Makagamor na Liket Iray Mananumpal na Salitay Dios

“Bidbiren tayo iyan kombension bilang sakey ed saray probisyon nen Jehova pian iparaan itayo parad apalaknab a kimey nipaakar ed Panarian,” so inkuan na sakey ed saray espiker diad gapo na “Mananumpal na Salitay Dios” a Distriton Kombension na saray Tastasi nen Jehova. Intuloy to: “Namparaan tayo pian paibangat nipaakar ed maliket a bilay na pamilya, pian napaseseg a mansiansian maapit ed organisasyon nen Jehova, pian napakiwas a mamasiansia ed seseg tayo ed serbisyo’d Panarian, tan pian napanonotan ed pankaukolan a lawas akabantay.”

GINMAPO nen saginonor lay Mayo 2000, nanduroypo iray minilyon a mananumpal na salitay Dios tan saray kakaaro ra ed nilibon lugar ed sankamundoan pian mangawat na makanan edukasyon ed Biblia. Antoy naaralan da legay taloy-agew a kombension?

Inmunan Agew​—Aglilingwanan Iray Kimey nen Jehova

Diad manangilukas a paliwawa, inimbitaan na tsirman iray inmatendi pian eksperiensiaen iray bendision a resulta na nankakasakey a panagdayew ed si Jehova diad saray kombension. Apaseguroan so amin ya inmatendi a napabiskeg so pananisia ra tan napaelet so personal a siglaotan da ed si Jehova.

Kabat na “maliket a Dios” so pankaukolan tayo parad dilin liket tayo. (1 Timoteo 1:11, NW) Kanian, nidanet ed paliwawan “Nagamoran so Liket ed Panggaway Linawa na Dios” a lugan na Salita nen Jehova, say Biblia, so sankaabigan a paraan na kabibilay. (Juan 13:17) Nipabitar ed pigaran interbio ed saray abayag lan Tastasi nen Jehova no panon a say panggaway linawa na Dios ed silong na nanduruman sirkumstansia so mangarum na kabaliksan ed bilay tayo. Indanet na tinmumbok a paliwawan, “Magmaliw a Masnag Lapud Kamaongan nen Jehova,” a bilang ‘umaalig ed Dios,’ kaliktan na saray Kristiano ya ipatnag so “amin a kaabigan” diad kabibilay da. (Efeso 5:1, 9) Say matalonggaring a paraan a nagawaan iya et diad pangipulong ed maong a balita tan panggawa na saray babangatan.​—Salmo 145:7.

Imparungtal na impaningbat ed “Mantultuloy ya Agnagiing a Singa Nanenengneng so Sakey ya Agnanengneng” no panon a makatulong so mabiskeg a pananisia pian “nanengneng” so agnanengneng a Dios. Deneskribe na espiker no panon a kabat na saray maespiritual a totoo iray kualidad na Dios, ontan met ed abilidad to ya amtaen no anto so nononoten tayo ni ingen. (Uliran 5:21) Insalaysay na saramay ininterbio iray ginawa ran kundang ta pian nabayuboan da so mabiskeg a pananisia tan iyuna ray maespiritual ya interes ed bilay da.

Anampot so sesyon ed kabuasan ed pinagka-teman paliwawa ya, “Idayew si Jehova​—Say Managgawa na Makapakelkelaw Iran Bengatla.” Tinmulong itan ed saray inmatendi pian natalosan a diad lalon pakaaral tayo nipaakar ed si Jehova, lalon dakel iray rason pian sikatoy dayewen tayo bilang Managgawa na makapakelkelaw iran bengatla. Inkuan na espiker: “Legan tayon momolimolien iray makapakelkelaw  a palsa na Dios tekep lay amin niran makapakelkelaw a bengatlan gagawaen to ed sikatayo natan, say impapuson apresasyon so mamakiwas ed sikatayo a mangidayew ed sikato. Legan tayon dadalepdepen iray mamilagron bengatla a ginawa to la ed totoo to nensaman, sikatoy kaliktan tayon dayewen. Tan legan tayon momolimolien iray sipan a makapakelkelaw iran bengatla a gawaen ni labat nen Jehova, anapen tayo met iray paraan a pangipatnagan tayoy apresasyon tayo.”

