Saray Bibii ya Amaliket ed Puso nen Jehova

“Si Jehova tumangan to so gawam, tan nasnaspot a gunggona so iter komon ed sika nen Jehova.”​—RUT 2:12.

1, 2. Panon itayon nagunggonaan no molimolien tayo iray ehemplo ed Biblia nipaakar ed saray bibiin amaliket ed puso nen Jehova?

 LAPUD takot ed Dios, agtinmulok so duaran bibii ed sakey a Faraon. Lapud pananisia, apakiwas so sakey a balangkantis a mangirisga ed bilay to pian protektaan so duaran Israelitan espiya. Lapud maong a pakatebek tan kapaabebaan sanen walay problema, nisalba na sakey a bii so bilay na dakel tan naamper to so nilanaan nen Jehova a mankasalanan ed dala. Lapud pananisia ed si Jehova a Dios tan inkamaparawes to, intarya na sakey a balo tan ina so nakekeraan lan tagano to komon parad sakey a propeta na Dios. Pigara labat iraya ed dakel a Makasulatan ya ehemplo na bibii ya amaliket ed puso nen Jehova.

² Say awawey nen Jehova ed saratan a bibii tan saray bendisyon ya impagamor to ed sikara so pakapatnagan a say manunaan a makapaliket ed sikato et say maespiritual a kalidades da, aliwan lapud ta laki odino bii ira. Diad sayan mundo natan a pirmin mangidadanet ed pisikal tan materyal a pamaakaran, sakey ya angat so pangiyuna ed espiritualidad. Balet ta nagawaan itan, a singa ipapatnag na minilyon a bibiin matakot ed Dios a manugyop ed baleg a kabiangan na totoo na Dios natan. Aaligen na saratan a Kristianon bibii so pananisia, maong a pakatebek, inkamaparawes, tan arum niran maabig a kalidad ya impatnag na matakot ed Dios a bibii ya asalambit ed Biblia. Siempre, labay met ya aligen na saray Kristianon lalaki iray kalidad ya impatnag na saratan a napanuliranan a bibii nensaman. Pian naamtaan no panon tayon gawaen itan ed mas malaknab a paraan, konsideraen tayo a mas detalyado iray salaysay na Biblia nipaakar ed saray bibiin asalambit ed gapo.​—Roma 15:4; Santiago 4:8.

Saray Bibiin Agtinmulok ed Faraon

3, 4. (a) Akin ya ag-inunor nen Sefora tan Pua so Faraon sanen ingganggan to iran mamatey ed amin a kapangiyanak a lalakin Israelita? (b) Panon so impanumang nen Jehova ed duaran manamianak lapud inkakpel tan maridios a takot da?

³ Diad saray bista ed Nuremberg, a ginawa ed Alemanya kayari na Guerra Mundial II, inkatunongan na dakel ya asentensiaan lapud palanit a panagpatey a saray krimen a ginawa ra et makasengeg ed impangunor da labat ed saray ganggan. Ikompara pa natan irayan indibidual ed duaran Israelitan manamianak, si Sefora tan Pua, a nambilay ed Ehipto nensaman legan na uley na sakey ya ag-abitla ed ngaran balet ta diktador a Faraon. Lapud natatakot so Faraon ed idarakel na saray Hebreo, ingganggan to so duaran manamianak a seguroen dan napatey so amin a kapangiyanak a lalakin Hebreo. Panon so inkiwas na sarayan bibii ed satan a marelmeng a ganggan? “Agda ginawa so unong na imbilin na ari’ Ehipto ed sikara, noag say binibilay da ingen so lalaki ya ugugaw.” Akin a sarayan bibii et agtinmakot ed too? Lapud “antakot da so Dios.”​—Exodo 1:15, 17; Genesis 9:6.

⁴ On, nanilalo irayan manamianak ed proteksion nen Jehova, tan bilang resulta et sikato so nagmaliw a “kinlong” da, a sinalimbengan to ira manlapud sanok nen Faraon. (2 Samuel 22:31; Exodo 1:18-20) Balet aliwan satan labat so bendisyon nen Jehova ed sikara. Tinumangan to si Sefora tan Pua a nawalaan na pamilya ran dili. Pinagalangan to ni ingen irayan bibii diad impangikurit to ed kangaranan tan ed saray ginawa ra diad apuyanan a Salita to pian nabasa na ontumbok iran kailalakan, bangta say ngaran na Faraon so aglan balot nanonotan.​—Exodo 1:21; 1 Samuel 2:30b; Uliran 10:7.

