Manggayaga Tekep na Ilalo ed Panarian!

SAMAN so sakey a magayagan okasyon a nandaragup so 5,784 a dumerengel nen Marso 10, 2001, diad taloran lugar ed New York State ya uusaren na baleg a pamilyan Bethel. Say okasyon et say impangraduar na koma-110 a klase na Gilead ya eskuelaan parad misionaryo.

Si Carey Barber, a membro na Mananguley ya Ulop na saray Tastasi nen Jehova, so angabrasa ed amin tan angilukas ed programa diad impangikuan: “Panliketan tayon naamtaan a 110 iran klase na saray estudyante ed Gilead so nipasal la bilang misionaryo tan niasain ed saray teritorya ed sankagloboan.”

No Panon so Pansiansian Magayaga

Kayari na manangilukas a parte nen Brother Barber, si Don Adams so nampaliwawa ed saray dumerengel, a kaibay mangraduar a 48 ya estudyante, ed teman “Pagmamaliwen Itayon Mayaman na Panamendision nen Jehova.” Diad impangibase to’d paliwawa to ed Uliran 10:22, pinanonotan toray dumerengel a tatalimaen tan bebendisionan nen Jehova iray lingkor to sano iyuna ra so intereses na Panarian ed bilabilay da. Pinaseseg toray estudyante ya awaten iray balon asainmin da tekep na miparan inkamabulos ya impatnag nen apostol Pablo sanen nikuan ed sikato a “gala ed Macedonia et tulongan mo kami.” (Gawa 16:9) Anggaman walaray kairapan a kaukolan nen Pablo a talonaan, say inkamabulos ton manpulong diad angibakian ed sikato so nansumpal ed dakel a makapagayagan gunggona.

Asumpal la na saray mangraduar so limay-bulan a panagaral na Biblia tan panangipasal parad misionaryon kimey. Siansia, si Daniel Sydlik, a membro na Mananguley ya Ulop na saray Tastasi nen Jehova, so amaseseg ed sikara a mantultuloy ed panagaral da. Diad impangipaliwawa to ed teman “Magmaliw Kayon Tuan Babangatan,” inkuan to: “Say inka-babangatan et kabaliksan toy mantultuloy ya ontulok ed saray salita nen Jesus. Lalanoren toy inkamabulos tayo lawas ya ontalineng ed saray salita to, ed mensahe to, ed bangat to.” Impabitar ton agmandedesisyon iray babangatan nen Kristo no agda ni atalineng so boses na Katawan da; say kakabatan na Dios so misiglaotan a tuloy ed bilay nen Kristo. (Colosas 2:3) Anggapo ed sikatayo so makarengel ed saray salita nen Jesus a maminsan labat tan ikuan tayon amta tayo lan amin so nipaakar ed sikato, kanian pinaseseg nen Brother Sydlik iray mangraduar a mantultuloy a manaral, mangiyaplika, tan manbangat ed Makristianon katuaan, a mansusumpal itan ed kawayangan.​—Juan 8:31, 32.

Pian mansiansian magayaga ed serbisyo ed Dios, say sakey so nepeg a mabulos a padisiplina tan pakorehi. Say tepet ya inyarap na instruktor na Gilead a si Lawrence Bowen et “Kasin Korehien Kayo na Saray Bato (Kidney) Yo?” Impanengneng to a diad Biblia et saray piguratibon bato so nisiglaot ed sankaaraleman iran kanonotan tan liknaan na sakey a too. Nayarin onkana iratan a mangorehi ed sakey no say pinuyanan a simbawan manlalapud Salita na Dios so ontanek ed akindalem iran aspekto na personalidad to. (Salmo 16:7; Jeremias 17:10) Say matoor  a kurang na sakey so mamaliket ni ingen a maong ed si Jehova. Kayarin binasa so Uliran 23:15, 16, intepet na espiker: “Kasin korehien kayo na saray bato yo?” Et inyarum to: “Pikasi min ontan pa komon, diad ontan et napaliket yon maong si Jehova. Nasagyat yoray sankaaraleman ya emosyon to. On, napaliket yoray bato na Dios no mansiansia kayon sitotoor ed saray asainmin yo.”

Say unor a nampaliwawa ed sayan parte na programa et si Mark Noumair, a nan-misionaryo ed Kenya sakbay a nagmaliw ya instruktor ed Gilead. Say paliwawa ton apauloan a “Magmaong so Pakanengneng na Saray Mata” so angipabitar ed kaimportantian na pamayubo ed inkakontento. Ontukoy ed Eclesiastes 6:9, oniay inrekomenda nen Brother Noumair: “Awaten so aktual a kipapasen. Satan so ‘inengneng panamegley na saray mata.’ Imbes a pampirawatan so bengatlan labay mon nagawaan balet ta diad tua et agmo nagagawaan, iyapasakey moy kanonotan mo’d panganamot ed saray kaplesan a sirkumstansiam. Say bilay a pantasya, a walaay agmakatunongan iran ilaloan, odino pi-imano iray negatibon bengatla nipaakar ed asainmin mo so sengegay pagmaliw mon agnapenek tan agkontento.” On, inerman so kawalaan tayo odino antokaman iray sirkumstansia, say pamayubo na maridios ya inkakontento unong ed saray sirkumstansia tayo so panlapuan na gayaga ed panaglingkor ed Engranden Manamalsa tayo.

