1. Antoy situasyon na saray Judion abihag ed Babilonia?

 IMADYIN mo pay alikna na saray Judio nen abihag ira ed Babilonia. Pinaulyanan nen Jehova ya deralen na saray kalaban so dalin da tan nagmaliw iran bihag ta ambelbelat so kasalanan da tan na saray inmuunan atateng da. (2 Awa. 36:​15, 16, 20, 21) Normal met so nagmaliw ya bilay da diad Babilonia, pero siempre, aliwan mainomay so situasyon da. (Jer. 29:​4-7) Tan no nayari labat komon, agda labay so manayam diman. Anto kasi alikna da legan iran wadman? Makala tayoy ideya ed sayay insulat na sakey ed saray matoor ya Judio: “Diad gilig na saray ilog ed Babilonia et yinmurong kami. Nanakis kami sanen anonotan mi Sion.” (Sal. 137:1) On, kakkaukolan day ligliwa. Balet, siopay manligliwa ed sikara?

2-3. (a) Antoy ginawa nen Jehova parad saray abihag ya Judio? (b) Antoy pantongtongan tayo ed sayan artikulo?

² Si Jehova so “Dios na amin a ligliwa.” (2 Cor. 1:3) Inar-aro to ray lingkor to tan labalabay to ran ligliwaen. Kanian anggano ambelat so kasalanan na saray Judio, amta nen Jehova ya awaten na arum ed sikara so disiplina to tan ompawil ira ed sikato. (Isa. 59:20) Katon masulok ya 100 taon antis ni ran abihag, impaisulat to lad si propeta Isaias so mensahe tod sikara. Atan may kabkabat tayo natan ya libro na Biblia ya Isaias. Antoy manunan gagala na sayan sulat? Oniay insulat nen Isaias: “‘Ligliwa yo, ligliwa yoy totook,’ so inkuan na Dios yo.” (Isa. 40:1) On, amta nen Jehova ya kakkaukolan na saray Judio so ligliwa, kanian impaisulat to lad si Isaias iray mensahe ya mamabiskeg ed liknaan da.

³ Singa sarayan Judio, kakkaukolan tayo met so ligliwa natan. Pantongtongan tayod sayan artikulo so taloran paraan no panon ya niligliwa nen Jehova iray abihag ya Judio. (1) Insipan to ya perdonaen to ra no magbabawi ira, (2) inikdan to ray  ilalo, tan (3) impaseguro to ya anggapoy kaukolan dan takotan. Legan tayon pantotongtongan iraya, nengnengen tayo met no panon to tayon liligliwaen nen Jehova natan.

KAKASIAN TAN PEPERDONAEN TO TAYO NEN JEHOVA

4. Panon ya impanengneng nen Jehova so panangasi ed saray magbabawin Judio? (Isaias 55:7)

⁴ Si Jehova so “Ama na maaron panangasi.” (2 Cor. 1:3) Mapatpatnag ya makasin Dios si Jehova nen insipan to ya perdonaen to ray magbabawin Judio. (Basaen so Isaias 55:7.) Kuan to: “Kasian ta ka lapud andi-anggaan [so] matoor a panangarok.” (Isa. 54:8) Tua ya kaukolan ya anien na saray Judio so resulta na saray kasalanan da. Pero insipan nen Jehova ya kasian to ra tan makapawil lanlamang ira ed dalin da. (Isa. 40:2) Seguradon aligliwa tan binmiskeg so liknaan na saray magbabawi tan matoor ya Judio nen naamtaan da yan sipan!

5. Komparad saray Judio nensaman, akin et mas walay basiyan tayo natan ya manisia ed panamerdona nen Jehova?

⁵ Antoy naaralan tayo? Mabulos ya peperdonaen nen Jehova iray lingkor to ta baleg so panamerdona to. Diad tua, kompara ed saray Judio nensaman, mas walay basiyan tayo natan ya manisia ed panamerdona nen Jehova. Akin ey? On ta mas natatalosan tayo natan no anto ray ginawa nen Jehova pian naperdona iray kasalanan tayo. Kalabas na manga 700 ya taon manlapu la nen impropesiya nen Isaias ya perdonaen nen Jehova iray Judio, imbaki nen Jehova diad dalin so inar-aro ton Anak pian dondonen iray totoo ya magbabawi ed saray kasalanan da. Imbayar la nen Jesus so bilay to kanian wala lay basiyan nen Jehova ya perdonaen odino ‘buralen’ iray kasalanan tayo. (Gawa 3:​19, paimanod leksab; Isa. 1:18; Efe. 1:7) Talagan makasi so Dios tayo!

