Mansiansian Agnagiing a Singano Sankanengneng so Agnanengneng a Sakey!

“Nansiansia [si Moises] a singa to nengnengnengen so agnanengneng.”​—HEBREOS 11:27.

1. Anton makatantandan balikas nipaakar ed Dios so imbaga nen Jesus diad Sermon to ed Palandey?

 SI Jehova et agnanengneng a Dios. Sanen kinaliktan nen Moises a nanengneng so karlangan nen Jehova, oniay ebat To ed sikato: “Agmo nayarian a nengnengen so lupak; ta say too agto ak naani nanengneng et manbilay.” (Exodo 33:20) Tan insulat nen apostol Juan: “Anggapo so too ya akanengneng ed Dios anggan kapigan.” (Juan 1:18) Sanen si Jesu-Kristo so nagmaliw a too diad dalin, anggan sikato et agto nanengneng so Dios. Anggaman ontan, diad Sermon to ed Palandey, onia so kuan nen Jesus: “Mapalar iray maralus ed puso; ta nanengneng da so Dios.” (Mateo 5:8) Anto so labay ya ibaga nen Jesus?

2. Akin ya agtayo nanengneng so Dios ed mismon kamataan tayo?

 ² Ipaparungtal na Kasulatan a si Jehova et agnanengneng ya Espiritu. (Juan 4:24; Colosas 1:15; 1 Timoteo 1:17) Aglabay ya ibaga nen Jesus sirin a si Jehova et aktual a nanengneng na kamataan tayo. Tua, saray alanaan a Kristiano so makanengneng ed si Jehova a Dios diad tawen sano onoli ira bilang espiritun palsa. Balet saray totoo a “maralus ed puso” tan walaan na ilalon manbilay ya andi-anggaan diad dalin so ‘makanengneng’ ed Dios. Panon iyan posibli?

3. Panon a natebek na totoo so arum ed saray kalidad na Dios?

³ Walay naaralan tayo nipaakar ed si Jehova diad maalwar a panimano ed saray pinalsa to. Diad ontan et pandinayewan tayo so pakayari to tan napakiwas itayon mamidbir ed sikato bilang Dios a Manamalsa. (Hebreos 11:3; Apocalipsis 4:11) Nipaakar ed saya, insulat nen apostol Pablo: “Saray bengatla ya agnanengneng a kien [na Dios], say andi-anggaan a pakayari to tan inkadibino to nanengneng a manlapu ed inkapalsa’y mundo, natalosan ira unong ed saray bengatla ya agawa.” (Roma 1:20) Kanian say sasaglawien na saray salita nen Jesus nipaakar ed pakanengneng ed Dios et say pakatebek ed arum iran kalidad nen Jehova. Nibase itan a pakanengneng diad suston pikakabat tan diad pakatebek ed espiritual a paraan panamegley na ‘say mata na puso.’ (Efeso 1:18) Dakel met so niparungtal na saray salita tan gawa nen Jesus nipaakar ed Dios. Kanian, inkuan nen Jesus: “Say akanengneng ed siak anengneng to so Ama.” (Juan 14:9) Nagnap a nipatnag nen Jesus so personalidad nen Jehova. Kanian, say pakapikabat ed bilay tan saray bangat nen Jesus so ontulong ed sikatayon makanengneng, odino makatebek, ed arum iran kalidad na Dios.

