1-2. Base ed 1 Pedro 4:7, 8, antoy makatulong pian nasarag tayo ray mairap a situasyon?

DIAD sayan kaunoran a parte na “kaunoran iran agew,” nayarin makaeksperiensya tayoy grabe iran subok. (2 Tim. 3:1) Singa bilang, kayari na eleksion ed sakey a bansa ed Africa, nagmaliw ya magulogulo so situasyon ditan. Masulok ya anem bulan a mapeligron maong so kipapasen na saray agagi ta wala ray panlalaban ed lugar ya kawalaan da. Panon dan asarag itan ya mairap a situasyon? Say arum et akiayam ed abung na agagi ya walad mas maligen ya lugar. Imbaga na sakey a brother: “Maong labat ta kaibak iray kakaarok. Pinaseseg mi sakey tan sakey.”

² No onggapo la so “baleg a kairapan,” seguradon labay tayo ya kaiba tayo ray kakaaro ya amta tayon mangaaro ed sikatayo. (Apo. 7:14) Importante sirin ya paeleten tayo la natan so bedber na pankakaaro tayo. (Basaen so 1 Pedro 4:7, 8.) Dakel so naaralan tayo ed saray naeksperiensya nen Jeremias, ya akaliktar ed samay panaon antis ya naderal so Jerusalem lapud tulong na saray kakaaro to. * Panon tayon naalig si Jeremias?

3. (a) Antoy rason ya nayarin labay komon nen Jeremias so manbukbukor? (b) Antoy imbalikas nen Jeremias ed sekretaryo to ya si Baruc, tan antoy resulta na satan?

³ Nayarin masulok ya 40 taon ya akaiba nen Jeremias iray agmatoor ya totoo, singa saray kakaabay tan arum ya kakanayon to ya  taga Anatot, say baley ya binalegan to. (Jer. 11:21; 12:6) Anggan ontan so situasyon to, agto labay so manbukbukor. Diad tua, imbalikas to iray nalilikna to ed matoor ya sekretaryo to ya si Baruc, tan amta tayo iratan lapud nabasa tayo ed Biblia. (Jer. 8:21; 9:1; 20:14-18; 45:1) Legan ya isusulat nen Baruc iray naeksperiensya nen Jeremias, seguradon inmaralem so panangaro tan respeto da ed sakey tan sakey.​—Jer. 20:1, 2; 26:7-11.

4. Antoy impagawa nen Jehova ed si Jeremias, tan panon ya inmelet so pankakaaro nen Jeremias tan Baruc lapud satan ya kimey?

⁴ Dakel a taon a makpel ya pinasakbayan nen Jeremias iray Israelita nipaakar ed saray nagawa ed Jerusalem. (Jer. 25:3) Pian napakiwas ya magbabawi iray totoo, impaisulat nen Jehova ed si Jeremias so amin ya pasakbay To diad sakey a lukot. (Jer. 36:1-4) Legan a saniba ya gagawaen nen Jeremias tan Baruc iyan kimey ya inter na Dios a nayarin binmayag na pigaran bulan, seguradon dakel so pankanawnawa ran mantongtong kanian binmiskeg so pananisia ra.

5. Akin et nibagan maong ya kaaro si Baruc?

⁵ Nen panaon la pian ipaamta ed totoo so karga na samay lukot, kaukolan ya iganggan nen Jeremias so kaaro ton si Baruc pian ipasabi so mensahe. (Jer. 36:5, 6) Makpel ya ginawa nen Baruc iyan mapeligron asainmin. Seguradon aliketan si Jeremias ed si Baruc nen sikatoy linma ed sular na templo tan binasa to so karga na lukot! (Jer. 36:8-10) Abalitaan na saray prinsipe ed Juda so ginawa nen Baruc, kanian impatawag da pian basaen ton maksil ed sikara. (Jer. 36:14, 15) Nandesisyon ira ya nepeg dan ipaamta ed si Arin Jehoiakim so karga na lukot. Balet inkonsidera day kipapasen nen Baruc, tan imbaga da ed sikato: “La ka la tan amot kayon dua nen Jeremias, tan agyo aabuloyan a naamtaan na anggan siopa no iner so kawalaan yo.” (Jer. 36:16-19) Maong labat ta pinasakbayan da ra!

