Mansiansian Aliing, Onabantin Makmakpel!

Report Nipaakar ed Saray Espisyal a Miting

SIOPA so makapangiburi a sikatayo lay manbibilay ed ‘maatap a panaon a mairap a pidenengan’? Bilang Tastasi nen Jehova, ag-itayo nipuera ed saray desdes ed panagbilay diad ‘kaunoran iran agew.’ (2 Timoteo 3:1-5) Balet namomoria tayon nakaukolan na totoo so tulong. Agda natatalosan so kabaliksan na saray nagagawa ed mundo. Nakaukolan da so ligliwa tan ilalo. Anto so manunan betang tayo pian natulongan so kapara tayon totoo?

Walaan itayo na inter na Dios a kimey ya inabang so maong a balita nipaakar ed niletneg lan Panarian na Dios. (Mateo 24:14) Nakaukolan a naamtaan na totoo a sayan mangatatawen a Panarian so mogmon ilalo na katooan. Balet, say mensahe tayo so aglawas aawaten a paborabli. Diad arum a pasen et nasesebelan so kimey tayo tan napapasegsegang iray agagi tayo. Anggaman ontan, ag-itayo onsusuko. Tekep na sigpot a panagmatalek ed si Jehova, determinado itayon mansiansian aliing tan mantultuloy ya onabanti a makmakpel, ya andi-tundan iyabawag so maong a balita.​—Gawa 5:42.

Satan a mapekder a determinasyon so mabitabitar diad saray agawan espisyal a miting nen Oktubre 2001. Diad Sabado, Oktubre 6, say tinaon a miting na Watch Tower Bible and Tract Society of Pennsylvania et ginawa diad Jersey City, New Jersey, Assembly Hall of Jehovah’s Witnesses diad Estados Unidos. * Diad tinmumbok ya agew et ginawa so kaaruman iran miting diad apatiran lugar, talora ed Estados Unidos tan sakey ed Canada. *

Diad manangilukas iran komento to diad tinaon a miting, say tsirman, a si Samuel F. Herd, membro na Mananguley ya Ulop na saray Tastasi nen Jehova, so angaon ed Salmo 92:1, 4 insan inkuanto: “Labay tayon ipatnag a misalsalamat itayo.” On, nitarya iray rason parad pisasalamat diad limaran report ed sankamundoan.

Saray Report ed Nanduruman Pasen

Si Brother Alfred Kwakye so angireport ed inaligwasan na kimey a panagpulong diad Ghana, a datin kabat bilang say Gold Coast. Say kimey tayo ditan so sinebelan diad loob na pigaran taon. Mantetepet iray totoo: “Akin a sesebelan da kayo? Anto so kasalanan yo?” Saya so angilukas na saray pankanawnawa pian makapantasi, so insalaysay nen Brother Kwakye. Nen 1991 sanen naandi  so pananebel et wala so 34,421 a Tastasi nen Jehova diad Ghana. Nen Agosto 2001 et walay dagup a 68,152​—a dinmaak na 98-porsiento. Peles ya iplaplano so pamaalagey na sakey ya Assembly Hall a walay 10,000 a napanyurongan. Malinew a saray espiritual ya agagi tayo ed Ghana so mangaanamot a nagkalalo ed relihyoson kawayangan da.

Anggaman ed inkagulo na politika, saray agagi tayo ed Irlandya so aktibon mibibiang diad ministeryo, tan sikaray igagalang lapud neutral a talindeg da. Say Irlandya so walaan na 115 kongregasyon ed 6 sirkito, kuan na Branch Committee coordinator a si Peter Andrews. Insalaysay nen Brother Andrews so eksperiensya na sakey a samploy-taon a lakin manngaran na Liam, a sikatoy makmakpel a manpupulong ed eskuelaan. Akapangipalima si Liam na My Book of Bible Stories, ya impalapag na Tastasi nen Jehova, ed 25 a kaklase to ontan met ed maestra to. Labalabay la nen Liam so nabautismoan, balet walay angibagan sikatoy uga-ugaw ni. Inmebat si Liam: “Say pakadeterminaan et aliwan say edad ko noagta say panangarok ed si Jehova. Ipatnag na bautismok a sikatoy talagan inararok.” Say kalat nen Liam et magmaliw a misionaryo.

