MAONG SO ALIMBAWA NA SARAY ATATENG KO

Tagad Italy iray atateng ko, pero nen manga bandad sampot la na 1950’s, nanayam la rad Kindersley, Saskatchewan, Canada. Ag-abayag, naamtaan day katuaan tan atan so nagmaliw ya sankaimportantian ed bilay mi. Nanonotan ko nen ugaw ak ni, naynay ak ya mimilan manpulong kaibay pamilyak. Kanian no maminsan no iistoryaen kod arum, ilulurey ko ya “auxiliary payunir” ak la anggano walora ni labat so taon ko.

Mairap so bilay mi, pero akaparaan ya mansakripisyo iray atateng ko parad si Jehova. Singa bilang nen 1963, dakel so inlako dan kaykayarian da pian makaatendi kamid internasyonal a kombension ed Pasadena, California, U.S.A. Insan nen 1972, inmalis kami ed Trail, British Columbia, Canada, pian napulongan mi ray totoo ditan ya say salita da et Italian. Manga 1,000 kilometro so kaarawi to ’tan manlapud samay datin panaayaman mi. Akalmoy trabaho si tatay ko bilang janitor. Tan anggano labay da ran i-promote ed trabaho, tinanggian da pian makapanpokus irad espiritual.

Akaaral ak ya maong tan saray taloran agagik ed maong ya alimbawa na saray atateng mi. Misatsalamat ak ta impasal da ak ya iyunay panaglingkor ed si Jehova. Say sakey ya naaralan kod sikara ya agkon balot nalinglingwanan et no iyunak so Panarian, agto ak balot paulyanan nen Jehova.—Mat. 6:33.

ATAWAYAN MI SO FULL-TIME YA PANAGLINGKOR

Nen 1980, nankasal kami nen Debbie, sakey ya magangganan sister ya walaan na espiritual iran goal. Labay min dua so manlingkor ya full-time, kanian kayari na taloy bulan manlapud samay impankasal mi, nampayunir lay Debbie. Insan nen sakey taon kami lan kasal, inmalis kamid melag tan mankakkaukolan ya kongregasyon tan nampayunir ak met la.

 Nen ombabayag kami lad man, walay akadismayaan min maong, kanian singa labay mi lay onalis. Pero antis kamin mandesisyon, imbaga mi itan ed manangasikaso na sirkito mi. Oniay maaro pero prangkan imbaga tod sikami: “Diad tua, pababalegen yoy problema. Agkayo manpopokus ed saray negatibo. Walan-walay positibo ed kongregasyon yo, tan aman so pampokusan yo.” Kakkaukolan mi iman ya bilin. (Sal. 141:5) Inyaplika mi man ya tampol tan diman mi anengneng ya dakel ya tua so positibo ed kongregasyon mi. Wala ray kakongregasyon mi ya mansasagpot pian mas napanlingkoran day Jehova, kaiba la ray ugugaw, tan anggan saray sister ya aliwan Tasi so asawa ra. Akaaral kamin maong ed saman ya imbaga na manangasikaso na sirkito. Manlapud saman, manpopokus kami lad saray positibo, tan naaralan mi mantiwala ed si Jehova ya ipetek to lanlamang so kaukolan ya ipetek ed kongregasyon. (Miq. 7:7) Kanian nakal so pakakadismaya mi, tan pinmawil so liket mi.

Saray instruktor ed samay unonan PSS mi et asali day nanlingkor ed arum ya bansa. Impanengneng dad sikami iray litrato da, tan inistorya dad sikami iray subok ya dinadalan da tan no panon iran benendisyonan nen Jehova. Lapud saman, in-goal mi so manmisionero.

Pian natulongan kamin nadampot itan ya goal, inmalis kamid Quebec nen 1984. Say salita ditan et French, tan masulok ya 4,000 kilometro so kaarawi to ’tan ed British Columbia. Kaukolan mi mibagay ed kultura da tan araley lenguahe ra. Pero wala ni sakey ya subok. Mabetbet ya kulang so badyet mi nen Debbie. Wala may panaon ya say kakanen mi labat et puros patatas ya atudtor mid alog. Gawa itan na sakey ya dumaralos, tan pinayagan to kamin laen iramay atilak ya patatas kayari panag-ani. Nanduruman luto na patatas so naimbento nen Debbie! Anggano wala ray onman ya subok, desidido kamin mananos tan maliket ya manlingkor. Lapud saman, apaneknekan mi ya talagan aasikasoen to kami nen Jehova.—Sal. 64:10.