Importante so Espiritualidad

4. Panon a nipatnag na dakel natan so kaandian na espiritualidad da?

⁴ Mataltalag natan so walaan na pananisia tan peteg ya espiritualidad. Oniay inkuan nen Pablo: “Say pananisia so aliwan walad amin a totoo.” (2 Tesalonica 3:2, NW) Dakel so nigalet lan maong ed personal iran gegemtan da tan anggapo so pananisia ra ed Dios. Lapud makasalanan a kondukta ra tan kaandian na espiritualidad da, sikatoy agda nanengneng panamegley na mata na pakatalos, lapud oniay insulat nen apostol Juan: “Say manggawa na mauges, agto anengneng so Dios.” (3 Juan 11) Lapud agnanengneng na saratan ya indibidual so Dios diad literal a pakanengneng da, onkikiwas ira a singano agto nanenengneng so gagawaen da. (Ezequiel 9:9) Mudmoraen daray espiritual a bengatla, kanian agda nagamoran so ‘mismon pikakabat ed Dios.’ (Uliran 2:5) Matukotukoy sirin so insulat nen Pablo: “Say too a gendat agto awaten so bengatla na espirituy Dios: ta kakulangkulangan ira ed sikato; tan agto ra natalosan, ta asumal ira lapu ed espiritu.”​—1 Corinto 2:14.

5. Saray sinononot ed espiritual so sikakabat ed anton katuaan?

⁵ Balet no sinononot itayo ed espiritual iran bengatla, magmaliw itayon lawas a sikakabat ya amta nen Jehova no mauges iray walad kanonotan tan pipilaleken tayo, anggaman sikato et Dios ya agmanaanap na lingo. On, “saray dalan na too wala ra ed arap na saray mata nen Jehova; tan dantalen to so saray amin a basbas to.” (Uliran 5:21) No akapankasalanan itayo, napakiwas itayon magbabawi tan onkerew na panamerdona nen Jehova lapud sikatoy inaro tayo tan agtayo labay a paermenen.​—Salmo 78:41; 130:3.

Anto so Makatulong Pian Ag-itayo Nagiing?

6. Anto so kabaliksan na pagmaliw ya agnagiing?

⁶ Anggaman agtayo nanengneng si Jehova, komon ta naynay tayon nodnonoten a sankanengneng to itayo. Say pikabat ed kiwawala to tan say pakawalaan na kombiksion a sikato so asingger ed amin ya ontawag ed sikato so ontulong pian magmaliw itayon agnagiing​—mapekder tan agnatenyeg ed katooran tayo ed sikato. (Salmo 145:18) Naalig tayo si Moises, a sinalambit nen Pablo ed sulat to: “Lapu ed pananisia tinaynan to so Ehipto, ya agto tinakotan so sanok na ari: ta nansiansia a singa to nengnengnengen so agnanengneng.”​—Hebreos 11:27.

7, 8. Anto so makasengeg no akin a makpel si Moises ya inmarap ed si Faraon?

⁷ Diad impanumpal to ed ingganggan ed sikato na Dios ya ibulos iray Israelita manlapud inkaaripen ed Ehipto, mabetbet ya omparisi si Moises ed malames a Faraon diad maarin korte a wadman so dakerakel iran lider na relihyon tan militar. Nayarin  atalunton na saray talintao iray dingding na palasyo. Balet si Jehova, anggaman agnanengneng, so petepeteg ed si Moises, aliwan singa saray talintao a mangirerepresenta ed saray andiay-bilay a dirios na Ehipto. Agpankelawan no akin ya agtinmalaw si Moises ed si Faraon!

⁸ Anto so amapakpel ed si Moises pian omparisi a maminpigapiga ed si Faraon? Ibabaga ed sikatayo na Kasulatan a say “laki a Moises sikato nensaman so mauyamon tuloy ed saray amin a lalaki a wala ed tapew na dalin.” (Numeros 12:3) Malinew, say mabiskeg ya espiritualidad tan kombiksion a walad dapag to so Dios et angiter ed si Moises na nakaukolan a biskeg pian nirepresenta to so ‘agnanengneng a Sakey’ ed arap na maruksan ari na Ehipto. Anto niray arum a paraan a nipapatnag natan na saramay ‘makakanengneng’ ed agnanengneng a Dios so pananisia ra ed sikato?

