian gawaen iratan a kimey. Anggaman kuan, bilang nasyon et irerepresenta na Israel so inkasoberano nen Jehova tan iyaabawag da ed saray nasyon so nipaakar ed kirayewan to. Kada Israelita so nepeg a magmaliw a tasi nen Jehova.​—Deuteronomio 26:19; Isaias 43:21; Malaquias 2:7; Roma 3:1, 2.

Nipulisay so Sakey ya “Aripen”

7. Akin a say kadaanan a nasyon na Israel so adiskualipika bilang “aripen” na Dios?

⁷ Lapud say Israel et “aripen” na Dios pigaran siglo lay linmabas, kasin satan met imay aripen a sinaglawi nen Jesus? Andi, lapud say kadaanan ya Israel so makapaermen ya agnagmaliw a matoor tan makabat. Sinegek nen Pablo so kipapasen sanen inaon to iray salita nen Jehova ed nasyon: “Say ngaran na Dios naayew lapu ed sikayo dia ed utel na saray Gentiles.” (Roma 2:24) On, amantok so Israel diad andukey ya awaran na panagrebeldi diad impangipulisay da ed si Jesus, anggad punton impulisay la ra nen Jehova.​—Mateo 21:42, 43.

8. Kapigan aturo so “aripen” ya onsalat ed Israel, tan diad antoran kipapasen?

⁸ Sayan ag-inkamatoor ed biang na “aripen” ya Israel, so agmankabaliksan ya aglan balot makagamor iray matoor a managdayew na suplay na espiritual a tagano. Nen Pentecostes 33 K.P., 50 agew kayari na impatey nen Jesus, niyibung so masanton espiritu ed manga 120 a babangatan to diad tagey a silir ed Jerusalem. Diad saman a bekta, nianak so balon nasyon. Matukotukoy ta say inkianak na satan so nipalapag sanen saray kabiangan na satan so makpel ya angiyabawag ed saray manaayam ed Jerusalem nipaakar ed “saray makapakelaw a gawa na Dios.” (Gawa 2:11) Kanian, satan a balon nasyon, sakey ya espiritual a nasyon, so nagmaliw ya “aripen” a mangiyabawag ed gloria nen Jehova ed saray nasyon tan mangitarya na tagano ed manepeg a panaon to. (1 Pedro 2:9) Matukotukoy, satan so tinawag ed saginonor ya “Israel na Dios.”​—Galacia 6:16.

9. (a) Siopa so tugyopen na “matoor tan makabat ya aripen”? (b) Sioparay membro na “sankaabungan”?

 ⁹ Kada membro na “Israel na Dios” et dedikado tan bautismadon Kristiano ya alanaan na masanton espiritu tan walaan na mangatatawen ya ilalo. Kanian, say balikas a “matoor tan makabat ya aripen” so manutukoy ed amin a membro na satan ya alanaan ya espiritual a nasyon bilang grupo diad dalin diad antokaman a panaon manlapu la’d 33 K.P. anggad natan, no panon a say kada Israelita a nambilay diad antokaman a panaon manlapu la’d 1513 K.K.P. anggad Pentecostes 33 K.P. so kabiangan ed sakbay-Kristianon aripen a klase. Siopa balet so “sankaabungan,” a makagamor na espiritual a tagano manlapud satan ya aripen? Nen inmunan siglo K.P., awalaan so kada Kristiano na mangatatawen ya ilalo. Kanian, say sankaabungan et saray alanaan met a Kristiano a minoria, aliwan bilang sakey a grupo, noagta bilang indibidual. Amin, pati saramay awalaan na responsablin posisyon ed kongregasyon, so mankaukolan na espiritual a tagano manlapud satan ya aripen.​—1 Corinto 12:12, 19-27; Hebreos 5:11-13; 2 Pedro 3:15, 16.

‘Diad Balang Sakey say Gawaen To’

10, 11. Panon tayon naseguro ya aliwan parepareho so kimey a nipabtang ed amin a membro na aripen a klase?

