1. Antoy labay nen Jehova ya nagawa?

 LABAY nen Jehova ya nipulong so maong a balita na Panarian diad interon mundo. (Mar. 13:10; 1 Tim. 2:3, 4) Kimey iya nen Jehova, tan importante iyan maong ta say mismon Anak to so pinili ton mangidaulo ed saya. Diad panangidaulo nen Jesu-Kristo, seguradon nasumpal so panagpulong a kimey diad paraan ya labay nen Jehova antis ya onsabi so anggaan.—Mat. 24:14.

2. Antoy aralen tayo ed sayan artikulo?

² Aralen tayo ed sayan artikulo no panon ya uusaren nen Jesus so “matoor tan makabat ya aripen” pian mangitaryay espiritual ya naakan tan organisaen iray papatumbok to ed impasyan kimey a panagpulong. (Mat. 24:45) Pantongtongan tayo met no antoy nagawaan na kada sakey ed sikatayo pian nasuportaan tayoy Jesus tan say matoor ya aripen.

3. Anton pakauley odino autoridad so niiter ed si Jesus?

³ Si Jesus ya mismo so mangidadaulo ed panagpulong a kimey. Akin ya segurado tayod satan? Antis ya pinmawil ed tawen si Jesus, sikatoy akibana ed saray matoor ya papatumbok to diad sakey a palandey ed Galilea, tan oniay imbaga tod sikara: “Amin a pakauley ed tawen tan diad dalin et niiter lad siak.” Imanoen no antoy sinmublay ya imbaga to: “Onla kayo sirin tan ibangat yo iray totoo ed amin a nasyon pian magmaliw iran disipulok.” (Mat. 28:18, 19) Nanengneng tayod saya ya kaibad pakauley odino autoridad ya niiter ed si Jesus so pangidaulo ed panagpulong a kimey.

4. Akin et segurado tayo ya idadaulo nen Jesus so panagpulong a kimey anggad natan?

⁴ Imbaga nen Jesus ya say kimey a panagpulong tan panagbangat  et nagawa diad “amin a nasyon” tan insipan to ya tulongan to ray papatumbok to ed sayan kimey ed “amin ya agew anggad kaunoran a parte na sistema na mundo.” (Mat. 28:20) Malinlinew ed saraman ya imbaga to ya tuloytuloy ton idaulo so panagpulong a kimey anggad panaon tayo.

5. Akin et kaiba tayo ed pakakasumpal na samay propesiya ya walad Salmo 110:3?

⁵ Aga nampagaan nen Jesus ya ompan daiset labat so malabay ya onsuporta ed kimey ya panagpulong diad kaunoran a parte na sistema na mundo. Baleg so tiwala to ya ontua iyan propesiya ya nabasa ed Salmo 110:3: “Saray totoom et mabulbulos dan iyapay so inkasikara diad agew a milaban so armadam.” No sakey ka ed saray makulikulin manpupulong natan, kaiba ka ed pakakasumpal na satan ya propesiya tan susuportaan moy Jesus tan say matoor ya aripen. Pero amta tayo ya wala ray subok ed sayan kimey.

6. Anto so sakey ya subok ed pampupulong tayo?

⁶ Say sakey ya subok et dakdakel so onkokontra ed pampupulong tayo. Amayamay so katilaan ya ikakayat na saray apostata, lider na relihyon, tan opisyales na gobierno tungkol ed sikatayo ran Tasi. No maminsan et panisiaan itan na saray kakanayon, kakaaro, tan katrabaho tayo. Kanian ompan kombinsien da tayo ya ontunda tayo lan manpulong tan manlingkor ed si Jehova. Diad arum ya bansa, aatakien, babantaan, aarestoen, tan ipipriso ni ingen iray agagi tayo. Pero agtayo la nabibigla ta oniay impasakbay nen Jesus: “Busolen kayo na amin a nasyon lapud ngaran ko.” (Mat. 24:9) Diad tua, imbaga to ya no busolen itayo na totoo, patunay itan ya walad sikatayoy pabor nen Jehova. (Mat. 5:11, 12) Si Satanas so mansusugsog ed saray onkokontra ed sikatayo. Pero tandaan tayo ya agbalot makakiking si Satanas ed si Jesus! Lapud pangidadaulo nen Jesus ed panagpulong, nipapasabi lay maong a balita ed saray totoo ed amin a bansa. Pantongtongan tayo iray ebidensya ya talagan ontan so nagagawa.

