‘Mibakal ed Maabig a Pibabakal na Pananisia’

NAISIP mo ta so sakey a sundalo ed panaon na bakal ya agto panliketan so ganggan ed sikaton: “Onsempet ka pian nakaibam a magano so asawam tan say pamilyam”?

Ontan so ingganggan ed sakey a sundalo diad panaon nen Arin David na Israel. Si Urias a Hiteo so impatawag a mismo na ari tan pinaseseg ton onsempet. Ingen, agsinmempet si Urias. Sanen tinepetan nipaakar ed nidumaruman awawey to, inmebat si Urias a say kaban na sipanan, a mangirerepresenta ed kiwawala na Dios, tan say armada na Israel so walad lawak na bakalan. “Siak ta sirin,” so intepet to, “onloob ak ed abung ko, a mangan tan oninum, tan miakdol ed asawak?” Parad si Urias, saya so agmakatunongan ed ontan a mapeligron panaon.​—2 Samuel 11:8-11.

Say kondukta nen Urias so amalesa na importante iran tepet, lapud sikatayo met so manbibilay ed sakey a panaon na bakal. Say bakal a peles a nagagawa et aliwan singa ed dinanman a bakal ya akilabanan na saray nasyon ed mundo. Baliwala so duaran guerra mundial no ikompara ed sayan bakal, tan sika so nalalanor ed saya. Saya so mapeligron tuloy tan masebeg so kabusol. Diad sayan bakal, anggapo iray paltogan tan anggapo iray bomban ipepelag, balet nakaukolan nin siansia so estratehiya ed pibabakal.

Antis kan milaban, nepeg mon amtaen no kasin maptek itan ed moral tan no anto so ilalaban mo. Kasin makatunongan so tumang  diad pilalaban? Say gagala na sayan nikaduman pilalaban so impalinew na sulat nen apostol Pablo ed si Timoteo: “Mibakal ka ed maabig a pibabakal na pananisia.” On, diad sayan bakal et nepeg mon iyagel, so aliwan sakey ya ilang, noagta say “pananisia”​—say interon Kristianon katuaan unong a niparungtal ed Biblia. Malinew, nepeg a sigpot mon awaten so inkamatua na “pananisia” pian milaban ka nisesengeg ed satan tan manalo ka.​—1 Timoteo 6:12.

Say sakey a makabat a mibabakal et pambanikelan ton nabidbir so kalaban to. Diad sayan pilalaban, say kalaban so onsiano lan tuloy ed estratehiya ed pibabakal, a walaan na dakel a pansuporta tan ayura. Sikato so mabiskeg met nen say too. Sikato so masebeg, maramsak, tan andian na prinsipyo; sikato si Satanas. (1 Pedro 5:8) Saray literal ya ayura ontan met ed kasiliban tan inkamataktika na too so agnikana sumpad sayan kabusol. (2 Corinto 10:4) Anto so nayarin usaren mo pian makapilaban ka?

Say manunan ayura et “say kampilan na espiritu, a sikato so salitay Dios.” (Efeso 6:17) Impabitar nen apostol Pablo no panon kaepektibo iya: “Say salita na Dios sikatoy mabilay tan mabiskeg, tan makdem nen say anggan dinan a kampilan a duara’y tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Hebreos 4:11, 12) Seguradon say makmakdem ya ayura, ya ontalos ed akindalem iran kanonotan tan motibo na indibidual so nepeg ya usaren tekep na dunong tan inkaasigta.

