Agkami Manbukbukor Sanen Asubok So Pananisia Mi

Si Vicky so magangganan ugaw​—mabunigas, masanting, tan makitkitsing. On, agaylay liket mi sanen sikatoy nianak nen primabera na 1993. Manaayam kami ed melag a baley dia ed abalaten na Sweden, tan alay abig na bilay mi.

BALET, nen mantaon la na sakey tan kapaldua si Vicky, walay linmesan problema ed bilay mi. Sikatoy medyo abayag lan nansakit, kanian imbatik mi ed ospital. Agmin balot nalingwanan iman a bekta sanen inkuan na doktor a say sakit na anak mi et graben lukemia (acute lymphoblastic leukemia), sakey a klase na kanser ed inkaugaw ya apektaen to iray white blood cell.

Mairap a tebeken tan awaten a say melag nin anak mi so adapoan na onian makapasinagem a sakit. Kamurmurikat to ni labat ed sayan mundon walad kaliberliber to, tan natan et sikato so nayarin ompatey. Diad panasali na doktor a tambayoen kami, imbaga to a nayarin natambal ni diad panamegley na chemotherapy tan maminpigan pangisaksak na dala. Saya so sinmublay a pirmin akagonigonan mi.

Asubok so Pananisia Mi

Inaro min talaga so anak mi tan kaliktan mi sankaabigan a pakatambal to. Balet, agmin balot abuloyan so pangisaksak na dala. Mapekder a sisiaen mi so Salita na Dios, say Biblia, a malinlinew ya angikuan a saray Kristiano so nepeg ya ‘onarawi ed dala.’ (Gawa 15:28, 29) Amta mi met a say panagpasaksak na dala a mismo so mapeligro. Nilibo iray awalaan na sakit tan inaatey lapud panagpasaksak na dala. Anggapo lay napanpilian noagta say atagey-kalidad a panagtambal ya ag-usaran na dala. Lapud saya, ginmapo so pilalaban mi parad pananisia.

 Anto so nayarin gawaen mi? Tinawagan mi so Hospital Information Services diad sangan opisina na Tastasi nen Jehova ed Sweden pian patulongan. * Tampol, nipawit iray sulat panamegley na fax ed nanduruman ospital ed intiron Europa lapud panaanap mi na ospital tan doktor a mabulos a mangipakurang na chemotherapy ya ag-usaray panagpasaksak na dala. Say seseg tan aro ya impanengneng na saray Kristianon agagi mi ed saray sagpot da pian tulongan kami so makapabiskeg a tuloy. Agkami manbukbukor ed pilalaban mi parad pananisia.

Diad loob na pigaran oras, walay aromog ya ospital tan sakey a doktor diad Homburg/Saar, Alemanya. Niareglo so iyakar mi diman panamegley na eroplano diad tinmumbok ya agew ta pian naeksamin si Vicky. Kasabi mi, saray Kristianon agagi diad lokal a kongregasyon na Tastasi nen Jehova ed Homburg, pati saray arum a kanayon mi so wadman pian abeten kami. Tan sakey a manangilaman na Hospital Liaison Committee diman so ampetapetang ya angabrasa ed sikami. Inibaan to kami ed ospital tan ginawa toy anggaay nayarian ton tulongan kami. Atambayo kami ed impakanengneng ya anggan diad sananey a bansa et walaray espiritual ya agagin ontutulong ed sikami.

Atambayo kami lamet sanen akabat mi ed ospital si Dr. Graf. Sikato so makatalos a tuloy tan impaseguro to’d sikamin gawaen toy anggaay nayarian to a tambalen si Vicky ya anggapoy pangisaksak na dala. Anggano say hemoglobin to et onabeba anggad 5 g/dl, siansian sikatoy mabulos a mangituloy ed panambal ya anggapoy panagpasaksak na dala. Imbaga to met a maabig so pankanawnawa to parad matalonan pakatambal lapud asakbay a diagnosis tan say impangawit dan tampol ed si Vicky diman. Inaksobi to a saman so pilpilimero ton pan-chemotherapy ya anggapoy panangisaksak na dala ed sakey a kason singa ed si Vicky. Misalsalamat kami tan nandinayewan mi inkakpel tan determinasyon nen Dr. Graf pian ontulong.