6. Akin et onlemew so liknaan tayo no dalepdepen tayo so panamerdona nen Jehova? (Nengnengen met so litrato.)

⁶ No nakokonsiensia tayo ni ed saray kasalanan ya agawaan tayo nensaman anggano nagbabawi tayo la, onlemew so liknaan tayo no dalepdepen tayo may walad Isaias 55:7. Ompan sankanonot tayo ni ray kasalanan tayo, lalo la no aanien tayo ni so makapuy ya resulta na satan. Pero tandaan tayo ya no impatua tayo la iray kasalanan tayo tan anguman tayo la, makapantiwala tayo ya pinerdona to tayo la nen Jehova. Tan no mameperdona si Jehova, lilingwanan to met la may kasalanan.  (Ikompara so Jeremias 31:34.) Kanian no nilingwanan la nen Jehova so kasalanan mo, lingwanan mo met la sirin. Say importante ed si Jehova et saray gagawaen mo natan parad sikato, aliwan saray agawaan mon lingo nensaman. (Eze. 33:​14-16) Tan diad balon mundo, ekalen met la na makasin Ama tayo so amin ya makapuy ya resulta na saray kasalanan tayo.

7. Antoy makatulong pian napakiwas tayon mitongtong ed saray elder no akagawa tayoy seryoson kasalanan?

⁷ Panon to no nakokonsiensia tayo lapud walay iyaamot tayon seryoson kasalanan? Ibabaga na Biblia ya manpatulong tayo ed saray elder. (Sant. 5:​14, 15) Antoy makatulong pian agtayo nababaingan ya ipatua ed saray elder so agawaan tayon kasalanan? Tandaan tayo ya singa si Jehova, makasi tan maaro met iray elder tan sikara so uusaren to pian tulongan tayo ya ombiskeg lamet ed espiritual. Napakiwas tayo met ya mitongtong ed sikara no talagan magbabawi tayo. Asali itan nen Brother Arthur. a Nakokonsiensian maong si Arthur lapud agawaan ton kasalanan, pero inusar nen Jehova iray elder pian ontulong tan manligliwa ed sikato. Oniay imbaga to: “Manga sakey taon ak met ya nambantay na pornograpiya, pero nen walay nadngel kon paliwawa ya say tema to et konsiensia, apakiwas ak ya ipatua ed si asawak tan ed saray elder so kasalanan ko. Kayari to man, akainawa ak. Pero no maminsan, nakokonsiensia ak ni. Impanonot ed siak na saray elder ya kaaro nin siansia so turing nen Jehova ed siak tan didisiplinaen to tayo ta inar-aro to tayo. Aligliwa ak ed satan ya imbaga ra, tan diman ko atalosan ya pinerdona to ak la nen Jehova.” Natan et payunir tan ministeryal a lingkor la si Arthur. On, no magbabawi tayo, kasian tan perdonaen to tayo nen Jehova!

IIKDAN TO TAYO NEN JEHOVA NA ILALO

8. (a) Antoy impaseguro nen Jehova ed saray abihag ya Judio? (b) Base ed Isaias 40:​29-31, antoy epekto ed saray magbabawin Judio nen naamtaan da ya wala manayay ilalo dan makapawil ed dalin da?

⁸ Ag-ibubulos na Babilonia iray bihag to. Kanian diad pakanengneng na too, singa imposible la ya makapawil iray Judio ed dalin da. (Isa. 14:17) Pero inikdan nen Jehova na ilalo iray Judio. Impaseguro to ya ibulos to ra tan anggapoy makaamper ed satan ya gagala to. (Isa. 44:26; 55:12) Diad tua, imbaga nen Jehova ya diad pakanengneng to et singa labat dabok so Babilonia. Di ba, no sibokan moy dabok, magangganon naandi? (Isa. 40:15) Antoy epekto to yan imbaga nen Jehova ed saray abihag ya Judio? Seguradon aligliwa ira. Pero wala ni epekto to ’tan ed sikara. Oniay insulat nen Isaias: “Ombiskeg iramay maniilalo ed si Jehova.” (Basaen so Isaias 40:​29-31.) On, lapud amta da ya walay ilalo ra, ombiskeg so liknaan da tan “ontikyab iran singa walaay payak na agila.”

9. Antoy amabiskeg ed pananisia na saray Judio ya talagan ibulos ira nen Jehova?

⁹ Anggano singa imposible ya makapawil iray Judio ed dalin da, makapantiwala ira ya tooren nen Jehova so sipan to. Akin ey? On ta dakel lan propesiya so anengneng dan asumpal. Singa bilang, amta da ya tinmua imay imbaga nen Jehova ya sakopen na Asirya so samploran tribu ya panarian na Israel tan gawaen da ran bihag. (Isa. 8:4) Anengneng da met no panon ya dineral na saray taga Babilonia so Jerusalem tan binihag da iray manaayam ditan. (Isa. 39:​5-7) Amta da met ya binulag na ari na Babilonia si Arin Zedekias tan abihag met ed Babilonia. (Jer. 39:7; Eze. 12:​12, 13) Amin iratan et abayag lan impasakbay nen Jehova. (Isa. 42:9; 46:10) Amta na saray Judio ya tinmua iratan ya amin, kanian seguradon  binmiskeg so pananisia ra ya talagan ibulos ira nen Jehova!

