Panangigloria ed Dios Diad Saray Palandey ed Pilipinas

No iisipen mo a say Pilipinas et sakey ya islan nasyon, agka alingo. Balet sakey met itan a bansan walaan na makapadinayew iran palandey. Parad Tastasi nen Jehova et mas mainomay tan epektibo so panagpulong diad saray syudad tan patar a lugar. Balet, duma so kipapasen ed pinmapalandey iran rehyon.

SAY mararakep a palandey ed bansa so midumaan a tuloy ed mabuer a kadayatan, saray coral reef, saray baryon dakel so sira, tan maaligwas a balbaley na saray patar ya isla. Saray palandey met so makapaangat a babeng ed panangipulong na “maong a balita” na Panarian na Dios.​—Mateo 24:14, NW.

Naromog iray Isla na Pilipinas diad pasen a mantupaan so duaran tectonic plate. Say kinmukutlaong a dalin ed sayan lugar so amawala na mapareng a pukpukdol diad maaawang ya isla. Naromog so masulok a 7,100 ya isla a manitibukel ed Pilipinas diad mamasagur ya arko na Pacific Ring of Fire. Kanian, saratan so atayek na saray bolkan, ya onaarum ed katitibukel na nipalpalandey a dalin. Satan a nipukpukdol a pasen so sengeg na inkisulinek na saray totoo’d palandey. Mairap so pakasabi ditan lapud pigpigara labat iray karsadan nadalan na luluganan.

Anggaman ed sarayan babeng, momoriaen na saray Tastasi nen Jehova so pankaukolan a nasabi so “amin a totoo.” (1 Timoteo 2:4) Kanian, mankikimey iray Tastasi ed Pilipinas a mitunosan ed mensahe na Isaias 42:11, 12: “Mankanta komon so saray taga Sela, oneyag ira komon ed liket a manlapu ed toktok na saray palandey. Mangiter ira komon na galang ed Jehova, tan ipaliwawa ra so galang ed saray pulpulo.”

Say pirmi iran sagpot pian pulongan so totoo ed kapalandeyan so ginmapo ed apalabas lan 50 a taon. Kayari na Guerra Mundial II, tinmulong iray misionaryo pian onabanti so kimey. Dakel a manaayam diman so anayakup ed katuaan na Biblia tan, insan, tinmulong met ya angikayat ed sayan katuaan diad saray baryo ed toktok na saray palandey. Angitonton iya ed maabig iran resulta. Alimbawa, diad kapalandeyan ed Cordillera Sentral diad mamaamianen na Luzon et wala lay masulok a 6,000 a manangipalapag na maong a balita. Maslak ed sikara et totoon nianak ditan, laktip iray Ibaloy, Ifugao, tan Kalinga.

 Anggaman ontan, wala nin siansia iray mairap-a-nasabin lugar diad saray palandey. Ag-alingwanan iray manaayam ditan. Panon ya asabi so arum ed sikara, tan panon so inkiwas da?

Sinalatan na Puron Pananisia so Tradisyon

Diad mamaamianen ya isla ed Luzon, saray kapalandeyan a lugar ed probinsya na Abra so panaayaman na saray Tinggian. Nayarin nanlapu iyan pananawag ed kadaanan a salitan Malay a tinggi, a kabaliksan toy “palandey.” Talagan matukotukoy! Tatawagen met na totoo so inkasikara tan say lenguahe ra bilang Itneg. Sikaray manisia ed sakey a dios a manngaray Kabunian, tan saray anito so pirmin mangiimpluensya ed inagew-agew a panagbilay da. Alimbawa, no binmasis so sakey a toon plano to so onla ed sananey a pasen, satan so mauges a signos. Nepeg toy manalagar na pigaran oras pian naandi so mauges ya epekto.

Nen 1572 et inloob na saray Kastila so Katolisismo, balet sinmaew iran ibangat so puron Inkakristiano ed saray Tinggian. Saramay nagmaliw a Katoliko so ag-angipulisay ed sisiaen da nipaakar ed si Kabunian tan tinumbok da iray abangonan dan kustombre. Say suston pikakabat nipaakar ed Biblia so primeron akasabi ed sarayan totoo nen dekada 1930 sanen inggapo na saray Tastasi nen Jehova ya ikayat so mensahe na Panarian ed saraman a palandey. Nanlapu la’d saman et saray masimoon a Tinggian so ginmapon mangiglogloria ed si Jehova “manlapu ed toktok na saray palandey.”

Alimbawa, si Lingbaoan et sakey a datin uloen na tribu a rerespetoen ed lugar da. Sikatoy aktibon tuloy a mibibiang ed kultura na Tinggian. “Sitotoor kon tinumbok iray tradisyon na Tinggian. No walay sakey a toon pinatey, sikami so mansayaw kayari na ponpon, tan mantogtog kami na saray gong [o kulintang]. Mangibabagat kami met na ayayep. Manisia kami ed kinen Kabunian, tan agko kabat so Dios diad Biblia.” Oniay inkuanto anggaman diad tua et sikatoy mankuan a Katoliko.