Nayarin kabat mo a say sakey ya armada so walaan na sankabaloan iran ayura, balet andi-kana iratan ya ayura no andian na dunong iray sundalo a mangusar ed saratan. Nakaukolan mo met so instruksion pian nausar mon epektibo so kampilan mo. Makapaliket ta walaray eksperiensyado lan mibabakal a makapangipasal ed sika. Tinawag nen Jesus irayan mibabakal a mangipapasal ed arum bilang “matoor tan makabat ya aripen,” ya angimatalkan na responsabilidad a mangitarya na nipanpanaon ya espiritual a tagano, odino instruksion, parad saray patumbok nen Jesus. (Mateo 24:45) Nabidbir mo iyan grupo na aripen diad pangusisa ed maseet a panangibangat da tan nipanpanaon a panamasakbay da nipaakar ed saray taktika na kabusol. Papaneknekan na ebidensya a saya so tugyopen na saray alanaan-na-espiritun membro na Kristianon kongregasyon na saray Tasi nen Jehova.​—Apocalipsis 14:1.

Sayan tugyop na aripen so aglambengat mangiiter na instruksion. Satan so mangipapatnag ed espiritu nen apostol Pablo, a nansulat ed kongregasyon ed Tesalonica: “Mauyamo kami ed pegley yo, a singa sakey a sigsiwa a managano na dilin anak to. Ontan mi met, maib-ibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” (1 Tesalonica 2:7, 8) Responsabilidad na kada Kristianon sundalo so pangikana ed maaron panangipasal a nitatarya.

Sankabukel a Kinlong

Say sankabukel a piguratibon kinlong so nitarya pian manprotekta ed sika. Sayan kinlong so nidatak diad Efeso 6:13-18. Say maalwar a sundalo so ag-ompawaypaway no anggapo odino aderal so arum ya espiritual a kinlong to.

Nakaukolan na sakey a Kristiano so kompleton makasalimbeng a kinlong to, balet nagkalautlan makana so baleg a kinlong na pananisia. Lapud satan, oniay insulat nen Pablo: “Nagkalalo et eegnaan yo so kinlong na pananisia, a sikato so nayarin pangerep yo naani ed saray amin a mandarlang a gayang na mauges.”​—Efeso 6:16.

Say baleg a kinlong, a makasakbong ed interon laman, so mangirerepresenta ed kalidad na pananisia. Nepeg moy nawalaan na mabiskeg a pananisia ed panangiwanwan nen Jehova, ya agmanduaruwa ya ontua so amin a sipan to. Nepeg a  moriaen mon singano asumpal la iratan a sipan. Agbalot panduaruwaan a magano lan naderal so interon sistema na mundo nen Satanas, a say dalin so magmaliw a paraiso, tan saray totoon matoor ed Dios so nipawil ed inkayadyari.​—Isaias 33:24; 35:1, 2; Apocalipsis 19:17-21.

Balet, diad peles a nikaduman pilalaban, wala ni so nakaukolan mo​—sakey a kaaro. Diad panaon na bakal, nababayuboan so maapit a pankakaaro legan a manpapasesegan tan manaagelan iray sundalo, a no maminsan et isalba ra ni ingen so sakey tan sakey ed ipapatey. Bangta papablien iray kaulop, nakaukolan moy mikaaro ed si Jehova a mismo pian makaliktar ka ed sayan pilalaban. Kanian sinampotan nen Pablo so impangidatak to ed saray kabiangan na kinlong ed oniaran salita: “Onkerew kayo ed espiritu ed amin a nengneng na pikakasi tan pikekerew ed amin a panaon.”​—Efeso 6:18.

Panliketan tayon tuloy a nakaiba so maapit a kaaro. Pirawrawat tayo so makapiulop ed sikato. Diad maparanay a pitongtong ed si Jehova diad pikakasi, sikato so magmaliw a peteg ed sikatayo, sakey a napanmatalkan a kaaro. Oniay impaseseg ed sikatayo nen babangatan a Santiago: “Singger kayo ed Dios, et sikato so onsingger naani ed sikayo.”​—Santiago 4:8.

Saray Taktika na Kabusol

Say pilalaban ed sayan mundo so magmaliw no maminsan a singa panaakar ed uma a walaray nikotkot a bomba. Nayarin onlesa so panangataki ed inerman a pasen, tan panggugunaetan na kabusol ya atakien ka ya agmo iilaloan. Balet, tandaan a si Jehova so mangitatarya ed amin a proteksion a nakaukolan mo.​—1 Corinto 10:13.

