Say Panmoria na Dios ed Saray Inaatey

TALAGAN makapagonigon so ipatey na sakey a pinabli. Say liknaan a singano walay kulang, inkabegtebegtew, tan say liknaan na pakaandi so pirmin tuloy. No ompatey so inad-aro na sakey a too et anggapo lay nagawaan to, kaunongan man karakel so kayamanan, pakayari, odino impluensya to, lapud anggapo so siopaman natan diad dalin a makapangipawil ed bilay na sakey ya inatey.

Anggaman ontan et miduma so panmoria na Manamalsa tayo ed saray bengatla. Lapud pinalsa to so inmunan too manlapud sapok na dalin, nayarian to met a bilayen so inatey a too. Satan so sengegan a momoriaen na Dios iray inaatey a singano mabilay ira. Onia so inkuan nen Jesus nipaakar ed saray inatey lan matoor a lingkor na Dios nensaman: ‘Mabilay iran amin nipaakar ed Dios,’ diad arum a panangibaga et amin na saray inaatey so mabilay ed panmoria na Dios.​—Lucas 20:38.

Sanen wadiad dalin si Jesus, sikatoy naikdan na pakayarin paolien iray inaatey. (Juan 5:21) Sirin, mipara so panmoria to ed panmoria nen Ama to nipaakar ed saray inatey a matoor. Singa bilang, sanen inatey so kaaro to a si Lazaro, onia so inkuan nen Jesus ed saray babangatan to: “Onla ak, pian sikato so liingen ko ed ugip.” (Juan 11:11) Diad panmoriay too et inatey la si Lazaro, balet parad si Jehova tan si Jesus, si Lazaro so nanaugip labat.

Diad uley na Panarian nen Jesus et walay “kioli ed bilay na saray matunong tan agmatunong.” (Gawa 24:15) Diad saginonor et makaawat iray apaoli na edukasyon manlapud Dios tan nawalaan ira na ilalo a makapambilay na andi-anggaan dia ed dalin.

On, say ipatey na sakey a pinabli so makapagonigon tan makapaermen a tuloy, tan nayari a manbayag itan ed loob na dakel a taon. Balet no moriaen tayo iray inaatey unong ed panmoria na Dios, sikatayoy naligliwan tuloy tan napano na ilalo.​—2 Corinto 1:3, 4.