9. Anto so sakey a paraan pian makapansiansia itayon agnagiing?

⁹ Sakey lan paraan pian nipatnag tayo so pananisia tan makapansiansia itayon agnagiing a singa sankanengneng so agnanengneng a Sakey et diad panamegley na makpel a panagpulong anggaman ed panamasegsegang. Impasakbay nen Jesus ed saray babangatan to: “Kagula kayo naani na saray amin a totoo nisengeg ed ngaran ko.” (Lucas 21:17) Inkuanto met ed sikara: “Say aripen aliwan babaleg nen say katawan to. No pinasegsegang da ak, pasegsegangen da kayo met.” (Juan 15:20) Singa ed inkuan la nen Jesus, kayarin tuloy na impatey to, sinagmak na saray patumbok to so panamasegsegang diad panamegley na saray panamagyaw, panag-aresto, tan panagpekpek. (Gawa 4:1-3, 18-21; 5:17, 18, 40) Anggaman linmoor ed saman so panamasegsegang, nantultuloy iray apostol tan arum niran babangatan nen Jesus ed panangipulong da na maong a balita tekep na inkakpel.​—Gawa 4:29-31.

10. Panon a makatulong so panagmatalek ed panagtalima nen Jehova diad ministeryo tayo?

¹⁰ Singa si Moises, saray inmuunan patumbok nen Jesus so ag-apagyaw na dakel iran nanengneng a kakabusol da. Saray babangatan nen Jesus so walaan na pananisia ed Dios, tan bilang resulta et asungdoan da so pirmin impamasegsegang ed sikara. On, nantultuloy ira ya agnagiing a singano sankanengneng da so agnanengneng a Sakey. Natan, say lawas pikabat a tatalimaen itayo nen Jehova so mamapakpel ed sikatayo, mangiter ed sikatayo na tepel tan sebeg diad kimey tayon panangipulong ed Panarian. Inkuan na Salitay Dios a say ‘itakot ed too et pakakalotan; balet siopaman a manmatalek ed si Jehova so nasalimbengan.’ (Uliran 29:25, NW) Mipadpara, ag-itayo onsesener lapud takot ed panamasegsegang; nisay ibaing tayo so ministeryo tayo. Say pananisia tayo so managdag ed sikatayo a manpulong a sipapakpel ed saray kaabay, katrabahoan, kaeskuelaan, tan arum nira.​—Roma 1:14-16.

Iwawanwan na Agnanengneng a Sakey so Totoo To

11. Unong ed si Pedro tan Judas, panon so impangipatnag na arum ya akilimog ed Kristianon kongregasyon a kulang ira na espiritualidad?

¹¹ Ontulong ed sikatayo so pananisia pian nanengneng si Jehova bilang say mangiwawanwan ed mangaraldalin ya organisasyon to. Diad ontan et napaliisan tayo so magmaliw a kritiko ed saramay manasakbat na responsabilidad ed kongregasyon. Si apostol Pedro tan si Judas, ya agi nen Jesus ed ina, so amasakbay nipaakar ed pigaran totoo a kulang na espiritualidad a maabuson nansalita sumpad saray lalakin mangidadaulo ed limog na saray Kristiano. (2 Pedro 2:9-12; Judas 8) Ontan kasi so pansalita na saratan a maanap na lingo diad arap nen Jehova no sikatoy literal a nanenengneng da? Andin balot! Balet lapud agda nanengneng so Dios, ag-amotektek na saratan a minumundon totoo so pikuentaan da ed sikato.

12. Anton awawey so nepeg ya ipatnag tayo ed saramay mangidadaulo ed kongregasyon?

¹² Tua, say Kristianon kongregasyon so tugyopen na ag-ayadyarin totoo. Saramay manlilingkor bilang mamatatken so nalilingo a nayarin sagpaminsan a makaapekto ed sikatayon mismo. Anggaman kuan, saratan a lalaki so uusaren nen Jehova bilang managpastol ed pulok to. (1 Pedro 5:1, 2) Bibidbiren na saray maespiritual a lalaki tan bibii a saya so sakey a paraan na pangiwawanwan nen Jehova ed totoo to. Kanian, bilang Kristiano, paliisan tayo so awawey a makritiko, mareklamon awawey tan ipanengneng so respeto ed saray teokratikon uksoyan na Dios. Diad pagmaliw a matulok ed saramay mangidadaulo ed sikatayo,  ipapanengneng tayo a sankanengneng tayo so agnanengneng a Sakey.​—Hebreos 13:17.