Nen 1968 et wala so 5,400 a manangipalapag na maong a balita diad Venezuela. Balet wala la natan so masulok ya 88,000, so inkuan nen Stefan Johansson, say Branch Committee coordinator. Tan walay posibilidad ya ondaak ni lapud masulok a 296,000 so inmatendi ed Memoryal nen 2001. Nen Disyembre 1999, inmagus so pitek makasengeg ed makmaksil ya uran ya inkatigwayan na ngalngalin 50,000 a totoo, kaiba so pigaran Tastasi. Sakey a Kingdom Hall so napno na pitek a 2 piye labat la so baetan manlapud gubida. Sanen walay angisuheri a paulyanan la so bilding, saray agagi so inmebat: “Andin balot! Kingdom Hall mi iya, tan agmi labay a paulyan itan natan.” Ginapoan dan kinimeyan so Kingdom Hall ya inekal da so toni-toniladan pitek, bato, tan arum nin geray. Pinasimbalo da lamet so bilding, tan inkuan na saray agagi a mas marakep itan natan no ikompara nensaman sakbay a sinmabi so kalamidad!

Wala so 87 a lenguahe tan dialekto ya uusaren diad Pilipinas, so inkuan nen Brother Denton Hopkinson, say coordinator na Branch Committee. Diad apalabas a serbisyon taon et nipaway so kompleton New World Translation of the Holy Scriptures diad taloran manunan lenguahe na bansa​—Cebuano, Iloko, tan Tagalog. Insalaysay nen Brother Hopkinson so eksperiensya na sakey ya ugaw a lakin mantaon na siamira a sikatoy akabasa ed Good News​—To Make You Happy, ya impalapag na Tastasi nen Jehova. Sikatoy nambabasa ni na arum a publikasyon ya inala to diad sanga, balet sikatoy sinumpa na pamilya to. Kalabas na pigaran taon sanen sikatoy manaaral na medisina, sikatoy akitalosan diad sanga pian paiyaralan na Biblia. Sikato so abautismoan nen 1996 tan ag-abayag et linmoob ed sigpot-panaon a ministeryo. Sikato la natan so manlilingkor ed sangan opisina a kaibay asawa to.

‘Nagagawa ed Puerto Rico so “panangibaki na Tasi diad arum a lugar,”’ so insalaysay na Branch Committee coordinator a si Brother Parkin. Wala so ngalngalin 25,000 a manangipalapag diad isla, tan nansiansia so parehon bilang diad loob na pigaran taon. Akin? Bueno, akalkula a “mangibabaki” so Puerto Rico na manga 1,000 a manangipalapag kada taon diad Estados Unidos, a dakel ed sikara so onaalis makasengeg ed ekonomya. Insalaysay nen Brother Parkin so sakey a makatantandan desisyon na korte a mangilalanor ed si Luis, sakey a 17-años a Tasi a walaan na leukemia. Lapud ag-inabobonan nen Luis so pampasaksak na dala, say kaso to so akasabi ed korte. Kinaliktan na huis a sikatoy personal a nakatongtong, kanian sikatoy binisita to diad ospital. Si Luis so nantepet ed sikato: “Akin ta a no siak so akagaway seryoson krimen et ukomen yo ak bilang sakey ya adulto, balet sanen labay kon unoren so Dios, siak so ipasen yo a menor-de-edad?” Akombinse so huis a sikatoy makalakal lan menor-de-edad tan makapandesidi la parad inkasikato.

Kayarin nadngelan so report ed ararawin dalin, ininterbio nen Harold Corkern, a membro na Branch Committee ed E.U., so apatira ya abayag lan lingkor nen Jehova. Si Arthur Bonno so 51 a taon la ed sigpot-panaon a serbisyo tan peles a manlilingkor ed Branch Committee diad Ecuador. Si Angelo Catanzaro so 59 a taon la diad sigpot-panaon a serbisyo, a maslak ed saratan et bilang managbiahen manangasikaso. Si Richard Abrahamson so nangraduar ed Gilead School nen 1953, tan sikatoy apribilehyoan a mangasikaso ed kimey diad Denmark diad loob na 26 a taon sakbay a pinmawil ed Brooklyn Bethel. Diad kaunoran,  aliketan so amin diad impakerengel ed 96-años lan si Carey W. Barber. Si Brother Barber, ya abautismoan nen 1921, so 78 a taon la ed sigpot-panaon a ministeryo tan sakey a membro na Mananguley ya Ulop manlapu la nen 1978.

