Tepetepet Manlapud Saray Managbasa

Antoy labay ya ibaga nen Pablo sanen inkuan ton: “Kapag no kanen yo so saya a tinapay, tan inuman yo so kopa”?

Diad panutukoy ed impangiletneg ed Memoryal na impatey nen Jesus, insulat nen Pablo: “Kapag no kanen yo so saya a tinapay, tan inuman yo so kopa, ipakabat yo so impatey na Katawan angga ed isabi to.” (1 Corinto 11:25, 26) Ipasen na arum a say salita dia a “kapag no” so mangipapabitar a say impatey nen Kristo so nepeg a selebraan a mabetbet, diad pantalos a maminpigapiga. Kanian, seselebraan da itan a mabetbet imbes a maminsan ed sakey taon. Kasin ontan so labay ya ibaga nen Pablo?

Ngalngalin 2,000 taon la natan nanlapula’d inggapo nen Jesus so Memoryal na impatey to. Sirin, say panselebra ed Memoryal anggan maminsan ed sakey taon et kabaliksan ton mabetbet a sinelebraan la itan nanlapula nen 33 K.P. Balet, diad konteksto na 1 Corinto 11:25, 26, say sisingbaten nen Pablo et aliwan no panon kabetbet, noagta no panon so nepeg a pangiselebra ed Memoryal. Diad orihinal a Griego, agto inusar so salitan pol·laʹkis, a kabaliksan toy “naynay” odino “mabetbet.” Noagta, inusar toy salitan ho·saʹkis, a kabaliksan toy “kapag no,” bilang idyom a mankabaliksan na “kapiganman,” “kada.” Say ibabaga nen Pablo et: ‘Kada gawaen yo iya, ipapakabat yo so impatey na Katawan.’

Kaunongan kabetbet sirin so nepeg a panselebra ed Memoryal na impatey nen Jesus? Matukoy a selebraan itan a maminsan ed kada taon. Satan so peteg a memoryal, tan saray memoryal so kaslakan a seselebraan a tinaon. Niarum ni, inatey si Jesus diad agew na Judion Paskua, a ginawa a maminsan ed sakey taon. Matukotukoy, sinalambit nen Pablo si Jesus bilang ‘Kristo a paskua tayo,’ lapud say masakripisyon impatey nen Jesus so angilukas na dalan a mamaarap ed bilay parad espiritual ya Israel, singa say inmunan bagat ed Paskua so angiliktar ed panguloan na saray Israelita diad Ehipto tan angilukas na dalan parad kibulos ed inkaaripen na nasyon. (1 Corinto 5:7; Galacia 6:16) Sayan pisiglaotan ed tinaon a Judion Paskua so nagkalalon paneknek a say Memoryal na impatey nen Jesus so nepeg a selebraan a maminsan labat ed sakey taon.

Sakey ni, insiglaot nen Pablo so impatey nen Jesus ed sananey a tinaon a Judion piesta, say Agew na Pananakbong. Onia so nabasa tayo ed Hebreos 9:25, 26: “Agmet nakaukolan ya isaklang [nen Jesus] so inkasikaton dili ed maminpigapiga: a singa say sankatageyan a saserdote ya onloob ed masanton pasen ed tinaon-taon [ed Agew na Pananakbong] a mangyakar na sananey a dala. . . . Balet natan aminpinsan, lambengat angga ed kasampotan na saray taon sikato so nipatnag pian gawaen to so kabagbag na kasalanan lapu ed panamegley na inkibagat na inkasikaton dili.” Lapud sinalatan na bagat nen Jesus so tinaon a bagat no Agew na Pananakbong, say Memoryal na impatey to so dugan seselebraan a tinaon. Anggapoy Makasulatan a rason pian selebraan so Memoryal a mas mabetbet ni nen say satan.

Mitunosan ed saya, inreport na manag-awaran a si John Laurence von Mosheim a nipasal iray komaduan-siglon Kristiano ed Asia Minor a manselebra ed Memoryal na impatey nen Jesus “diad koma labin-apat ya agew na unonan Judion bulan [a Nisan].” Dia lambengat ed saginonor iran taon a nagmaliw a kustombre ed Kakristianoan so panselebra ed satan a mas mabetbet nen say maminsan ed sakey taon.