Sankanengneng so Dios Bilang say Baleg a Managbangat Tayo

13, 14. Anto so kabaliksan ed sikayo na pakanengneng ed si Jehova bilang say Baleg a Managbangat?

¹³ Wala so sananey nin aspekto a mankaukolan na espiritual a pakatebek. Oniay impropesiya nen Isaias: ‘Saray matam nanengneng da naani so Mangibangat ed sika.’ (Isaias 30:20) Kakaukolanen so pananisia pian nabidbir a si Jehova so manbabangat ed sikatayo panamegley na mangaraldalin ya organisasyon to. (Mateo 24:45-47) Wala ni so sasaglawien na pakanengneng ed Dios bilang Baleg a Managbangat tayo nen say panmantini lambengat na maong ya ugali ed panagaral na Biblia tan say regular ya iyaatendi ed saray Kristianon miting. Sasaglawien na satan so sigpot a panganamot ed saray espiritual a probisyon na Dios. Singa bilang, nakaukolan tayo so nagkalalon panimatlek ed pangiwawanwan nen Jehova panamegley nen Jesus ta pian ag-itayo onkasipa ed espiritual a paraan.​—Hebreos 2:1.

¹⁴ No maminsan et mankaukolan itan na nikaduman sagpot pian nagnap itayon nagunggonaan ed espiritual a tagano. Alimbawa, nayarin onkiling tayon parlasan labat so pigaran salaysay ed Biblia a mairap tayon talosan. Sano babasaen tayo iray Panag-Bantayan tan Awake! a magasin, nayarin labsanan tayo ni ingen iray pigaran artikulo lapud aliwan tanton makapainteres ed sikatayo so tema. Odino abuloyan tayoray kanonotan tayo a manyatawyataw legan na saray Kristianon miting. Balet, makapansiansia itayon alerto no maalwar tayon morekdeken iray punton kokonsideraen. Say aralem ya apresasyon tayo ed espiritual a bilin a nagagamoran tayo so pakapatnagan a bibidbiren tayo si Jehova bilang say Baleg a Managbangat tayo.

Nepeg Itayon Mikuentaan

15. Panon so inkiwas na arum a singano ag-ira nanenengneng nen Jehova?

¹⁵ Importante so pananisia ed samay agnanengneng a Sakey, lautla ta say karelmengan so kasmak a tuloy ed sayan “panaon na anggaan.” (Daniel 12:4, NW) Kasmak so ag-inkamatua tan seksual ya imoralidad. Siempre, makabat a nodnonoten ya iimanoen nen Jehova iray kiwas tayo anggano ag-itayo  nanenengneng na totoo. Arum so akalingwan ed sayan katuaan. Sano ag-ira nanengneng na arum, nayarin mangagamil ira na agmakasulatan a kondukta. Singa bilang, agniresistian na arum so tukso a manbantay na makaderal iran panligliwaan tan pornograpiya diad Internet, telebisyon, tan arum niran modernon teknolohiya. Lapud diad amot so kagagawaan na saratan a bengatla, arum so kinmiwas a singano agnanenengneng nen Jehova iray gagawaen da.

