Anamoten so Panaon ed Panagbasa tan Panagaral

“Anamoten yo so [walan] panaon, ta saray agew sikara so mauges.”​—EFESO 5:16.

1. Akin a makabat so pangiyeskedyul ed panaon tayo, tan anto so ipapatnag na panguusar tayo’d panaon tayo nipaakar ed sikatayo?

 NIBABAGA a say “pangigeter ed panaon et pakagimperan na panaon.” Say too ya espisipikon mangipapanaon ed nepeg ton gawaen so makapangusar a maong ed panaon to. Oniay insulat nen makabat ya Arin Solomon: “Amin a bengatla et walaay aturon oras, walay panaon na amin a bengatla ed silong na tawen.” (Eclesiastes 3:1, Moffatt) Amin tayo so walaan na pareparehon sukat na panaon; dependi labat ed no panon so pangusar tayo ed satan. Say paraan na panangiyapasakey tayo’d saray prayuridad tayo tan panangiyeskedyul ed panaon tayo so malaknab a mangipatnag ed no anto so papablien tayo ed puso tayo.​—Mateo 6:21.

2. (a) Diad Sermon to ed Palandey, anto so imbaga nen Jesus nipaakar ed espiritual a pankaukolan tayo? (b) Anton dilin-panangusisa so manepeg?

² Obligado itayon mangusar ed panaon na panangan tan kakaugip lapud nakaukolan iratan na laman tayo. Balet komusta met so espiritual iran pankaukolan tayo? Kabat tayo a nepeg met iratan a napenek. Diad Sermon to ed Palandey, inyabawag nen Jesus: “Mapalar iray duruka ed espiritu; ta sikaray makankien na panariay’y tawen.” (Mateo 5:3) Satan so rason no akin a naynay itayon papanonotan na “matoor tan makabat ya aripen” ed kaimportantian na pangipanaon ed panagbasa tan panagaral ed Biblia. (Mateo 24:45) Nayarin moriaen yon importanti iyan maong, balet ta nayarin isipen yo met ya anggapo labat so magenap a panaon yo a manaral tan manbasa ed Biblia. No ontan, usisaen tayo pa iray paraan pian malaglaem tayon nipanaon ed bilay tayo so panagbasa ed Salitay Dios, personal a panagaral, tan panagdalepdep.

Pangipanaon ed Panagbasa tan Panagaral ed Biblia

3, 4. (a) Anto so insimbawa nen apostol Pablo nipaakar ed panangusar tayo’d panaon tayo, tan anto so laktipen na saya? (b) Anto so labay ya ibaga nen Pablo sanen sinimbawa to itayon ‘saliwen so niganan panaon parad sikatayon dili’?

³ Nipaakar ed panaon a pambibilayan tayo, amin tayo so nepeg ya ontalineng ed saray salita nen apostol Pablo: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal; ya anamoten yo so panaon [“saliwen so niganan panaon,” NW], ta saray agew sikara so mauges. Kanian aliwa kayo komon a makulangkulang, noag ingen talosan yo no anto so linawa na Katawan.” (Efeso 5:15-17) Siempre, lalanoren na sayan simbawa so amin ya aspekto na bilay tayo bilang dedikadon Kristiano, pati say panaon na panagpikasi, panagaral, saray miting, tan say sigpot a pibiang no posibli diad panangipulong ed  “maong a balita na panarian.”​—Mateo 24:14, NW; 28:19, 20.

⁴ Ompatnag a dakel ed saray lingkor nen Jehova natan so naiirapan a mangitunos ed panagbasa tan aralem a panagaral ed Biblia diad mismon kabibilay da. Mabitar, agtayo la naaruman na oras so sanagew tayo, kanian say simbawa nen Pablo et walaan na nikaduman kabaliksan. Diad Griego, say balikas a “saliwen so niganan panaon” so mankabaliksay panaliw bilang kasalat ed sananey a bengatla. Diad libro ton Expository Dictionary, inter nen W. E. Vine so kabaliksan na satan ya “anamoten a nagkalalo so kada pankanawnawa, a pagmaliwen itan a makagunggunan tuloy lapud ta agla itan nabawi no nadarak itan.” Manlapud anto odino iner so panganamotan (odino panaliwan) tayo na walan panaon parad panagbasa tan panagaral ed Biblia?