¹⁰ Anggaman say “Israel na Dios” et manutukoy ed matoor tan makabat ya aripen a klase a walaan na nipabtang a kimey, kada membro so walaan met na personal iran responsabilidad. Nipabitar itan diad saray salita nen Jesus a nikurit diad Marcos 13:34. Oniay inkuanto: “Sikato so singa sakey a too, sanen onla ed sananey a dalin, a tinaynan to so abung to, tan inter to so pakauley ed saray aripen to, ed balang sakey say gawaen to, a binilin to met so bantay-pinto a manpuyat.” Kanian say kada membro na aripen a klase so akaawat na asainmin​—pian padaaken so mangaraldalin a kaykayarian nen Kristo. Kada sakey so manusumpal ed sayan kimey unong ed dilin abilidad tan pankanawnawa to.​—Mateo 25:14, 15.

¹¹ Niarum ni, imbaga nen apostol Pedro ed saray alanaan a Kristiano ed panaon to: “Sakey tan sakey unong na agamoran to a pamalangkap ipagamor to met ed saray arum ta ontan so maong a panangimatalkan na daakan a grasya na Dios.” (1 Pedro 4:10) Kanian, saratan ya alanaan so walaan na responsabilidad a manlingkor ed balang sakey ya usaren da iray langkap ya inter na Dios ed sikara. Niarum ni, ipapabitar na saray salita nen Pedro ya aliwan amin a Kristiano et nawalaan na pareparehon abilidad, responsabilidad, odino pribilehyo. Balet, kada membro na aripen a klase so makatulong ed sakey a paraan diad ibulaslas na espiritual a nasyon. Panon?

12. Panon ya akatulong so kada membro na aripen a klase, laki man odino bii, diad ibubulaslas na aripen?

¹² Unona, kada sakey so walaan na responsabilidad a magmaliw a tasi nen Jehova, a mangipulong ed maong a balita na Panarian. (Isaias 43:10-12; Mateo 24:14) Sakbay na intokotok to ed tawen, ingganggan nen Jesus so amin a matoor  a babangatan to, lalaki tan bibii, a magmaliw ira a managbangat. Inkuanto: “Onla kayo sirin, tan manggawa kayo na saray babangatan ed amin a nasyones, a binyagan yo ra ed ngaray Ama, tan say Anak, tan say espiritu santo. Ya ibangat yo ran mangunor na amin a bengabengatla ya ingganggan ko ed sikayo; tan nia, wala ak a naynay ed sikayo, ya angga ed kasampotan na mundo.”​—Mateo 28:19, 20.

13. Anton pribilehyo so nanggayagaan na amin ya alanaan?

¹³ Sanen aromog iray balon babangatan, sikara so maalwar ya imbangat a mangunor ed amin a bengatlan ingganggan nen Kristo ed saray babangatan to. Diad kaunoran, saray kinmiwas so nagmaliw a kualipikado a mangibangat ed arum. Nitarya so makapabunigas ya espiritual a tagano ed saray prospektibon membro na aripen a klase a walad nanduruman nasyon. Amin ya alanaan a Kristiano, lalaki tan bibii, so akibiang ed niganggan ed sikaran panggawa na babangatan. (Gawa 2:17, 18) Sayan kimey so kaukolan a mantultuloy manlapu la’d inmunan inggapo na aripen ed kimey to anggad anggaan na sayan sistema na bengabengatla.

14. Siopa lambengat so walaan na saray pribilehyon manbangat ed loob na kongregasyon, tan anto so awawey na saray alanaan a bibii nipaakar ed satan?