5. Panon ya ipapatnag na dakel a Kristianon bibii natan so awawey a singa impatnag di Sefora tan Pua, tan panon iran tumangan nen Jehova?

⁵ Wala ra kasi so bibii natan a singa si Sefora tan Pua? On, wala! Kada taon, nilibo ed saratan a bibii so andi-takot a mangipupulong ed manangiliktar-bilay a mensahe na Biblia diad daldalin a sebel itan lapud “ganggan na ari,” ya iririsga da so kawayangan da odino anggan say bilay da ni ingen. (Hebreos 11:23; Gawa 5:28, 29) Lapud panangaro ra ed Dios tan ed kapara ran totoo, ag-iyaabuloy na saratan a makpel a bibii ya amperen ira na siopaman ed pananginabang da na maong a balita na Panarian na Dios. Kanian, dakel a Kristianon bibii so mipupuligesgesan ed isusumpa tan panamasegsegang. (Marcos 12:30, 31; 13:9-13) Singa met si Sefora tan Pua, kabat a tuloy nen Jehova iray gawa na saratan a matalonggaring tan makpel a bibii, tan ipatnag to so panangaro to ed sikara diad pangikurit to ed kangaranan da diad “libro na bilay,” daput no manmatoor tan mansungdo ira anggad kasampotan.​—Filipos 4:3; Mateo 24:13.

Sakey a Datin Balangkantis ya Amaliket ed Puso nen Jehova

6, 7. (a) Anto so kabat nen Rahab nipaakar ed si Jehova tan ed totoo to, tan panon so inkaapektoan to ed satan a pikakabat? (b) Panon a pinagalangan na Salitay Dios si Rahab?

⁶ Nen taon 1473 K.K.P., walay sakey a balangkantis a manngaray Rahab a nambilay ed syudad na Jerico diad Canaan. Mapatnag, si Rahab so sakey a biin walaan na magenap a pikakabat. Sanen nanamot so duaran Israelitan espiya diad abung to, nisalaysay to ed sikara iray espisipikon detalye nipaakar ed mamilagron impaway na Israel manlapud Ehipto, anggaman satan so agawa 40 taon lay linmabas! Sikato met so mikabisado ed agano niran impanbiktorya na Israel ed Arari na saray Amorreo, a si Sihon tan Og. Imanoen pa so epekto ed sikato na satan a pikakabat. Oniay inkuan to ed saray espiya: “Amtak a si Jehova initer to ed sikayo so dalin, . . . ta si Jehova a Dios yo, so Dios ed tawen ed tagey, tan dia ed dalin ed leksab.” (Josue 2:1, 9-11) On, lapud pikakabat nen Rahab ed si Jehova tan ed saray ginawa to nisesengeg ed Israel, si Rahab so paborablin kinmiwas tan awalaan na pananisia ed Sikato.​—Roma 10:10.

⁷ Si Rahab so apakiwas lapud pananisia to. Inabrasa to iray espiya na Israel “ed kareenan,” tan inunor to iray manangiliktar-bilay a bilin da sanen nilusob na Israel so Jerico. (Hebreos  11:31; Josue 2:18-21) Anggapoy duaruwa a saray gawa na pananisia nen Rahab so amaliket ed puso nen Jehova, lapud pinuyanan To so Kristianon babangatan a si Santiago ya idatak so ngaran to kaiba so ngaran nen Abraham, a kaaro na Dios, bilang ehemplo ya aligen na saray Kristiano. Oniay insulat nen Santiago: “Ontan met, si Rahab a milalawanan agkasi apatunong lapu ed saray gawa to, nen inawa’to so saray imbaki tan pinapaway to’ra ed sananey a dalan?”​—Santiago 2:25.

8. Panon so impamendisyon nen Jehova ed si Rahab lapud pananisia tan katutulok to?

⁸ Si Rahab so tinumangan nen Jehova ed nanduruman paraan. Sakey la so mamilagron impangiliktar To ed bilay nen Rahab tan saramay nanamot ed ayaman to​—salanti, “say kaiba ed abung nen ama to, tan amin a wala ed sikato.” Insan inabuloyan To ira a manayam ed “pegley na Israel,” ya ipasen ira a singa kabiangan na nasyon. (Josue 2:13; 6:22-25; Levitico 19:33, 34) Balet ta aliwan satan labat. Pinagalangan met nen Jehova si Rahab diad impagmaliw ton inmunan ateng nen Jesu-Kristo. Agaylan makapasagyat a panangipatnag na maaron-panangasi ed sakey a Canaanita a datin managdayew ed talintao! *​—Salmo 130:3, 4.