10. Anggano mair-irap so bilay diad sayan kaunoran iran agew, antoy gawaen tayo pian mansiansian malinew ed isip tayo so ilalo tayo?

¹⁰ Antoy naaralan tayo? Baleg so nitulong na ilalo pian ombiskeg so liknaan tayo. Diad sayan kaunoran iran agew, lalon oniirap so bilay tan dakel so onkokontra ed sikatayo. Kanian no maminsan, naeermenan tayo tan singa nanaekalan tayo lay ilalo. Antoy makatulong ey? Lanang tayon nonoten so balibalin ilalo ya inter nen Jehova ed sikatayo. Insipan nen Jehova ya ikdan to tayoy bilay ya andi-anggaan diad Paraiso. Mareen la ditan tan anggapo lay nepeg tayon pampagaan. Komon ta pansiansiaen tayon mabilabilay tan malinlinew itan diad isip tan puso tayo. Ta no andi, ompan agtayo naliklikas ya nalilingwanan tayo lay ilalo tayo. Singa tayo onnenengneng ed marakdakep ya hardin ed paway pero aburareg ta marutak manaya so bintana tayo. Antoy gawaen tayo ey? Linisan tayo may bintana! Ontan met so gawaen tayo pian malinew ed isip tayo so ilalo tayo. Lanang tayon imadyinen so balibalin bilay diad balon mundo. Makatulong no basaen tayo ray artikulo, bantayan tayo ray video, tan ondengel tayo ed saray kansion ya say topic to et bilay ed Paraiso. Makatulong met so pikakasi. Ibaga tayo ed si Jehova no anto ray labalabay tayon nagawa ed balon mundo.

11. Antoy akatulong ed sakey ya sister ya walay graben sakit to pian ombiskeg so liknaan to?

¹¹ Imanoen no panon ya akatulong so ilalo pian ombiskeg tan naligliwa si Sister Joy. Walay graben sakit to, pero oniay imbaga to: “No ngalngali ak la onsuko, ibabagak ed si Jehova so amin ya naliliknak ta amtak ya natatalosan to ak. Kayarik ya manpikasi, sankaliknak ya iikdan to ak na ‘pakayari [ya] mas mabiskeg nen say pakayari na too.’” (2 Cor. 4:7) Iimadyinen met nen Joy so sarili to diad balon mundo ya ditan et anggapo lay mangibagan, “Mansasakit ak.” (Isa. 33:24) Singa si Joy, no ibaga tayo met ed si Jehova so amin ya nalilikna tayo tan manpokus tayo ed ilalo tayo, seguradon ombiskeg so liknaan tayo.

12. Akin et makapantiwala tayo ya tooren nen Jehova so amin ya sipan to? (Nengnengen met so litrato.)

¹² Singa saray Judio nensaman, akin et makapantiwala tayo met natan ya tooren nen Jehova iray sipan to? On ta dakel ya propesiya so  nanenengneng tayon nagagawa la natan. Singa bilang, tinmua so propesiya ya say world power ed sayan kaunoran iran agew et “mabiskeg ed arum a parte tan lupok ed arum a parte.” (Dan. 2:​42, 43) Nababalitaan tayo met iray “yegyeg ed nanduruman pasen” tan nipupulong la so maong a balita diad “amin a nasyon.” (Mat. 24:​7, 14) Nanenengneng tayon mismo no panon ya nasusumpal irayan propesiya, kanian lalon ombibiskeg so pananisia tayo ya tooren nen Jehova so amin ya sipan to.

IMPASEGURO NEN JEHOVA YA ANGGAPOY NEPEG TAYON TAKOTAN

13. (a) Anto ni mairap ya dalanen na saray Judio antis iran nibulos? (b) Base ed Isaias 41:​10-13, antoy imbaga nen Jehova pian naligliwa iray Judio?