Saray Problema ed Ekonomiya

Say tepet natan et, Panon kamin makabayar ed pampapatambal nen Vicky? Abigla kami sanen impaamta ed sikamin say duay taon a panagtambal et manggastos kami na ngalngalin 150,000 deutsche marks. Dagdaiset a tuloy so kuarta mi, balet kapilitan lan igapon tampol so panambal ed si Vicky. Lapud nanlapu kami’d Sweden pian manpatambal ed Alemanya, agkami naikdan na kanepegan ed dinanman a pampublikon health insurance. Kanian wadman kami kaiba so mansasakit ya anak mi tan akataryan ontulong so espisyalista ed medikal, balet ta anggapoy magenap a kuarta mi.

Tinmulong ed sikami so ospital diad impangibagan nigapo lan tampol so panambal no makapangipauna kami na 20,000 marks tan garantiyaan a bayaran mi so balansi diad panpirma mi. Walay daiset a tipon mi, tan diad maaron tulong na kakaaro tan kakanayon, akapangipauna kami na 20,000 marks​—komusta balet imay balansi mi?

Aminsan lamet ya apanonotan kami ya agmi bukbukor ed pilalaban mi parad pananisia. Sakey ya agi ed espiritual, ya agmi kabat ed saman, so mabulos a mangako ed responsabilidad parad balansi. Anggaman ontan, agmi la kinaukolan so mabunlok ya opresi to lapud wala lay niyareglo min arum iran uksoyan.

Impakurang so Inka-espisyalista ed Medikal

Inggapo so chemotherapy. Pigaran agew tan simsimba so linmabas. No maminsan et mair-irap tan makapabelat parad melag ya anak mi tan ed sikami. Diad biek a dapag, malikeliket tan misalsalamat kami ed kada nanengneng min walay aaligwasan nen Vicky. Binmayag na waloy bulan so chemotherapy. Say sankaabebaan a hemoglobin level nen Vicky so 6 g/dl, tan tinoor nen Dr. Graf so sipan to.

Masulok lan anem taon so apalabas, et anggapo lay nanengneng a sintomas na leukemia ed unor a check-up ed spinal fluid to. Sikato la natan so malikeliket tan anggapo lay antokaman a  pakapatnagan na sakit to. Tua, singa sakey a milagro a si Vicky et sigpot lan inmabig. Amta min dakel ya ugugaw a walaan met na onian sakit so ompapatey anggaman sikaray uusaran na chemotherapy tan panagpasaksak na dala.

Matalona so pilalaban mi parad pananisia lapud tulong na kakanayon, Kristianon agagin lalaki tan bibii, tan saray espisyalista ed medikal. Say Hospital Information Services so sigpot a sinmuporta ed sikami ed amin ya oras ed kada agew. Si Dr. Graf tan saray kaiba ton doktor so angikana ed saray inka-espisyalista ra pian napaabig si Vicky. Pisalsalamatan min peteg irayan amin.

Apabiskeg so Pananisia Mi

Balet, manuna ed amin, misalsalamat kami ed Dios a Jehova, lapud maaron panangasikaso to tan ed biskeg ya agamoran mi panamegley na Salita to, say Biblia. No onnengneng kami ed apalabas, namoria mi no panon ya akaaral kami a maong tan agaylan makapabiskeg ed pananisia mi iyan makapasinagem ya eksperiensia ed bilay mi.

Say impapuson pilalek mi natan et say pamasiansia na maapit a pisisiglaotan mi ed si Jehova a Dios tan bangatan so anak mi nipaakar ed kablian na pambilay a mitunosan ed saray kakaukolanen to. On, labay min iter ed sikato so maabig ya espiritual a tawir a bilay ya andi-anggaan ed onsabin Paraiso diad dalin.​—Insulat.

[Paimano ed leksab]