1. Antoy agawa ed pamilya nen Jose lapud ibeg na saray kuya to?

INAR-ARO nen Jacob so amin ya ananak to, balet espisyal ed sikato si Jose ya manga 17 so taon tod saman. Antoy alikna na saray kuya nen Jose? Akaibeg ira ed sikato kanian binusol da. Anggapo pay aliwan ginawa nen Jose ed saray kuya to pian busolen da. Balet sikatoy inlako da pian magmaliw ya aripen tan tinilaan da so ama ra. Imbaga dan pinatey na atap ya ayep so paborito ton anak. Lapud ibeg et aderal so kareenan na pamilya ra tan asakisakitan si Jacob.​—Gen. 37:3, 4, 27-34.

2. Base ed Galacia 5:19-21, akin ya makapatey so ibeg?

² Diad Biblia, say ibeg * et sakey ed saray makapatey ya “gawa na laman” ya lapud satan et nayarin agnatawir na sakey so Panarian na Dios. (Basaen so Galacia 5:19-21.) Say ibeg so kaslakan ya rason no akin ya walay pambubusolan, pankokolkol, tan sanok.

3. Anto ray pantongtongan tayo ed sayan artikulo?

³ Nanengneng ed ginawa na saray kuya nen Jose ya say ibeg et deralen toy maong ya ulopan tan kareenan ed pamilya. Ompan iisipen tayo ya agtayon balot aligen so ginawa ra, balet tandaan ya amin tayo et agperpekto tan mapalikdo so puso tayo.  (Jer. 17:9, paimanod leksab) Kanian agtayo la pankelawan ya no maminsan et makaibeg tayo ed arum. Pantongtongan tayo so pigaran alimbawa ed Biblia pian naamtaan tayo no anto ray rason no akin ya nayarin ontubo so ibeg ed puso tayo. Insan tayo pantongtongan iray praktikal ya paraan pian naekal tayo itan ed puso tayo tan mansiansia so kareenan.

4. Akin et akaibeg ed si Isaac iray Filisteo?

⁴ Kayamanan. Mayaman si Isaac, kanian akaibeg ed sikato iray Filisteo. (Gen. 26:12-14) Tinatabonan da ni ingen iray bobon ya pangaasolan na danum parad saray ayayep to. (Gen. 26:15, 16, 27) Saray arum ya totoo natan et singa saraman ya Filisteo. Makakaibeg ira ed saray mas mayaman nen say sikara. Pipirawaten da ya niwala met ed sikara iray bengatlan wala ed arum tan labalabay da ni ingen ya naandi komon so kayamanan na arum.

5. Akin ya akaibeg ed si Jesus iray lider na relihyon?

⁵ Atension na arum. Akaibeg ed si Jesus iray Judion lider na relihyon lapud sikatoy labalabay na dakel ya totoo. (Mat. 7:28, 29) Irerepresenta nen Jesus so Dios, tan ibabangat to so katuaan. Balet, sikatoy pinauges na sarayan lider na relihyon pian naderal so reputasyon to. (Mar. 15:10; Juan 11:47, 48; 12:12, 13, 19) Antoy naaralan tayo? Imbes ya makaibeg tayo ed saray agagi ya labalabay na arum lapud wala ray balibalin kualidad da, mas maong no aligen tayo iray balibalin ugali da.​—1 Cor. 11:1; 3 Juan 11.

6. Antoy ginawa nen Diotrefes lapud akaibeg?

⁶ Pribilehyo ed kongregasyon. Nen inmunan siglo, akaibeg si Diotrefes ed saramay mangidadaulo ed Kristianon kongregasyon. Labalabay toy “magmaliw a manunaan,” kanian angikayat na labirlabir pian naderal so reputasyon nen apostol Juan tan arum ni ran agagi ya walaan na responsabilidad. (3 Juan 9, 10) Anggano agtayo met aligen so ginawa nen Diotrefes, ompan makaibeg tayo ed sakey ya agi ya naikdan na asainmin ya pipirawaten tayo​—lalo la no pakalikna tayo et kualipikado tayo met ed satan ya responsabilidad.

7. Antoy epekto ed sikatayo na ibeg?

⁷ Say ibeg et singa dika ya amperen toy ibaleg na tanaman. No abuloyan tayon onlamot itan ed puso tayo, mairap lan ekalen. Tan lalo itan ya ombuna no maimon, mapaatagey, tan makasarili tayo. Amperen na ibeg so iyaligwas na maong iran kualidad, singa say aro, pililikna, tan kaabigan. Kanian no nalikas tayo ya onggagapo lan ontubo so ibeg ed puso tayo, kaukolan tayon bagoten itan ya tampol. Panon tayon gawaen itan?