Nepeg ya Iletneg Tayoray Prayuridad

5. Akin tan panon tayon ‘naseguro so mas importanti iran bengatla’?

⁵ Nilikud ed sekular iran obligasyon tayo, dakel iray bengatlan gawaen tayo ed espiritual. Bilang dedikadon lingkor nen Jehova, walaan itayo na ‘daakan a kimey ed Katawan.’ (1 Corinto 15:58) Makasengeg ed saya, binilin nen Pablo iray Kristiano ed Filipos a “seguroen [da] so mas importanti iran bengatla.” (Filipos 1:10, NW) Kabaliksan na saya a nepeg ya iletneg iray prayuridad. Nepeg ya iyunan naynay iray espiritual a bengatla nen say materyal iran bengatla. (Mateo 6:31-33) Ingen, nakaukolan met so inkasimbang no kakapeten tayoray espiritual ya obligasyon tayo. Panon tayon ipanaon so nanduruman aspekto na Kristianon kabibilay tayo? Inreport na saray managbiahen manangasikaso a kalaktip ed “mas importanti iran bengatla” a nepeg ya asikasoen na sakey a Kristiano, say personal a panagaral tan panagbasa ed Biblia so napapaulyanan.

6. Anto so sasaglawien na panganamot ed walan panaon no nipaakar ed trabaho odino kimey ed abung?

⁶ Unong ya anengneng tayo la, say panganamot ed walan panaon so manasaglawi ed ‘panganamot a nagkalalo ed kada pankanawnawa’ tan “pagmaliwen itan a makagunggunan tuloy.” Kanian no makapuy so pangiyuugali tayo ed panagbasa tan panagaral ed Biblia, maabig ya usisaen tayon mismo no panon so panguusar tayo’d panaon tayo. No matrabahon maong so anapan tayo, a nauusar so dakerakel a panaon tan biskeg tayo, nepeg tayon ipikasi itan ed si Jehova. (Salmo 55:22) Nayarin iyarunsa tayo iray bengatla ta pian nawalaan itayo na malaglaem a panaon ed saray importantin bengatla a misiglaotan ed panagdayew ed si Jehova, laktip lay panagaral tan panagbasa ed Biblia. Lanang a nibabaga ya agbalot nasumpal so kimey na bii. Kanian nepeg ya iletneg met na saray Kristianon agagin bibii iray prayuridad da tan mangisagana ira na espisipikon panaon a manbasa tan manaral a maong ed Biblia.

7, 8. (a) Antoran kimey so napanaliwan tayo na panaon parad panagbasa tan panagaral? (b) Anto so gagala na panagligliwaan, tan panon a makatulong so pannodnonot ed saya pian niletneg tayo iray prayuridad?

⁷ Diad intiraminti, naanamot na maslak ed sikatayo so panaon parad panagaral bilang kasalat ed ag-importanti iran kimey. Nayarin tepetan tayoy inkasikatayon dili, ‘Kaunongan karakel so panaon ya uusaren ko ed panagbasa’d saray sekular a magasin odino peryodiko, panagbantay na telebisyon, panagdengel na musika, odino panagay-ayam na video games? Kasin mas dakel nin panaon so nauusar ko ed kompyuter nen say panaon ya uusaren ko’d pambasa ed Biblia? Inkuan nen Pablo: “Aliwa kayo komon a makulangkulang, noag ingen talosan yo no anto so linawa na Katawan.” (Efeso 5:17) Ompatnag a say agmakatunongan a panagbantay ed telebisyon so manunan rason no akin ya agnipapanaon a susto na dakel a Tastasi so personal a panagaral tan panagbasa ed Biblia.​—Salmo 101:3; 119:37, 47, 48.

⁸  Nayarin ikuan na arum ya agda nayarian so puros lan aral, nakaukolan da so panligliwaan. Anggaman tua itan, maabig a nodnonoten so karakel na panaon ya uusaren tayo ed panagrelaks tan ikompara itan ed oras ya uusaren tayo ed aktual a panagaral odino panagbasa ed Biblia. Nayarin makapasurprisa so resulta na satan. Anggaman nakaukolan, say panagligliwaan tan panagrelaks so nepeg ya ipanaon. Say gagala na saratan et pian narepreskoan itayo parad saray apasimbalon espiritual a kimey. Nabanalan lambengat so sakey a too ed dakel a programa na telebisyon tan video games, balet ta say panagbasa tan panagaral ed Salitay Dios so makaparepresko tan makapabiskeg.​—Salmo 19:7, 8.