9. Panon a say awawey nen Jehova ed si Rahab tan arum niran Kristianon bibii nen inmunan siglo so makapaseseg ed arum a bibii natan?

⁹ Singa si Rahab, say arum a Kristianon bibii, manlapud inmunan siglo anggad natan, so angitalirak la ed imoral a kabibilay da pian napaliket da so Dios. (1 Corinto 6:9-11) Anggapoy duaruwa ya arum ed sikara so nambilay ed kaliberliber a mipadpara ed kadaanan a Canaan, a kasmak so imoralidad tan ipapasen da ni ingen itan a normal labat. Ingen, pinasimbalo ra so daladalan da, apakiwas ira ed pananisia a nibase ed suston pikakabat ed Kasulatan. (Roma 10:17) Kanian, nibaga met a saratan a bibii et “ag-ira imbaing na Dios, a tawagen da bilang Dios da.” (Hebreos 11:16, NW) Agaylan panamagalang!

Abendisyonan Lapud Maong a Pakatebek To

10, 11. Antoran kipapasen a makalanor ed si Nabal tan David so amakiwas ed si Abigail?

¹⁰ Dakel a matoor a bibii nensaman so matalonggaring ya angipatnag na maong a pakatebek, a sengegay impagmaliw dan mabmabli ed imaton na saray totoo nen Jehova. Sakey ed saratan a bibii et si Abigail, ya asawa nen Nabal a mayaman ya Israelita a walaay maawang a dalin. Say maong a pakatebek nen Abigail so nanresulta ed inkasalba na dakel a bilay tan angamper ed si David, say arapen ya ari na Israel, diad pankasalanan ed dala. Nabasa tayo so nipaakar ed si Abigail diad salaysay a nikurit ed 1 Samuel kapitulo 25.

¹¹ Diad gapo na istorya, nankampamento si David tan saray bataan to diad asingger na saray pulok nen Nabal, a libren binantayan da itan ed agew tan labi lapud kaabigan da ed kapara ran Israelita a si Nabal. Sanen ngalngali la naupot so abasto di David, imbaki to so samploran kalangweran a lalaki pian onkerew na tagano ed si Nabal. Si Nabal natan so walaan komon na pankanawnawan mangipatnag na apresasyon to ed si David tan mamagalang ed sikato bilang nilanaan nen Jehova.  Balet ta duma so ginawa nen Nabal. Diad pirmin insanok to, ininsulto to si David tan paoypaoy ton pinasempet iray kalangweran a lalaki. Sanen naamtaan itan nen David, tinipon to so 400 ya armadon lalaki tan pinmikal pian ombales. Naamtaan nen Abigail so makapasulag ya inkiwas nen masiken to tan sikatoy tampol tan makabat a kinmiwas pian pakepaen so sanok nen David diad impangipawit to na dakel a tagano. Insan sikaton mismo so linma ed si David.​—Bersikulo 2-20.

12, 13. (a) Panon a pinaneknekan nen Abigail so maong a pakatebek tan katooran to ed si Jehova tan ed alanaan To? (b) Anto so ginawa nen Abigail sanen kasempet to, tan anto so nansumpalan na saray bengatla ed sikato?

¹² Sanen nabet nen Abigail si David, say mapaabeban inkerew to na panangasi so angipatnag na aralem a respeto to ed nilanaan nen Jehova. “Si Jehova tua a gawaen to so katawan ko a matalek ya abung, lapu ed say katawan ko mibakal ed saray bakal nen Jehova,” so inkuan to, insan inyarum to a turoen nen Jehova si David bilang lider na Israel. (Bersikulo 28-30) Ontan met, impatnag nen Abigail so inkakpel diad impangibaga to ed si David a say getma ton pangibales so mangitonton ed pankasalanan to ed dala, no agto itan napokpokan. (Bersikulo 26, 31) Amoria itan nen David lapud kapaabebaan, aralem a respeto, tan malinew a panag-isip nen Abigail. Oniay ebat nen David: “Bendito si Jehova, a Dios na Israel, ya angibaki ed sika ed sayan agew ya onabet ed siak: Et bendito so karunongan mo, tan bendito ka ya angiyagel ed siak ed sayan agew ed pankasalanan ed dala.”​—Bersikulo 32, 33.