7. Anto ray ebidensya ya nagagawa la natan imay propesiya ed Apocalipsis 14:6, 7?

⁷ Say sakey nin subok ed pampupulong tayo et nandurumay lenguahe na totoo. Pero diad samay pasingawey ya impanengneng nen Jesus ed si apostol Juan, impasakbay nen Jesus ya diad panaon tayo et nipulong so maong a balita diad amin ya lenguahe. (Basaen so Apocalipsis 14:6, 7.) Panon itan ya nagagawa natan? Seseguroen na organisasyon tayo ya anggad posible et naamtaan na amin ya totoo so mensahe na Panarian. Singa bilang, saray base ed Biblian impormasyon ya walad website tayon jw.org et sarag ya basaen na totoo ed interon mundo ta ni-translate itan ed masulok ya 1,000 ya lenguahe! Say libron Panliketan so Bilay ya Anggapoy Anggaan! ya uusaren tayod pamba-Bible study et inaprobaan na Mananguley ya Ulop ya i-translate ed masulok ya 700 a lenguahe! Anggan saray emel tan bulag et napupulongan met ta saray publikasyon tayo et wala lad format ya video tan braille. On, amin iraya et kasumpalan na saray propesiya ed Biblia. Saray totoo ya “nanlapud amin a lenguahe na saray nasyon” et aaralen day “puron lenguahe”—saray katuaan ya walad Biblia. (Zac. 8:23; Sof. 3:9) Nagagawaan tayo irayan amin lapud marundunong ya pangidadaulo nen Jesus-Kristo.

8. Anto ray resulta na pampupulong tayo?

⁸ Natan et masulok lan 8,000,000 ya totoo ed 240 ya bansa so kabiangan na organisasyon nen Jehova, tan kada taon et libo-libo so nababautismoan! Pero walay mas importante nen say karakel na nababautismoan  kada taon. Anto itan? Anguma-uman so bilay na sarayan balon disipulo lapud nansagpotan dan insulong so “balon personalidad.” (Col. 3:8-10) Dakel ed sikara so datin imoral, masebeg, makabansa, tan walay papaboran dan lahi. Nagagawa la imay propesiya ed Isaias 2:4 ya saray lingkor na Dios et ‘agla ra manaral a miguerra.’ Lapud pansasagpotan tayo ya ipanengneng so balon personalidad, nasasagyat iray totoo ya onloob ed organisasyon nen Jehova, tan ipapanengneng tayo ya aaligen tayoy alimbawa na lider tayon si Kristo Jesus. (Juan 13:35; 1 Ped. 2:12) Akin et nagagawaan tayo itan? Lapud iiter nen Jesus so tulong ya kaukolan tayo.

9. Base ed Mateo 24:45-47, antoy impropesiya nen Jesus ya gawaen to diad panaon na anggaan?

⁹ Basaen so Mateo 24:45-47. Impropesiya nen Jesus ya diad panaon na anggaan, walay pilien ton “matoor tan makabat ya aripen” ya mangitarya na espiritual a naakan. Kanian ilaloan tayo ya diad panaon tayo et dakel so gawaen na sayan aripen. Kasin nagagawa la iyan propesiya? On. Walay melag ya grupo na alanaan iran lalaki ya uusaren nen Jesus ya mangitaryay espiritual a “naakan . . . diad dugan panaon” parad saray lingkor na Dios tan saray interesadon manaral na Biblia. Ag-iisipen na sarayan lalaki ya sikara so lider tayo. (2 Cor. 1:24) Imbes, bibidbiren da ya si Jesu-Kristo so “lider tan manuley” na amin ya papatumbok to.—Isa. 55:4.

