Papabiskegen nen Jehova so Naksawan

“[Si Jehova] mangiter na pakayari ed makapuy; et saman so andian na pakapanyari sikato so parakelan to na biskeg.”​—ISAIAS 40:29.

1. Iyilustra so pakayarin walad saray bengatlan pinalsa na Dios.

 ANGGAPOY limitasyon na pakapanyari nen Jehova. Tan agaylan dinamikon enerhiya so walad saray pinalsa to! Say melmelanting ya atomo​—say mismon manutugyop ed amin a bengatla​—so tingtingot kanian say sakey a tedter labat na danum et walaan lay sanlasus bilyones ya atomo. * Amin a bilay ed globo tayo so akadependi ed enerhiyan napapawala panamegley na saray atomic reaction ed agew. Balet kaunongan karakel ya enerhiyan manlalapud agew so nakaukolan pian nasustuni so bilay diad dalin? Say dalin so makakaawat lambengat na dagdaiset a kabiangan na amin ya enerhiyan papawalaen na agew. Anggaman kuan, say melmelanting a kabiangan na enerhiya na agew ya onsasabi ed dalin so mas mabisbiskeg ni nen say amin lan enerhiyan uusaren ed saray industriya diad mundo.

2. Bilang segek, anto so ibabaga na Isaias 40:26 nipaakar ed pakayari nen Jehova?

² Balanglan say iisipen tayo et nipaakar ed atomo odino say iimanoen tayo et say maaw-awang ya uniberso, nasagyat itayo ed makapakelkelaw a pakapanyari nen Jehova. Agla pankelawan no akin a nibaga ton: “Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato  tawagen to ra ya amin ed ngaran; lapu ed kabaleg a tuloy na biskeg to ed pakapanyari [“dinamikon enerhiya,” NW], tan lapu ed mabiskeg ed pakayari, anggapo so kulang anggan sakey”! (Isaias 40:26) On, si Jehova so “mabiskeg ed pakayari,” tan sikato so Lapuan na “dinamikon enerhiya” ya inusar to diad impamalsa ed intiron uniberso.

Labas Ni Nen say Gendat a Pakayari so Nakaukolan

3, 4. (a) Anto so pigaran sengegan a nayarin nakesawan itayo? (b) Anton tepet so nakaukolan a konsideraen?

³ Bangta anggapoy limitasyon na pakapanyari na Dios, saray totoo balet so nakesawan. Inerman so laen tayo, naiimatonan tayo iray naksawan a totoo. Onliing iran naksawan, mantrabaho odino maneskuela iran naksawan, onsempet a naksawan, tan onugip ya aliwa lambengat a naksawan noagta abanalan. Labay na arum so makakar ed arum a pasen pian makapanpainaway daiset. Bilang lingkor nen Jehova, nakesawan tayo met, lapud say bilay tayo ya atekepan na maridios a debosyon so mankaukolay impasyan panangisekar. (Marcos 6:30, 31; Lucas 13:24; 1 Timoteo 4:8) Tan nakekesawan itayo lapud dakel niran sengegan.

⁴ Anggaman Kristiano itayo, ag-itayo nipuera ed saray probleman sasagmaken na totoo ed inkalapagan. (Job 14:1) Say sakit, inyirap na panagbilay, odino arum niran kairapan a kaslakan ed bilay so nayarin pansengegay pakadismaya, laktip lay makapakapuy ya epekto na satan. Niarum ni ed sarayan angat et saray subok a nagagawa’d saramay napapasegsegang nisengeg ed inkatunong. (2 Timoteo 3:12; 1 Pedro 3:14) Lapu ed inagew-agew a pananesdes na mundo tan isusumpa ed panangipulong tayo ed Panarian, arum ed sikatayo so nayarin abanalan lan maong a singa ontatatayer tayo la’d panaglingkor ed si Jehova. Niarum ni, diad gunaet ton buyaken so katooran tayo ed Dios, uusaren nen Satanas a Diablo so amin a paraan a nayarian to. Panon tayo sirin a nagamoran so nakaukolan tayon espiritual a biskeg pian agtayo onkesaw tan ontunda?

