Sano say Panagpulong so Nagkalautlan Makatantanda

“Mansasnit so petang na agew. Singano agmanampot so basbas ed kapalandeyan. Kayari min alampasan so amayamay a babeng, asabi min siansia so pegdat mi: say nisulinek a baryo. Say kesaw mi so asalatan na gayaga sanen tinmoktok kami ed sankaunaan a puerta tan sikami so ampetapetang ya inabrasa. Kayari na sanagew, nipalima mi lan amin so literaturan awit mi tan akapangigapo kami na pigaran panagaral ed Biblia. Magunaet iray totoo a makaaral. Natan et kaukolan lan onsempet kami, balet insipan min ompawil kami.”

SAY ontan iran eksperiensya so kaslakan la ed sakey a grupo na saray payunir a ministro diad Mexico. Sikaray determinado a maseseg a mibiang ed panumpal ed ganggan ya inter nen Jesu-Kristo ed saray babangatan to: “Sikayo so tasik . . . angga ed kasampotan na dalin.” (Gawa 1:8) Diad Mexico, saray espisyal a kampanya ed panagpulong​—a tatawagen a saray rota na payunir​—so inorganisa pian nasabi iray teritorya ya agniasain ed kongregasyon tan sirin et aliwan regular a napupulongan na maong a balita na Panarian na Dios. Kaslakan a sarayan teritorya et nisulinek tan mairap a nasabi. Tinulongan met iray walad nisulinek a kongregasyon a walaan na maaw-awang a teritorya a pulongan.

Pian nadetermina no antoran lugar ed bansa so sakopen na saray rota na payunir, inusisa na sangan opisina na saray Tasi nen Jehova iray pankaukolan na teritorya. * Kayarin agawaan iya, imbaki iray grupo na espisyal payunir pian pulongan so teritorya. Sikaray inikdan na saray luluganan a matukoy ed makitog tan nikutkutlaong iran karsada. Saray luluganan so onkakana met a simpenan na literatura tan ugipan sano nakaukolan.

Mabulos Iran Onkikiwas

Manlapu nen Oktubre 1996, inimbitaan met iray arum a managpulong na maong a balita a mibiang ed sayan kimey pian ibaan iray espisyal payunir. Saray manangipalapag na Panarian ontan met ed saray regular payunir a mabulos a manlingkor ed babaleg so pankaukolan, so akibiang ed kampanya diad nanduruman paraan. Saray arum so inyasain ed saray kongregasyon a nadalan na rota pian asikasoen so teritorya tan nabayuboan iray nalmon interesado. Dakel a kalangweran a manangipalapag tan payunir so angawat ed sarayan imbitasyon tan sikaray abendisyonan na makapaseseg a maong iran eksperiensya.

Alimbawa, si Abimael, a Kristianon kalangweran a walaan na atagey a sueldon trabaho diad sakey a kompanya na mobile-phone, so nandesisyon a mibiang ed panagpulong a kimey diad saraman ya arawdawin rehyon. Sanen naamtaan na saray amo to a sikato lay onekal, inyopresi ran itagey so posisyon tan sueldo to. Sikatoy dinesdes na saray katrabahoan to, ya ipipilit dan nikaduman pankanawnawa itan tan kakulangkulangan so agto pangawat ed satan. Balet, determinado si Abimael a suportaan so espisyal a kampanya na panagpulong diad loob na taloran bulan. Kayari ton nanggayagaan iyan serbisyo, nandesisyon si Abimael a mansiansia ni ed nisulinek a kongregasyon a baleg so pankaukolan parad saray manangipalapag na Panarian. Sikatoy walaan natan na melag a trabaho tan naaralan ton pasimplien so bilay to.

Diad sananey a kipapasen, si Julissa so kaukolan a manbiahe na 22 oras panamegley na bus pian makasabi’d asainmin to. Diad unor lan kabiangan na biahe to, agto nabotan so unor lan  bus ed saman ya agew. Balet, walay trak a mangipapatnubang ed saray trabahador. Nampakpel si Julissa tan akikasin milugan. Natalosan a sikatoy mapaga, lapud bukbukor to so bii ed limog na dakerakel a lalaki. Sanen sikatoy nampulong ed kalangweran a laki, naamtaan ton say laki so sakey a Tasi nen Jehova! “Likud ed satan,” so inkuan nen Julissa, “say drayber na trak et sakey manayan matatken ed kongregasyon ya akaasainan ko!”

Akibiang Iray Maedad la

Sayan aktibidad so aliwa labat a parad saray kalangweran. Si Adela, a maedad lan agin bii, so lawas mankaliktan a makapanpulong ed malaglaem a panaon. Sikatoy awalaan na pankanawnawa sanen naawat to so imbitasyon a mibiang ed sayan espisyal a panagpulong a kimey. Oniay insalaysay to: “Nanggayagaan kon tuloy so asainmin ko kanian inkerew ko ed saray matatken ed kongregasyon ya abuloyan da ak nin mansiansia. Maliket ak ta anggaman maedad ak la et mausar ak nin siansia parad si Jehova.”