Sakey agew, walay tawag ya agmi iilaloan. Naimbitaan kamin manlingkor ed Bethel diad Canada. Mankelaw kami ta nanaplay kami lad Gilead School ed saman. Kanian agmi amtay nalikna mi nen tinmawag so Bethel. Pero inawat mi nin siansia iman ya imbitasyon. Kasabi mid man, tinepetan mi may sakey ya membro na Branch Committee ya si Brother Kenneth Little: “Panon to may application mid Gilead ey?” Oniay ebat dad sikami: “Agkayo mapaga ta agmet ni naaprobaan may aplikasyon yo.”

 Kayari sakey simba, naimbitaan kami nen Debbie ya man-Gilead, kanian kaukolan mi mandesisyon no antoy pilien mi. Oniay kuan nen Brother Little: “Antokaman so pilien yo, ompan wala ray agew ya ibaga yon, ‘Aliwan saya la komon so pinili mi.’ Pero tandaan yo ya pareho itan ya nanlapud si Jehova. Kanian anggano antoy pilien yo, bendisyonan to kayo.” Inawat mi may imbitasyon ya man-Gilead. Tan kalabas na saray taon, apaneknekan mi ya duga may imbaga nen Brother Little. Diad tua, atan met so ibabaga mi ed saray agagi ya kaukolan day mandesisyon no anton asainmin so pilien da.

SAY BILAY MI BILANG MISIONERO

Eksayted kamin maong ta sakey kamid saray 24 ya estudyante ya kaibad koma-83 ya klase na Gilead diad Brooklyn, New York, nen Abril 1987. Si Brother Ulysses Glass tan Brother Jack Redford so instruktor mi. Agangganon linmabas so limaran bulan, tan nan-graduate kami nen Setyembre 6, 1987. Say asainmin mi et diad Haiti, kaiba mi John tan Marie Goode.

Nen 1962, impa-deport na gobiernoy Haiti iray misionero tayo. Manlapud saman ya taon, sikami so unaan ya imbaki lamet na organisasyon tayo ed satan ya bansa. Kayari taloy simba manlapud impan-graduate mi, wala kami lad Haiti. Melag labat so kulaan min kongregasyon, 35 labat so publisher ditan. Say teritorya mi et kapalandeyan. Ugaw kami nid saman tan daiset ni eksperiensya mi. Tan bukbukor mi manaayam diad missionary home. Mair-irap so bilay na saray totoo, tan maslak ed sikara et agda amtay manbasa. Diad inmuunan taon mi diman, dakel so agawan protesta, kudeta, wala ray pool ed karsada, tan maksil iray bagyo.

Dakel so naaralan mid saray agagi ed Haiti. Mabisbiskeg so pananisia da. Anggano mairap so bilay da, inar-aro day Jehova tan makulikuli rad ministeryo. Walay maedad lan sister ya aga makabasa  pero manga 150 ya teksto ed Biblia so kabisado to. Lapud inagew-agew min nanenengneng so mairap ya kipapasen na saray totoo, desidido kamin ipulong ya say Panarian labat so alenleneg ya solusyon ed problema ra. Malikeliket kami ta wala ray inyaralan mi na Biblia ya nagmaliw ya regular payunir, espisyal payunir, tan elder.

Akabat kod Haiti si Trevor, sakey ya kabataan ya misionero na Mormon. Aminpiga kami met ya akapantongtong nipaakar ed Biblia. Kalabas na pigaran taon, akaawat ak na sulat ya nanlapud sikato. Kuan to: “Manpabautismo ak la ed sayay ontumbok ya asemblea. Labay koy ompawil ed Haiti, tan makapanlingkor ak komon ya espisyal payunir diad samay teritoryak nen misionero ak ni na Mormon.” Tan aman ya tua so agawa. Dakel ya taon ya nanlingkor si Trevor bilang espisyal payunir ed Haiti kaibay asawa to.