5. Akin a say nakaukolan et labas ni nen say biskeg na too pian nasumpal so Kristianon ministeryo?

⁵ Parad espiritual a biskeg, nepeg itayon manmatalek ed si Jehova, say makapanyarin-amin a Manamalsa. Impabitar nen apostol Pablo a say Kristianon ministeryo so mankaukolan na labas ni nen say gendat a pakayari na ag-ayadyarin totoo. Oniay insulat to: “Wala so sayan kayarian tayo ed baso a pitek, pian say sankatageyan ya inkabaleg na pakayari kien komon na Dios, ya agmanlapu ed sikatayo.” (2 Corinto 4:7) Susumpalen na saray alanaan a Kristiano so “ministeryo na pipupulangan” diad tulong na saray kaiba ran walaay mangaraldalin ya ilalo. (2 Corinto 5:18; Juan 10:16; Apocalipsis 7:9) Lapud gagawaen tayo so kimey na Dios diad arap na panamasegsegang bilang ag-ayadyarin totoo, agtayo itan nagawaan ed dilin biskeg tayo. Tutulongan itayo nen Jehova panamegley na masanton espiritu to, tan diad ontan et nitatandoro so pakayari to lapud kaleteyan tayo. Tan agaylan ­makapaligliwa’d sikatayo so panamaseguro ya ­‘ampopoen nen Jehova so matunong’!​—Salmo 37:17.

‘Si Jehova so Biskeg Tayo’

6. Panon itayon papaseguroan na Kasulatan a si Jehova so Lapuan na biskeg tayo?

⁶ Say mangatatawen ya Ama tayo so “mabiskeg ed pakayari” tan mainomay to itayon pabiskegen. Diad tua, nibaga’d sikatayon: “[Si Jehova] so mangiter na pakayari ed makapuy; et saman so andian na pakapanyari sikato so parakelan to na biskeg. Anggan saray ugugaw onkapuy ira tan nakesawan ira, tan saray tobonbalo parukol ira naani a sigpot. Balet saray manalagar ed Jehova pasimbaloen to so biskeg da; mamaatagey ira naani ya akapayak a singa say agila; ombatik ira naani, tan ag-ira nakesawan; manakar ira naani, tan ag-ira onkapuy.” (Isaias 40:29-31) Makasengeg ed onloloor iran pananesdes, nayarin liknaen tayo no maminsan a singa tayo la apunaw a bumabatik ya agla makakupbang. Balet say kasampotan na lumba ed bilay et asingsingger la, tan nepeg ya agtayo onsuko. (2 Awaran 29:11) Say Kabusol tayo, say Diablo, so manliliberliber a “singa omoang a leon,” tan labay to itayon patundaen. (1 Pedro 5:8) Nodnonoten tayo komon a ‘si Jehova so biskeg tan kinlong tayo,’ tan sikatoy walaan na daakan a probisyon a ‘mangiter na pakayari ed makapuy.’​—Salmo 28:7.

7, 8. Anto so walan paneknek a pinabiskeg nen Jehova si David, Habacuc, tan Pablo?

⁷ Si David so inikdan nen Jehova na biskeg a nakaukolan to pian mantultuloy anggaman ed pirmi iran babeng. Tekep na nagnap a pananisia tan kompiyansa, oniay insulat nen David: “Dia ed tulong  na Dios mankimey itayo a mabaybayani; ta sikato so mangigatingatin ed saray kakabusol tayo.” (Salmo 60:12) Si Habacuc so pinabiskeg met nen Jehova ta pian nasumpal to so nipabtang ed sikato bilang propeta. Oniay ibabaga na Habacuc 3:19: “Si Jehova, a Katawan, sikato so biskeg ko; et gawaen toray salik a singa saray sali na ulsa a makbet, tan gawaen toak a manakar ed tapew na saray atagey a pasen ko.” Makatantanda met so alimbawa nen Pablo, ya angisulat: “Nayarian ko a gawaen so ganagana ed saman so mamabiskeg ed siak.”​—Filipos 4:13.

⁸ Singa si David, Habacuc, tan Pablo, kaukolan tayon agamilen so pananisia ed pakayari na Dios a mamabiskeg ed sikatayo tan ed pakapanyari ton mangilaban ed sikatayo. Lapud amta tayo lan say Soberanon Katawan a Jehova so Lapuan na “biskeg” tayo, konsideraen tayo natan so pigaran paraan a pakagamoran tayoy espiritual a biskeg manlapud saray probisyon a daakan ya itatarya na Dios.