Mipadpara, lapud apakiwas na pisasalamat ed si Jehova tan panangaro ed kaparan too, si Martha a 60 años la, so angigana na panaon pian mibiang ed kampanya. Diad impakaimano to a nairapan so grupo to a nasabi so amin a totoo lapud arawdawi tan agaylay irap na dalan ed teritorya, sikatoy angaliw na luluganan pian usaren na saray payunir. Lapud donasyon na sayan agin bii, mas dakel a teritorya so napupulongan tan nipapaamta so katuaan ed Biblia diad mas dakel a totoo.

Makapaligsay-puson Kiwas

Say kalat na saramay mibibiang ed sarayan espisyal a kampanya na panagpulong et pian ‘manggawa na babangatan.’ Diad sayan pamaakaran, saray resulta et ekselente. Saray totoon walad nisulinek so akaawat na manangisalbay-bilay iran katuaan manlapud Biblia. (Mateo 28:19, 20) Dakel so nigapon panangiyaral ed Biblia. Saraya so ikokondukta na saray manangipalapag ed lugar odino saray manag-ebanghelyo a nansiansia ed teritorya. Diad arum iran kipapasen, naorganisa iray grupo na saray manangipalapag, tan diad arum et aporma iray angkelag a kongregasyon.

Si Magdaleno tan saray kakaiba to so nambiahe panamegley na pampasahero a luluganan pian makakar ed saray nisulinek a teritorya ya akaasainan da. Diad dalan, inanamot da so pankanawnawan manpulong ed drayber. “Inkuan na samay laki ed sikami a nen imbeneg a simba, walaray dinmalaw a Tasi ed abung da legan a sikato so anggapo’d man. Sanen sinmempet, insalaysay na pamilya to ed sikato so nadngelan da.  Inkuan mi’d sikato ya aliwa kamin taga’d dia noagta nanlalapu kami’d nanduruman estado na bansa pian suportaan iyan espisyal a kampanya a panagpulong tan dili min gastos so pamasahe mi. Lapud mandinayew, inkuan na drayber a sikatoy manaral la na Biblia kaiba so pamilya to ed saman lanlamang a simba. Sikato ni ingen so sinmuporta ed kimey diad impangilibre to la ed pasahe mi.”

Pandinayewan met a maong nen Magdaleno so inkiwas na saray totoo a tubo ed kapalandeyan na Chiapas. “Naeksperiensya mi nen akulaw kon innabang so mensahe na Panarian ed grupo na 26 a kalangweran ya onaatendi ed Iglesia na Presbyterian. Amin da so mapetepet a tinmalineng ed loob na 30 minuto. Impaway da iray Biblia ra, tan akapantasi kami a maong ed sikara nipaakar ed saray gagala nen Jehova. Kaslakan a totoo so walaan na dili ran Biblia diad lenguahe a Tzeltal.” Nigapo so pigaran tuloytuloy a panagaral ed Biblia.

Kinmepa so Isusumpa

Walay sakey a komunidad ed Chiapas ya agni akadngel na mensahe ed Biblia diad loob la na duay taon makasengeg ed isusumpa na totoo. Naimano nen Teresa, sakey a sigpot-panaon ya ebanghelisador, a masuyat so arum iran Tasi a manpulong ed saman a baryo. “Nikelawan so amin lapud mabulos ya ondengel iray totoo. Kayari min nampulong, inmuran na biewbiew. Diad panaanap mi na siroman, akakar kami’d abung na sakey a maparawes a too a manngaran na Sebastián, ya amasirom ed sikami. Kaloob mi, tinepet ko no wala lay dinmalaw ed sikato. Sanen inkuan ton anggapo ni, sikatoy pinulongan ko tan nigapo so panagaral na Biblia diad impangusar ed libron Pikakabat a Mangitonton ed Andi-anggaan a Bilay. * Sanen asumpal kami, si Sebastián so akanangis ya akikasi’d sikami ya ompawil kami pian sikatoy iyaralan mi.”

Oniay inreport na sananey a grupo na saray payunir a dinmalaw ed Chiapas: “Diad tulong nen Jehova et maabig iray nansumpalan. Diad inmunan simba, akapangigapo kami na 27 iran panagaral; diad komaduan simba, inimbitaan miray totoo a manbantay na video a The Bible​—Its Power in Your Life. Anemaplo so nambantay. Labalabay na amin itan. Diad kaunoran, implano min igapo so inggrupon panagaral ed Biblia. Makasurprisa ta duaran grupo na panagaral so aporma ed satan a baryo.

“Kayari min kinimeyan iray niasain a teritorya, pinmawil kami ed baryo pian pasesegen iray interesado tan pian amtaen no anto la so agawa ed saray naorganisan grupo na panagaral ed Biblia. Inimbitaan mi ra ed mapublikon miting tan ed Panagaral na Panag-Bantayan. Balet, anggapoy maawang a pasen a napanmitingan. Samay toon angiyopresi ed abung to parad panagaral na  grupo so angituro ed beneg a sular to tan inkuan to: ‘Nayarin gawaen iray miting ed beneg a sular.’”

