Panisia ed Sakey a Dios a Nayarin Agtayo Kabat

DUARA ed kada taloran totoo ed Alemanya so manisia ed Dios. Balet, sanen tinepetan so masulok a sanlibon totoo no panon dan deskribien so Dios a papanisiaan da, nanduruma lawarin amin so ebat da. “Nanduruma iray ideya na saray Aleman nipaakar ed Dios no panon a nanduruma met iray totoo a mismo,” so inreport na peryodikon magasin a FOCUS. Anggaman maabig so panisia ed Dios, agta makapaermen a sikatoy papanisiaan balet ta agkabat no anton klase a Dios?

Sayan agpakaseguro nipaakar ed inkapersona na Dios et aglabat naiimano diad Alemanya; wala met itan ed arum a bansa ed Europa. Ipapatnag na impansurbi diad Austria, Britanya, tan Netherlands so malaknab a panisia a say Dios so “atagey a pakayari odino agnadeskribin sekreto.” Nagkalautlan ipapasen na saray kalangweran, tan anggan saramay manisia ed Dios, a sikato so misteryo.

Kasin Kabkabat Mon Mismo so Dios?

Baleg so pandumaan na kabat-kabaten so sakey tan kabkabat a mismo so sakey. No kabat-kabaten mo so sakey, bastam labat amta a sikatoy mabilay, a singa bilang, say manuley a walad arawi, say maong ya atleta, odino sakey ya artista. Balet, no kabkabat mon mismo so sakey, nagkalalo ni so nalalanor. Lalanoren na satan so pagmaliw a pamilyar ed ugali, walna, liknaan, saray labay tan agto labay, tan saray plano to ed arapen. Say pakapikabat a mismo ed sakey so mangilukas ed pankanawnawa a nawalaan na maapit a relasyon ed sikato.

Amoria na nilasus nilibon indibidual ya aliwan magenap so pakawalaan labat na samet ya ideya nipaakar ed Dios odino basta amta dan wala so Dios. Sikaray kinmiwas diad impangabat a maong ed Dios. Kasin nalmoan dan makagunggona itan? Sakey a lakin manngaran na Paul, a manaayam ed bandad amianen ya Alemanya tan dati et basta manisia labat ed Dios, so nandesisyon a kabaten a maong so Dios. Oniay insalaysay nen Paul: “Mankaukolan na panaon tan sagpot so pakapikabat a maong ed Dios, balet saray resulta so makagunggona. Say maapit a relasyon ed Manamalsa so mamapaaligwas ed inagew-agew a kabibilay.”

Kasin makagunggona so pangipanaon tan pansagpot diad pangabat a maong ed Dios? Ipangasin basaen so onsublay ya artikulo.

[Blurb ed pahina 3]

Baleg so pandumaan na kabat-kabaten so sakey tan kabkabat a mismo so sakey