No Panon so Pangipapanaon na Arum ed Panagaral

9. Antoray gungguna diad panumbok ed walan bilin diad bokletan Usisaen so Kasulatan ya Inagew-agew​—1999?

⁹ Oniay nikuan ed paunan-salita na 1999 ya edisyon na bokletan Usisaen so Kasulatan ed Inagew-agew: “Lalon maabig no kabuasan so pangonsidera ed inagew-agew a teksto tan saray komento manlapud sayan bokleta. Naliknam a singano si Jehova, say Engranden Instruktor, so mamabangon ed sika tekep na bilibilin to. Si Jesu-Kristo so mapropetikon nibaga bilang agunggunaan a manlapud bilibilin nen Jehova a kinabuasan: ‘Sikato [Jehova] onliing a kinabuasan, sikato liingen to so layag ko a pandengel a singa pandengel na saray abangatan.’ Say ontan a bilin so angiter ed si Jesus na ‘dila na saray abangatan’ ta pian nayarian to ‘no panon so panamabiskeg ed saray naksawan ed panamegley na saray salita.’ (Isaias 30:20; 50:4; Mateo 11:28-30) Say kinabuasan a pakaliing ed nipanpanaon a konseho manlapud Salita na Dios so aglambengat ontulong ed sikan manalona ed dili iran problemam noagta kinlongan to ka met tekep na ‘dila na saray abangatan’ pian ontulong ed arum.” *

10. Panon so pangipapanaon na arum nipaakar ed panagbasa tan panagaral ed Biblia, tan antoray gungguna ra?

¹⁰ Dakel a Kristiano so ontutumbok ed sayan bilin diad pambasa ra ed inagew-agew a teksto tan saray komento tan diad pambasa odino panaral ed Biblia diad masaksakbay nin kabuasan. Diad Pransya, sakey a matoor a payunir so masakbay ya  ombabangon ed kada kabuasan pian mangideboto na 30 minutos ed panagbasa to na Biblia. Anto so akatulong ed sikato pian nagawaan to itan ed loob na dakel a taon? Inkuanto: “Siak so pirmin apakiwas, tan mansiasiansia ak ed eskedyul ko ed panagbasa antokaman so nagawa!” Antokaman ya oras so pilien tayo ed loob na sanagew, say importantin bengatla et say pansiansia tayo ed eskedyul tayo. Oniay inkuan nen René Mica, a manpapayunir ed loob na masulok lan 40 taon diad Europa tan diad Amianen ya Aprika: “Nanlapula’d nen 1950 et kalat ko la so pambasa ed intiron Biblia kada taon, bengatlan agawaan ko la natan a 49 danay. Naliknak a makanakana iya pian napansiansiak so maapit a pisisiglaotan ko ed Manamalsak. Say panagdalepdep ed Salitay Dios so akatulong ed siak pian natalosan kon maong so inkahustisya tan arum niran kualidad nen Jehova tan lapuan met itan na pirmin biskeg.” *

“Saray Abaston Tagano ed Dugan Panaon”

11, 12. (a) Antoran espiritual ya “abaston tagano” so itatarya na “napanpiyaan ya inkargado”? (b) Panon a nitatarya iray “abaston tagano” diad dugan panaon?

¹¹ No panon a say regular a panangan so pakawalaan na maong a bunigas ed pisikal, say regular ya eskedyul ed panagaral tan panagbasa ed Biblia so maabig a pakagamoray maong a bunigas ed espiritual. Diad Ebanghelyo nen Lucas, oniay nabasa tayo iran salita nen Jesus: “Siopan peteg so napanpiyaan ya inkargado, say sakey a makabat, a turoen na katawan to ed ulop na saray katambayan to pian tuloytuloy a mangiter ed sikara na sukat na saray abaston tagano ed dugan panaon?” (Lucas 12:42, NW) Diad loob la na masulok a 120 a taon, saray espiritual ya “abaston tagano ed dugan panaon” so nitatarya ed Say Panag-Bantayan, ontan met ed arum niran libro tan publikasyon a nibase’d Biblia.