Makapasagyat Iran Paliwawa

Kabiangan ed tinaon a miting so sakey a serye na makatenyeg-kanonotan iran paliwawa. Si Brother Robert W. Wallen so angipaliwawa ed teman “Totoo a Nipaakar ed Ngaran To.” Sikatayoray totoon parad ngaran na Dios, tan naromogan itayo ed masulok a 230 a daldalin. Inikdan itayo nen Jehova na “say arapen tan say ilalo.” (Jeremias 29:11, NW) Nepeg tayon itultuloy ya iyalibansa so Panarian na Dios, ya inabang so alay abig a mensahe a makaligliwa tan makatambayo. (Isaias 61:1) Oniay sampot ya inkuan nen Brother Wallen: “Inagew-agew komon a sikatayo so manbilay unong ed ngaran ya akatawagan tayo, Tastasi nen Jehova.”​—Isaias 43:10.

Say kaunoran a kabiangan na programa et sakey a simposium na taloran membro na Mananguley ya Ulop. Satan so apauloan na “Natan la so Panaon Pian Mansiansian Aliing, Ontalindeg a Malet, tan Manpabiskeg.”​—1 Corinto 16:13, NW.

Unona, impaliwawa nen Brother Stephen Lett so teman “Mansiansian Aliing Diad Sayan Unor lan Oras.” Say pisikal ya iyugip et sakey a langkap, so impaliwawa nen Brother Lett. Satan so mamakasil ed sikatayo. Balet, say espiritual ya iyugip et agbalot makagunggona. (1 Tesalonica 5:6) Sirin, panon itayon makapansiansian aliing ed espiritual? Indalatdat nen Brother Lett so taloran espiritual a “pilduras”: (1) Padaaken so kimey ed Katawan. (1 Corinto 15:58) (2) Magmaliw a sinononot ed espiritual a pankaukolan yo. (Mateo 5:3) (3) Magmaliw a maawat ed simbawa a nibase’d Biblia ta pian makabat so ikiwas.​—Uliran 13:20.

Impaliwawa nen Brother Theodore Jaracz so makapasagyat a teman “Ontalindeg a Malet Sano Nasusubok.” Diad impanukoy to’d Apocalipsis 3:10, intepet nen Brother Jaracz: “Anto so ‘oras na katukso [o pakasubokan]’?” Onsabi itan a subok diad “agew na Katawan,” a pambibilayan tayo la natan. (Apocalipsis 1:10) Nisisiglaot iyan subok ed say manunan isyu a​—kasin wala itayo ed dapag na niletneg a Panarian na Dios odino ed dapag na marelmeng a sistema na bengabengatla nen Satanas? Angga’d agni anampot itan ya oras na pakasubokan, sikatayoy nidunget ed saray pakasalsalian tan kairapan? Kasin mansiansia itayon manmatoor ed si Jehova tan ed organisasyon to? ‘Kaukolan tayon ipatnag so ontan a katooran bilang indibidual,’ so kuan nen Brother Jaracz.

Diad kaunoran, si Brother John E. Barr so angipaliwawa ed teman “Manpabiskeg Bilang Sakey ya Espiritual a Too.” Diad panutukoy ed Lucas 13:23-25, inkuan to a nepeg tayon isekar so inkasikatayo ‘pian makaloob ed pinto a mainget.’ Dakel so onsasaew lapud agda pampepelengan so manpabiskeg. Ta pian magmaliw a matakken a Kristiano, nepeg tayon aralen so pangiyaplika ed saray prinsipyo na Biblia ed amin ya aspekto na bilay tayo. Oniay impaseseg nen Brother Barr: “Segurado ak ya onabobon kayo a natan la so panaon pian (1) pansiansiaen a sankamanunaan si Jehova; (2) manpabiskeg; tan (3) isekar so inkasikatayo ed panggawa na linawa nen Jehova. Diad onian paraan et makaloob itayo ed mainget a pinto a mangitonton ed alay abig a bilay ya anggapoy anggaan.”