16. Anto so makatulong ed sikatayo pian natumbok iray atagey ya estandarte nen Jehova?

¹⁶ Maabig a nodnonoten iray salita nen apostol Pablo: “Sakey tan sakey ed sikatayo mangiyosaosa naani nipaakar ed inkasikaton dili ed arap na Dios.” (Roma 14:12) Nakaukolan a sinononot itayo a no makapankasalanan itayo et mankakasalanan itayo ed si Jehova. Say pakaamta ed satan so makatulong ed sikatayo pian natumbok iray atagey ya estandarte to tan napaliisan so marutak a kondukta. Papanonotan itayo na Biblia: “Anggapo so bengatlan pinalsa ya agnipanengneng ed arap to: noag ingen saray amin a bengatla wala ra a lakseb tan mapatnag ed saray mata na pangikdan tayo na bilang.” (Hebreos 4:13) Tua, nepeg itayon mikuentaan ed Dios, balet maseguron say aralem a panangaro tayo ed si Jehova so manunan rason no akin a gagawaen tayo so linawa to tan uunoren tayo iray matunong ya estandarte to. Komon ta magmaliw itayon makabat diad panagpili tayoy panligliwaan tan say kondukta tayo ed saray agkapara ed sekso.

17. Sikatayo so iimanoen nen Jehova tekep na anton panangiyansakit?

¹⁷ Interesadon maong si Jehova ed sikatayo, balet ag-itan mankabaliksan a sisipotan to itayon makapankasalanan pian dusaen to itayo. Imbes, iimanoen to itayo tekep na maaron panangiyansakit a singa sakey ya ama a malabay a manumang ed matoor ya ananak to. Agaylan makapaligliwan naamtaan a say mangatatawen ya Ama tayo so naliliketan ed pananisia tayo tan “mananumang ed saray mananap ed sikato”! (Hebreos 11:6) Komon ta agamilen tayo so nagnap a pananisia ed si Jehova tan ‘manlingkor ed sikato ed ayadyari a puso.’​—1 Awaran 28:9.

18. Lapud oobserbaan itayo nen Jehova tan iimanoen to so panmamatoor tayo, anto so ipapaseguro ed sikatayo na Kasulatan?

¹⁸ Oniay ibabaga na Uliran 15:3: “Saray mata nen Jehova wala ed balang pasen, a manbabantay ed mauges tan maong.” On, babantayan na Dios iray mauges a totoo tan pidedenengan to ra unong ed kondukta ra. Balet, no kabiangan itayo ed saramay “maong,” makaseguro itayo a naiimano nen Jehova so panmamatoor tayo. Agaylan makapabiskeg-pananisian naamtaan a ‘say kimey tayo et aliwa ya anggapo so kabaliksan ed Katawan’ tan say agnanengneng a sakey so ‘agmakalingwan ed gawa tayo tan say aro ya impanengneng tayo ed ngaran to’!​—1 Corinto 15:58; Hebreos 6:10.

Pausisa Itayo ed si Jehova

19. Anto so pigara ed saray nagunggona ed mabiskeg a pananisia ed si Jehova?

¹⁹ Bilang matoor a lingkor nen Jehova, mabli itayo ed sikato. (Mateo 10:29-31) Anggaman sikatoy agnanengneng, sikato so nayarin magmaliw a petepeteg ed sikatayo, tan papablien tayo so mablin siglaotan tayo ed sikato. Say pakawalaan na ontan ya awawey ed mangatatawen ya Ama tayo so mangitarok ed sikatayo na dakel a gunggona. Say mabiskeg a pananisia tayo so ontulong pian nawalaan itayo na maralus a puso tan malinis a konsiensia ed arapan nen Jehova. Say pananisia ya aliwan mansimpisimpitan so mangipaliis met ed sikatayo manlapud doblen-estandarte a panagbilay. (1 Timoteo 1:5, 18, 19) Say agnagiing a pananisia tayo ed Dios so mangipatnag na maabig ya alimbawa tan walaan na positibon epekto ed saramay walad kaliberliber tayo. (1 Timoteo 4:12) Niarum ni, say ontan a pananisia so mangiyalibansa na maridios a kondukta, a mamapaliket ed puso nen Jehova.​—Uliran 27:11.