NANLINGKOR KAMID EUROPE, INSAN DIAD AFRICA

Niyasain kami ed parte na Europe ya kalkalna lan nababawasan so panagbawal ed kimey ya panagpulong. Nen 1992, akasabi kamid Ljubljana, Slovenia. Asingger itan ed lugar ya binalegan na saray atateng ko antis iran inmalis ed Italy. Peles ya wala ni guerra ed saray lugar ya datin sakop na Yugoslavia. Kanian diad saman, say mangaasikaso ed kimey ya panagpulong ditan et say branch office ed Vienna, Austria, ontan met ed saray opisina ya walad Zagreb, Croatia, tan Belgrade, Serbia. Pero sinmabi panaon ya kaukolan lan nawalaan na sarili dan Bethel so kada bansa ya datin sakop na Yugoslavia.

Kaukolan mi lamet so manaral na sananey ya lenguahe tan mibagay ed sananey ya kultura. Say kuan da ray tagad man, “Jezik je težek,” ya say labay ton ibaga et “Mair-irap so lenguahe dia.” Tan tua ya mair-irap! Pero pambiliban koy katooran na saray agagi. Akaparaan iran awaten iray pananguman ed organisasyon, tan sankanengneng mi ya talagan bebendisyonan ira nen Jehova. Lapud saman, anengneng mi lamet ya talagan ipepetek nen Jehova iray kaukolan ya ipetek ed dugan panaon. Dakel so naaralan mid Slovenia, tan akatulong iramay dati lan naaralan mi pian nasarag iray nanduruman subok ya dinadalan mi ditan.

 Pero dakel ni ran subok so naeksperiensya mi. Nen 2000, imbaki da kamid Côte d’Ivoire, diad West Africa. Pero nen Nobyembre 2002, walay agawan guerra kanian apilitan kamin onalis ed Sierra Leone. Kakkayari met na guerra ditan ya agawa ed loob na 11 ya taon. Biglaan iman ya inyalis mi, kanian ambelat so liknaan mi ya taynan so Côte d’Ivoire. Pero akatulong iray imbangat nen Jehova ed sikami diad apalabas pian agnaandi so liket mi.

Dakel iray totoon interesado ed Sierra Leone tan maar-aro iray agagi ditan. Abayag dan inanosan so guerra. Mairap ira labat, pero akaparaan iran iter no antoy walad sikara. Aminsan, walay sister ya iikdan toy Debbie na kawes. Nababaingan si Debbie kanian ngalngali agto awaten. Pero talagan mapilit may sister. Say kuan to: “Legan na guerra, dakel so naawat min tulong ed saray agagi ed nanduruman bansa. Kanian natan, tsansa mi met la ’ya pian makabales.” Apaseseg kami ya aligen so alimbawa na saray agagi ditan.

Amawil kami lanlamang ed Côte d’Ivoire, pero wala lamet so agawan gulo. Kanian nen Nobyembre 2004, nan-evacuate kami tan inlugan da kamid helikopter, tan sansakey labat ya bag so naawit mi nen Debbie. Akasabi kami ed kampo na saray sundalon French, tan diad flooring kami naugip ya sanlabi. Insan kaimbuasan to, intuloy mi biahe paonlad Switzerland. Pegley-labi kami la akasabi ed branch. Kasabi mi, wadman la ray membro na Branch Committee, saray instruktor na Ministerial Training School, tan saray kaasawaan da ya manatalaran ed sikami. Malikeliket da kamin in-welcome tan nilalakap da kami. Angiparaan met ira na naakan tan dakel ya tsokolati. Talagan a-touch kami tan aliklikna mi panangaro da.

Inyasain da kamin agano ed Ghana insan pinmawil kami ed Côte d’Ivoire nen kinmalma lay situasyon. Anggano aminpiga tan makapa-stress so inyalis-alis mi, asarag mi lapud panangaro tan kamaongan ya impanengneng na saray agagi. Apantongtongan mi nen Debbie ya anggano normal labat so ontan ya aroan ed organisasyon nen Jehova, agmi ’tan dapat ibaliwala. Diad tua, anggano mair-irap iraman ya dinadalan mi, akaaral kamin maong, tan impasen min parte iraman na panangipasal nen Jehova ed sikami.