Nayarin getmaen na kabusol ya atakien ka diad pamikewet ed saray katuaan ed Biblia ya importante ed pananisiam. Saray apostata so nayarin mangusar na makaingganyo iran salita, panaglarog, tan pikewet a panagkatunongan pian taloen ka. Balet ta agnononoten na apostata so pankaabigan mo. Oniay inkuan na Uliran 11:9: “Say too ya andian na Dios [“apostata,” NW] bagbagen to ed sangi to so kaabay to; balet lapu ed pikakabat say matunong nilaban.”

Lingo so panisip a nakaukolan mo so ondengel ed saray apostata odino manbasa ed sulsulat da pian suppiaten iray argumento ra. Saray pikewet tan makasamal a panagkatunongan da so makaderal ed espiritual tan nayarin mandutak ed pananisiam a singa maples ya ikayat na gangrena. (2 Timoteo 2:16, 17) Imbes, aligen so inkiwas na Dios ed saray apostata. Oniay inkuan nen Job nipaakar ed si Jehova: “Say andian na Dios [odino apostata] a too ag-onla ed arap to.”​—Job 13:16.

Nayarin salien na kabusol so mangusar na duman taktika, samay sakey a medyo epektibo la. No say armada a manmamartsa so nasagyat a manbubuyak pian gegemtanen so mabanday tan imoral a kondukta, saya so pansengegan na gulo.

Say minumundon panagligliwaan, a singa say imoral iran pelikula tan saray palabas ed telebisyon tan maingal a musika, so epektibon tapang. Ibabaga na arum a nayarian da so manbantay na imoral iran eksena odino manbasa na imoral iran literatura ya ag-ira naapektoan. Balet oniay prangkan impatua na sakey a lakin maparanay a manbabantay na saray pelikulan mangipaparayag ed sekso: “Agmon balot nalingwanan iraman ya eksena, diad pannonot mo a lalo ed saraman et lalon nasagyat kan manggawa ed saraman ya  anengneng mo . . . Pannonoten ka na saray pelikula a talagan wala so bengatlan nasasaew mo.” Kasin maabig so pangipalaran moy inkasika a nasugatan lapud sayan masilib a panangataki?

Say sananey nin gayang ya uusaren na kabusol ed pangataki et say pananagyat na materyalismo. Nayarin mairap a natebek so kapeligroan lapud amin tayo so mankakaukolan na materyal. Nakaukolan tayo so ayaman, tagano, tan kawesen; tan aliwan mauges so pakawalaan na mararakep a kagawaan. Say kapeligroan et wala ed panmoria na sakey. Nayarin magmaliw a mas importante so kuarta nen saray espiritual a bengatla. Nayarin magmaliw itayon maaro ed kuarta. Nepeg tayon nodnonoten iray limitadon nagawaan na kayamanan. Satan so temporaryo, bangta saray espiritual a kayamanan so mansiansia lawas.​—Mateo 6:19, 20.

No abeba so moral na saray sundalo, dagdaiset so tsansa ran manalo. “No onkapuy ka ed agew na kasegsegang, say kasil mo sikato so melag.” (Uliran 24:10) Say pakadismaya et sakey ya ayura ya epektibon uusaren nen Satanas. Say pangisulong ed ‘sanib na ulo ya ilalo na kilalaban’ so ontulong ed sikan nalabanan so pakadismaya. (1 Tesalonica 5:8) Pansiansiaen a mabiskeg so ilalom a singa si Abraham. Kinmiwas a tampol si Abraham sanen kinerew ed sikato ya ibagat to so bogbogtong ya anak ton si Isaac. Sikatoy nanmatalek a sumpalen na Dios so sipan To a nabendisyonan so amin a nasyon panamegley na ilalak to tan sarag na Dios a paolien ed bilay si Isaac no nakaukolan ta pian nasumpal itan a sipan.​—Hebreos 11:17-19.