20, 21. (a) Akin a makapalikliket so pambabantay nen Jehova ed sikatayo? (b) Panon tayon niyaplika so Salmo 139:23, 24 ed inkasikatayon dili?

 ²⁰ No talagan makabat itayo, maliket itayon pabantayan ed si Jehova. Aliwa lambengat a labay tayo so paimano ed sikato noagta pilalek tayo met ya usisaen ton maong iray walad kanonotan tan kakikiwas tayo. Diad pikakasi, maabig no pasukayan itayo ed si Jehova tan patebek itayo no kasin walaan itayo na agmanepeg ya inklinasyon. Sikato so maseguron makatulong ed sikatayo a manalona ed saray problema tayo tan manggawa na antokaman iran nakaukolan a pananguman. Matukotukoy so inkanta na salmistan David: “Sukayan moak, O Dios, et naamtaan mo so pusok; salsalien moak et naamtaan mo so nodnonot ko; Tan nengneng mo no wala so anto a bagel a kagagawa ed inkasiak, et ibasbas moak ed maando lawas a dalan.”​—Salmo 139:23, 24.

²¹ Akikasi si David ed si Jehova a sikatoy sukayan to pian naamtaan no walay “bagel a kagagawa” ed sikato. Singa say salmista, agtayo kasi pipirawaten a pasukayan ed Dios iray kapusoan tayo tan nengnengen no kasin walaan itayo na agmanepeg iran motibo? Tekep na pananisia, sirin, komon ta pausisa itayo ed si Jehova. Balet panon to no nagogonigon itayo lapud walay papagaan tayon impakaluksoan tayo odino walay makapasakit a bengatla ed akindalem tayo? Diad ontan et itultuloy tayo so manpikasin masimoon ed maaron Dios tayo, si Jehova, tan mapaabeban manpasakop ed panangidirehi na masanton espiritu to tan say simbawa na Salita to. Makapanmatalek itayo ya antabayan to itayo tan tulongan to itayon gegemtanen so kurang a mangitonton ed andi-anggaan a bilay.​—Salmo 40:11-13.

22. Anto so kaukolan a determinasyon tayo no nipaakar ed agnanengneng a Sakey?

²² On, bendisionan itayo nen Jehova na magnayon a bilay no nakapet tayo iray kakaukolanen to. Siempre, nepeg tayon bidbiren so pakayari tan autoridad to, unong a binidbir met nen apostol Pablo sanen insulat to: “Dia ed Ari ya andi-angga, ag-ompatey, agnanengneng, say saksakey a Dios, niiter komon so dayew tan gloria lawas ed ando lan ando. Amen.” (1 Timoteo 1:17) Komon ta lawas tayon ipatnag so masimoon a panangigalang ed si Jehova. Tan antokaman so nagawa, agtayon balot komon onligan-ligan ed determinasyon tayo a mansiansian agnagiing a singano sankanengneng so agnanengneng a Sakey.

Panon Yon Ebatan?

• Panon so posiblin pakanengneng na totoo ed Dios?

• No petepeteg ed sikatayo si Jehova, panon itayon onkiwas sano napapasegsegang itayo?

• Anto so kabaliksan na pakanengneng ed si Jehova bilang say Baleg a Managbangat tayo?

• Akin a kaukolan a panliketan tayo so pausisa ed si Jehova?

[Tepetepet Parad Panagaral]

[Litrato ed pahina 18]

Si Moises, ya agtinmalaw ed si Faraon, so kinmiwas a singano sankanengneng to si Jehova, say agnanengneng a Dios

[Litrato ed pahina 21]

Komon ta agtayon balot onkikiwas a singano agnalilimeng nen Jehova so gagawaen tayo

[Litrato ed pahina 23]

Masimoon tayon anapen so pikakabat ed Dios lapud sikato so nenengnengen tayo bilang say Baleg a Managbangat tayo