Saray Espiritual a Probisyon a Mamabiskeg ed Sikatayo

9. Anto so betang na saray Kristianon publikasyon pian natagano itayo?

⁹ Say maseet a panagaral ed Kasulatan diad tulong na saray Kristianon publikasyon so mamabiskeg tan manuporta ed sikatayo. Oniay inkanta na salmista: “Mapalar so too . . . [a] say gayaga to wala ed ganggan nen Jehova; tan diad ganggan to mandalepdep ed agew tan labi. Et sikato mipara ed sakey a kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga; tan antokaman a gawaen to ombuna.” (Salmo 1:1-3) No panon a nakaukolan tayoy mangan pian mansiansian mabiskeg ed pisikal, nakaukolan met a mangan tayoy espiritual a tagano ya itatarya na Dios panamegley na Salita to tan saray Kristianon publikasyon pian mansiansia so espiritual a biskeg tayo. Kanian makanakana so makabaliksan a panagaral tan panagdalepdep.

10. Kapigan so nayarin pangipanaon tayo ed panagaral tan panagdalepdep?

¹⁰ Peteg a makapatumang so pandalepdep ed ‘aralem iran bengatla na Dios.’ (1 Corinto 2:10) Balet kapigan so maabig a pakapandalepdep? Si Isaac, ya ilalak nen Abraham, so ‘pinmaway ed uma a nandalepdep nen ngarngarem la.’ (Genesis 24:63-67) Si salmistan David so ‘nandalepdep leleg na saray panagbantay ed labi.’ (Salmo 63:6) Nayarin aralen tayo so Salitay Dios tan dalepdepen itan ed kabuasan, diad labi​—on, anggan anton oras. Say ontan a panagaral tan panagdalepdep so mangitundas ed sananey nin probisyon nen Jehova a makapabiskeg ed espiritual​—say pikakasi.

11. Akin ya ipasen tayon importantin tuloy so regular a pikakasi?

¹¹ Say regular a pikakasi ed Dios so mamabiskeg ed sikatayo. Komon ta ‘mansiansia itayo ed pikakasi.’ (Roma 12:12) No maminsan, nakaukolan ya espisipiko so ikerew tayo na kakabatan tan biskeg a nakaukolan pian natalonaan so sakey a subok. (Santiago 1:5-8) Komon ta pisalamatan tan idayew tayo met so Dios sano naiimano tayo so pakakasumpal na saray gagala to odino nanenengneng tayo a papabiskegen to itayo pian makapantultuloy ed panaglingkor ed sikato. (Filipos 4:6, 7) No mansiansia itayon maapit ed si Jehova diad pikakasi, agto itayon balot ikaindan. “Nia,” so inkanta nen David, “say Dios sikato so mananulong ko.”​—Salmo 54:4.

12. Akin ya onkerew itayo ed Dios na masanton espiritu to?

¹² Say mangatatawen ya Ama tayo so mamapabiskeg tan mamapakasil ed sikatayo panamegley na masanton espiritu, odino aktibon puersa to. Insulat nen Pablo: “Italimukor ko ‘ray pueg ko ed arap na Ama . . . a yabuloy to ed sikayo, unong na kayamanan na gloria to, a napabiskeg kayo komon ed pakayari ed panamegley na espiritu to.” (Efeso 3:14-16) Nepeg a manpikasi itayo parad masanton espiritu, a matalek a sikatayo so palaboan nen Jehova ed satan. Inkatunongan nen Jesus: No onkerew na sira so sakey ya anak, kasin sikatoy ikdan na maaron ama na sakey ya uleg? Siempre, andi. Kanian onia so impangikuanto: “No sikayo sirin, anta [makasalanan tan diad ontan et ompatnag a] mauges kayo, amta yo so mangiter na saray maong a  panangaro ed saray anak yo agkasi nagkalalo a say Ama yo a mangatatawen mangiter na espiritu santo ed saray onkerew ed sikato!” (Lucas 11:11-13) Komon ta manpikasi tayo tekep na ontan a kompiyansa tan lawas nodnonoten a saray matoor a lingkor na Dios so “napabiskeg” tekep na pakayari diad panamegley na espiritu to.

Makapabiskeg a Tulong so Kongregasyon

13. Panon tayon moriaen iray Kristianon miting?

¹³ Papabiskegen itayo nen Jehova panamegley na saray miting ed Kristianon kongregasyon. Inkuan nen Jesus: “No iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” (Mateo 18:20) Sanen insipan itan nen Jesus, siningbat to iray pamaakaran a kaukolan ya asikasoen na saramay mangidadaulo ed kongregasyon. (Mateo 18:15-19) Balet, saray salita to so onaplika bilang prinsipyo ed amin a miting, asamblea, tan kombension tayo, a lukasan tan saraan ed pikakasi panamegley na ngaran to. (Juan 14:14) Kanian sakey a pribilihyo so iyatendi ed ontan iran Kristianon pantitipon, balanglan daiset odino nilibo so presenti. Ipatnag tayo sirin so pisasalamat tayo ed sarayan pankanawnawa a denisinyon mamabiskeg ed sikatayo diad espiritual a paraan tan managyat ed sikatayo ed aro tan ed maabig iran gawa.​—Hebreos 10:24, 25.

