1. Akin et kaukolan tayoy manparaan parad panamasegsegang?

DIAD samay labi antis ya pateyen so Katawan tayon Jesus, imbaga to ya amin ya malabay a magmaliw a disipulo to et busolen na sayan mundo. (Juan 17:14) Anggan diad panaon tayo, saray matoor ya Tasi nen Jehova et papasegsegangen na saray kontra ed dugan panagdayew. (2 Tim. 3:12) Legan ya manasingger so anggaan na sayan sistema na mundo, ilaloan tayo ya lalo itayon sumpaen na saray mamubusol ed sikatayo.​—Mat. 24:9.

2-3. (a) Antoy nepeg tayon tandaan nipaakar ed takot? (b) Anto ray aralen tayo ed sayan artikulo?

² Antoy nepeg tayon gawaen pian natan ni labat et niparaan tayo lay sarili tayo parad panamasegsegang? Agtayo nepeg ya isipen so amin ya posiblin nagawa ed sikatayo. Ta no ontan so gawaen tayo, nayarin ontakot tan napagaan itayo laingen, ya lapud satan et ompan ontunda tayo lan manlingkor ed si Jehova anggano anggapo ni panamasegsegang ya naeeksperiensya tayo. (Pro. 12:25; 17:22) Nepeg tayon tandaan ya say takot et uusaren na ‘kabusol tayo, say Diablo,’ pian natalo to tayo. (1 Ped. 5:8, 9) Anto ray sarag tayon gawaen natan pian napabiskeg tayoy sarili tayo?

³ Diad sayan artikulo, aralen tayo no panon tayon napabiskeg so relasyon tayo ed si Jehova tan no akin ya importantin gawaen tayo la itan natan. Aralen tayo met no anto ray gawaen tayo pian magmaliw tayon mas makpel. Insan tayo pantongtongan no antoy gawaen tayo sano busolen itayo na totoo.

4. Base ed Hebreo 13:5, 6, nepeg ya kombinsido tayo ed anto, tan akin?

⁴ Nepeg ya kombinsido ka ya inar-aro ka nen Jehova tan agto kan balot paulyanan. (Basaen so Hebreo 13:5, 6.) Dakel ya  taon lay apalabas, oniay imbaga na Say Panagbantayan: “Say too ya kabkabat to so Dios et manmamatalek ed sikato sano nasusubok.” Tua itan. Pian nasungdoan tayo so panamasegsegang, nepeg ya talagan aroen tan panmatalekan tayoy Jehova, tan agtayon balot panduaruwaan ya inar-aro to tayo.​—Mat. 22:36-38; Sant. 5:11.

5. Antoy makatulong ed sika pian naliknam ya inar-aro ka nen Jehova?

⁵ Basam ya inagew-agew so Biblia ya say gagalam et pian lalo kan onapit ed si Jehova. (Sant. 4:8) No manbabasa ka, manpokus ka ed saray balibalin kualidad nen Jehova. Legan mon babasaen iray ibabaga tan gagawaen to, imanom no panon kabaleg so panangaro to. (Exo. 34:6) Say arum et nayarin mairap dan panisiaan ya inaro ira na Dios ta agda nin balot naeksperiensya ya walay angaro ed sikara. No ontan so naliliknam, marakep no kada agew et ilistam iray ginawa nen Jehova ya impanengneng toy panangasi tan kaabigan to ed sika. (Sal. 78:38, 39; Roma 8:32) Legan mon nononoten iray mismon eksperiensyam tan dadalepdepen iray nababasam ed Salita na Dios, seguradon dakel so nilistam ya ginawa nen Jehova parad sika. No lanang mon aapresyaen iray gagawaen nen Jehova, mas ombiskeg so relasyon mo ed sikato.​—Sal. 116:1, 2.