Say sesyon ed ngarem so ginmapo ed paliwawan “Ag-ontutundan Manggawa na Maabig,” ya angipanonot ed amin ya inmatendi a saray desdes ed sayan mundo so mamaneknek ya asingger lay anggaan. (2 Timoteo 3:1) Balet, diad agtayo itunda et napaneknekan itayon “iba na saray walaan na pananisia ed kilalaban na kamarerwa.”​—Hebreos 10:39.

Anton simbawa na Biblia so niiter nipaakar ed bilay na pamilya? Say pilimeron simposium na kombension a​—“Magmaliw a Matulok ed Salitay Dios”​—so ginmapo ed partin “Diad Pampili na Kapareha.” Say pampili na kapareha et sakey ed saray sankaseryosoan a pandesisyonan na totoo. Kanian, kaliktan na saray Kristiano so panalagar a mangasawa anggad sikara lay matatken ed espiritual, tan kaukolan a sikaray mangasawa odino miasawa “ed linawa na Katawan lambengat.” (1 Corinto 7:39) Siningbat na tinmumbok a parti na simposium so pilalek nen Jehova ya amin a Kristianon pamilya so ontalona bilang mabiskeg a maespiritual iran grupo, tan angiter itan na praktikal iran paraan pian nagawaan iya. Say unor a parti so angipanonot ed atateng a say pangibangat ed ananak dan aroen so Dios et onggapo’d pangaron mismo na atateng ed sikato.

Saray punton nipabitar ed paliwawan “Manalwar ed Saray Labir-labir tan Talabutob” so angipamoria ed amin ya anggaman talagan nagagawa iray makapakelaw a bengatla, nepeg itayon onkiwas a makabat, aliwan mainomay a napalikdo, sano makarengel itayo na makapasagyat iran balita. Magmaong ya itongtong na saray Kristiano so amta ran tua​—say maong a balita na Panarian. Dakel so aligliwa tan apabiskeg ed tinmumbok a paliwawan, “Talonaan so ‘Sabit ed Laman.’” Tinmulong itan ed sikara a natalosan ya anggaman ed saray peles a subok a nayarin arapen tayo, nayarian itayon pabiskegen nen Jehova panamegley na masanton espiritu to, say Salita to, tan say Kristianon impanaagi tayo. Dakel a panamaseseg so agamoran manlapud personal ya eksperiensia nen apostol Pablo nipaakar ed saya.​—2 Corinto 12:7-10; Filipos 4:11, 13.

Anampot so pilimeron agew ed paliwawan “Mantultuloy a Mibansag ed Organisasyon nen Jehova.” Taloran pamaakaran so siningbat a nagkalautlan inkiyabantian na organisasyon na Dios: (1) say  idaraak na pakatalos ed espiritual a liwawa manlapud si Jehova, (2) say ministeryon inmatalek na Dios ed sikatayo, tan (3) say nipanpanaon iran pananguman ed organisasyonal iran paraan. Insan matalek ya inkuan na espiker: “Maliket tayon manatalaran ed saray nagawa ed arapen.” Intepet to: “Wala ta’y panduaruwa tayo a walaan itayo na amin a rason pian pansiansiaen so kompiyansan walad sikatayo nen inmuna anggad kasampotan?” (Hebreos 3:14) Mabitar so ebat. Satan so angitonton ed inkipaway na balon brosyur ya apauloan na Nayarian Yoy Magmaliw a Kaaro na Dios! Onkana itan bilang epektibon uusaren ed panagbangat ya ontulong ed saray totoon limitadoy aral da odino nairapan ed panagbasa pian naaralan so nipaakar ed si Jehova.

