Akin a Magmaliw a Dilin-Managsakripisyo?

Si Bill so de-pamilyaan a masulok lan 50 años to, a managbangat nipaakar ed teknolohiya na panagpaalagey. Diad intiron taon, diad dilin gastos to et sikatoy manguusar na dakel a simba pian ontulong ed panangiplano tan pangipaalagey na saray Kingdom Hall parad saray kongregasyon na Tastasi nen Jehova. Si Emma et de-aral tan kualipikadon maong a 22 años a marikit. Imbes a gegemtanen to so personal iran kalat tan likeliket, sikatoy manguusar na 70 oras kada bulan bilang sakey a ministro, ya ontutulong ed totoo pian natalosan da so Biblia. Si Maurice tan Betty so nanretiro la. Imbes a manrelaks la, sikaray inmalis ed sananey a bansa pian tulongan iray totoo diman a makaaral na katuaan nipaakar ed saray gagala na Dios ed dalin.

SARAYAN indibidual so agmangipapasen ed inkasikara a nikaduma odino ekstra-ordinaryo. Sikaray ordinaryon totoo a manggagawa ed ipapasen da a dugan bengatla. Akin ya uusaren day panaon, biskeg, abilidad, tan saray kayarian da ed pankaabigan na arum? Say mamapakiwas ed sikara et say aralem a panangaro ed Dios tan ed kapara ran totoo. Sayan aro so papakiwasen na puron dilin-panagsakripisyo ya awawey ed balang sakey ed sikara.

Antoy kabaliksan na dilin-panagsakripisyo ya awawey? Bueno, say pagmaliw a dilin-managsakripisyo et agmankabaliksan na pambilay bilang sakey ya ermitanyo odino asetiko. Agkaukolan so pirmin pangiburi ed dili a mangekal ed sikatayo na gayaga odino kapenek. Singa inkuan na The Shorter Oxford English Dictionary, say dilin-panagsakripisyo et kabaliksan toy “pangisuko ed dilin interes, liket, tan pilpilalek na sakey, nisengeg ed obligasyon odino pankaabigan na arum.”

Si Jesu-Kristo​—Say Manunan Ehemplo

Say bogbogtong ya Anak na Dios, si Jesu-Kristo, so manunan ehemplo na sakey a walaan na dilin-panagsakripisyo ya awawey. Antis na kiwawala to bilang too, say bilay to so makapasagyat tan makapenek a tuloy. Sikatoy awalaan na maapit a siglaotan ed si Ama to tan ed saray espiritun pinalsa. Sakey ni, say Anak na Dios so angusar ed saray abilidad to diad makapaangat tan makapaliket iran kimey bilang “uloen a komikimey.” (Uliran 8:30, 31) Sikatoy peteg a nambilay ed saray kipapasen a superyor a tuloy nen say nanggayagaan na sankayamanan a too ed dalin. Onkomadua ed si Jehova, sikatoy walaan na nitandoro tan alay abig a posisyon ed tawen.

 Ingen, say Anak na Dios et “nilukpos to so inkasikato, ya inala to so ereng na sakey ya aripen, ya agawan kaulibay na saray totoo.” (Filipos 2:7) Mabulbulos ton insuko so amin a personal iran pankaabigan to diad impagmaliw ton too tan inyapay toy inkasikato bilang dondon ta pian bagbagen so epekto na ginawa nen Satanas. (Genesis 3:1-7; Marcos 10:45) Kabaliksan na satan so pambilay ed limog na makasalanan a katooan diad mundo a walad pakayari nen Satanas a Diablo. (1 Juan 5:19) Kabaliksan to met so pananos ed irap tan ag-inkakombinienti. Balet, antokaman so sakripisyo ya arapen nen Jesu-Kristo, sikatoy determinadon manggawa ed linawa nen Ama to. (Mateo 26:39; Juan 5:30; 6:38) Saya so anubok a maong ed aro tan katooran nen Jesus. Kaunongan kalaknab so pansakripisyo to? “Nampaabeba,” so inkuan nen apostol Pablo, “a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].”​—Filipos 2:8.

“Yatol Yo so Sayan Kalakal ed Sikayo”

Napapaseseg itayon manumbok ed ehemplo nen Jesus. “Yatol yo so sayan kalakal ed sikayo, a wala met nensaman ed Kristo Jesus,” so impaseseg nen Pablo. (Filipos 2:5) Panon tayon nagawaan iya? Say sakey a paraan et “agnengnengen na balang sakey ed sikayo so kayarian ton dili, noag balang sakey ed sikayo nengnengen to met so saray bengatlan kayarian na saray arum.” (Filipos 2:4) Say peteg ya aro et “agto anapen so kien to.”​—1 Corinto 13:5.