8. Anto ran kualidad so makatulong pian naekal tayo so ibeg ed puso tayo?

⁸ Naekal tayo so ibeg ed puso tayo no pansagpotan tayoy manpaabeba tan mankontento. No say puso tayo et napno na sarayan maong ya kualidad, anggapo lay tuboan na ibeg. Say too ya mapaabeba et agto iisipen ya sikatoy mas maong tan mas makanepegan nen say arum. (Gal. 6:3, 4) Say too ya kontento et maliket ed no antoy wala ed sikato tan agto ikokomparay sarili to ed arum. (1 Tim. 6:7, 8) Kanian no nanengneng na mapaabeba tan kontenton too ya makakaawat na bendisyon so arum, sikatoy miliket ed sikara.

9. Base ed Galacia 5:16 tan Filipos 2:3, 4, antoy nitulong ed sikatayo na masanton espiritu?

⁹ Kaukolan tayo so masanton espiritu na Dios pian agtayo magmaliw ya maibeg tan nipanengneng tayo so inkamapaabeba tan inkakontento. (Basaen so Galacia 5:16; Filipos  2:3, 4.) Natulongan itayo na masanton espiritu nen Jehova ya usisaen iray sankaaraleman ya kanonotan tan motibo tayo. Diad tulong nen Jehova, sarag tayon ekalen iray mauges ya kanonotan tan liknaan, tan salatan tayo iratan na makapabiskeg iran kanonotan. (Sal. 26:2; 51:10) Pantongtongan tayo no panon ya nilabanan nen Moises tan Pablo so tendensian makaibeg.

10. Antoy agawa ya asubok so inkamapaabeba nen Moises? (Nengnengen so litrato ed apis.)

¹⁰ Baleg so autoridad nen Moises ed saray totoo na Dios, balet agto insiblet itan ya pribilehyo ed arum. Singa bilang, aminsan et inala nen Jehova so arum ya masanton espiritu ya walad si Moises tan inyan to itan ed pigaran mamatatken ed Israel ya akaalagey ed paliber na tolda ya pantitiponan. Kayari na satan, abalitaan nen Moises ya walay duaran mamatatken ya akaawat na masanton espiritu tan kinmiwas iran singa propeta anta ag-ira linma ed tolda ya pantitiponan. Antoy reaksion nen Moises nen imbaga nen Josue ed sikato ya patundaen to irayan duaran mamatatken? Ag-akaibeg si Moises ed atension ya inter nen Jehova ed sikara. Lapud mapaabeba, sikatoy maliket ed pribilehyo ya naawat da. (Num. 11:24-29) Antoy naaralan tayo ed si Moises?

11. Panon ya naalig na saray elder si Moises?

¹¹ No sakey kan elder, antoy reaksion mo no kerewen ed sika ya ipasal mo so sakey ya brother parad responsabilidad ya papablien mo? Singa bilang, nayarin papablien mon maong so pribilehyom ya mangikondukta na Panagaral na Panag-bantayan kada simba. Anggaman ontan, no mapaabeba ka ya singa si Moises, agka manisip na negatibo no kerewen ed sika ya ipasal so sakey ya brother pian diad arapen et sarag to lan gawaen itan. Imbes, maliket mon ipasal so agim.

12. Panon ya ipapanengneng na dakel ya agagi so inkakontento tan inkamapaabeba?

¹² Wala ni sakey ya situasyon ya pakakasubokan na arum ya maedad lan brother. Pigaran dekada ya sikara so coordinator na ulop na mamatatken. Balet no nasabi day edad ya 80, mabulos dan ipasa ed arum so responsabilidad da. Ontan met, saray manangasikaso na sirkito ya manedad na 70 et mapaabeba dan ikbanan so pribilehyo da tan maliket dan awaten so balon asainmin diad arum ya klase na panaglingkor. Tan diad agano ni ran taon, dakel ya membro na pamilyan Bethel diad interon mundo so inyasain la ed field. Anggapoy sakit na linawa na sarayan matoor ya agagin lalaki tan bibii ed saray sinmalat ed sikara.

13. Antoy rason ya posiblin makaibeg komon si Pablo ed 12 apostol?

¹³ Si apostol Pablo so sakey nin maong ya alimbawa na inkakontento tan inkamapaabeba. Agto inabuloyan ya ontubo so ibeg ed puso to. Nansagpot ya maong ed ministeryo, balet oniay mapaabeba ton imbaga: “Siak so sankaabebaan ed saray apostol, tan agak manepeg a tawagen ya apostol.” (1 Cor. 15:9, 10) Saray 12 apostol et akaiba day Jesus legan na ministeryo to diad dalin, balet si Pablo et nagmaliw ya Kristiano kayari la na impatey tan inkioli nen Jesus. Anggaman aturo si Pablo ya “apostol ed saray nasyon,” agniiter ed sikato so espisyal ya pribilehyon magmaliw ya sakey ed saray 12 apostol. (Roma 11:13; Gawa 1:21-26) Imbes ya makaibeg si Pablo ed sikara tan ed impiulop da ed si Jesus, sikatoy nansiansian kontento ed no antoy walad sikato.