14. Anton gungguna so nagamoran tayo ed saray sagpot na Kristianon mamatatken?

¹⁴ Saray Kristianon mamatatken so mangitatarya na espiritual a tulong tan panamaseseg. (1 Pedro 5:2, 3) Tinulongan tan pinaseseg nen Pablo iray kongregasyon a nanserbian to, a singa gagawaen met natan na saray managbiahen manangasikaso. Diad tua, pinirawat toy pakapilimog ed saray kapananisiaan to ta pian makapanpapabiskegan tan makapanpapasesegan ira. (Gawa 14:19-22; Roma 1:11, 12) Komon ta lawas tayon ipatnag so apresasyon tayo ed saray mamatatken tayo tan arum niran Kristianon manangasikaso, a walaan na baleg a betang ed panamabiskeg ed sikatayo diad espiritual a paraan.

15. Panon ya apaneknekan a “makapabiskeg a tulong” iray kapananisiaan diad kongregasyon tayo?

¹⁵ Saray kapananisiaan a tugyopen na kongregasyon tayo so magmaliw a “makapabiskeg a tulong.” (Colosas 4:10, 11, NW) Bilang ‘tuan kakaaro,’ natulongan da itayo ed panaon na gonigon. (Uliran 17:17) Singa bilang, sanen nibulos so 220 a lingkor na Dios manlapud panangipangawan a kampo ed Sachsenhausen, a binantayan na saray Nazi a guardia nen 1945, nidunget ira ed 200 a kilometron panakar. Nambiahe ira bilang sakey a grupo, tan saray mabibiskeg so angiguyor ed saray angkelag a kariton ya akaluganan na saray makapuy la. Say resulta? Diad death march ya inateyan na masulok a 10,000 a priso ed panangipangawan a kampo, anggapoy inatey ed Tastasi nen Jehova. Sarayan salaysay a pinmaway ed saray publikasyon na Watch Tower, pati diad Yearbook of Jehovah’s Witnesses tan Jehovah’s Witnesses​—Proclaimers of God’s Kingdom, so mamaneknek a papabiskegen na Dios iray totoo to, ta pian ag-ira onsuko.​—Galacia 6:9. *

 Apabiskeg Lapud Lawak na Ministeryo Tayo

16. Panon itayon napabiskeg na regular a pibibiang ed ministeryo diad espiritual a paraan?

¹⁶ Say regular a pibibiang ed panangipulong ed Panarian so mamabiskeg ed sikatayo diad espiritual a paraan. Satan a kimey so ontulong ed sikatayo pian niyapasakey so Panarian na Dios tan napansiansia ed kanonotan so andi-anggaan ya arapen tan saray abenditon iilaloan ed satan. (Judas 20, 21) Saray Makasulatan a sipasipan ya itotongtong tayo ed ministeryo tayo so mangiter ed sikatayo na ilalo tan magmaliw itayon determinado a singa si propetan Miqueas, ya angikuan: “Manakar itayo naani dia ed ngaran nen Jehova a Dios tayo ed ando lan ando lawas.”​—Miqueas 4:5.

17. Antoran suhestion so niiter nipaakar ed saray panangiyaral na Biblia?

¹⁷ Napaelet so mismon relasyon tayo ed si Jehova diad malaknab a pangusar tayo ed Kasulatan a mangibangat ed arum. Alimbawa, sano mangikokondukta itayo na panangiyaral na Biblia diad tulong na libron Pikakabat a Mangitonton ed Andi-Anggaan a Bilay, makabat so pamasa tan paningbat ed pigaran nisitas a teksto. Ontulong iya ed iyaaralan tan napaaralem ni so mismon espiritual a pakatalos tayo. No mairap a natalosan na sakey ya iyaaralan so sakey a bangat odino ilustrasyon ed Biblia, nayarin usaren so pigaran sesyon ed panagaral no kobrian so sakey a kapitulo ed libron Pikakabat. Agaylan liket tayo no manparaan itayon maong tan lalon pansagpotan a tulongan so arum ya onapit ed Dios!