Saray manangiyansakit ya indibidual so mabetbet a mangipapanengneng na andi-siblet a dedikasyon diad panserbi ed arum. Balet, natan et dakel a totoo so onkiling a mapaga labat ed sikaran dili. Say mundo et walaan na siak-ni ya awawey. Kaukolan tayoy manbantay sumpa ed espiritu na mundo lapud ta no ontalona itan a manmoldi ed panmoria tan awawey tayo, maseguron say manunan ikdan tayo na importansia et say dilin pilpilalek tayo. Insan amin lan gawaen tayo​—no panon so pangusar tayo ed panaon, biskeg, tan kaykayarian tayo​—et nisentro labat ed saray dilin-kapagaan. Kanian kaukolan tayon labanan iyan impluensia.

No maminsan balet, anggan say simbawan walaan na maabig a getma et manaeg ed dilin-panagsakripisyo ya awawey tayo. Diad pakakamoria ed pansumpalan na dilin-panagsakripisyon kurang nen Jesus, inkuan nen apostol Pedro: “Kasian moy inkasika, Katawan.” (Mateo 16:22, NW) Mapatnag a mairap ton awaten so inkamabulos nen Jesus ya ompatey nisesengeg ed inkasoberano nen Ama to tan ed kisalba na katooan. Kanian sinali ton isuawi si Jesus nanlapud satan a kurang.

‘Iburim so Inkasika’

Panon so inkiwas nen Jesus? Ibabaga na salaysay: “Sikato balet nen pinmigar, tan sankanengneng to so saray babangatan to, pinoot [“binaat,” NW] to si Pedro, et kuan to, Onla ka ed beneg ko, Satanas; ta agmo nononoten so saray nipaakar ed Dios, noag saray nipaakar ed saray totoo.” Insan tinawag nen Jesus so karaklan pati saray babangatan to tan inkuanto: “No siopaman a too labay toy ontumbok ed siak, iburi to so inkasikato, et awiten to so krus [“panamairapan a kiew,” NW] to, tan tumboken toak.”​—Marcos 8:33, 34.

Manga 30 taon kayari ton imbaga iya ed si Jesus, impanengneng nen Pedro a diad saman to atalosan so kabaliksan na dilin-panagsakripisyo. Agto pinaseseg iray kapananisiaan to a manrelaks tan kasian day inkasikara. Imbes, pinaseseg ira nen Pedro ya iparaan day kanonotan da parad aktibidad tan agla papaimpluensiaan ed saray datin minumundon pilpilalek da. Anggaman ed saray subok, kaukolan dan itultuloy ya iyuna ed bilay da so panggawa ed linawa na Dios.​—1 Pedro 1:6, 13, 14; 4:1, 2.

Say makatumang a tuloy a kurang a nayarin gemtanen na siopaman ed sikatayo et say pangiter ed si Jehova na amin a walad sikatayo, a matoor a tumboken si Jesu-Kristo tan paiwanwan tayo ed Dios iray aktibidad tayo. Nipaakar ed saya, angipanengneng si Pablo na maabig ya ehemplo. Say pakatebek to ed inkaganatan tan say pisalsalamat to ed si Jehova so amakiwas ed sikato ya ipulisay iray minumundon ambisyon odino iilaloan ya  angisuawi komon ed sikato ed panggawa na linaway Dios. “Diad biang ko,” inkuanto, “panliketan kon maong so pangusar tan sigpot a pausar” diad panserbi ed pankaabigan na arum. (2 Corinto 12:15, NW) Inusar nen Pablo iray abilidad to pian ilaknab so intereses na Dios, aliwan say dilin pankaabigan to.​—Gawa 20:24; Filipos 3:8.