¹³ Kasempet to, makpel a nanggunaetan nen Abigail ya ipaamta ed masiken to a pinalangkapan to si David. Balet, sanen kasabi to ed si Nabal, sikato so “abuek a tuloy.” Kanian inalagar ton naimangmangan si Nabal insan to imbaga. Antoy reaksion nen Nabal? Sikato so atalagnaw, a nayarin sengegan lay agto impakagalaw. Kayari na samploy agew, sikato so tinigway na Dios. Sanen naamtaan nen David so impatey nen Nabal, improponi to so pangasawa ed si Abigail, a mapatnag ya inrayew tan nirespeto ton maong. Inawat nen Abigail so inyopresi nen David.​—Bersikulo 34-42.

Sarag Yo Kasin Aligen si Abigail?

14. Antoran kalidad nen Abigail so labay tayon bayuboan ed mas malaknab a paraan?

¹⁴ Kasin natebek yo so pigaran kalidades nen Abigail a labay yo​—lalaki kayo man odino bibii​—a bayuboan ed mas malaknab a paraan? Nayarin pilalek yo so onkiwas a mas maalwar tan walaan na maong a pakatebek sano onlesa iray problema. Odino labay yo so mansalita ed kalmado tan makatunongan a paraan sano pirmi lay sanok na arum? No ontan, akin ta no ipikasi itan ed si Jehova? Insipan toy mangiter na kakabatan, pakatebek, tan abilidad na panag-isip ed amin ya ‘onkerew ed pananisia.’​—Santiago 1:5, 6; Uliran 2:1-6, 10, 11.

15. Diad antoran kipapasen a nagkalalon importante parad Kristianon bibii so pangipatnag na saray kalidad ya impatnag nen Abigail?

¹⁵ Saratan a maabig a kalidad so nagkalalo lan importante parad sakey a bii a walaan na agmananisian asawa a laki, ya agtanto odino agtalaga manutumbok ed saray prinsipyo na Biblia. Nayarin sikatoy mainum na alak. Komon ta manguman iratan a lalaki ed daladalan da. Ginawa la itan na dakel, lapud maumildin awawey, aralem a panagrespeto, tan masimpit a kondukta na kaasawaan dan bibii.​—1 Pedro 3:1, 2, 4.

16. Antokaman iray kipapasen ed ayaman, panon a nipatnag na Kristianon agin bii a mas papablien to so relasyon to ed si Jehova nen say antokaman ni?

¹⁶ Antokaman iray kairapan a kaukolan yon sungdoan diad ayaman yo, tandaan a si Jehova so lawas akaparaan ya ontulong ed sikayo. (1 Pedro 3:12) Kanian panggunaetan a pabiskegen so mismon espiritualidad yo. Manpikasi a nawalaan na kakabatan tan kalmadon puso. On, onapit ed si Jehova diad panamegley na regular a panagaral ed Biblia, pikakasi, panagdalepdep, tan pililimog ed saray kaparan Kristiano. Say aro nen Abigail ed Dios tan say awawey to ed alanaan a lingkor To so agnaapektoan na minumundon panmoria na masiken to. Sikato so kinmiwas unong ed saray matunong a prinsipyo. Anggan diad sakey a sankaabungan a say asawan laki so napanuliranan a lingkor na Dios, moriaen na  sakey a Kristianon asawan bii a nakaukolan toy mantultuloy a mansagpot pian pabiskegen tan pansiansiaen so mismon espiritualidad to. Tua, say masiken to so walaan na Makasulatan ya obligasyon a mangasikaso ed espiritual tan materyal a pankaukolan na akulaw to, balet diad kaunoran et say asawan bii so nepeg a manggunaet parad “dili a kilalaban [to] ed takot tan giwgiw.”​—Filipos 2:12; 1 Timoteo 5:8.

Sikatoy Akaawat na “Sakey a Tumang na Propeta”

17, 18. (a) Say balon bii ed Sarepta so nipaarap ed anton nikaduman subok ed pananisia? (b) Panon so inkiwas na balo ed kerew nen Elias, tan panon so impanumang nen Jehova ed sikato?