10. Diad litrato, dinan ed saratan ya libro so akatulong ed sikan mandesisyon ya manlingkor ed si Jehova?

¹⁰ Manlapu nen 1919, angi-publish so matoor ya aripen na nanduruman publikasyon pian nataryaan na espiritual ya naakan iray interesado ya manaral na Biblia. Nen 1921, im-publish na aripen so libron The Harp of God pian naaralan na saray interesado iray  manunan bangat na Biblia. Diad ilalabas na panaon tan lapud panguuman na situasyon, angi-publish so aripen na nanduruma nin libro. Dinan ed sarayan libro so akatulong ed sika pian nakabkabat tan naar-arom si Aman Jehova? Kasin say “Let God Be True,” Say Katuaan a Mangitonton ed Bilay ya Andi Anggaan, Makapambilay Kayo na Ando lan Ando ed Paraiso diad Dalin, Pikakabat a Mangitonton ed Andi-anggaan a Bilay, Anto so Peteg ya Ibabangat na Biblia?, Antoy Ibabangat na Biblia?, odino Panliketan so Bilay ya Anggapoy Anggaan!, say sankabaloan ya libro? Amin irayan publikasyon et im-publish pian natulongan iray totoo ya magmaliw ya papatumbok nen Kristo, tan sineguro na aripen ya epektibo irayan libro diad panaon ya in-release iratan.

11. Akin et kaukolan tayon amin so espiritual ya naakan?

¹¹ Aliwan saray interesado labat so tuloytuloy ya mankaukolan na anawet ya espiritual ya naakan. Kaukolan tayon amin itan. Diad tua, imbaga nen apostol Pablo ya “say anawet a naakan et parad saray matatken la.” Imbaga met nen Pablo ya makatulong itan ya espiritual ya naakan pian ‘nibiig tayoy duga tan aliwa.’ (Heb. 5:14) Diad tua, aliwan mainomay ya unoren iray ganggan tan prinsipyo nen Jehova ta abebbeba lan maong so moralidad na saray totoo natan. Pero seseguroen nen Jesus ya tuloytuloy itayon nataryaan na espiritual ya naakan pian ombiskeg so determinasyon tayon unoren si Jehova. Satan ya naakan et manlalapu ed Salita na Dios, say Biblia. Ipaparaan tan ibubunog itan na matoor ya aripen diad panangidaulo nen Jesus.

12. Singa si Jesus, panon tayon papagalangan so ngaran na Dios?

¹² Singa si Jesus, papagalangan tayo so ngaran na Dios tan labay tayon ipakabat itan ed amin ya totoo. (Juan 17:6, 26) Singa bilang, nen 1931, atawag tayo la ed ngaran ya Saray Tasi nen Jehova. Imbase tayo itan ed Biblia,  tan prueba itan ya importantin maong ed sikatayo so ngaran nen Jehova. (Isa. 43:10-12) Tan manlapu la nen Oktubre 1931, say ngaran na Dios et nanengneng la ed apis na kada isyu na magasin ya Say Panag-bantayan. Sakey ni, diad Balon Mundo a Patalos na Masanton Kasulatan et impawil tayo so ngaran na Dios diad saray bersikulon talagan kawalaan to. On, duma tayon maong ed arum ya relihyon! Ibabaga ra ya Kristiano ira pero inekal day ngaran nen Jehova diad translation na Biblia ra.

