Maliket Da Kan Iimbitaan

SAY Pangdem na Katawan, ya inletneg nen Katawan a Jesu-Kristo manga 2,000 a taon lay apalabas, et aliwa labat lan ebento ed awaran a paninteresan. Satan so walaan na mabiskeg ya epekto ed totoo nanlapu la’d inkiletneg to. Lapud atenyeg so kapusoan na dakel a totoo diad saray abasa ran salaysay ed Ebanghelyo nipaakar ed agawa ed saman a labi, panggugunaetan dan seselebraan so Pangdem na Katawan diad nanduruman paraan.

Natalosan iya, lapud ingganggan a mismo nen Jesu-Kristo iray patumbok to a selebraan iyan ebento tan gawaen da itan a regular. Espesipikon inkuan to ed sikara: “Gawa yo’ya a pakanodnonotan ed siak.”​—Lucas 22:19; 1 Corinto 11:23-25.

Siempre, pian peteg a makagunggona so selebrasyon, kaukolan a say sakey so walaan na suston pakatalos ed kabaliksan na satan, unong a naromog ed Salita na Dios, say Biblia. Niarum ni, importante ya amtaen so ibabaga na Biblia nipaakar ed no kapigan tan no panon a selebraan so ebento.

Bilang katutulok ed ganggan nen Jesus, saray Tasi nen Jehova ed interon mundo so mandaragup diad labi na Mierkoles, Abril 16, 2003, pian nodnonoten so impatey nen Jesus. Satan so okasyon pian sikaray mangusisa ed Kasulatan tan mamasimbalo ed pananisia tan aro ra ed Katawan a Jesu-Kristo, ya angikuan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Maliket da kan iimbitaan a midagup ed sikara ed satan a labi pian napabiskeg met so pananisiam tan panangarom ed si Jesu-Kristo tan ed say mangatatawen ya Ama, si Jehova a Dios.