Komaduan Agew​—Mantultuloy ya Ipakabat so Nipaakar ed Makapakelkelaw Iran Kimey na Dios

Kayari impangonsidera ed inagew-agew a teksto, say komaduan agew na kombension so nituloy ed say simposium a “Saray Ministro na Salitay Dios.” Say pilimeron parti so angipaimano ed peles ya intalona na sankagloboan a panagpulong a kimey tayo. Balet, say panagsungdo tayo ed sayan kimey, so aangaten na karaklan, ya agmangawat ed mensahe na Panarian. Insalaysay na pigaran abayag lan manangipalapag no panon dan apansiansia so gayaga ra ed ministeryo diad pamabiskeg ed nonot tan puso ra pian arapen so angat ya agpananginenen odino isusumpa. Say komaduan parti so angipanonot ed saray aki-kombension a saray Tastasi nen Jehova so manggugunaet pian sabien so totoo ed inerman a pasen, diad pormal tan impormal a paraan. Tan say unor a parti so aneskribe ed nanduruman paraan a nayarin napalaknab na amin a Kristiano so personal a ministeryo ra. Pian nagawaan itan, indanet na espiker a nepeg tayon iyuna so Panarian na Dios, anggaman say panggawa ed satan et lanoren toy ag-inkakombenienti odino dilin-panangiburi.​—Mateo 6:19-21.

Lapud manbibilay itayo ed agmaridios a mundo a napno na agnapenek a pampirawat ed materyal iran bengatla, say paliwawan “Bayuboan so Maridios a Debosyon Tekep na Dilin-Inkapnek” so nipanpanaon. Diad impangibase toy arum a komento to diad 1 Timoteo 6:6-10, 18, 19, impanengneng na espiker no panon a makatulong so maridios a debosyon ed saray Kristiano a makapaliis ed aro’d  kuarta, a mangisuawi ed sikara tan panlapuan na dakel ya ot-ot. Indanet to ya antokaman so kipapasen tayo ed ekonomya, say liket so mandependi ed relasyon tayo ed si Jehova tan ed inkabunigas tayo ed espiritual. Dakel so apakiwas ed saray punton niparungtal ed paliwawan “Ag-iyan ed Kababaingan so Dios.” Nidanet so katuaan ya agbalot lilingwanan nen Jehova iray matoor a Tastasi to. Say agnaparaan ya ehemplo nen Jesu-Kristo​—a ‘sikato met lanlamang karuman tan natan, tan ed ando lan ando’​—so ontulong ed dakel pian mantultuloy a milumba parad bilay tekep na panagsungdo.​—Hebreos 13:8.

Sinampotan na paliwawa’d bautismo so sesyon ed kabuasan​—a lawas a pabitar diad angkabaleg iran pantitipon na saray Tastasi nen Jehova. Agaylan gayaga so pakanengneng ed balo niran dedikado ya anumbok ed saray bakat nen Jesus diad pampabautismo ed danum! (Mateo 3:13-17) Amin a mangala ed sayan kundang et dakel lay nagagawaan da bilang mananumpal na salitay Dios. Sakey ni, diad pakabautismoan et magmaliw iran ordinadon ministro na maong a balita, a panlapuan na baleg a gayaga diad pakaamtan sikaray mibibiang ed panamasantos ed ngaran nen Jehova.​—Uliran 27:11.

Niiter so mabitar a simbawa ed paliwawan “Nakaukolan so Inkatakken ed Espiritual ‘Pian Nibiig so Maong tan Mauges.’” Agaylan kulang iray estandarte na mundo nipaakar ed maong tan mauges. Kaukolan tayo sirin so onsaral ed saray estandarte nen Jehova. (Roma 12:2) Amin so apaseseg a mankimey ya impasya pian nagamoran so suston pakatalos ed saray paraan na Dios tan pian ombulaslas ed  inkatakken. Insan, diad pangagamil et nipasal so pakayari tayon manebek ‘pian nibiig so maong tan mauges.’​—Hebreos 5:11-14.