13. Antoy akakombinse ed sika ya talagan uusaren nen Jesus so “matoor tan makabat ya aripen” natan? (Juan 6:68)

¹³ Panamegley na “matoor tan makabat ya aripen,” binuo nen Jesus so mabisbiskeg tan makapabilib ya organisasyon ed dalin ya onsusuporta ed dugan panagdayew. Antoy nibagam ed sayan organisasyon? Seguro nibagam met imay imbaga nen apostol Pedro ed si Jesus. Kuan to: “Siopa ni so laen mi? Walad sika iray salita a mangitonton ed bilay ya andi-anggaan.” (Juan 6:68) Isip mo pa no antoy bilay mo natan no agmo aromog so organisasyon nen Jehova. Ayan organisasyon so uusaren nen Kristo pian napakan tan napesel tayo ed espiritual. Ipapasal to tayo met pian magmaliw tayon epektibo ed ministeryo, tan tutulongan toy kada sakey ed sikatayo ya isulong so “balon personalidad” pian napaliket tayoy Jehova.—Efe. 4:24.

14. Legan na COVID-19 pandemic, akin et misatsalamat ka ya parte ka na organisasyon nen Jehova?

¹⁴ Sankanengneng tayo met so panangigiya nen Jesus diad sayan mair-irap ya panaon. Singa bilang, aliklikna tayoy panangasikaso to legan na COVID-19 pandemic. Diad gapo na pandemic, ag-amta na saray totoo no antoy  gawaen da. Pero, sinegurado nen Jesus ya makaawat tayoy malinlinew ya instruksion no antoy gawaen tayo pian ag-itayo naalisan. Impaseseg ya man-face mask tayo tan man-physical distancing. Binilin iray elder ya lanang dan kumustaen iray kakongregasyon da tan seguroen ya niiter so materyal tan espiritual ya pankaukolan da. (Isa. 32:1, 2) Akaawat tayo met na kaaruman iran instruksion tan panamaseseg diad saray update na Mananguley ya Ulop.

15. Legan na pandemic, antoy naawat tayon instruksion tungkol ed pantitipon tan panagpulong tayo, tan antoy resulta?

¹⁵ Legan na pandemic, akaawat tayo met na malinlinew iran instruksion no panon tayon gawaen so aral ed kongregasyon tan no panon tayon manpulong. Mapmaples ya nandesisyon so Mananguley ya Ulop ya videoconference la so aral, asemblea, tan kombension tayo. Inaral tayo met so man-letter writing tan man-telephone witnessing pian makapanpulong tayo, tan benendisyonan nen Jehova so amin ya sagpot tayo. In-report na dakel ya branch office ya dinmakel laingen so publisher ed teritorya da. Diad tua, dakdakel so balibalin eksperiensya na saray agagi legan na pandemic.—Nengnengen so kahon ya “ Bebendisyonan nen Jehova so Pampupulong Tayo.”

16. Makaseguro tayo ed anto?

¹⁶ Ompan inisip na arum ya masyadon istrikto iray instruksion ya inter na organisasyon legan na pandemic. Pero anengneng tayo ya duga iratan tan parad pankaabigan tayo lanlamang. (Mat. 11:19) No isipen tayon maong so maar-aron pangaasikaso tan pangidadaulo nen Jesus ed sikatayo, ombiskeg so tiwala tayo ya anggan antoy nagawa, ag-itayon balot paulyanan nen Aman Jehova tan say inar-aro ton Anak.—Basaen so Hebreo 13:5, 6.

17. Antoy naliliknam no iisipen mo ya si Jesus so Lider tayo?

¹⁷ Malikeliket tayo ta si Jesus so Lider tayo! Anggano nandurumay kultura, bansa, tan lenguahe tayo, walay pankakasakey ed organisasyon tayo. Papakanen itayo nen Jesus ed espiritual, ipapasal to tayo pian magmaliw tayon epektibo ed panagpulong, tutulongan toy kada sakey ed sikatayo pian naisulong tayo so balon personalidad, tan ibabangat to itayo ya aroen so sakey tan sakey. On, misatsalamat tan proud tayo ed Lider tayon si Jesus!