Magayaga Iran Eksperiensia ed Serbisyo ed Panarian tan ed Gilead

Kayari na saratan a praktikal a simbawan inter na saramay nandiskurso, saray estudyante so  angisalaysay na pigaran eksperiensian nanggayagaan da diad publikon ministeryo ra legan na limay-bulan a kurso ra. Diad panangidirehi nen Wallace Liverance, say registrar na Gilead School, indalatdat na saray mangraduar no panon dan inrekomenda so inkasikara bilang miministro na Dios. (2 Corinto 4:2) Sikaray akasagyat ed inter-Dios a konsiensia na arum. Impanengneng met na saray eksperiensia ra no panon a nigapo iray panangiyaral na Biblia ed saray masimoon a sinansakey a nabet da diad lansangan, diad kabkaabungan a ministeryo, tan diad arum niran paraan. Diad nanduruman kipapasen et inkuan na interesadon totoo a saray nibase’d Biblian palapagan na organisasyon nen Jehova so mangiyaabawag na katuaan. Positibon tuloy so inkiwas na sakey ya onabung ed sakey a bersikulo na Biblia. Sikato la natan so paiyaaralan na Biblia ed saray Tastasi nen Jehova.

Insan, ininterbio nen Joel Adams iray nangraduar la ed Gilead ed akadkauna iran klase. Say tema to et “Agbalot Ontunda ed Panagaral, Agbalot Ontunda ed Panaglingkor ed si Jehova.” Walaan na nipanpanaon a simbawa iramay na-interbio parad saray balon misionaryo. Oniay inkuan nen Harry Johnson ed nanonotan to legan a sikatoy kabiangay koma-26 a klase na Gilead: “Nibangat ed sikami a si Jehova so lawas a mangitotonton ed totoo to tan mangitonton ed totoo to. Satan a kompiyansa so kapapasesegan diad loob na saray taon.” Si William Nonkes, a nanaral ed koma-53 a klase na Gilead, so animbawa ed saray mangraduar: “Manuna’d amin, lawas nonoten iray prinsipyo na Biblia, tan iyaplika iratan ed amin a desisyon a kaukolan yon gawaen ed bilay natan tan diad ando lan ando. Diad ontan et makapansiansia kayo ed asainmin yo, tan niwala’d sikayoy mayaman a panamendision nen Jehova.”

“Napabiskeg a Manumpal ed Linawa nen Jehova” so pinili nen Richard Rian a tema ed betang to’d programa. Sakey ed saramay ininterbio to et si John Kurtz, a nangraduar ed koma-30 klase, a masulok lan 41 taon to ed España bilang misionaryo. Sanen atepetan nipaakar ed curriculum na Gilead, inkuan nen Brother Kurtz: “Say manunan libron-panaralan et say Biblia. Insan walaan kami na saray katulongan ed panagaral pian natalosan mi so Biblia. Saratan so akaparaan parad amin. Anggapo so sekreton impormasyon a nitarya ed Gilead. Lawas kon ipupurek iya lapud amin et makalan tampol ed impormasyon a nitatarya ed Gilead.”

Si Brother Gerrit Lösch, a membro na Mananguley ya Ulop na saray Tastasi nen Jehova, so angisampot ed espiritual a programa diad paliwawan atemaan na “Diad Tapew tan Diad Silong na Saray Payak nen Jehova.” Impaliwawa to no panon a say proteksion tan suporta na Dios ed saray matoor a lingkor to so niyilustra ed Biblia bilang payapayak na agila. (Deuteronomio 32:11, 12; Salmo 91:4) No maminsan et say ina ya agila so mangibuskag ed saray payak to ed loob na pigaran oras ta pian salimbengay siwsiw to. No maminsan met et isakbong ni na ina ya agila iray payak to ed siwsiw to pian protektaan ira manlapud siplog na ambetel a dagem. Diad mipadparan dalan tan mitunosan ed gagala to, si Jehova so ontulong ed saray matoor a lingkor to, nagkalautla sano nipaarap ira ed espiritual iran subok. Ag-aabuloyan nen Jehova iray lingkor to a nasubok ed labas na nayarian da balet ta mamawalay paraan pian nasungdoan da itan. (1 Corinto 10:13) Sinampotan nen Brother Lösch, diad impangikuan: “Ta pian mansiansian naprotektaan ed espiritual, sikatayo so nepeg a mansiansia ed silong na saray payak nen Jehova. Kabaliksan na saya a nepeg ya agtayo bayuboan so awawey na inka-independente. Mansiansia itayo sirin a maapit ed si Jehova tan ed singa-inan organisasyon to, ya agtayo isisian so inkasikatayo manlapud panangiwanwan da tan ed maaron simbawa ra.”

Binasa na tsirman iray telegrama tan sulat na pabanon nanlapud nanduruman bansa ed interon mundo. Insan asabi lay panangiyawat ed saray diploma. Sanen niletneg so Gilead School, inggagala itan ed limitado labat a bilang na saray klase ed loob na limaran-taon. Balet diad loob la na 58 taon et siansian pakukurangen nen Jehova a Dios so eskuelaan. Unong ed imbaga nen Brother Barber ed manangilukas a paimano to: “Agaylan marakep a rekord so napapawala na saray nangraduar ed Gilead nanlapula nen 1943, sanen inaguraan so Gilead! Say interamentin sagpot da so mansusumpal ed kiyaarum na literal a nilasus nilibo iran mauyamo ed dalin a mamapaarap ed maglorian organisasyon nen Jehova.” On, sayan eskuelaan parad misionaryo so akatulong ed minilyon a manggayaga tekep na ilalo ed Panarian.

[Kahon ed pahina 24]

SARAY ESTADISTIKA NA KLASE

Bilang na saray bansan nanlapuan: 8

Bilang na saray bansan angiyasainan: 18

Dagup a bilang na saray estudyante: 48

Promedyon edad: 34

Promedyon taon ed katuaan: 18

Promedyon taon ed sigpot-panaon a ministeryo: 13

[Litrato ed pahina 25]

Koma-110 a Nangraduar a Klase na Watchtower Bible School of Gilead

Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.