Nen magano lan nasumpal so tinaon a miting, walay sakey a tepet ya agni naebatan: Anto so teksto-ed-taon parad 2002 a serbisyon taon? Satan a tepet so naebatan ed tinmumbok ya agew.

Kaaruman a Miting

Pirmi iray iilaloan ed kabuasan na Simba sanen ginmapo so programa parad kaaruman a miting. Ginmapo itan ed impansumaryo na say leksion ed Panag-Bantayan ed saman a simba, a tinumbokan na antikey ya impangipresenta ed pigaran pabitar ed tinaon a miting. Insan, amin so nanliket ed impakarengel ed paliwawa nipaakar ed teksto-ed-taon parad 2002: “Dago kayo’d siak, . . . et ikdan ta kayoy pampainawa.” (Mateo 11:28) Say paliwawa so nibase ed artikulon panaralan ya impalapag ed Disyembre 15, 2001, a paway na Say Panag-Bantayan.

Kayari na satan, arum a nagmaliw a delegado ed “Manangibangat na Salitay Dios” iran Kombension diad Pransya tan Italya nen Agosto 2001 so anginabang ed saray makapasagyat a naimano ra. * Diad kaunoran, bilang pabitar ed programa ed saman ya agew, duaran unor a paliwawa so impresenta  na saray ombibisitan espiker a nanlapud Brooklyn Bethel.

Say unona so apauloan na “Makpel a Manmatalek ed si Jehova Diad Sarayan Maatap a Panaon.” Tinibukel na espiker iray onggendan a manunan punto: (1) Say makpel a panagmatalek ed si Jehova so makanakana lawas parad totoo na Dios. Lugan na Biblia so dakel ya alimbawa na saraman so angipatnag na inkakpel tan pananisia anggaman ed isusumpa. (Hebreos 11:1-12:3) (2) Si Jehova so mangitatarya ed sikatayo na malet a basiyan pian sigpot a manmatalek ed sikato. Saray kimey tan say Salita to so mangagarantiya a sikatoy manatalima ed saray lingkor to tan agto ran balot lingwanan. (Hebreos 6:10) (3) Nagkalautlan nakaukolan natan so inkakpel tan panagmatalek. Sikatayo so ‘puntirya na panggula,’ a singa impasakbay nen Jesus. (Mateo 24:9) Ta pian makapansungdo, kaukolan itayon manmatalek ed Salita na Dios, a matalek itayon ontulong ed sikatayo so espiritu to, tan makpel a mantultuloy a mangiyabawag ed maong a balita. (4) Ipapanengneng na saray alimbawa a sikatayo natan so nipapaarap ed isusumpa. Amin so pirmin atenyeg legan ya insalaysay na espiker iray sinungdoan na agagi tayo diad Armenya, Georgia, Kazakhstan, Pransya, Russia, tan Turkmenistan. Peteg a natan la so panaon pian ipatnag so inkakpel tan panagmatalek ed si Jehova!

Tinibukel na unor ya espiker so teman “Onaabanti a Mankakasakey Kaibay Organisasyon nen Jehova.” Kinobrian na paliwawa so pigaran nipanpanaon a punto. (1) Malaknab a naiimano so iyaabanti na saray totoo nen Jehova. Say panagpulong a kimey tan saray kombension tayo so manasagyat na imano na publiko. (2) Si Jehova so angiletneg na sakey ya organisasyon a nankakasakey. Nen 29 K.P., si Jesus so nilanaan na masanton espiritu pian nitarok to so “amin a bengatla”​—saramay walaan na mangatatawen ya ilalo ontan met ed saray walaan na mangaraldalin ya ilalo​—ed nankakasakey a pamilya na Dios. (Efeso 1:8-10) (3) Saray kombension so matalonggaring a pakapatnagan na internasyonal a pankakasakey. Saya so mapatpatnag diad saray espisyal a kombension a ginawa diad Pransya tan Italya nen imbeneg ya Agosto. (4) Sakey a makapasagyat a resolusyon so inawat diad Pransya tan Italya. Innabang na espiker so pigaran inaon a balikas manlapud makapasagyat a resolusyon. Naromog so kompleton inkisulat na resolusyon diad leksab.