¹² Imanoen pa so balikas ya “ed dugan panaon.” Diad suston panaon, say “Baleg a Managbangat” tayo, si Jehova, diad panamegley na Anak to tan say aripen a klase, so angiwanwan ed say totoo to nipaakar ed doktrina tan kondukta. Singano narerengel tayon amin so sakey a bosis a mangibabaga ed sikatayo na: “‘Saya so dalan. Manakar kayo ditan, sikayon totoo,’ no bilang ta sikayon totoo so nepeg ya onla’d kawanan odino nepeg ya onla’d kawigi.” (Isaias 30:20, 21, NW) Niarum ni, sano mapetepet a babasaen na sinansakey so Biblia tan say amin a publikasyon na Biblia, mabetbet dan iisipen a saray punton nibabalikas ditan so nagkalalo lan nipapaarap ed sikara. On, say simbawa tan panangidirehi na Dios so onsabi ed sikatayo ed dugan panaon, ya ontulong ed sikatayo pian naresistian so tukso odino manggawa na makabat a desisyon.

Bayuboan so Maong ya Ugali ed Panagbasa

13. Anto so pigaran makapuy ya ugali ed panangan ed espiritual?

¹³ Pian nagunggunaan itayon maong ed saratan ya “abaston tagano” a nitatarya ed dugan panaon, nakaukolan a nawalaan itayo na maong ya ugali ed panagbasa. Makana so pakawalaan na regular  ya eskedyul ed panagbasa tan personal a panagaral ed Biblia tan say pansiansia ed satan. Kasin wala lay inyugali yon maong a panangan ed espiritual tan regular a panaon ed aralem a personal a panagaral? Odino kasin paparlasan yo lambengat so materyal a maalwar a niparaan parad sikatayo, a magangganat tayon kanen, a singa panangibaga, odino palalabasen tayo so pigaran panangan? Lapud makapuy ya ugali ed panangan ed espiritual, linmetey so arum ed pananisia​—a kinmasipa ni ingen.​—1 Timoteo 1:19; 4:15, 16.

14. Akin a makagungguna so maalwar a panangusisa ed materyal ya ompatnag a kabisado la?

¹⁴ Isipen na arum a kabat da laray manunan doktrina tan aliwan lan balobalo ed sikara so nipaparungtal ed kada artikulo. Kanian agda la nakaukolan so sistematikon panagaral tan iyaatendi ed miting. Balet, ipapanengneng na Biblia a nakaukolan a napanonotan itayo ed saray bengatlan naaralan tayo la. (Salmo 119:95, 99; 2 Pedro 3:1; Judas 5) No panon a nitatarya na maong a kusinero iray pareparehon manunan rekado diad nankakapigan mananam a taway, itatarya met na aripen a klase so masustansyan espiritual a tagano diad nanduruman tuloy a paraan. Anggan diad saray artikulo a mangokobri ed saray teman mabetbet a nipaliwawa la nensaman, walaray mas maabig a punto ya agtayo labay a nasaew. Say punto et mandependi so nagamoran tayo ed pambabasa tayo’d materyal diad karakel na panaon tan sagpot ya uusaren tayo ed panagaral.

Saray Espiritual a Gungguna Manlapud Panagbasa tan Panagaral

15. Panon a makatulong ed sikatayo so panagbasa tan panagaral ed Biblia pian magmaliw itayon magmaong a ministro na Salitay Dios?

¹⁵ Dakerakel a gungguna so nagamoran tayo diad panagbasa tan panagaral ed Biblia. Natulongan itayon makakapet ed sakey ed saray manunan Kristianon responsabilidad tayo, salanti, nayari itayon magmaliw a “tometeger ya anggapo so ibaing to, ya agamilen mo ed matunong so salita a tua.” (2 Timoteo 2:15) No lalo itayon manbasa tan manaral na Biblia, lalon napano iray isip tayo na saray kanonotan na Dios. Insan, singa si Pablo, sikatayo so ‘makapankatunongan ed saray totoo unong Kasulatan, ya ipaliwawa tan paneknekan panamegley na saray reperensia’ so alay abig a katuaan na saray gagala nen Jehova. (Gawa 17:2, 3, NW) Ombulaslas so dunong tayo ed panagbangat, tan say pitotongtong tayo, saray paliwawa, tan simbawa tayo so lalon makapabiskeg ed espiritual.​—Uliran 1:5.