Panon tayon usisaen so inkasikatayo pian amtaen no kasin walaan itayo na panmoria a singa ed si apostol Pablo? Nayarin tepetan tayoy inkasikatayo na singa saraya: Panon kon uusaren so panaon ko, say biskeg ko, abilidad ko, tan kaykayarian ko? Kasin uusaren ko iraya tan arum niran mablin langkap pian iyuna labat iray dilin pankaabigan ko, odino kasin uusaren ko iratan pian tulongan so arum? Kasin ninonot ko lay nagkalalon pibiang ed manangiliktar-bilay a kimey a pangiyabawag na maong a balita, bilang sigpot-panaon a manangiyabawag na Panarian? Kasin nagkalalon makapibiang ak ed saray aktibidad a singa say panangipaalagey odino panagmantini ed saray Kingdom Hall? Kasin aanamoten ko iray pankanawnawa pian tulongan iray mankaukolan? Kasin iiter ko ed si Jehova so sankaabigan ko?​—Uliran 3:9.

‘Lalo a Maliket so Mangiter’

Ingen, peteg kasin makabat so pagmaliw a dilin-managsakripisyo? On! Kabat nen Pablo unong ed personal ya eksperiensia to a makatumang itan ya awawey. Angitarok itan na baleg a liket tan pirmi ya inkapenek ed personal a paraan. Impaliwawa to iya ed saray mamasiken a nanlapud Efeso sanen nabet to ra diad Mileto. Inkuan nen Pablo: “Dia ed amiamin a pamaakaran inter ko ed sikayo so pangaligan, dia ed panagsagpot yo na ontan [diad dilin-masakripisyon paraan], nepeg yo a tulongan so saray makapuy, et nonot yo so saray salita nen Jesus a Katawan a sikato a dili kuan to: Lalo a mapalar so mangiter [“maliket,” NW] nen say mangawat.” (Gawa 20:35) Minilyon a totoo so makakaromog a say panangipatnag ed sayan klase na awawey et mangitarok la natan na baleg a liket. Mangitarok met itan na gayaga ed arapen sano tumangan la nen Jehova iramay mangiyuuna ed intereses to tan ed arum nen say ed sikaran dili.​—1 Timoteo 4:8-10.

Sanen atepetan no akin a pansasagpotan ton tulongan so arum a mangipaalagey na saray Kingdom Hall, inkomento nen Bill: “Say panulong ed kaslakan ya ipapasen a memelag iran kongregasyon ed onian paraan et mangiiter ed siak na dilin-inkapnek. Panggagayagaan kon usaren iray dunong ko tan inkalarinok parad kagunggunaan na arum.” Akin a denesidi nen Emma ya usaren so biskeg tan saray abilidad  to pian tulongan so arum a makaaral na Makasulatan a katuaan? “Agko naisip so panggawa na arum nin bengatla. Legan a kaksilan ko ni tan sarag ko ni mantrabaho, labay kon gawaen so anggaay nayarian ko pian napaliket si Jehova tan natulongan so arum. Say pangisakripisyo ed pigaran materyal iran kayarian et melag labat iratan ed biang ko. Gagawaen ko labat so nepeg kon gawaen makasengeg ed agawaan la nen Jehova ed siak.”

Si Maurice tan Betty so andian na pagbabawi ed agda impangiyabuloy ed mainawan kabibilay, kayari na saray taon na imbunek a panagpabaleg tan panaglegpet ed pamilya ra. Natan ta nanretiro la ra, labay dan itultuloy so panggawa na bengatlan mausar tan makabaliksan ed bilay da. “Agmi labay so basta labat la manrelaks natan,” so kuan da. “Say panulong ed arum a makaaral nipaakar ed si Jehova diad sananey a bansa so mangiiter ed sikami na pankanawnawa pian itultuloy a gawaen so bengatlan walay gagala.”

Kasin determinado kan magmaliw a dilin-managsakripisyo? Aliwa iyan mainomay. Wadtan so tuloytuloy a labanan na ag-ayadyarin atooan iran pilalek tayo tan say masimoon a pilalek tayo a paliketen so Dios. (Roma 7:21-23) Balet nayarian tayoy manalo ed satan a pilalaban no paiwanwan tayoy bilay tayo ed si Jehova. (Galacia 5:16, 17) Seguradon nodnonoten to so dilin-panagsakripisyo tayo diad serbisyo to tan mayamyaman to itayon bendisionan. On, lukasan nen Jehova a Dios ‘so saray pinto na tawen tan ikalbo to naani ed sikayo so sakey a bendision, ya anggapo naani so pasen a makasarag a mangawat ed satan.’​—Malaquias 3:10; Hebreos 6:10.

[Litrato ed pahina 23]

Walaan si Jesus na dilin-panagsakripisyo ya awawey. Ontan ka ta met?

[Saray litrato ed pahina 24]

Inyapasakey nen Pablo iray sagpot to ed panangipulong na Panarian