¹⁷ Say impangasikaso nen Jehova ed mairap-bilay a balo diad panaon nen propetan Elias so mangipatnag ya aapresyaen Ton tuloy iramay manusuporta ed tuan panagdayew lapud pangisasakripisyo ra ed inkasikara tan ed kaykayarian da. Lapud abayag a kelang diad panaon nen Elias, dakel so naapektoan na eras, pati say balo a bii tan say anak ton laki a manaayam ed Sarepta. Sanen say akeraan labat et say unor lan kanen da, walay sinmabin bisita​—si propeta Elias. Sikato so walaan na nikadkaduman kerew. Anggaman amta to so makapasinagem a kipapasen na bii, sikato so impailutoan ed bii na “melag a bibingka,” ya usaren to so akeraan lan larak tan arina to. Balet oniay inyarum nen Elias: “Onia so kuan nen Jehova, a Dios na Israel, Say kamaw na tapong agnabawasan, anggan say salongkit na larak ag-onkulang, angga ed agew a si Jehova manbaki na uran ed dalin.”​—1 Arari 17:8-14.

¹⁸ Panon so ikiwas yo ed ontan a nikadkaduman kerew? Say balon bii ed Sarepta, a mapatnag ya akabidbir ed si Elias bilang propeta nen Jehova, et “ginawa to so unong na kuan nen Elias.” Panoy inkiwas nen Jehova lapud inkamaparawes na balo? Sikato so mamilagron angitarya na tagano ed bii, say anak to, tan si Elias legan na kelang. (1 Arari 17:15, 16) On, inter nen Jehova ed balon bii ed Sarepta so “tumang na sakey a propeta,” anggaman sikatoy aliwan Israelita. (Mateo 10:41) Inrayew met na Anak na Dios iyan balon bii sanen sikatoy sinalambit to bilang ehemplo parad saray andiay-pananisian totoo a kabaleyan to, diad Nazaret.​—Lucas 4:24-26.

19. Diad antoran dalan a dakel a Kristianon bibii natan so mangipapatnag na awawey na balon bii ed Sarepta, tan panon so panmoria nen Jehova ed sikara?

¹⁹ Dakel natan a Kristianon bibii so mangipapatnag ed awawey na balon bii ed Sarepta. Alimbawa, kada simba et saray mabulos a Kristianon bibii​—a dakel ed saratan et mairap-bilay tan walaan na pamilyan asikasoen​—so manpaparawes ed saray managbiahen manangasikaso tan ed saray kaasawaan dan bibii. Arum so manginanabang na tagano ed saray lokal a sigpot-panaon a ministro, ontutulong  ed saray mankaukolan, odino diad arum a paraan et mangisasakripisyo ed inkasikara tan ed kaykayarian da pian suportaan so kimey na Panarian. (Lucas 21:4) Kasin naiimano nen Jehova iratan a panagsakripisyo? Segsegurado! “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—Hebreos 6:10.

20. Anto so konsideraen ed ontumbok ya artikulo?

²⁰ Nen inmunan siglo, walaray matakot ed Dios a bibii a walaan na pribilehyon manserbi ed si Jesus tan ed saray apostol to. Diad ontumbok ya artikulo, singbaten tayo no panon ya apaliket na sarayan bibii so puso nen Jehova, tan konsideraen tayo so ehemplo na bibii natan ya interon-kamarerwan manlilingkor ed si Jehova, anggaman ed mairap iran kipapasen.

[Paimano ed Leksab]

Bilang Panrepaso

• Panon ya apaliket na onggendan a bibii so puso nen Jehova?

• Sefora tan Pua

• Rahab

• Abigail

• Say balon bii ed Sarepta

• Panon a say pandalepdep ed saray ehemplon impatnag na sarayan bibii so ontulong ed sikatayon mismo? Iyilustra.

[Tepetepet Parad Panagaral]

 [Saray litrato ed pahina 9]

Dakel a matoor a bibii so nanlingkor ed Dios anggaman ed “ganggan na ari”

[Litrato ed pahina 10]

Akin a si Rahab et maabig ya ehemplo parad sakey a walaan na pananisia?

[Litrato ed pahina 10]

Antoran kalidad so impatnag nen Abigail a labay tayon aligen?

[Litrato ed pahina 12]

Dakel a Kristianon bibii natan so mangipapatnag ed awawey na balon bii ed Sarepta