6. Base ed Salmo 94:17-19, panon ya makatulong ed sika so impapuson pikakasi?

⁶ Manpikasi kan lanang. Imadyin mo pay sakey ya ugaw a laki ya sankalakap na maaron tatay to. Maligen so liknaan to kanian labalabay ton istoryaen ed si tatay to iray balibali tan aliwliwan agawa ed sikato diad saman ya agew. Sarag mo met so nawalaan na ontan ya relasyon ed si Jehova no manpikasi kan impapuso ed sikato diad kada agew. (Basaen so Salmo 94:17-19.) Legan kan manpipikasi ed si Jehova, “ikalbom a singa danum so amin a walad pusom” tan ibagam ed maaron Amam so amin ya pakakatakotan tan pakakaaburidoan mo. (Tag. 2:19) Antoy magmaliw ya epekto na satan ed sika? Naliknam imay ibabaga na Biblia ya “kareenan na Dios a palumbasan toy amin a pakatalos.” (Fil. 4:6, 7) No ontan so pampikasim, mas lalo kan onapit ed si Jehova.​—Roma 8:38, 39.

7. Akin et nepeg ya kombinsido ka ya talagan nagawa iray sipan na Dios nipaakar ed Panarian to?

⁷ Nepeg ya kombinsido ka ya talagan nagawa iray bendisyon na Panarian na Dios. (Num. 23:19) No makapuy so pananisiam ed saray sipan nipaakar ed Panarian, main-inomay kan nataktakot nen Satanas tan saray alipores to. (Pro. 24:10; Heb. 2:15) Panon mon napabiskeg so pananisiam ed Panarian na Dios? Diad personal ya panagaral mo et aral mo ray sipan na Dios nipaakar ed Panarian to tan saray rason no akin ya makaseguro ka ya talagan nagawa iratan. Panon itan ya makatulong? Imanoen so alimbawa nen Stanley Jones, ya pitoy taon ya nipriso lapud pananisia to. Antoy akatulong ed  sikato pian matoor ya makapansungdo? Imbaga to: “Mabiskeg so pananisiak lapud amtak so nipaakar ed panarian na Dios, segurado ak ed satan, tan agkon balot nanduaruwaan itan. Kanian anggapoy makapanpatunda ed siak ed panaglingkor kod si Jehova.” No mabiskeg so pananisiam ed saray sipan na Dios, mas onapit ka ed si Jehova tan agka nadaeg na takot.​—Pro. 3:25, 26.

8. Antoy napatnagan ed panmoria tayo ed saray pantitipon? Ipaliwawa.

⁸ Regular mon atendian iray Kristianon pantitipon. Ontulong iray pantitipon pian mas onapit tayo ed si Jehova. Napatnagan ed panmoria tayo natan ed saray pantitipon no kasin nasungdoan tayo so panamasegsegang diad arapen. (Heb. 10:24, 25) Akin ey? No natan ni labat et agtayo la onatendi ed saray pantitipon lapud ataptapew iran rason, panon to la kasi diad arapen no kaukolan ya ipeligro tayoy sarili tayo pian makapilimog tayo ed saray agagi? Balet no natan ni labat et determinado tayon onatendi ed saray pantitipon, ag-itayo napatunda na saray onsusumpad sikatayo no sebelan da tayo. Kanian aralen tayon pablien iray pantitipon tayo. No importante iratan ed sikatayo, unoren tayo so Dios imbes ya saray totoo anggano walay panamasegsegang odino sebelan itayo na gobierno.​—Gawa 5:29.

9. Akin et makatulong so pangipatlep na saray teksto pian makapanparaan tayo parad panamasegsegang?

⁹ Ipatlep mo ray paboritom ya teksto. (Mat. 13:52) Anggano aliwan perpekto so memoryam, sarag nen Jehova ya usaren so makapanyarin masanton espiritu to pian ipanonot ed sika iratan ya teksto. (Juan 14:26) Imanoen so imbaga na sakey ya brother ya nipriso ed bartolina diad East Germany: “Maong labat ta diad saman et pigan lasus la ya teksto so nipatlep ko! Kanian anggano bukbukor ko, dakel so dadalepdepen ko ya walad Biblia.” Akatulong iraman ya teksto pian mansiansian maapit ed si Jehova iyan brother tan matoor ya makapansungdo.