Diad konklusyon na unor a paliwawa, imbasa na ombibisitan espiker so makatenyeg ya anunsion imparaan na Mananguley ya Ulop. Oniay inkuan na satan bilang kabiangan: “Natan la so panaon pian mansiansian aliing tan lawas akabantay, a tebeken no panon so kagagawa na saray ebento ed kipapasen na mundo. . . . Labay min ipasabi ed sikayo so maaron panangiyansakit na Mananguley ya Ulop ed sikayo tan ed amin a totoo na Dios. Komon ta mayamyaman to kayon bendisyonan diad panggagawa yo na linawa to tekep na interon kamarerwa.” Saray totoo nen Jehova ed amin a pasen so determinadon mansiansian aliing ed sayan maatap a panaon tan mantultuloy ya onabanti a makmakpel kaibay nankakasakey ya organisasyon nen Jehova.

[Saray paimano ed leksab]

[Kahon/Saray litrato ed pahina 29-31]

Resolusyon

Nen Agosto 2001, say espisyal a “Manangibangat na Salitay Dios” iran Kombension so ginawa diad Pransya tan Italya. Diad saratan a kombension et nipresenta so makapasagyat a resolusyon. Nisulat ed onggendan so lugan na satan a resolusyon.

“BILANG Tastasi nen Jehova, amin tayon nantitipon diad sayan ‘Manangibangat na Salitay Dios’ a Kombension so nabibilin panamegley na makagunggonan tuloy a bangat. Say lapuan na sayan bangat so malinew a nabibidbiran. Aliwan too so panlalapuan na sayan bangat. Manlalapu iya ed samay Sakey a deneskribe na propeta nensaman a si Isaias bilang say ‘Engranden Managbangat’ tayo. (Isaias 30:20, NW) Imanoen so panonot nen Jehova a nisulat ed Isaias 48:17: ‘Siak si  Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.’ Panon ton susumpalen iya? Say manunan paraan et diad panamegley na sankalaknaban a libron nipapatalos tan papawalaen diad interon mundo, say Biblia, a satan so malinew a mangibabaga ed sikatayo: ‘Amin a Kasulatan et impuyan na Dios tan makagunggona.’​—2 Timoteo 3:16.

“Natan, say katooan so mankaukolan a maong na ontan a makagunggonan bangat. Akin a nibaga tayo so onia? Diad pangimano tayo ed manguuman tan makapawetwet a kipapasen na sayan mundo, anto so aaksobien na totoon makatebek? Onia labat: Anggaman minilyon so nibabangat ed saray sisteman pan-edukasyon na mundo, makapasinagem a naaandi so maabig iran walna tan agla nibibiig so duga manlapud aliwa. (Isaias 5:20, 21) Ondarakel so agmakakaaral ed Biblia. Anggaman ontutulong so teknolohiya pian makaala na agnasabaan ya impormasyon diad panguusar na saray computer, iner so pakaromogan na saray ebat ed tepetepet a singa say, Anto so gagala na bilay? Panon tayon talosan iray nagagawa ed panaon tayo? Kasin wala so malet ya ilalo parad arapen? Peteg kasin niwala so kareenan tan kaligenan? Niarum ni, diad saray librarya et wala so dakerakel a tomo na saray nansagpotan a reperensya a mangokobre ed amin lawarin lawak na aktibidad na too. Anggaman ontan et uuliten ni na katooan iray apalabas lan lingo. Ondaraak so krimen. Onlelesa lamet iray sakit a datin ipapasen a natambal la, bangta say arum, singa say AIDS, so makapataktakot ya onkakayat. Ondarakel a tuloy so bilang na saray nabubuyak a bilay na pamilya. Say polusyon so manederal ed kaliberliber. Say terorismo tan saray ayura ed turobos a panamatey so manesesga ed kareenan tan kaligenan. Mantutultuloy ya ondarakel iray probleman agnasolbar. Anto so manepeg a betang tayo diad panulong ed kapara tayon too diad sarayan maatap a panaon? Kasin wala so bangat a mangipapaliwawa ed sengegan na paniirap na katooan tan aglabat natan mangipaparungtal ed dalan a mamaarap ed magmaong a bilay noagta mangiyoopresi met na masnag tan seguradon ilalo parad arapen?