Tinmumbok so simposium a “Makulin Bayuboan so Espiritualidad.” Bidbiren na saray tuan Kristiano so kaimportantian na pamayubo tan panmantini ed espiritualidad. Laktipen na saya so pansagpot​—panagbasa, panagaral, tan panagdalepdep. (Mateo 7:13, 14; Lucas 13:24) Saray maespiritual a totoo so mantultuloy met ed “amin a nengneng na pikakasi tan pikekerew.” (Efeso 6:18) Namomoria tayon saray pikakasi tayo et mangiparungtal ed kabiskeg na pananisia tan debosyon tayo, kaaralem na espiritualidad tayo, ontan met ed no antoray momoriaen tayon “bengatla ran sankaabigan.” (Filipos 1:10) Nidanet met so kaimportantian na pamayubo na maligsa, maaron siglaotan ed si Jehova a singa ed siglaotan a panggagayagaan na matulok ya ugaw ed mapangasin ama to. Aliwa lambengat a walaan itayo na tuan relihyon noagta kaliktan tayon ipaalagey so mabiskeg a pananisia, ‘a singa nanenengneng so Dios.’​—Hebreos 11:6, 27.

Say tema nipaakar ed espiritual ya iyaaligwas so nagkalalo nin siningbat ed paliwawan “Ipatnag Yoy Iyaaligwas Yo.” Asingbat so taloran pamaakaran na satan ya iyaaligwas: (1) iyaaligwas na pikakabat, pakatalos, tan kakabatan, (2) pamawala na saray bunga na espiritu na Dios, tan (3) panumpal ed saray responsabilidad tayo bilang membro na pamilya.

Diad sampot na unor a paliwawa ed komaduan agew, “Mankurang ed Tuloytuloy ya Ililiwawa na Salitay Dios,” saray aki-kombension so aliketan ya angawat ed balon libro, Isaiah’s Prophecy​—Light for All Mankind I. Saya so unona ed duaran tomo a manisingbat ed libro na Biblia ya Isaias kapitulo por kapitulo. “Say libron Isaias so walaan na mensahe parad sikatayo natan,” so inkuan na espiker. Intuloy to: “On, dakel ed saray propesiya na satan so asumpal la ed panaon ni nen Isaias. . . . Balet, dakel ed saray propesiya nen Isaias so nasusumpal natan, tan arum so nasumpal ed insipan na Dios a balon mundo.”

Komatlon Agew​—Magmaliw a Mananumpal na Salita nen Jehova

Say unor ya agew na kombension so ginmapo diad impaningbat ed teksto. Insan tinmumbok so simposium, “Say Makabaliksan a Propesiya nen Sofonias Parad Saramay Manggagawa na Linaway Dios.” Impabitar na taloran parti na sayan simposium, ya ipaakseb nen Jehova so kairapan ed saramay ag-ontulok ed pasakbay to, singa ginawa to la ed matungangan Juda. Lapud sikaray nankasalanan ed Dios, sikaray mankurang a singa bulag a totoo, ya agmakaromog na kililiktar. Balet, saray tuan Kristiano so matoor a manaanap ed si Jehova, tan sikaray niyamot ed agew na sanok na Dios. Sakey ni, panggayagaan  day dakel a bendision anggan natan la. Sikaray walaan na abenditon pankanawnawa a mansalita na “puron lenguahe” na katuaan na Biblia. (Sofonias 3:9, NW) Impaimano na espiker: “Say pansalita na puron lenguahe et saglawien toy panisia ed katuaan tan pangibangat ed satan ed arum ontan met ed pangitunos tayoy kondukta tayo ed saray ganggan tan prinsipyo na Dios.”