6. Antoy ginawa nen Jeremias tan Baruc nen walay isusumpa?

 ⁶ Sinmanok ya maong si Arin Jehoiakim nen nadngel to so karga na lukot kanian pinoolan to itan tan ingganggan to ya erelen si Jeremias tan Baruc. Balet agtinmakot si Jeremias. Sikatoy angala na sananey a lukot, inter tod si Baruc, tan legan ton ididikta so mensahe nen Jehova, insulat nen Baruc so “amin a salitan . . . walad samay lukot a pinoolan nen Arin Jehoiakim na Juda.”​—Jer. 36:26-28, 32.

7. Antoy resulta na saniba ya impankimey nen Jeremias tan Baruc?

⁷ No saniba ya susungdoan na sankakaaro iray subok, lalon onelet so pankakaaro da. Kanian seguradon akabkabat nen Jeremias tan Baruc so sakey tan sakey tan inmelet so pankakaaro da nen saniba iran nankimey pian salatan so lukot ya pinoolan nen Arin Jehoiakim. Panon ya makatulong ed sikatayo so alimbawa na sayan duaran matoor ya lalaki?

8. Anto ray nayarin rason ya agtayo nawalaan na maapit ya kakaaro, tan akin et nepeg ya agtayo ontundan mikaaro?

⁸ Ompan natatakot itayon mikaaro no asali tayo lay asakitan nensaman. (Pro. 18:19, 24) Odino ompan iisipen tayo ya agtayo nawalaan na maapit ya kakaaro ta anggapoy panaon tan biskeg tayo parad satan. Balet nepeg ya agtayo ontundan mikaaro. No labay tayo ya wadtan iray agagi ya ontulong ed sikatayo no onsabi iray subok, nepeg tayo lan paeleten natan so pikakaaro tayo ed sikara. Say sakey ya importantin paraan ya nagawaan tayo itan et no ibalikas tayod sikara iray nononoten tan nalilikna tayo.​—1 Ped. 1:22.

9. (a) Panon ya impanengneng nen Jesus ya walay talek tod saray kakaaro to? (b) Akin ya onelet so pankakaaro no ibalikas mod kakaarom iray nononoten mo tan naliliknam? Mangiter na alimbawa.

⁹ Impanengneng nen Jesus ya walay talek tod saray kakaaro to diad impangibalikas to ed sikara na saray nononoten tan nalilikna to. (Juan 15:15) Sikatoy naalig tayo no ibaga tayo ed saray kakaaro tayo iray bengatla ya panliliketan, pampapagaan, tan pakakadismayaan tayo. No walay mangibalikas ed sika na nalilikna to, dengel kan maong. Ompan dakel manayay pamparehoan yo diad panmoria, liknaan, tan plano ed bilay. Imanoen so alimbawa nen Cindy, sakey a sister ya 29 so taon to. Sikatoy akikaaro ed sakey a payunir ya 67 lay taon to, si Marie-Louise. Saniba ran dua ya manpupulong kada Huebes na kabuasan, tan nanduruman topic so napaniistoryaan da. Imbaga nen Cindy: “Labalabay koy mitongtong ed saray kakaarok nipaakar ed importante iran bengatla ta makakatulong itan pian mas nakabat tan mas natalosan ko ra.” Singa  si Cindy, no ibalikas mod kaarom iray nononoten mo tan naliliknam, onelet so pankakaaro yo.​—Pro. 27:9.

10. Base ed Proverbio 27:17, antoy resulta no mankimey tayo a kaiba iray agagi?

¹⁰ Singa agawa ed si Jeremias tan si Baruc, no mankimey tayo a kaiba iray agagi tan naobserbaan tayo iray balibalin kualidad da, makaaral tayod sikara tan lalo tayon onapit ed sikara. (Basaen so Proverbio 27:17.) Singa bilang, antoy naliknam no legan na panagpulong et narengel moy kaarom ya makpel ton idedepensa so pananisia to odino nanengneng mod panagsalita to so mabiskeg a pananisia tod si Jehova tan ed saray sipan To? Seguradon sikatoy mas naar-arom.