 Saray ministro na Tastasi nen Jehova so linman nampulong ed satan a lugar. Akabat da si Lingbaoan tan sikatoy pinaseseg dan manbasa na Biblia. Oniay nanonotan to: “Say Biblia so akakombinse ed siak a si Jehova so tuan Dios.” Kanian, sakey a Tasi so angiyaral ed sikato na Biblia, tan nandesisyon si Lingbaoan a manlingkor ed tuan Dios. Tinaynan to so datin paraan na kabibilay to, pati say posisyon to bilang lider na tribu, a gapoan la na insanok na pari ed lugar da tan saray datin kalimog nen Lingbaoan. Anggaman ontan, determinado si Lingbaoan a manumbok ed saray katuaan ya aromogan to ed Biblia. Sikato la natan so manlilingkor bilang sakey a matatken ed kongregasyon.

Pitoran Agew tan Anemiran Labi

Anggaman arum a pasen ed Abra so regular la natan a makakarengel ed maong a balita, arum so nisulinek tan mataltalag labat a napulongan. Pigaran taon lay apalabas et nansagpotan so pakasabi diad sakey ed sarayan lugar. Sakey ya ulop na 35 a Tastasi so linman nampulong ed agnasasabin teritorya diad Tineg, Abra, sakey a pasen ya agni nakar ed loob na 27 a taon.

Sayan impanbaroy pian manpulong so ginawa panamegley na akaran, a binmayag ed pitoran agew. Isipen pa so ibeltang ed akabitin iran taytay tan araralem ya ilog tan pigaran oras ya ikalab-kalab ed pukpukdol a sankabitbit iray suplay​—pian nipulong labat so maong a balita ed saramay matalag a makadngel ed satan! Diad loob na anemiran labi a pambabaroy, amipat so inyugip ed pataktak a palandey.

Anggaman saray maan-anos a Tastasi a kaiba ed panagbaroy so angawit na pigaran nakan, ag-ira makapangawit na magenap parad interon biahe. Anggaman ontan, aliwa iyan problema lapud malikeliket iray totoo a mangisalat na tagano parad nibase’d-Biblia iran publikasyon. Makakaawat iray Tastasi na dakel a bungay tanaman, sira, tan karne na ulsa. Anggaman walay pigaran kairapan et oniay inkuan na ulop: “Sarayan impansakripisyo so asalatan na manleppuan gayaga a naeksperiensya mi.”

Legan na pitoy agew, sarayan ministro so akapanpulong ed samploran baryo, akapangipalima na 60 a libro, 186 a magasin, tan 50 a brosyur, tan dakel a tract. Nidemostra ra so panangiyaral na Biblia ed 74 a grupo na totoo. Diad baley na Tineg, agawa so miting ed kongregasyon ya inatendian na 78, lapud kerew na saray lokal ya opisyal tan pigaran dederlengen a mibabaley. Maslak ya inmatendi et saray managbangat tan pupulis. Komon ta dakel nin Tinggian so mibiang ed saraman so ‘mankakanta’ tan mandadayew ed si Jehova manlapud toktok na saray palandey.

Bengatlan Magmaong Nen Say Balitok

Diad mas arawin abalaten na Pilipinas et walaray islan akaromogan na saray Kastila na balitok. Saya so nanlapuan na ngaran a Mindoro, say pinatikey a salitan Español a mina de oro, odino “minaan na balitok.” Balet walay bengatlan naroromogan natan a magmaong nen say balitok diad saraman ya isla​—totoo a malabay a manlingkor ed tuan Dios, si Jehova.

Manga 125,000 a totoon tubo diman a tatawagen a saray Mangyan so manaayam ed pegley na nisulinek a takel ed Mindoro. Simpli so panagbilay da, a kaslakan et sikara labat so manmomogel, tan wala so dilin lenguahe ra. Maslak et ondadakmomo ira ed ayayep tan dakel a dirios, tan manisia ra ed nanduruman espiritu ed palsa.

Sagpaminsan, sano onkulang ira na tagano  odino arum nin nakaukolan, onlalasor so indibidual iran Mangyan ed saray gilig na dayat pian mananap na trabaho. Onia so kipapasen nen Pailing, a nanlapud abebbeban grupo na saray Mangyan a tatawagen a Batangan. Sikatoy binmaleg ed limog na katribu to diad katakelan na palandey, tan sinmuporta ed sisisiaen tan agagamil na Batangan. Kaslakan et sikaray akabeel lambengat. Pian naseguroy maong ya ani, kakaukolanen ed tradisyon na Batangan a saray managdayew so mamakger na manok tan ipatedter da so dala ed danum leleg dan mandadasal.