10. Akin et nepeg tayon ipatlep iray kansion na panangidayew ed si Jehova?

¹⁰ Ipatlep mo tan kansion mo iray kansion na panangidayew ed si Jehova. Nen impriso si Pablo tan Silas diad Filipos, angansion ira na saray nipatlep dan kansion na panangidayew ed si Jehova. (Gawa 16:25) Ontan met so ginawa na saray agagi tayo ed datin Soviet Union pian napabiskeg day sarili da sanen nibantak ira diad Siberia. Oniay nanonotan nen Sister Mariya Fedun: “Kinansion mi so amin ya kansion ed  songbook ya amta mi.” Imbaga to ya apaseseg iran amin ed saraman ya kansion tan akatulong iraman pian nalikna ran maap-apit ira ed si Jehova. Kasin ombibiskeg met so liknaan mo no kakansionen mo ray paboritom ya kansion na panangidayew ed si Jehova? Ipatlep mo la sirin iratan natan!​—Nengnengen so kahon ya “ Tulongan Mo Ak ya Manpakpel.”

11-12. (a) Base ed 1 Samuel 17:37, 45-47, akin et makpel si David? (b) Anton importantin leksion so naaralan tayo ed alimbawa nen David?

¹¹ Pian sarag mon arapen so panamasegsegang, kaukolan moy pakpel. No pakaliknam et aliwa kan makpel, antoy gawaen mo? Tandaan ya say tuan pakpel et ag-akadepende ed kabaleg, biskeg, odino abilidad mo. Imanoen so alimbawa nen David nen inmarap ed si Goliat. No ikomparad satan ya higante, si David et melmelag, makapuy, tan palsot labat so armas to. Anggapo pati espada to. Balet agaylay pakpel to! Binmatik ni ingen si David pian labanan iyan malastog ya higante.

¹² Akin et makmakpel si David? Sikatoy talagan kombinsido ya kaiba to si Jehova. (Basaen so 1 Samuel 17:37, 45-47.) Agninonot nen David no panon kabaleg si Goliat kompara ed sikato. Say ninonot to et no panon kamelag si Goliat kompara ed si Jehova. Antoy naaralan tayo ed sayan salaysay? Magmaliw tayon makpel no kombinsido tayo ya kaiba tayo si Jehova, tan no nonoten tayo ya melmelag iray onsusumpa ed sikatayo kompara ed Makapanyarin-amin a Dios. (2 Awa. 20:15; Sal. 16:8) Antoy gawaen tayo natan pian magmaliw tayon mas makpel antis nin onsabi so panamasegsegang?

13. Antoy gawaen tayo pian magmaliw tayon mas makpel? Ipaliwawa.

¹³ Magmaliw tayon mas makpel no ipulong tayo so maong a balita na Panarian na Dios. Akin ey? No manpupulong itayo, naaralan tayoy manmatalek ed si Jehova, tan agtayo ontakot ed too. (Pro. 29:25) No panon ya magmamaliw ya mas mabiskeg iray muscle na laman tayo no mani-ehersisyo tayo, magmaliw tayo met ya mas makpel no manpupulong tayo ed kaabungan, diad publiko iran lugar, diad impormal ya paraan, tan diad pasen na negosyo. No natan ni labat et makpel tayo lan manpulong, akaparaan tayon mantultuloy ya manpulong anggano sebelan na gobierno so kimey tayo.​—1 Tes. 2:1, 2.

14-15. Anto ray naaralan tayo ed si Nancy Yuen tan Valentina Garnovskaya?

 ¹⁴ Dakel so naaralan tayo ed alimbawa na duaran matoor ya sister ya angipanengneng na makapadinayew ya pakpel. Si Nancy Yuen et manga 1.5 metro labat so kaatagey to, balet agmainomay ya napagyaw. * Agto labay ya itunda so pampupulong to na maong a balita na Panarian, kanian sikatoy nipriso na masulok a 20 taon diad China. Imbaga na saramay opisyal ya amagyaw ed si Nancy Yuen ya sikato so “sankabengeran ya too” diad bansa ra.

¹⁵ Ontan met so agawa ed si Valentina Garnovskaya ya amitlon nipriso ed loob na 21 taon diad datin Soviet Union. * Akin et apriso? Sikatoy determinadon ag-ontunda ya manpulong kanian imbaga na saray opisyal ya sikatoy “talagan mapeligro ya kriminal.” Akin et makmakpel irayan duaran sister? Kombinsido ira ya kaiba da si Jehova.