“Say Makasulatan a kimey a niganggan ed sikatayo et ‘onla tan manggawa na saray babangatan ed amin a nasyones, ya ibangat iran mangunor ed amin a bengabengatla ya ingganggan nen Kristo.’ (Mateo 28:19, 20) Saya so ingganggan nen Jesus kayari na impatey tan inkioli to, sanen naawat to so amin a pakayari ed tawen tan diad dalin. Talonaan na satan so amin a kimey ya iyaalibansa na totoo. Manlapud panmoria na Dios, say kimey a niganggan ed sikatayo, a nisentro ed saray espiritual a pankaukolan na saramay naeerasan parad katunongan, so sankamanunaan. Walaan itayo na putel a Makasulatan iran rason pian seryosoen itan a kimey a niganggan.

“Mankakaukolan iya na pantultuloy a pangiyuna ed satan a kimey diad bilay tayo. Diad panamendisyon tan tulong na Dios, say kimey so nasumpal, anggaman dakel so makapangisuawi ya impluensya, babeng, tan isusumpa a manlalapud grupo na relihyon tan politika, a ginetma pian patundaen so iyaaligwas na sayan sankagloboan a programa na panagbangat. Matalek tan manisia itayo a sayan kimey so mantultuloy ya onaligwas anggad satan so sigpot a nasumpal. Akin a makapanseguro itayo? Lapud insipan na Katawan a Jesu-Kristo a sikatoy kaiba tayo ed sayan inter na Dios a ministeryo tayo anggad kasampotan na sayan sistema na bengabengatla.

“Say kagogonigon na katooan so asingger lan manampot. Say kimey a niganggan ed sikatayo natan so nepeg a nasumpal sakbay ya onsabi so anggaan. Sirin, sikatayo, bilang Tastasi nen Jehova, so determinadon:

“Unona: Bilang dedikadon ministros, sikatayoy determinadon mangiyuna lawas ed intereses na Panarian diad bilay tayo tan mantultuloy ya ombulaslas ed espiritual. Pian nagawaan itan, nepeg a mitunosan so pikakasi tayo ed saray balikas ed Salmo 143:10: ‘Ibangat moak a mangunor na linawam; ta sika so Dios ko.’ Mankaukolan iya na pagmaliw tayon maseet ya estudyante, a panbanikelan so pambasa ed Biblia ya inagew-agew tan nawalaan na personal a panagaral tan panagsukimat. Pian nipatnag so ibubulaslas tayo ed amin a totoo, gawaen tayoy anggaay nayarian tayo pian manparaan tan sigpot a minabang ed teokratikon edukasyon a nitatarya diad saray miting ed kongregasyon, diad saray asamblea ed sirkito, tan diad distrito, nasyonal, tan internasyonal iran kombension.​—1 Timoteo 4:15; Hebreos 10:23-25.

  “Komadua: Ta pian nabangatan na Dios, ondungo itayo labat diad espiritual a dulang to tan talinengen a maong so pasakbay na Biblia nipaakar ed manamalikdon bangabangat na saray demonyo. (1 Corinto 10:21; 1 Timoteo 4:1) Gawaen tayo so nikadkaduman panag-alwar pian napaliisan so makaderal iran elemento, a laktip so relihyoson panamalingo, maapa iran panagkatunongan, makapabaing a lingon panangagamil ed sekso, salot na pornograpiya, mabanday a panliliket, tan amin a bengatlan aliwan ‘tukoy ed maabig a bangat.’ (Roma 1:26, 27; 1 Corinto 3:20; 1 Timoteo 6:3; 2 Timoteo 1:13) Bilang panamagalang ed saray ‘langkap a lalaki,’ a kualipikadon mangibangat ed maabig, sikatayo so masimoon a manrespeto ed saray sagpot da tan interon puson mikoopera ed sikara diad panangitandoro ed malinis tan maptek iran estandarte na Salitay Dios nipaakar ed moral tan espiritual.​—Efeso 4:7, 8, 11, 12; 1 Tesalonica 5:12, 13; Tito 1:9.