11-12. Mangiter na alimbawa ya mangipanengneng a say saniba ya pankimey ed ministeryo et makatulong pian lalon onelet so pankakaaro.

¹¹ Imanoen so duaran eksperiensya ya mangipanengneng a say saniba ya pankimey ed ministeryo et makatulong pian lalon onelet so pankakaaro. Si Adeline, sakey a sister a mantaon na 23, et intagar toy sakey a kaaro to, si Candice, pian manpulong ira ed teritorya a matalag ya nakikimeyan. “Labay mi magmaliw ya mas maseseg tan mas maliket ed ministeryo,” so kuan to. “Kaukolan min dua so panamaseseg pian onaligwas kami ni ed espiritual.” Panon iran agunggonaan ed impankimey dan saniba? “Kayari na sanagew,” so kuan nen Adeline, “pantongtongan mi no antoy alikna mi ed saray agawaan mi, no anto ray akapaseseg ed sikami ed saray impitongtong mid totoo, tan no panon min anengneng so panangigiya nen Jehova ed ministeryo mi. Nanliketan mi irayan tongtongan tan mas akabat mi sakey tan sakey.”

¹² Si Laïla tan si Marianne, duaran single ya sister a taga France, et nampulong ya limay simba ed matoon syudad na Bangui, say capital na Central African Republic. Oniay nanonotan nen Laïla: “Wala ray mairap ya situasyon ya naeksperiensya mi nen Marianne, balet lapud lanang kamin mantotongtong tan talagan inaro mi sakey tan sakey, mas inmelet so pankakaaro mi. Nen naobserbaan ko ya si Marianne et maong ya  onadapta, maaro ed saray totoo, tan maseseg ed ministeryo, mas inmaralem so respetok ed sikato.” Agmo la kaukolan so onlad arum a bansa pian naeksperiensyam irayan bendisyon. Kada no manpulong kad teritorya na kongregasyon yo a kaiba so sakey ya agi, walay pankanawnawam ya sikatoy mas kabaten tan mas paeleten so pankakaaro yo.

13. Antoy nayarin naimano tayo diad pankikimey tayo a kaiba iray kakaaro tayo?

¹³ Diad pankikimey tayo a kaiba iray kakaaro tayo, no maminsan et aliwa labat ya saray maabig a kualidad so naimano tayo ed sikara noagta pati saray kakapuyan da. Antoy makatulong pian agnaderal so maapit a pankakaaro tayo? Imanoen lamet so alimbawa nen Jeremias. Antoy akatulong ed sikato pian say pampokusan to et saray maabig a kualidad na arum imbes a saray kakapuyan da?

14. Antoy naaralan nen Jeremias ed si Jehova, tan panon ya akatulong itan ed sikato?

¹⁴ Insulat nen Jeremias so libro ya inngaran ed sikato, tan nayarin insulat to met iray libro na Biblia ya kabkabat natan bilang 1 tan 2 Arari. Lapud satan et seguradon naamtaan to no panon kabaleg so panangasi ya ipapanengneng nen Jehova ed saray totoo ya aliwan perpekto. Singa bilang, amta nen Jeremias ya nen nagbabawian nen Arin Ahab iray mauges ya ginawa to, imbaga nen Jehova ya agla nanengneng nen Ahab so desyang ya idapo To ed sankaabungan to legan a mabilay ni. (1 Ara. 21:27-29) Amta met nen Jeremias so nipaakar ed saray ginawa nen Manases, ya mas mauges ni nen saray ginawa nen Ahab. Balet pinerdona nen Jehova si Manases lapud sikatoy nagbabawi. (2 Ara. 21:16, 17; 2 Awa. 33:10-13) Akatulong ed si Jeremias irayan salaysay pian naalig toy inkaanos tan panangasi na Dios diad pidedeneng tod saray kakaaro to.​—Sal. 103:8, 9.

15. Panon ya inalig nen Jeremias so inkaanos nen Jehova sanen temporaryon abalang so pokus nen Baruc?

¹⁵ Imanoen no antoy ginawa nen Jeremias sanen temporaryon abalang so pokus nen Baruc ed asainmin to. Agtampol hinusgaan nen Jeremias si Baruc noagta tinulongan to ya nipetek so kanonotan to. Impasabi tod si Baruc so diretsaan balet maaron mensahe a nanlapud Dios. (Jer. 45:1-5) Antoy naaralan tayo ed saya?