16. Antoy nepeg tayon tandaan pian magmaliw tayon makmakpel?

¹⁶ Singa apantongtongan tayo la, pian magmaliw tayon mas makpel, agtayo nepeg ya manmatalek ed sarili tayon biskeg tan abilidad. Imbes, nepeg ya kombinsido tayo ya kaiba tayoy Jehova tan sikato so milalaban parad sikatayo. (Deu. 1:29, 30; Zac. 4:6) Nepeg tayon tandaan itan pian magmaliw tayon makmakpel.

17-18. Singa nabasa ed Juan 15:18-21, antoy impasakbay nen Jesus ed saray Kristiano, tan akin?

¹⁷ Maliket tayo no rerespetoen itayo na arum, balet say liket tayo et ag-akadepende ed no kasin labay itayo na totoo odino andi. Imbaga nen Jesus: “Maliket kayo no busolen kayo na totoo, tan no ipulisay da kayo tan balbalawen da kayo tan pagpaugesen day ngaran yo nisengeg ed Anak na too.” (Luc. 6:22) Antoy labay ya ibaga nen Jesus?

¹⁸ Aglabay ya ibaga nen Jesus ya manliket tayo no busolen itayo na totoo. Imbes, ibabaga to no antoy nagawa ed saray Kristiano. Ag-itayo  kabiangan na mundo. Uunoren tayo iray bangat nen Jesus tan ipupulong tayo so mensahe ya impulong to. Kanian bubusolen itayo na mundo. (Basaen so Juan 15:18-21.) Labay tayon paliketen si Jehova. No busolen itayo na totoo lapud inaro tayo so Ama tayo ed tawen, problema da la ’tan.

19. Panon tayoy naalig so alimbawa na saray apostol?

¹⁹ Agmon balot ibabaing ya sakey kan Tasi nen Jehova lapu labat ed ibabaga o gagawaen na saray totoo. (Miq. 4:5) Nalabanan tayoy takot ed too no nonoten tayoy alimbawa ya impanengneng na saray apostol ed Jerusalem ag-abayag kayari na impamatey ed si Jesus. Amta da ya kabkabusol ira na saray Judion lider na relihyon. (Gawa 5:17, 18, 27, 28) Balet kada agew et ag-ira tinmundan linmad templo, tan lapud pampupulong da et impaamta ra ya disipulo ira nen Jesus. (Gawa 5:42) Ag-ira tinmakot. Nalabanan tayo met so takot ed too no ipapaamta tayod arum ya sakey tayon Tasi nen Jehova​—diad trabaho, eskuelaan, tan diad lugar ya panaayaman tayo.​—Gawa 4:29; Roma 1:16.

20. Akin et maliket iray apostol anggano binusol ira na totoo?

²⁰ Akin et maliket iray apostol? Amta ra so rason no akin ya bubusolen ira na totoo, tan ipapasen dan pribilehyo so napabanday lapud panggagawa ra ed linawa nen Jehova. (Luc. 6:23; Gawa 5:41) Oniay insulat nen apostol Pedro: “Anggano kaukolan yoy manirap nisengeg ed inkatunong, maliket kayo.” (1 Ped. 2:19-21; 3:14) No natatalosan tayo ya bubusolen itayo na totoo lapud gagawaen tayo so duga, agtayo ontundan manlingkor ed si Jehova anggano busolen da itayo.

21-22. (a) Antoy iisipen mon gawaen pian makapanparaan ka parad panamasegsegang? (b) Antoy aralen tayo ed onsublay ya artikulo?

²¹ Agtayo amta no kapigan onsabi so graben panamasegsegang odino no kapigan isebel na gobierno so panagdayew tayod si Jehova. Balet, amta tayo ya makapanparaan tayo la natan no pabiskegen tayoy relasyon tayod si Jehova, no manggawa tayoy paraan pian magmaliw tayon mas makpel, tan no aralen tayo ray nepeg ya gawaen no busolen itayo na totoo. No manparaan tayo la natan, makatulong itan ed sikatayo ya manmatoor diad arapen.

²² Balet panon to no sebelan la na gobierno so panagdayew tayo? Aralen tayo ed onsublay ya artikulo iray prinsipyo ya makatulong pian mantultuloy itayon manlingkor ed si Jehova anggano walay pananebel.