NIYASAIN KAMI ED MIDDLE EAST

Nen 2006, akaawat kami na sulat ya nanlapud world headquarters. Kuan to may sulat, ibaki da kami kuno ed Middle East. Agi! Seguradon dakel lamet so balon naeksperiensya mi. Onarap kamid nanduruman subok, manaral kami nanduruman lenguahe, tan mibagay kami ed nanduruman kultura. Ampetang so isyu na politika tan relihyon ditan. Pero dakel la lamet so imbangat nen Jehova ed sikami. Nandurumay lenguahe na saray agagi, pero anengneng mi ya walay pankakasakey da ta tutumboken day instruksion na organisasyon. Pambiliban mi met so pakpel na saray agagi ta maslak ed sikara et kokontraen na saray kapamilya, kaklase, katrabaho, tan kakaabay da.

Nen 2012, inmatendi kami ed espisyal a kombension ed Tel Aviv, Israel. Agmi man nalingwanan ya kombension ta manlapu la nen Pentecostes 33 C.E., first time ya akapantitipon lamet so dakel ya lingkor nen Jehova ed satan ya lugar!

Diad saraman ya taon, imbaki da kami ya ombisita ed sakey ya bansa ya sebel so kimey tayo  tan daiset ni labat so Tasi. Wala ray awit min literatura, nampulong kami, tan inmatendi kamid angkelag iran asemblea. Wala ray armadon sundalo ed amin lawarin sukong, tan dakel iray checkpoint. Pero agkami mapaga ta kaiba mi ray agagi tan nanalwar kamin maong.

PINMAWIL KAMID AFRICA

Nen 2013, walay naawat mi ya nikadkaduman asainmin—niyasain kami ed branch office diad Kinshasa, Congo. Balbaleg tan marakdakep iyan bansa, pero mair-irap so bilay na totoo tan mabetbet ya walay guerra. Nen kasabi mi ditan say kuan mid sarili mi, “Andi bale ta kabisado ta lay Africa, agta la masyadon nairapan.” Pero andi manaya! Nairapan kami nin siansia, lalo la no manbiahe kamid saray lugar ya anggapo ni ray karsada tan taytay. Pero nampokus kami la ed saray positibo. Singa bilang, maan-anos tan malikeliket iray agagi, anggano mair-irap so bilay da. Inar-aro day ministeryo, tan pansasagpotan day miaral tan onatendi ed saray asemblea. Anengneng min mismo no panon ya benendisyonan nen Jehova so kimey ditan. Diad pigaran taon ya impanlingkor mid Congo, dakdakel so naaralan mi tan dakdakel met so akaaro mi ya inturing mi lan kapamilya.

Nen bandad sampot na 2017, akaawat kami lamet na balon asainmin—diad South Africa. Aya so sankabalegan ya branch ya nanlingkoran mi, tan say kimey ya niyasain ed sikami nen Debbie et agmi nin balot asali. Pero maong labat ta akatulong ed sikami iray naaralan mi ed imbebeneg ya asainmin mi. Naar-aro mi iray agagi dia ya deka-dekada la ya manmamatoor ed si Jehova. Tan makapalikliket ya nanengneng so pankakasakey tan deen diad pamilyan Bethel anggano nandurumay lahi tan kultura da. Mapatpatnag ya bebendisyonan nen Jehova iray lingkor to lapud pansasagpotan dan isulong so balon personalidad tan iyaaplika da iray prinsipyo na Biblia.

Diad inlabas na saray taon, nanduruman asainmin so naawat mi nen Debbie. Naaralan mi mibagay ed nanduruman kultura tan akaaral kami nanduruman lenguahe. Tua, walan-wala ray subok pero aliklikna mi so matoor ya panangaro nen Jehova. Inusar toy organisasyon to tan saray agagi pian ipalikna itan ed sikami. (Sal. 144:2) Nibaga mi ya nagmaliw kamin mas maong ya lingkor nen Jehova lapud linmoob kami ed full-time ya panaglingkor.

Misatsalamat ak ya maong ed impamabaleg ed sikami na atateng mi, ed suporta na maar-aron asawak ya si Debbie, tan ed makapaseseg ya alimbawa na saray agagi diad interon mundo. Anggano anto ni tay nagawad arapen, desidido kami nen Debbie ya tuloytuloy ya paibangat ed Makapadinayew ya Managbangat tayo.