Anggapoy ibabaga na Biblia tungkol ed saya. Pero anggan panon et walay ideya tayo base ed saray impormasyon ya nabasa tayod Biblia.

Nen imbalita na anghel ed si Maria ya sikatoy manlukon tan iyanak toy Jesus, sikato tan si Jose et manaayam ed Nazaret, sakey ya syudad ed Galilea. (Luc. 1:26-31; 2:4) Nen inyanak lay Jesus, wala may panaon ya nanayam irad Ehipto, insan ira amawil ed Nazaret. Diad Nazaret binmaleg si Jesus, kanian say tawag ed sikato et Nazareno. (Mat. 2:19-23) Kanian no nabitla so ngaran nen Jesus, Jose, tan Maria, say naisip tayon tampol et taga rad Nazaret.

Walay kanayon nen Maria ya say ngaran to et Elizabet ya taga Juda. Si Elizabet et asawa na saserdote ya si Zacarias tan nanay nen Juan ya Managbautismo. (Luc. 1:5, 9, 13, 36) Nen lukon nen Elizabet si Juan, sikatoy binisita nen Maria. Taloy bulan to diman, insan anempet lanlamang ed Nazaret. (Luc. 1:39, 40, 56) Kabisado sirin nen Maria iray lugar ed Juda.

Nen asingger lan mananak si Maria, walay ganggan ya kaukolan ya ‘manparehistro iray totoo’ kanian nambiahe ira nen Jose paarap ed Betlehem. Say Betlehem so “syudad nen David” tan akapropesiya ya ditan iyanak so Mesias. (Luc. 2:3, 4; 1 Sam. 17:15; 20:6; Miq. 5:2) Ditan inyanak nen Maria si Jesus. Siempre, lapud kapananak si Maria tan walay ugaw, aliwan praktikal ya manbiahe iray arawrawi pasempet ed Nazaret. Nandesisyon ira ya dia ni rad Betlehem, ya manga siameran kilometro labat so kaarawi to ed Jerusalem. Kanian asingger labat so biniahe da nen inawit day Jesus ed templo tan “angiyapay ira na bagat unong ed Ganggan.”​—Luc. 2:22-24; Lev. 12:2, 6-8.

Nen imbaga na anghel ed si Maria ya sikatoy manlukon, impaamta met na anghel ya tawiren na ugaw so “trono nen David” tan “sikatoy manuley ya andi-anggaan bilang Ari.” Nen inyanak si Jesus ed syudad nen David, kasin anonotan nen Jose tan Maria itan ya imbaga na anghel tan inisip da ya mas marakep no diman ni ra? (Luc. 1:32, 33; 2:11, 17) Posible ya ontan so naisip da kanian ditan da la inalagar no antoy ontumbok ya instruksion na Dios ed sikara.

Agtayo amta no panon la ra kabayag ed Betlehem nen nalmo ira na saray astrologo. Pero abayag met la ta manaayam la rad sakey ya abung. (Mat. 2:11) Labay ton ibaga, aliwa lan kapangiyanak si Jesus. Mapatnag sirin ya mas pinili day mansiansia ni ed Betlehem nen say ompawil ed Nazaret.

Ag-abayag, ingganggan nen Herodes ya pateyen so “amin ya ugugaw a lalaki ed Betlehem [ya] mantaon na duara a paleksab.” (Mat. 2:16) Pinasakbayan la na anghel si Jose tan Maria kanian batik irad Ehipto tan nanayam ira diman anggad impatey nen Herodes. Pero agla ra pinmawil ed Betlehem ta abalitaan da ya maruksa so sinmublay ya manuley ditan​—si Arquelao ya anak nen Herodes. Pinasakbayan met na Dios si Jose ya agla ra ompapawil ed Betlehem, kanian dia la rad Nazaret nanayam. Ditan et arawi ed peligro si Jesus, tan sikatoy binmaleg ya inar-aro toy Dios.​—Mat. 2:19-22; 13:55; Luc. 2:39, 52.

Mapatnag ya inatey lay Jose antis ya nilukas so pribilehyo ya wala ray totoon nalanaan ya onlad tawen. No ontan sirin, napaoli si Jose diad dalin. No nagawa la itan, nakaiba tayoy Jose tan natepetan tayo no akin ya nandesisyon ira nen Maria ya manayam ni ed Betlehem kayari na inkiyanak nen Jesus.