Iner so Pakaromogan Mo na Tuan Espiritual Iran Kablian?

“NO tumboken mo so sakey a relihyon lapu labat ed tradisyon na pamilya, akin ya agpilien so Celtic a relihyon ya inagamil na saray inmunan atateng tayo 2,000 taon lay apalabas?” so malurey ya intepet nen Rodolphe. Satan ya ideya so panimisan na kalangweran a pangibabagaan to.

“Say relasyon ko ed Dios so importantin maong ed siak,” so inkomento nen Rodolphe. “Siak so kontran maong ed ideya a saray relihyoson sisiaen so nepeg a nipasoot ed siak panamegley na tradisyon, lapu labat ta saray membro na pamilyak a nambilay ed pigamplo odino nilasus ni ingen iran taon ed apalabas so angagamil ed sakey a relihyon.” Ninonot a maong nen Rodolphe iray bengatla; agto impasen iyan importantin pamaakaran bilang bengatlan atawir to labat.

Anggaman say pangipapabangon na relihyon ed saray kailalakan so onaabeba natan, say karaklan so siansian manutumbok ed relihyon na pamilya ra. Balet kasin naynay a duga so panumbok ed saray relihyoson kablian na atateng na sakey? Antoy ibabaga na Biblia?

Kayari na 40 taon ed desierto, si Josue, a sinmublay ed si Moises, so angidatak na pampilian ed arap na saray Israelita: “No isipen yo a mauges so panlingkor ed si Jehova, manpili kayo ed sayan agew no siopa so panlingkoran yo; no saray dirios a nanlingkoran na saray atateng yo a wala ra nensaman ed nibaliw na Ilog, odino saray dirios na saray Amorreo, a dia ed dalin da so panaayaman yo. Balet nipaakar ed siak tan say abung ko, manlingkor kami ed si Jehova.”​—Josue 24:15.

Sakey ed saray atateng a tinukoy nen Josue et si Tera, say ama nen Abraham, a nanayam ed syudad na Ur, a diad saman a panaon et naromog ed bukig na Ilog Eufrates. Agtanto tinukoy na Biblia so nipaakar ed si Tera, likud ed nibagan sikatoy nandayew ed arum a dirios. (Josue 24:2) Say ilalak ton si Abraham, anggaman andian na sigpot a pikakabat ed gagala na Dios, so mabulos ya ontaynan ed panaayaman ton syudad sanen ingganggan itan nen Jehova. On, pinili nen Abraham so relihyon a duma ed relihyon nen ama to. Lapud ontan so ginawa nen Abraham, sikatoy akaawat na saray bendisyon ya insipan na Dios ed sikato, tan sikatoy nagmaliw a too a bibidbiren na dakel a relihyon bilang “ama na amin a mananisia ed Dios.”​—Roma 4:11, Today’s English Version.

Paborabli met so impangisalaysay na Biblia ed istorya nen Rut, a nanlapuan a linya nen Jesu-Kristo. Si Rut, a Moabita ya akiasawa ed sakey ya Israelita, so abalo tan nipaarap ed sakey a pampilian: mansiansia ed mismon bansa to odino ompawil ed Israel kaibay katulangan ton bii. Diad impakaamta to ed superyor a kablian na panagdayew ed si Jehova no ikompara ed idolatroson panagdayew ya inagamil na atateng to, inkuan nen Rut ed katulangan ton bii: “Say baley mo sikato so baley ko tan say Dios mo, Dios ko.”​—Rut 1:16, 17.

Bilang komento ed kabaliksan na sayan  rekord ed kanon a Biblia, ipapaliwawa na Dictionnaire de la Bible a sayan salaysay so mangipapanengneng “no panon a say bii a nianak ed sananey a bansa, a nianak ed paganon totoo a kabusol tan kagula na Israel, . . . lapud aro to ed nasyon tan panagdayew ed si Jehova, so mapalar a nagmaliw a nanlapuan a linya na masanton Arin David.” Agmasuyat a pinili nen Rut so relihyon a duma ed relihyon na atateng to, tan bilang resulta na satan a desisyon, agamoran toy bendisyon na Dios.

Say salaysay nipaakar ed gapoan na Inkakristiano so mabitar a tuloy nipaakar ed saray rason no akin a saray babangatan nen Jesus so angikaindan ed relihyon na saray laki tan bai ra. Diad makatangguyor a panagsalita, inimbitaan nen apostol Pedro iray dumerengel to pian ‘nilaban manlapud sayan pikewet a kapolian’ diad pampataoli ra ed saray kasalanan da tan pampabautismo ed ngaran nen Jesu-Kristo. (Gawa 2:37-41) Sakey ed makatantandan tuloy iran ehemplo et si Saulo, sakey a Judion manamasegsegang ed saray Kristiano. Sanen walad dalan a mamaarap ed Damasco, anengneng toy sakey a pasingawey nen Kristo, a kayari na satan et nagmaliw a Kristiano si Saulo tan akabat bilang apostol Pablo.​—Gawa 9:1-9.