16. Diad antoran paraan a personal itayon nagunggunaan ed panagbasa tan panagaral ed Salitay Dios?

¹⁶ Niarum ni, say panaon a nitalaga ed panangusisa ed Salitay Dios so makatulong ed sikatayo pian lalo tayon nitunos a maong so bilay tayo ed saray dalan nen Jehova. (Salmo 25:4; 119:9, 10; Uliran 6:20-23) Satan so mamabiskeg ed espiritual iran kualidad tayo, a singa say inkamapaabeba, katooran, tan liket. (Deuteronomio 17:19, 20; Apocalipsis 1:3) Sano iyaplika tayo so pikakabat a nagamoran tayo ed panagbasa tan panagaral ed Biblia, panggayagaan tayo so mabulos ya iyagus na espiritu na Dios diad bilay tayo, a manresulta ed mas daakan a bunga na espiritu ed amin a gawaen tayo.​—Galacia 5:22, 23.

17. Panon a makaapekto so karakel tan kualidad na personal a panagbasa tan panagaral tayo ed Biblia diad siglaotan tayo ed si Jehova?

¹⁷ Mas importanti, say panaon ya inanamot tayo manlapud arum ya aktibidades pian makapanbasa tan makapanaral ed Salitay Dios so pakagunggunaan a tuloy no nipaakar ed siglaotan tayo ed Dios. Impikasi nen Pablo a saray kapara ton Kristiano so ‘napano komon na kakabatan na linawa [na Dios] ed amin a karunongan a  maespiritu tan pakatalos, mankurang a makana ed Katawan ya onarap ed amin a makapaliket ed sikato.’ (Colosas 1:9, 10) Mipadpara, nepeg a ‘napano [itayo] ed kakabatan na linawa to ed amin a karunongan a maespiritu tan pakatalos,’ ta pian ‘makapankurang itayon makana ed Katawan.’ Malinew, say pakagamor tayo ed bendision tan panangabobon nen Jehova so malaknab ya akadependi ed karakel tan kualidad na personal a panagbasa tan panagaral tayo ed Biblia.

18. Antoran bendision so nagamoran tayo no tumboken tayoray salita nen Jesus a nikurit ed Juan 17:3?

¹⁸ “Saya sikato so andi-angaan a bilay, a naamtaan da ka a saksakey a tuan Dios, tan saman so imbakim, salanti, Jesu-Kristo.” (Juan 17:3) Sakey itan ed saray tekston piusar na saray Tastasi nen Jehova pian tulongan so arum a makatalos ed kaimportantian na panaral ed Salitay Dios. Seguradon importanti ed balang sakey ed sikatayo so mismon panggawa ed satan. Say mismon ilalo tayo ed pambilay ya andi-anggaan so mantegteen ed ibulaslas tayo ed pikakabat ed si Jehova tan ed Anak to, si Jesu-Kristo. Tan isipen pa lambengat so kabaliksan na satan. Agbalot mangangga so pakaaral tayo ni dakel nipaakar ed si Jehova​—tan wala so inkamagnayon pian makapanaral itayo nipaakar ed sikato!​—Eclesiastes 3:11; Roma 11:33.

[Saray paimano ed leksab]

Saray Tepet a Repasoen

• Anto so nipaparungtal ed paraan na panguusar tayo’d panaon tayo?

• Antoran kimey so napanganamotan tayoy panaon parad panagbasa tan panagaral ed Biblia?

• Akin a bantayan tayo so ugali tayo ed panangan ed espiritual?

• Antoran gungguna so nagamoran ed panagbasa tan panagaral ed Kasulatan?

[Tepetepet Parad Panagaral]

[Saray litrato ed pahina 20, 21]

Say regular a pambasa tan panaral ed Biblia so ontulong ed sikatayo ‘pian suston nausar so salita na katuaan’

[Saray litrato ed pahina 23]

Nagunggunaan itayon maong no balansien tayo so arum iran aktibidades ed okupadon bilay tayo ya akatekep iray espiritual a gegemtan