18. Iyilustra no panon so epektibon pangusar ed libron Pikakabat.

¹⁸ Kada taon, epektibon nauusar so libron Pikakabat pian natulongan so nilibo a magmaliw a dedikadon lingkor nen Jehova, tan kaiba ed saratan so dakerakel ya agni akabasa na Biblia. Singa bilang, nadngel na sakey a lakin Hindu diad Sri Lanka, sanen sikatoy ugaw ni, so itotongtong na sakey a Tasi nipaakar ed Paraiso. Kayari na pigaran taon, inasinggeran to iman ya agin bii, tan sikatoy impaiyaralan na Biblia ed asawa na saman a Tasi. Diad tua et inagew-agew ya impaiyaralan so balolaki, tan aganon asumpal so libron Pikakabat. Sikatoy ginmapon inmatendi ed amin a miting, pinultot ton amin so pisisiglaotan to’d datin relihyon to, tan sikatoy nagmaliw a manangipalapag na Panarian. Sanen sikatoy abautismoan, sikatoy mangiyaaral la na Biblia ed sakey a kabat to.

19. Diad pangiyuuna tayo ed Panarian, makaseguro tayo ed anto?

¹⁹ Say pangiyuna ed Panarian so mangitarok ed sikatayo na gayaga a makapabiskeg. (Mateo 6:33) Anggaman sasagmaken tayo so nanduruman subok, maliket tan maseseg tayon itultuloy so pangiyabawag ed maong a balita. (Tito 2:14) Nakakapet na dakel ed sikatayo iray kakaukolanen parad sigpot-panaon a panagpayunir, tan walaray manlilingkor ed lugar a babaleg so pankaukolan ed saray ebanghelisador. Antokaman ed sarayan paraan et maliket tayon gawaen pian iyalibansa so intereses na Panarian, matalek itayo ya aglingwanan nen Jehova so pansasagpot tayo tan say aron ipapatnag tayo nisesengeg ed ngaran to.​—Hebreos 6:10-12.

Mantultuloy Lapud Biskeg a Manlapud si Jehova

20. Panon tayon nipanengneng a mandedependi tayo ed panamabiskeg nen Jehova?

²⁰ Diad anggaay nayarian tayo, komon ta ipatnag tayo a maniilalo tayo ed si Jehova tan mandependi itayo ed sikato parad biskeg. Nagawaan tayo itan diad sigpot a panganamot ed saray espiritual a probisyon ya itatarya to panamegley na ‘matoor ya aripen.’ (Mateo 24:45) Say panagaral ed Salitay Dios diad pribadon paraan tan ed kongregasyon diad tulong na saray Kristianon publikasyon, impapuson pikakasi, espiritual a tulong na saray matatken, maabig iran alimbawa na matoor iran kapanisiaan, tan regular a pibibiang ed ministeryo so kabiangan ed saray probisyon a mamapaelet ed relasyon tayo ed si Jehova tan mamapabiskeg ed sikatayo a mantultuloy ed sagradon panaglingkor ed sikato.

21. Panon ya imbalikas di apostol Pedro tan Pablo a nakaukolan so biskeg a manlapud Dios?

 ²¹ Anggaman ed kaleteyan tayo bilang too, pabiskegen itayo nen Jehova a gawaen so linawa to no manmatalek itayo’d pananulong to. Lapud kabat nen apostol Pedro a nakaukolan so ontan a tulong, oniay insulat to: “No wala so mangiter, mangiter met ya unong na pakayari ya iter na Dios.” (1 Pedro 4:11) Tan impatnag nen Pablo so panag-matalek to’d inter na Dios a biskeg sanen inkuanto: “Panliketan ko so saray kakapuyan, dia ed saray inkapabpabanday, dia ed saray pankaukolan, dia ed saray pakausil-usil, dia ed saray irirap a makalanor ed Kristo; ta sano siak so makapuy, dia ed satan mabiskeg ak.” (2 Corinto 12:10) Komon ta ipatnag tayo so ontan met a kombiksion tan igloria so Soberanon Katawan a Jehova, a mamapabiskeg ed saray naksawan.​—Isaias 12:2.

[Saray paimano ed leksab]

Panon Yon Ebatan?

• Akin a nakaukolan na totoo nen Jehova so labas nen say gendat a biskeg?

• Anto so walan Makasulatan a prueba a papabiskegen na Dios iray lingkor to?

• Anto so pigara ed saray espiritual a probisyon ya intarya la nen Jehova pian pabiskegen itayo?

• Panon tayon nipanengneng a mandedependi tayo ed panamabiskeg na Dios?

[Tepetepet Parad Panagaral]

[Litrato ed pahina 12]

Onelet so mismon relasyon tayo ed si Jehova no uusaren tayo so Biblia a mangibangat ed arum