Karaklan ed inmuunan Kristiano so andian na ontan a nikadkaduman eksperiensya. Siansia, amin da so angikaindan ed balanglan Judaismo odino panagdayew ed nanduruman paganon dirios. Saraman so angawat ed Inkakristiano so nanggawa ed satan diad sigpot a pikakabat ed saray katuaan, mabetbet a kayari na andukey a diskusyon nipaakar ed betang nen Jesus bilang Mesias. (Gawa 8:26-40; 13:16-43; 17:22-34) Saraman ya inmuunan Kristiano so malinew ya apakabatan ed pankaukolan a manggawa na pananguman ed kabibilay da. Say imbitasyon so niiter ed amin, diad saray Judio tan aliwan Judio, balet say mensahe so siansian pareho. Pian napaliket so Dios, nakaukolan so panumbok ed balon nengneng na panagdayew, salanti say Inkakristiano.

Sakey a Pili a Makabaliksan ed Sikatayo

Seguradon kinaukolan so inkakpel nen inmunan siglo pian ipulisay so relihyoso iran tradisyon na pamilya​—Judaismo, panagdayew ed emperador, panagdayew ed saray paganon dios​—tan mibiang ed relihyon a minelmelag na saray Judio tan Romano. Ag-abayag, sayan pili so nansumpal ed pirmin panamasegsegang. Natan, kaukolan so mipadparan pakpel pian ipulisay so “pakapilanor tan kigalet ed onkakasmak ya impluensya na piabobon,” unong ya impaliwawa nen Hippolyte Simon, Katolikon obispo na Clermont-Ferrand, ed libro ton Vers une France païenne? (Say Inka-pagano na Pransya?) Kakaukolanen so pakpel diad pakapilimog ed melag a relihyoson grupo a no maminsan et balbalawen, salanti, saray Tasi nen Jehova.

Si Paul, sakey a kalangweran a taga-Bastia, Corsica, a binmaleg ed Katolikon relihyon, so sagpaminsan ya akibiang ed saray aktibidad ed simbaan, a singa say panaglakoy bibingka pian makatipon na kuarta a parad pananulong ya organisasyon na Katoliko. Lapud labay toy nawalaan na magmaong a pakatalos ed Biblia, sikatoy inmabobon parad regular a diskusyon ed saray Tasi nen Jehova. Asabi panaon, amoria to a say naaaralan to so pakagamoran to na magnayon iran gunggona. Bilang resulta, sigpot ya inawat nen Paul iray kablian na Biblia tan nagmaliw a sakey ed saray Tasi nen Jehova. Nirespeto na atateng to so pili to, ya ag-angapekta ed maapit a siglaotan da bilang pamilya.

Si Amélie so manaayam ed abalaten a Pransya. Saray membro na pamilya to et Tasi nen Jehova diad apalabas lan apatiran henerasyon. Akin a pinili ton awaten iray relihyoson kablian na atateng to? “Aliwan lapud ta Tasi nen Jehova iray atateng mo odino lakim tan baim kanian sakey ka met la ed saray Tasi nen Jehova,” so inkomento to. “Noagta nasabi panaon et ikuan mo ed inkasika,  ‘Relihyon ko itan lapud saratan so sisiaen ko.’” Singa ed dakel ya arum nin kalangweran iran Tasi nen Jehova, amta nen Amélie a say putel a relihyoso iran sisiaen to so mangiiter ed sikato na gagala ed bilay tan lapuan itan na magnayon a liket.

No Akin ya Awaten so Maridios Iran Kablian

Say libron Uliran, ed kapitulo 6, bersikulo 20, so mamapaseseg ed saraman so malabay a mamaliket ed Dios: “Ana’ko, unoren mo so ganggan na amam, tan agmo ikaindan so tunong nen inam.” Imbes ya irekomenda so pagmaliw a tuloktulok, say ontan a konseho so mamapaseseg ed saray kalangweran a mangawat ed maridios iran estandarte diad pamabiskeg da ed pananisia ra tan diad italindeg dan dili ed dapag na Dios. Inimbitaan nen apostol Pablo iray kapanaonan to a “seguroen so amin a bengatla,” pian imanoen no kasin say nibabangat ed sikara et mitunosan ed Salita na Dios tan ed linawa To, tan pian onkiwas ira unong ed satan.​—1 Tesalonica 5:21, NW.

Balanglan binmaleg ed sakey a Kristianon sankaabungan odino andi, say masulok ya anemiran milyon a Tasi nen Jehova, kalangweran man o matatken so nanggawa na ontan a desisyon. Diad panamegley na maalwar a panagaral ed Biblia, aromog da so napanmatalkan iran ebat ed saray tepet da nipaakar ed gagala na bilay tan naawat so malinew a pakatalos ed linawa na Dios parad katooan. Diad impakagamor ed sayan pikakabat, inawat da iray kablian na Dios tan gagawaen day anggaay nayarian da pian gawaen so linawa na Dios.

Balanglan regular kan manbabasa ed sayan magasin odino andi, akin ya ag-awaten so opresi na saray Tasi nen Jehova ya ontulong ed sikan anapen ed Biblia tan usisaen iray espiritual a kablian. Diad onian paraan, nayarian mon ‘tawayan tan nanengneng a si Jehova so maong’ tan makagamor na pikakabat a, sano agamilen et mangitonton ed andi-anggaan a bilay.​—Salmo 34:8; Juan 17:3.

[Litrato ed pahina 5]

Apatiran kailalakan na sakey a pamilya na saray Tasi nen Jehova diad Pransya

[Litrato ed pahina 7]

Pinili nen Rut so manlingkor ed si Jehova imbes a diad saray dirios na saray laki tan bai to