Agla tutumboken nen Pailing iratan a tradisyon. Akin ya andi la? Sanen sikatoy linmasur ed saray patar, sikatoy akaromog na trabaho ed saray pamilya na Tastasi nen Jehova. Inanamot na sakey ed sarayan pamilya iyan kipapasen pian nipaamta so katuaan na Biblia ed kinen Pailing. Maabig so inkiwas to tan pinabli ton tuloy so impakaaral ed gagala nen Jehova parad too tan say dalin. Sikatoy impanaral da ed eskuelaan ya elementarya, tan inyaralan da met na Biblia. Abautismoan si Pailing bilang sakey ed saray Tastasi nen Jehova diad edad a 24. Diad edad a 30, sikatoy wala’d komaduan taon to ed haiskul, tan ginawa to a teritoryan pampulongan so eskuelaan. Natan et sikatoy tatawagen dan Rolando (say ngaran to diad patar).

No nakabat yo si Rolando, nanengneng yo so akakawes na masimpit tan maimis a ministro a manlilingkor bilang sigpot-panaon a managpulong tan bilang sakey a ministeryal a lingkor ed sakey ed saray kongregasyon ed Mindoro. Agano ni et pinmawil si Rolando ed kapalandeyan, aliwan pian mibiang ed saray tradisyon na saray Batangan, noagta pian inabang ed sikara so manangiter-bilay iran katuaan a manlalapud Biblia.

Magunaet a Nawalaan na Kingdom Hall

Say probinsya na Bukidnon​—a kabaliksan toy “Totoo ed Kapalandeyan” ed salitan Cebuano​—so wala ed mamaabalaten ya isla na Mindanao. Lugar iya na saray palandey, kelas, ilog ed lawak, tan atagey a patar. Ontutulong so mabunan dalin ed pakaani na saray pinya, mais, kape, pagey, tan saray ponti. Saray tribu’d palandey a Talaandig tan Higaonon so manaayam ditan. Sarayan totoo so kaukolan met a makaaral nipaakar ed si Jehova. Agano ni, diad asingger a baley na Talakag, et nilukas iyan pankanawnawa diad makapainteres a tuloy a paraan.

Saray Tastasin onkakalab ed kapalandeyan so makakaabet na ambetel a klima balet ta ampetang a panangabrasa. Saray totoo diman so mankuan a manisia ed makapanyarin-amin a Dios, say Ama, balet agda amta so ngaran to. Lapud uusaren day maslak a panaon da diad takel, saya so pilpilimeron impakapikabat da ed saray Tastasi nen Jehova. Nipaamta ed sikara so ngaran na Dios, ontan met ed alay abig a gagala to a misiglaotan ed Panarian. Saray totoo so malikeliket, kanian denesidi a sikaray nepeg a dalawen lamet diad baryo ra.

Agawa so aminpigan indalaw. Bilang resulta, inyopresi na saray manaayam diman so sakey a lote a parad “abung” na Tastasi nen Jehova. Maliket ya inawat na saray Tastasi so opresi. Say lote so wala’d toktok na sankatageyan a pukdol diad saman a pasen, a sankabantag so karsada. Impaalagey so bilding panamegley na tabla, kawayan, tan bulobulong na palma. Asumpal so proyekto ed loob na taloran bulan tan samploran agew. Say karatula a “Kingdom Hall of Jehovah’s Witnesses” so sankanengneng ed arap na bilding. Isipen pa itan, nipaalagey so Kingdom Hall antis ya aporma so kongregasyon!

Nanlapud saman, inmalis diman so sakey a matatken ed kongregasyon a sigpot-panaon a ministro, ontan met ed sakey a ministeryal a lingkor. Nankimey ira, a kaibay Tastasi ed kabangibang a lugar, parad gagalan mamorma na sakey a kongregasyon. Saya so agawan tua nen Agosto 1998. Natan et sakey a melag a kongregasyon so sigpot a manguusar ed sayan Kingdom Hall, ya ontutulong ed saray totoo’d palandey pian naaralan iray katuaan na Biblia.

Peteg a mabiskeg ya uusaren nen Jehova iray mabulos a lingkor to diad Pilipinas pian nikayat so katuaan nipaakar ed Panarian anggan diad mairap-a-nasabi a kapalandeyan. Nipapanonot ed sikatayo so Isaias 52:7, a kuanton: “Agay la so kalimgasan ed tapew na saray palandey so saray sali na mangyakar na saray maong a balita.”

[Saray mapa ed pahina 11]

(Parad aktual a format, nengnengen so publikasyon)

ABRA

MINDORO

BUKIDNON

[Credit Line]

Globe: Mountain High Maps® Copyright © 1997 Digital Wisdom, Inc.

[Saray litrato ed pahina 10]

Lalanoren na say panagpulong ed kapalandeyan so pigaran oras ya ikalab-kalab ed nipukpukdol iran pasen

[Litrato ed pahina 10]

Panagbautismo diad sakey ya ilog ed palandey