Tinalaranan a maong na saray inmatendi ed kombension so draman “Panmadmaran Iran Agawa Parad Panaon Tayo.” Sayan kontodo-kostyum a drama so angipanengneng no panon ya atigway iray nilibon Israelita diad ketegan na Insipan a Dalin lapud nilingwanan day Jehova tan sikaray sinagyat na paganon bibii ed pilalawanan tan palson panagdayew. Sakey ed manuna iran karakter​—si Jamin​—so diad inmuna et naapag so katatanguyoran to, ed baetan na panasagyat na saray Moabitan bibii tan say debosyon to ed si Jehova. Nipabitar so palson panagkatunongan tan mapalikdon kaisipan na agmaridios a Zimri, ontan met ed pananisia tan debosyon nen Pinehas. Nipabitar met so kapeligroan ed pakapilanor ed saramay agmangaaro ed si Jehova.

Say drama so angiparaan ed nonot parad tinmumbok a paliwawa, “Aleg a Magmaliw a Malingwan a Dumerengel.” Say impangusisa ed 1 Corinto 10:1-10 so angipabitar a susuboken nen Jehova so katutulok tayo pian determinaen so inkamanepeg tayon mangawat na tawir diad balon mundo. Parad arum, saray pilalek na laman so mamapakilot ed espiritual iran kalat anggan natan, ya asingger tayo lan onloob ed balon sistema. Amin so apaseseg ya agpirdien so pankanawnawan ‘makaloob ed panagpainawa nen Jehova.’​—Hebreos 4:1, NW.

Say publikon paliwawa so apauloan na “No Akin a Morekdeken Iray Makapakelkelaw a Gawa na Dios.” ‘Say makapakelaw a kimey nen Jehova’ so angipatnag ed kakabatan tan autoridad to ed saray pinalsan walad kaliberliber tayo. (Job 37:14) Magenap la so pigaran manangusisan tepet manlapud si Jehova pian nipurek ed si Job so biskeg na makapanyarin-amin a Manamalsa. Gawaen met nen Jehova ed arapen iray “makapakelaw a kimey” nisengeg ed saray matoor a lingkor to. Onia so impangisampot na espiker: “Walaan itayo na daakan a rason pian morekdeken iray makapakelkelaw a gawa nen Jehova​—no anto so ginawa to la nensaman, no anto so gagawaen to ed palsa a walad kaliberliber tayo natan, tan no anto so isisipan ton gawaen ed magano lan arapen.”

Kayari na sumaryo ed panagaral na artikulo ed Panag-Bantayan parad saman a simba, tinmumbok so unor a paliwawa ed kombension. Apauloan na “Pabpabli Yoy Pribilihyo Yo Bilang Mananumpal na Salitay Dios,” indanet na sayan maligsan paliwawa a sakey a kagalangan so pagmaliw a mananumpal na salitay Dios. (Santiago 1:22) Apanonotan iray inmatendi a nikadkaduma so pribilihyo tayo bilang mananumpal na salitay Dios, tan diad ibabayag na pangaagamil tayo ed satan, lalon napapabli tayo itan. Apaseseg so amin ya inmatendi a mangipatnag ed makagunggunan panamaseseg na sayan distriton kombension ed pilalek dan magmaliw a mananumpal na salitay Dios diad sankalaknaban a paraan. Satan labat so alenleneg a paraan pian naeksperiensia so pirmin liket.

[Kahon/Litrato ed pahina 25]

Nayarian Moy Magmaliw a Kaaro na Dios!

Nipaway ed Biernes na ngarem so sakey a balon brosyur ya apauloan na Nayarian Moy Magmaliw a Kaaro na Dios! Walay baleg a pankaukolan parad pinasimplin edukasyon ed Biblia diad dakel a parti na mundo, tan sayan brosyur so nausar parad sayan pankaukolan. Baleg iyan bendision parad totoo a limitadoy aral da odino abilidad da ed panagbasa.

[Kahon/Saray litrato ed pahina 26]

Isaiah’s Prophecy​—Light for All Mankind

Aliketan iray inmatendi ed kombension ed impakaawat da ed Tomo I na duaran-tomo ya Isaiah’s Prophecy​—Light for All Mankind. Diad sayan publikasyon, nidanet so praktikal a kablian na propesiya nen Isaias ed panaon tayo.