¹³ Anggano imbaga la nen Jehova ya makapawil iray abihag ya Judio ed dalin da, amta to ya wala ni ray mairap ya dalanen da antis to ’tan. Impasakbay nen Jehova ya no asingger lan nibulos irayan abihag ya Judio, walay makapanyarin ari ya sakopen to iray bansa ya akapaliber ed Babilonia, ya anggad atakien to met la so mismon Babilonia. (Isa. 41:​2-5) No nagawa la itan, wala kasi dapat ya pampagaan na saray Judio? Anggapo, ta onia lay abaybayag ya impaseguro nen Jehova: “Agka ontatakot, ta wala ak ed sika. Agka ompapaga, ta siak so Dios mo.” (Basaen so Isaias 41:​10-13.) Antoy labay ya ibaga nen Jehova nen imbaga ton, “Siak so Dios mo”? Kasin ipapanonot tod saray Judio ya sikato so nepeg dan dayewen? Andi, ta amta da la ’tan. Imbes, ipapanonot tod sikara ya ituturing to ni ran siansia ya lingkor to kanian agto ra paulyanan tan wadtan ya lanang parad sikara.—Sal. 118:6.

14. Anto ni imbaga nen Jehova pian ag-ontakot iray Judio?

¹⁴ Wala ni imbaga nen Jehova ed saray Judio pian ag-ira ontakot. Impanonot tod sikara ya sikato so Makapanyarin-amin ya Dios tan kabkabat to so kada sakey ed sikara. Imbaga tod saray Judio ya ontangay ira ed tawen tan nengnengen da ray bitewen. Sikato so amalsa ed saratan ya amin tan kabkabat to ran amin ed kangaranan da. (Isa. 40:​25-28) No kabkabat nen Jehova so ngaran na kada bitewen, di mas lalon kabkabat to so ngaran na kada lingkor to. Tan no sarasarag ton palsaen iray bitewen, sarasarag to met sirin ya tulongan iray lingkor to. On, anggapoy nepeg ya takotan o pampagaan na saray Judio.

15. Panon ya imparaan nen Jehova iray Judio ed saray nagawa no nasakop lay Babilonia?

 ¹⁵ Imparaan met la nen Jehova iray Judio ed saray nagawa no nasakop la so Babilonia. Diad akadkaunan parte na libro na Isaias, oniay imbaga na Dios ed saray Judio: “Loob kayod saray kuarto yo, tan ikapot yo iray puerta. Amot kayon magano anggad onlabas so sanok na Dios.” (Isa. 26:20) Nayarin anonotan na saray Judio iyan instruksion nen inataki nen Arin Ciro so Babilonia. Imbaga na sakey ya Griegon historian ya nen alooban la nen Ciro so Babilonia, “ingganggan to ray sundalo to ya pateyen da so siopaman ya nanengneng dan walad paway na abung.” Seguradon natatakot ya maong iray taga Babilonia nen onlulusob la ray sundalo nen Ciro. Saray maunor ya Judio balet ey? Seguradon akaligtas ira ta inunor day Jehova.

16. Akin et agtayo nepeg ya takotan iray nagawa no baleg ya kairapan? (Nengnengen met so litrato.)

¹⁶ Antoy naaralan tayo? Asingsingger lay baleg ya kairapan, tan atan so sankairapan ya dalanen tayo. No onggapo la ’tan, seguradon nataktakot iray totoo tan agda amtay gawaen da. Sikatayo ran lingkor nen Jehova ey? Agtayo ontakot ta si Jehova so Dios tayo. Lalo ingen ya ombiskeg so liknaan tayo ta amta tayon ‘asingger lay kililiktar tayo.’ (Luc. 21:28) Anggano atakien itayo la na alyansa na saray bansa, anggapoy nepeg tayon takotan. Usaren nen Jehova iray anghel pian naprotektaan tayo tan makaawat tayo met na saray instruksion ya mangiligtas ed bilay tayo. Panon ya iter nen Jehova ed sikatayo iratan ya instruksion? Agtayo ni amta. Pero posiblin ipadalan itan nen Jehova diad kongregasyon. Ditan so pinagka-kuarto tayo! No ditan so kawalaan tayo, seguradon ligtas tayo. Anto la sirin so gawaen tayo natan pian akaparaan tayo la ed saray nagawa ed arapen? Lanang tayon miulop ed saray agagi, mabulos tayon unoren iray instruksion na organisasyon tayo, tan mantiwala tayo ya si Jehova so mangigigiya ed sayan organisasyon.—Heb. 10:​24, 25; 13:17.

17. No kaukolan moy ligliwa, panon mon nipanengneng ya maniilalo ka ed si Jehova?

¹⁷ Mair-irap so dinalan na saray Judio ya abihag ed Babilonia, pero niligliwa ira nen Jehova tan pinabiskeg toy liknaan da. Seguradon ontan met so gawaen to natan parad sikatayo. Kanian anggan antoy nagawad bilay mo, manilalo kad si Jehova no kaukolan moy ligliwa. No akagawa kay lingo, mantiwala ka ya kasian tan perdonaen to ka. Pansiansiam ya mabilay ed nonot mo so ilalom. Tan agmon balot lilingwanan ya si Jehova so Dios mo, kanian anggapoy nepeg mon takotan!