16. Base ed Proverbio 17:9, antoy kaukolan tayon gawaen pian mansiansia so pankakaaro tayo?

¹⁶ Amta tayo ya nalilingo iray agagi tayo. Kanian no walay akaaro tayo, nepeg ya mansagpot tayo pian mansiansia itan ya pankakaaro. No nalingo iray kakaaro tayo, ompan kaukolan tayo ran ikdan na diretsaan balet maaron simbawa a nibase ed Salita na Dios. (Sal. 141:5) Tan no nasakitan da itayo, kaukolan ya perdonaen tayo ira. No pinerdona tayo la ra, agtayo la uulit-uliten ya ipanonot ed sikara so ginawa ran lingo odino itongtong itan ed arum. (Basaen so Proverbio 17:9.) Talagan importante ya diad sayan mair-irap a panaon et manpokus tayo ed saray maong a kualidad na saray agagi imbes ya diad saray kakapuyan da! No ontan so gawaen tayo, onelet so pankakaaro tayo. Importante ya gawaen tayo la itan natan ta kaukolan tayo iray maapit a kakaaro no onsabi so baleg a kairapan.

17. Panon ya impanengneng nen Jeremias ya sikatoy tuan kaaro ed panaon na kairapan?

¹⁷ Impanengneng nen propeta Jeremias ya sikatoy tuan kaaro diad panaon na kairapan. Singa bilang, nen walad mapitek a bobon si Jeremias, sikatoy inliktar na opisyal ed palasyo ya si Ebed-melec pian ag-ompatey ditan. Balet kayari na satan,  tinmakot si Ebed-melec ya ompan sakitan na saray prinsipe. Nen naamtaan itan nen Jeremias, agto nampareen tan agto inisip ya sarag la itan na kaaro ton si Ebed-melec. Anggano akapriso si Jeremias, ginawa toy anggaay nayarian to ya ipasabi ed kaaro to so makaligliwan sipan nen Jehova.​—Jer. 38:7-13; 39:15-18.

18. Base ed Proverbio 17:17, antoy gawaen tayo no walay kaaro tayo ya ondadalan ed mairap ya situasyon?

¹⁸ Diad panaon tayo, nanduruman subok so aarapen na saray agagi. Singa bilang, dakel so naaapektoan na saray kalamidad, guerra, odino arum nin trahedya. No ontan so nagawa, say arum ed sikatayo et sarag dan patuloyen ed abung da irayan agagi. Say arum et nayarin ontulong diad pinansyal ya paraan. Balet amin tayo et sarag tayon ipikasi ed si Jehova ya tulongan to iray agagi tayo. No naamtaan tayon onkakapuy so liknaan na sakey ya agi, ompan agtayo amta no antoy ibaga odino gawaen tayo. Balet walay nagawaan tayon amin. Singa bilang, sarag tayoy mangigana na panaon parad satan ya agi. Dengelen tayon maong so ibaga to. Tan sarag tayon ibasa ed sikato so paborito tayon teksto ya makaligliwa. (Isa. 50:4) Say importante et wadtan ka diad panaon ya kakkaukolan ka na kaarom.​—Basaen so Proverbio 17:17.

19. Panon ya say pamaelet tayod pankakaaro tayo natan et makatulong ed sikatayo diad arapen?

¹⁹ Komon ta paeleten tayo la natan so pikakaaro tayo ed saray agagi tan pansiansiaen tayo itan. Akin? Lapud salien na saray kalaban tayo ya deralen so pankakasakey tayo panamegley na saray katilaan. Salien da met ya deralen so talek tayod saray agagi pian agtayo la suportaan so sakey tan sakey. Balet anggapoy nagawaan da. Agda sarag ya buyaken so bedber na panangaro ya walad sikatayo. Agdan balot naderal so malet ya pankakaaro tayo. Diad tua, say pankakaaro tayo et aliwa labat ya anggad sampot na sayan sistema na mundo, noagta anggad andi-anggaan!