¹⁴ Saray kapkapanbautismon alanaan so nagmaliw a kabiangan na satan ya aripen, tan anggan siopaman ni so angibangat ed sikara diad gapo, sikaray nantultuloy ya angawat ed panangibangat na saray membro na kongregasyon ya akakapet ed Makasulatan iran kualipikasyon a manlingkor bilang mamasiken. (1 Timoteo 3:1-7; Tito 1:6-9) Sarayan aturon lalaki so apribilehyoan sirin ya ontulong ed ibulaslas na nasyon ed nikadkaduman paraan. Agnan-imbelan na saray matoor ya alanaan a Kristianon bibii a saray Kristianon lalaki lambengat so apabtangan a manbangat ed loob na kongregasyon. (1 Corinto 14:34, 35) Diad pisunian, sikara so maliket a nagunggonaan ed maseet a kimey na saray lalakin membro na kongregasyon tan maliket ira ed saray pribilehyon niiter ed saray bibii, a mangilaktip ed pangitarok na maabig iran balita ed arum. Saray maseseg ya alanaan ya agagin bibii so mangipapatnag natan na parehon inkamapaabeba, balanglan say aturon mamatatken so alanaan odino andi.

15. Anto so sakey ed manuna iran lapuan na espiritual a tagano nen inmunan siglo, tan siopa so angidaulo ed panangitarya ed satan?

¹⁵ Say manunan espiritual a tagano a nitarya nen inmunan siglo so direktan nipasabi panamegley na saray sulat na saray apostol tan arum nin babangatan ya angidaulo. Saray insulat da​—nagkalalo la ed saramay kabiangan na 27 ya apuyanan iran libro a tugyopen na Kristianon Griegon Kasulatan​—so nipatulor ed amin a kongregasyon tan maseguron nagmaliw a pinagkabasiyan na panagbangat na saray lokal a mamatatken. Diad ontan a paraan, saray manangilaman ed satan ya aripen so matoor ya angitarya na daakan ya espiritual a tagano ed saray masimoon a Kristiano. Say aripen a klase nen inmunan siglo so matoor ya anumpal ed niganggan ed sikara.

Say “Aripen” Kayari na 19 a Siglo

16, 17. Panon a pinaneknekan na aripen a klase a sikatoy matoor ed panusumpal to ed asainmin to diad saray taon anggad 1914?

¹⁶ Komusta met natan? Sanen ginmapo so kiwawala nen Jesus nen 1914, kasin walay aromog ton grupo na saray alanaan a Kristiano a matoor a mangitatarya na tagano ed suston panaon? Wala so aromog to. Sayan grupo so malinew ya abidbiran lapu ed maabig a bunga a pinawala na satan. (Mateo 7:20) Say awaran manlapu la’d saman so amaneknek a duga itan.

¹⁷ Diad samay panaon ya insabi nen Jesus, manga 5,000 a membro na sankaabungan so okupadon mangikakayat ed katuaan na Biblia. Daiset iray komikimey, balet inusar na satan ya aripen so pigaran balon paraan pian ikayat so maong a balita. (Mateo 9:38) Alimbawa, niyuksoy so kipalapag na saray paliwawa nipaakar ed Biblia ed ngalngali 2,000 a peryodiko. Diad onian paraan, say katuaan na Salitay Dios so tampol ya akasabi ed pigamplon libon managbasa. Niarum ni, walay niparaan a waloy oras a programa a pinantekep so de-kolor ya slides tan pelikula. Bilang resulta na sayan balo a presentasyon, say mensahe na Biblia, manlapud gapo na Panamalsa anggad sampot na Sanlibon Taon ya Uley nen Kristo,  so nipabitar ed saray managbantay a walaan na dagup a masulok a siameran milyon ed taloran kontinente. Say niyimprintan literatura so sananey nin paraan a nausar. Alimbawa, nen 1914 et nipalapag so manga 50,000 a kopya na sayan dyurnal.

18. Kapigan tinuro nen Jesus so aripen a mangasikaso ed amin a kaykayarian to, tan akin?

¹⁸ On, sanen sinmabi so Katawan, aromog to so matoor ya aripen to a maalwar a manatagano ed saray membro na sankaabungan ontan met ed panangipulong na maong a balita. Walaray babaleg a responsabilidad natan a manatalaran ed satan ya aripen. Inkuan nen Jesus: “Tua kuan ko ed sikayo, a sikatoy ipasen to’d amin a wala ed sikato.” (Mateo 24:47) Ontan so ginawa nen Jesus nen 1919, sanen asungdoan na aripen so panaon na subok. Akin balet a say “matoor tan makabat ya aripen” et angawat na babaleg iran responsabilidad? Lapud naawat na Katawan so munat na kaykayarian to. Niiter ed si Jesus so inkaari nen 1914.