Diad saman a sampot-simba saray ondadalaw a payunir tan interesadon totoo so makulin tinmulong ya angiparaan ed sular pian nausar a panmitingan. Walay 103 ya inmatendi ed inmunan miting. Natan et 40 so iyaaralan na Biblia ed satan a baryo.

‘Makapalikliket ya Eksperiensya’

Likud ed impakawalaan na alay abig iran resulta diad panagpulong a kimey, saramay akibiang ed sayan panag-ebanghelyon kimey so agunggonaan a tuloy. Si María, sakey a kalangweran a payunir ya akibiang ed sakey ed sarayan kampanya, so angibalikas ed nalilikna to: “Makapalikliket iman ya eksperiensya lapud duaran rason. Pinmalalo so gayagak ed panagpulong a kimey, tan mas inmapit so relasyon ko ed si Jehova. Aminsan sanen onkakalab kami ed palandey, naknaksawan kami. Kayari min kinmerew na tulong nen Jehova, naeksperiensya mi so ibabaga na Isaias 40:29-31: ‘Saray manalagar ed si Jehova pasimbaloen to so biskeg da.’ Kanian akasabi kami diman tan niyaralan mi so totoo ya ampetapetang ya angabrasa ed sikami.”

Sananey nin kalangweran a payunir, a mantaon na 17 a si Claudia so nankuan: “Agunggonaan ak a maong. Naaralan ko so magmaliw a larino ed ministeryo, a panliliketan kon maong, tan saya so amakiwas ed siak a mangiletneg na espiritual iran kalat. Tinmakken ak met ed espiritual. Dati et si inak so manggagawa na amin parad siak diad abung. Natan, lapud dakel ya eksperiensya, nagmaliw ak a lalon responsable. Alimbawa, dati et mapili ak ed panangan. Balet natan ta kaukolan koy onadapta ed nanduruman kipapasen, agak la manrereklamo nipaakar ed nakan. Sayan nengneng na serbisyo so tinmulong ed siak a nabayuboan iray sankaabigan a pikakaaro. Inanabang mi so amin a walad sikami tan mantutulongan kami.”

Maliket a Panagani

Antoray resulta na sayan nikaduman sagpot? Diad gapo na 2002, manga 28,300 a payunir so akibiang ed sarayan rota na payunir. Akapangikondukta ira na masulok a 140,000 a panangiyaral ed Biblia, ya angusar na masulok a duaran milyon ya oras ed panagpulong a kimey. Pian natulongan so totoo a makaamta na katuaan ed Biblia, akapangipalima ira na ngalngali 121,000 a libro tan ngalngali 730,000 a magasin. Kaslakan la parad arum a payunir so pangikondukta na 20 odino masulok ni ya iyaaralan na Biblia.

Saramay makakaawat ed sayan kaabigan so misalsalamat a tuloy ed impansagpot pian nipasabi ed sikara so mensahe na Biblia. Anggaman mairap-bilay ira, ipapasoot na dakel ya awaten na saray manangipalapag iray donasyon da. Sakey a mairap-bilay a 70 años a bii so lawas walaay niyoopresi ed saray payunir ya ondadalaw ed sikato. No agda awaten itan, sikatoy onnangis. Sakey nin pamilya a mairap-bilay so angikuan ed saray manag-ebanghelyo a nan-iknol so nganak a parad sikara tan pinaskar da ran mangawat ed saray iknol.

Nagkalalo ed amin, impatnag na saraman a masimoon a totoo so tuan panangapresya ed saray espiritual a bengatla. Singa bilang, sakey a kalangweran a bii so manaakar a bukor ed loob na talora tan kapalduan oras pian onatendi ed saray Makristianon miting, agto ni asaew so anggan sakey ed saratan. Anggaman makapuy lay pueg to, sakey a maedad lan interesado a bii so nambiahe na duay oras pian mangawat na simbawa manlapud Biblia legan na dalaw na managbiahen manangasikaso. Arum ed saray ag-akapanaral so magunaet a manaral a manbasa tan mansulat pian nagunggonaan ira a nagkalalo manlapud edukasyon ed Biblia. Abendisyonan a maong iray sagpot da.

Diad libro a Gawa, deneskribe nen Lucas so pasingawey ya anengneng nen apostol Pablo: “Sakey a laki a taga Macedonia nanalagey ya akikasi ed sikato, a kuan to: Gala ed Macedonia et tulongan mo kami.” Mabulos si Pablo a tinmulok ed satan. Natan, diad ararawin pasen ed Mexico, dakel so kinmiwas a singa ontan, ya ilulugar day inkasikara a mangiyabawag ed maong a balita “angga ed kasampotan na dalin.”​—Gawa 1:8; 16:9, 10.

[Saray paimano ed leksab]

[Litrato ed pahina 9]

Dakel iray Tasi a taga Mexico ya akibiang ed espisyal iran kampanya ed panagpulong