Ag-onsusuko ed Pibabakal

Nayarin onkesaw la so arum ya abayaglan mibabakal kanian sikara so agla milaban tekep na parehon inkamabantay. Say ehemplo nen Urias, ya asalambit diad gapo na sayan artikulo, so makatulong ed amin a mibabakal pian napansiansia ra so dugan panmoria. Dakel ed saray kapara tayon Kristiano a mibabakal so kaukolan a mansungdo ed saray kairapan, nidudunget ed saray kaatapan, odino mantetepel ed kaktelan tan eras. Singa si Urias, agtayo pipirawaten so pakainawaan a nayarin panggayagaan tayo natan odino manpilalek a nawalaan na komportablin bilay. Labay tayo so mansiansia ed sankamundoan ya armada nen Jehova a tugyopen na saray matoor a mibabakal tan mantultuloy ed pibabakal anggad napanggayagaan tayo so alay abig iran bendisyon a nitarya ed sikatayo.​—Hebreos 10:32-34.

Mapeligro so itunda tayon manbantay, a nayarin isipen tayon mabayag ni so unor a panangataki. Say ehemplo nen Arin David so mangipapabitar ed sayan kapeligroan. Lapud pigaran rason et sikatoy agkaiba na saray armada to ed bakalan. Bilang resulta, si David so akapanggawa na graben kasalanan kanian asagmakan to so ot-ot tan irap diad nakekeraan a bilay to.​—2 Samuel 12:10-14.

 Kasin makagunggona so pibiang ed sayan pibabakal, pangarap ed kairapan ed bakalan, pansungdo ed panagludlurey, tan ipaliis ed kuestionable iran panliliket ed mundo? Saraman so ontatalona ed pibabakal so onabobon ya ompatnag a makapasagyat so iyoopresi na mundo, a singano mankirkirlap, balet andian itan na kakanaan no maapit ya usisaen. (Filipos 3:8) Sakey ni, saratan a likeliket so mabetbet a mansusumpal ed pakasakitan tan pakadismaya.

Say Kristiano a wala ed sayan espiritual a pibabakal so manggayaga ed maapit a pililimog ed tuan kakaaro, malinis a konsiensia, tan makapakelaw ya ilalo. Iilaloan na saray alanaan-na-espiritun Kristiano so imortal a bilay diad tawen a kaibay Kristo Jesus. (1 Corinto 15:54) Iilaloan na karaklan ed saray Kristianon mibabakal so ayadyarin bilay diad sakey a mangaraldalin a paraiso. Segurado a saratan a premyo et mabmabli a tumang. Tan aliwan singa ed saray minumundon pambabakal, seguradon manbiktorya itayo ed sayan pibabakal daput no mansiansia itayon matoor. (Hebreos 11:1) Balet, sigpot a kadederal so pansumpalan na sayan sistema a walad panangontrol nen Satanas.​—2 Pedro 3:10.

Legan na pantutultuloy mon mibabakal, tandaan irayan salita nen Jesus: “Man-ilalo kayo’d siak tinalok so mundo.” (Juan 16:33) Sikatoy analo diad impantultuloy ton akabantay tan diad impanmatoor to ed silong na subok. Nagawaan tayo met so ontan.

[Blurb ed pahina 27]

Anggapo iray paltogan tan anggapo iray bomban ipepelag, balet nakaukolan nin siansia so estratehiya ed pibabakal

[Blurb ed pahina 30]

Seguradon manbiktorya itayo ed sayan pibabakal daput no mansiansia itayon matoor

[Litrato ed pahina 26]

Say pamulaw na kilalaban so ontulong ed sikatayon nalabanan so pakadismaya

Usaren so baleg a kinlong na pananisia pian samperen so “mandarlang a gayang”

[Litrato ed pahina 28]

“Singger kayo ed Dios, et sikato so onsingger naani ed sikayo”

[Litrato ed pahina 29]

Nepeg a nawalaan itayo na pananisia ed kasumpalan na saray sipan na Dios