19. Ipaliwawa no panon a naaasikaso iray espiritual a pankaukolan na “baleg ya ulop.”

¹⁹ Antoran kaykayarian so impabtang na balon abalangetan a Katawan ya asikasoen na matoor ya aripen to? Amin ya espiritual a bengatla a kien To diad dalin. Alimbawa, duaran dekada kayari na inkitrono nen Kristo nen 1914, abidbiran so “baleg ya ulop” na “arum a karnero.” (Apocalipsis 7:9; Juan 10:16) Saraya et aliwan alanaan a membro na “Israel na Dios,” noagta saray masimoon a lalaki tan bibii a walaan na mangaraldalin ya ilalo, a mangaaro ed si Jehova tan malabay a manlingkor ed sikato a singa gagawaen na saray alanaan. Bilang resulta, oniay inkuan da ed “matoor tan makabat ya aripen”: “Sikami mila kami naani ed sikayo, ta sikami nadngelan mi a say Dios wala ed sikayo.” (Zacarias 8:23) Sarayan balon abautismoan a Kristiano so akagamor na parehon masustansyan espiritual a tagano a singa met ed alanaan iran membro na sankaabungan, tan sayan duaran grupo so mandurungo ed sayan maespiritual a lamisaan manlapu la ed saman. Agaylan bendisyon itan parad saray membro na “baleg ya ulop”!

20. Anto so betang na “baleg ya ulop” diad idaraak na kaykayarian na Katawan?

²⁰ Saray membro na “baleg ya ulop” so maliket ya akiulop ed alanaan ya aripen a klase bilang manangipulong na maong a balita. Diad pampupulong da, dinmaak so mangaraldalin a kaykayarian na Katawan, a niarum ed saray responsabilidad na “matoor tan makabat ya aripen.” Diad idarakel na saray manaanap na katuaan, kinaukolan so pinalaknab iran pasilidad na panag-imprintaan pian napenek so pankaukolan na literatura na Biblia. Saray sangan opisina na saray Tasi nen Jehova so niletneg ed dakel a daldalin. Saray misionaryo so nibaki “angga ed kasampotan na dalin.” (Gawa 1:8) Manlapud ngalngali liman libo ya alanaan nen 1914, dinmakel so bilang na saray manangidayew ed Dios a nagmaliw a masulok ya anemiran milyon natan, a say karaklan ed satan et kabiangan na “baleg ya ulop.” On, dinmakel iray kaykayarian na Ari manlapu la’d inkabalangetan to nen 1914!

21. Anton duaran parabolo so konsideraen tayo ed ontumbok a panagaral?

²¹ Amin na saya so mangipapabitar a say aripen et namparan “matoor tan makabat.” Kayarin tuloy na impanaglawi to ed “matoor tan makabat ya aripen,” inter nen Jesus so duaran parabolo ya angipabitar ed saratan a kalidad: say parabolo na saray makabat tan makulangkulang a birhen tan say parabolo na saray talento. (Mateo 25:1-30) Mas lalo itayon nainteresan ed satan! Anto so kabaliksan na saratan a parabolo ed sikatayo natan? Konsideraen tayo iyan tepet ed ontumbok ya artikulo.

Anto so Nikuan Yo?

• Siopa so tugyopen na “matoor tan makabat ya aripen”?

• Siopa iray membro na “sankaabungan”?

• Kapigan so inkaturo na matoor ya aripen a mangasikaso ed amin a kaykayarian na Katawan, tan akin a diad satan a panaon?

• Siopara so tinmulong a mamadaak ed kaykayarian na Katawan ed apalabas iran dekada, tan panon?

[Tepetepet Parad Panagaral]

[Saray litrato ed pahina 10]

Pinaneknekan na inmunan-siglon aripen a klase a matoor ira ed niganggan ed sikara