“Komatlo: Bilang Kristianon atateng, say interon-puson panggunaetan tayo et say pangibangat ed ananak tayo ya aliwan diad panamegley labat na salita noag pati diad alimbawa. Say manunan pampagaan tayo et say panulong ed sikara manlapud inkaugaw a ‘naaralan da so masanto a Sulsulat pian magmaliw iran makabat ed kilalaban.’ (2 Timoteo 3:15) Nodnonoten tayo lawas a say pamabaleg ed sikara diad disiplina tan manametek-kanonotan nen Jehova so mangiter ed sikara na sankaabigan a pankanawnawa pian naeksperiensya so sipan na Dios a ‘makapaabig ed sikara tan makapambilay ira na andukey diad tapew na dalin.’​—Efeso 6:1-4.

“Komapat: Sano nidunget ed saray kapagaan tan seryoson problema, manuna ed amin et ‘ipakabat tayoray kerew tayo ed Dios,’ a matalek itayon ‘say kareenan na Dios, a talonaan to so amin a pakatalos na too’ so manalimbeng ed sikatayo. (Filipos 4:6, 7) Diad panakbat ed pako nen Kristo, naromog tayo so pakainawaan. Lapud amta tayon tatalimaen itayo na Dios, ag-itayo masuyat ya ipiya iray kapagaan tayo ed sikato.​—Mateo 11:28-30; 1 Pedro 5:6, 7.

“Komalima: Bilang pangibalikas na pisasalamat tayo ed si Jehova lapud pribilehyo tayon magmaliw a manangibangat na Salita to, mansagpot itayon nagkalalo pian ‘naagamil tayo ed matunong so salita a tua’ tan ‘sigpot tayon nasumpal so ministeryo tayo.’ (2 Timoteo 2:15; 4:5) Lapud kabkabat tayon tuloy no anto so nalalanor, say impapuson pilalek tayo et say pananap ed saray makanepegan tan say pamayubo ed nitanem a bukel. Niarum ni, napaaligwas tayo so panagbangat tayo diad epektibon pangikondukta na dakel nin panangiyaral na Biblia. Lapud saya et lalon makapitunosan tayo ed linawa na Dios ya ‘amin a totoo nilaban ira komon, tan ondago ra ed pakapikabat ed katuaan.’​—1 Timoteo 2:3,4.

“Komanem: Diad loob na apalabas a siglo ya angga ni’d natan, naeeksperiensya na saray Tastasi nen Jehova ed dakel a daldalin so nanduruman nengneng na isusumpa tan panamasegsegang. Balet pinaneknekan nen Jehova a ikatoy kaiba tayo. (Roma 8:31) Papaseguroan itayo na say ag-onsaew a Salita to ya ‘anggapo so ayura ya agawan sumpa ed sikatayo’ a mangamper, mamatayer, odino mamatunda ed kimey tayo a panangipulong tan panangibangat ed Panarian ya ontalona. (Isaias 54:17) Balanglan diad paborabli tan agpaborablin panaon, ag-itayo nayarin ontunda a mansalita na katuaan. Say determinasyon tayo et say panumpal ed panagpulong tan panagbangat a kimey tayo tekep na inkaganatan. (2 Timoteo 4:1, 2) Say kalat tayo et say sigpot a panginabang ed maong a balita na Panarian na Dios diad totoo ed amin a nasyones anggad posibli. Diad ontan, sikaray mantultuloy a nawalaan na pankanawnawa a makaaral nipaakar ed say probisyon parad pakagamor na andi-anggaan a bilay diad matunong a balon mundo. Bilang sakey a muyongan na saray manangibangat na Salitay Dios, say determinasyon tayo et say pantultuloy a panumbok ed alimbawa na Matalonggaring a Managbangat, si Jesu-Kristo, tan say pangipatnag ed maridios iran kalidad to. Amin na saya so gawaen tayo parad kagalangan tan kidayewan na Engranden Managbangat tan Manangiter-Bilay tayo, si Jehova a Dios.

“Amin ya inmatendi diad sayan kombension ya onabobon ed pangawat ed sayan resolusyon et ipangasi yo pan ibagay ON!”

Sanen say tepet ed resolusyon bilang panampot so nipaarap ed 160,000 a nandaragup diad taloran kombension diad Pransya tan 289,000 diad siamiran lugar ed Italya, arengelan so maksil ya “On” diad dakel a lenguahe a nirepresenta ed limog na saray delegado.