Saray Sagpot a Mangiyalibansa ed Maabig Iran Estandarte ed Moral

Diad pansamposampot na 2001, nadngel na saramay onderengel ed interon bansan broadcast na Radio Mozambique iyan pakabat:

“Pinasyar na presidente na Republika iray sangan pasilidad na Tastasi nen Jehova diad Maputo. Pinaseseg to iyan relihyoson kongregasyon a pansagpotan dan maong ya iyalibansa so maabig iran estandarte ed moral diad limog na pamilya tan diad pakapan-aral na saray wala la’d edad panamegley na saray programa ed pakapanbasa tan pakapansulat. Ngalngalin 10,000 a totoo so agunggonaan la ed sarayan programa. Unong ed si Presidente Chissano et nakomendaan so oniaran programa, ta saratan so pirmin makatulong ed komunidad diad panolbar ed saray problema ed edukasyon ya aarapen ni na sayan bansa.”

Intuloy ni so pakabat diad onggendan a nirekord a segek ed impansalita na presidente: “Makapaseseg ed sikatayon nanengneng a dakel so totoon interesado ed pakapanbasa tan pakapansulat. Ipapatnag na satan ed sikatayo a saray ordinaryon ombaley so makatulong ed sikatayo pian ondakel so makabasa tan makasulat. Kanian, labay kon ipaseseg ed saray Tastasi nen Jehova a palaknaben iray programa ra ed pakapanbasa tan pakapansulat ed dinanman a lenguahe. Say talagan importante et say pakapanbasa tan pakapansulat pian mainomay a makapantatalosan so totoo tan diad arapen et makapanaral a nagkalalo.”

Saray Tastasi nen Jehova ed Mozambique so manbabangat na pakapansulat tan pakapanbasa diad 850 a pasen ed bansa ta pian nabasan mismo na totoo so Salitay Dios. Niarum ni, walay manga 50,000 a libren iyaaralan da na Biblia ed abung kada simba. Amin na saya so kabiangan na sankamundoan a programa na panagaral ed Biblia a wala la natan ed 235 a bansa. (Mateo 24:14) Nagunggonaan kayo met ed sayan programa. Ipangasin mitongtong kayo ed saray Tastasi nen Jehova ed lugar yo.