Kasin sika may too ya mair-irap mon tandaan iray teksto ed Biblia? Seguro wala ray paboritom ya teksto ya makakatulong ed sika pian naligliwa ka tan nalabanan mo ray negatibon iisipen mo. Ompan wala met iray teksto ya labay mon usaren pian pasesegen so arum. (Sal. 119:​11, 111) Nia ray sarag mon gawaen pian natandaan mo iratan ya teksto.

• Manggawa kay tag diad JW Library^® app. Ngaranan mo itan na “Paboritok Iran Teksto.” Kada no manbasa kay Biblia diad JW Library tan walay agustoan mon bersikulo, i-save mo itan ed satan ya tag. a

• Marakep no lanang mon nanengneng imay teksto. Singa bilang, say gagawaen na arum et isusulat da itan ed papel insan da ipeket ed salming odino diad refrigerator da pian lanang dan nanengneng. Say arum balet, i-screenshot da may teksto insan da gawaen ya wallpaper na computer odino gadyet da.

• Manggawa kay flash cards. Isulat mo may teksto diad arap, tan isulat mod beneg no antoy nabasa ed satan ya teksto. No akaarap ed sika may teksto, i-recite mo no anto may nabasa ditan. No say akaarap balet ed sika et amay nabasa ed satan ya teksto, bitlam no anto itan ya teksto.