14. Antoy gawaen tayo no kontento tan mapaabeba itayo?

¹⁴ No kontento tan mapaabeba tayo, aligen tayoy apostol Pablo tan respetoen tayo iray inikdan nen Jehova na autoridad. (Gawa  21:20-26) Anuro si Jehova na saray lalaki ya mangidaulo ed Kristianon kongregasyon. Anggano nalilingo ira, ipapasen ira nen Jehova bilang “regalo a lalaki.” (Efe. 4:8, 11) No respetoen tayo irayan aturon lalaki tan mapaabeba tayon uunoren so panangigiya ra, mansiansia tayon maapit ed si Jehova tan mareen so ulopan tayo.

15. Antoy nepeg tayon gawaen?

¹⁵ Naderal so kareenan no abuloyan tayon mansiansia so ibeg. Kaukolan tayo sirin ya ekalen itan ed mismon puso tayo tan paliisan tayoy manggawa na bengatla ya mamatubo na ibeg ed puso na arum. Importante itan pian naunor tayo iyan ganggan nen Jehova: “Seetan [yon] gawaen iray bengatlan mamapawala na kareenan tan saray bengatlan makapabiskeg ed sakey tan sakey.” (Roma 14:19) Anto ray espisipikon nagawaaan tayo pian natulongan tayoy arum ya labanan so tendensian makaibeg, tan panon tayon napansiansia so kareenan?

16. Panon tayon natulongan iray agagi ya nalabanan so tendensian makaibeg?

¹⁶ Say ugali tan kiwas tayo et baleg so impluensya to ed arum. Labay na mundo ya ‘ipangta’ tayo ray kaykayarian tayo. (1 Juan 2:16) Balet satan ya ugali et panlapuan na ibeg. Napaliisan tayoy mangitanem na ibeg ed puso na arum no agtayo lanang ya is-istoryaen iray kaykayarian tayo o plano tayon saliwen. Sakey ni, agtayo ipapasirayew iray pribilehyo tayo ed kongregasyon, ta no atan lan lanang so  bungay sangi tayo, ompan sikatayo laingen so rason ya ontubo so ibeg ed puso na arum. Balet, no ipanengneng tayoy personal ya interes ed saray agagi tan komendaan tayo ra ed saray maabig ya nagagawaan da, natulongan tayo ran nalikna so inkakontento, tan mansiansia so pankakasakey tan kareenan ed kongregasyon.

17. Antoy asarag ya gawaen na saray kuya nen Jose, tan akin?

¹⁷ Sarag tayon ekalen so ibeg ed puso tayo! Imanoen tayoy ginawa na saray kuya nen Jose. Kayari na dakel a taon manlapud samay impangilako ra ed sikato, linma ra ed Ehipto. Antis ton impaamta ed saray kuya to ya sikato si Jose, sinubok to ni no talagan anguman la ra. Angiparaan na panangan parad sikara tan maminlima ya mas dakel a naakan so ingganggan ton iparungo ed bolirek ya si Benjamin. (Gen. 43:33, 34) Balet anggapoy pakapatnagan ya akaibeg ed si Benjamin iray kuya to. Anengneng nen Jose ya talagan iyaansakit day agi ra tan say ama ran si Jacob. (Gen. 44:30-34) Lapud inekal la na saray kuya nen Jose so ibeg ed puso ra, pinmawil so kareenan ed pamilya ra. (Gen. 45:4, 15) Mipadpara, no ekalen tayo met so anggan daiset ya ibeg ed puso tayo, makatulong tayo pian mansiansian mareen so pamilya tan kongregasyon.

18. Base ed Santiago 3:17, 18, antoy resulta no ontulong tayo pian niwalay mareen ya kipapasen?

¹⁸ Labay nen Jehova ya ekalen tayo so ibeg ed puso tayo tan panseetan tayo ray bengatlan mamapawala na kareenan. Kaukolan tayoy mansagpot pian nagawaan tayo itan. Singa naaralan tayo ed sayan artikulo, walay tendensia tayon makaibeg. (Sant. 4:5) Tan iimpluensyaan itayo na sayan mundo ya nawalaan na ontan ya ugali. Balet no pansagpotan tayon ipanengneng so inkamapaabeba, inkakontento, tan panangapresya, agla ontubo so ibeg ed puso tayo. Tan bilang resulta, makatulong tayo pian niwalay mareen ya kipapasen ya ditan et ombaleg so bunga na inkatunong.​—Basaen so Santiago 3:17, 18.